Jaceuq 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer-anr Ghoe-eu

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ngar, Ya’we Miqyaer-euq lafkhoer caevzaf ma. Nawr, ngaq-anr heulof-aer aqjox-aer aernya-eu le: “Arjir lof-aer, nawq-euq gawqjawq paw zawbyov lef-awq.

² Aqjeq mirnae aernar-aq, hawsher-eq, tsawrcawv deuq kav ngofdav taq-awr, Aqyawfmaf, yawzaf-anr jawr-awr nae Dawrcoeni daef-eu tsawrhaq-euq nuima-anr beuv-eu laer, Kavmyaq kav-euq cavpi-anr yurdav-awr laeqhmq taq-euq mae.

³ Dawqpaeq duqpur bi lavcawv-euq nar-aq, Tsaq-awr dawr-eu tsawrhaq aqjeq par janrnya-eu?”

⁴ Ya’we Miqyaer-aq, aqyawf-euq shawr-eu uqduq tanqnymr nymrma-euq lafkhoer jawrluf-eu mae. Ya’we Miqyaer-euq nuirmanq-aq, mqtav mirkhanq-anr jav-awr, Aqyawf-euq myavnuiv hawluf-eu lafkhoer, Aqyawf-euq myavnuiv khovtaev tsawrhaq-euq zaqyo-anr tsermr luf-eu mae.

⁵ Ya’we Miqyaer, tsaq-awr dawr-eu tsawrhaq-anr tsermr-eu mae. Aerkhawf, coeqler deuqler-eu jeq-anr gaq-eu tsawrhaq hawr-eu tsawrcawv-anr-aq, Aqyawf-euq nuima saflar byae duidui-eu mae.

⁶ Aqyawf, tsawrcawv-euq khoertav miqdzaq miqdziv hawr-eu, Miqdzaq dof-eu miqdzar dzarshuir tanqdav lef-awr, Puivdzaqlar paq-aer lanr-eu jaqlaer bi bawlef taef-a. Heudeuq-aq, aqyawf maf-anr of-eu shaqbymr-euq khmqmaq pyeuf taef-a.

⁷ Aqjeq mirnae aernar-aq, Ya’we Miqyaer-aq, tsaq-awr dawr-awr, aqyawf-aq, tsaq-awr dawr-eu jeq-anr gaq-eu mae. Dawrcoeni daef-eu tsawrhaq, aqyawf-euq myavpyawq-anr ya’mawr taef-a.