Jaceuq 111 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Huiq-eu Gar Mr-eu Miqyaer-anr Jaceuq-eu

¹ Haleluya! Dawrcoeni ghae-eu deuq uiqlar taq-awr jawr-eu tsawrhaq baqmaf-euq ghanrcae; Ngaq-euq nuima dawqtawvluf, Ya’we Miqyaer-anr jaceuq ma.

² Ya’we Miqyaer nae mr-euq gardeuq-aq, huiq-awr manr-eu mae. Khoer-anr nuikhanr shir-eu tsawrhaq dawqtawvluf dzawsawx mr-eu mae.

³ Aqyawf nae mr-euq gar-aq, Yawshaef khanqsaer huiq-awr taqhuiq taqmanr paq-aer ghae-eu mae. Aqyawf-euq tsaq-awr dawr-eu jeq, mqmaq maqbyav yarzir zif-eu mae.

⁴ Aqyawf, aqyawf-euq zanqler paq-aer ghae-eu gardeuq-anr bi noeqtaq-eu gharduq mr-euq mae. Ya’we Miqyaer-aq, guiqlanq yawdzanr, Hawr-eu ghawqshaq gaq-eu jeq byan-eu mae.

⁵ Aqyawf, aqyawf-anr guv-eu deuq-anr dzaqdzaq dawrdawr bif-awr; Aqyawf, tiqjawr-iq aqyawf-euq dawqma sarjax-anr maqngaer-a.

⁶ Miqyaer, aqyawf-euq tsawrhaq-anr aqcawq tsawrjeuq-euq jeqbir bifnaeq ma laer, Baoq nae gar mr-euq garkawv aqyawf-euq tsawrhaq-anr dawqdzawr mrnaeq taq-euq mae.

⁷ Aqyawf-euq aqlaf nae mr-euq deuq-aq, ngeur-awr, dawr-awr tsaq-eu mae. Aqyawf-euq maeqdawq-aq, yawduq baw-eu mae.

⁸ Heudeuq-aq, yawtsaq yawdawr-euq lafkhoer dawrcoeni mr-euq mirnae, Arsaq saq-awr li-eu maqbawni zif-eu mae.

⁹ Aqyawf, aqyawf-euq tsawrhaq-anr kakhof-eu arpoeq bifghae lef-awr; Aqyawf-euq dawqma sarjax mqmaq maqbyav yarzir zifni dawq biftaq-euq mae. Aqyawf-euq tsawrmyanr-aq, yawzeu bawlar paq-aer ghae-awr yawshawr mae.

¹⁰ Ya’we Miqyaer-anr guv-eu jeq-aq, zaqsiq tsawrganr-euq ardanq baeduq mae. Aqyawf-euq zanrdawq khofdawq-anr khar mrcaw-eu tsawrhaq deuq-aq, Yawmuiq-aer ghovshaw nya-eu tsawrhaq mae. Aqyawf-anr jaceuq-eu jeq mqmaq maqbyav yarzir gmq taef-a.