Jaceuq 109 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Muirlar-eu Deuq-anr Darnaeq-awq

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ngar jaceuq-eu Miqyaer-or! Ciqcurni taq jawrbyov naeqlaf.

² Aqjeq mirnae aernar-aq, tsawrcawv hawr-eu jaqmyawf maershuir deuq, Khaqmae mrnga-awr, ngaq-anr caelar-eu mae. Aqyawfmaf, jaqmyawf myawf-eu maeqlar nae, Ngaq-anr dawqdoer ngaeq-eu mae.

³ Aqyawfmaf, ngaq-anr byae-eu dawq, ngaq-euq tiqjawq jabyan taq-awr; Tiqjeq-iq maqngeur-eu gar, ngaq-anr caelar luf-eu mae.

⁴ Ngar, aqyawf maf-anr gaq naeq-euq khawf, Aqyawfmaf, ngaq-anr iqbax taq-eu mae. Aerkhawf, ngar-aq, guiqlanq sharluf-eu ma.

⁵ Aqyawfmaf, ngaq nae yawmuiq jeq mr-euq gar yawdoer jeq mrkhof naeqlaf-awr, Ngaq nae gaq naeq-euq jeq-anr, byae-eu jeq bifkhof naeqlaf-euq mae.

⁶ Aqyawf-euq khoertav zuiv-eu tsawrcawv tiq ghaq bi dovlar-awr; Aqyawf-anr iqbax taq-eu, aqyawf-euq armar paw tiq ghaq bi yawflar-awq.

⁷ Aqyawf-anr yarkhaqdar ngae, Aqyawf yawlaeq nga laer darnaeq-awr; Aqyawf-euq guiqlanq shardawq-aq, iqbax bi pyeuflar-awq.

⁸ Aqyawf-euq arnan aryamq bi nymrle-awr; Aqyawf-euq ardeuv artiv-anr, aqcawq nae biyur-awq.

⁹ Aqyawf-euq zaqdeuq, aqda maqbaw-eu zaq bipyeuf-ir-awr; Aqyawf-euq miqzaq-aq, miqcoeq miqma bipyeuf-ir-awq.

¹⁰ Aqyawf-euq zaqdeuq doedoe ghagha-aer hawqshar sharshar-aer bican-awr; Tiqjeq-iq maqjav-eu yawqha-euq jawrduq-anr dzaqdzaq dawrdawr povpov-aer bishaq luf-ur.

¹¹ Aqyawf, dzirdzov dav-eu tsawrhaq nae, aqyawf kharjav-eu jeq bi yurjir-awr; Boermiq siqkhaq deuq, aqyawf-euq ghaq nae mrdov taq-euq jeq-anr yurgeufjir luf-ur.

¹² Aqyawf-anr ghawqshaq gaqnaeq-eu tsawrhaq tiqghaq-iq maqbi jawr-aer; Aqda maqbaw-eu aqyawf-euq zaqdeuq-anr, Ngaeqghae-eu ghaq maqjawrni bi shaqluf-ur.

¹³ Aqyawf-euq zaqdeuq uvdeuq bicuv-ir-awr, nanqzir keuvle ngae, Aqyawf maf-euq tsawrmyanr byovtsaev luf-ur.

¹⁴ Aqyawf-euq aqpoeq aqbawr deuq-euq yawlaeq yawca-anr, Ya’we Miqyaer noeqtaq-awr; Aqyawf-euq aqma-euq iqbax-anr maq sivbyovni bijav luf-ur.

¹⁵ Heudeuq aqmyanluf, Ya’we Miqyaer-euq maeqshi jav-eu mirnae; Miqyaer, aqyawf maf-anr maqbi noeqkeuvni, mirtsaq-anr nae deuvtsaevdzae naeq luf-ur.

¹⁶ Aqjeq mirnae aernar-aq, aqyawf ghawqshaq gaq-eu ngaer-awr, Irshaqzaq hawr-eu shaqzaq zanqzaq-anr khaeqnaeq khavnaeq-awr; Nuima tsawqpav taq-euq tsawrhaq-anr khawf saef-euq mae.

¹⁷ Aqyawf, yaqkhaer yaq-eu gar gaq-eu lof-aer, yaqkhaer yaq-eu gar bidaq-awr; Aqyawf, guiqlanq janr-eu laqkhaq maqcaer-eu lof-aer, Aqyawf-anr nae guiqlanq bikaq-ir luf-ur.

¹⁸ Aqyawf maeqtsoeq dm-eu lof-aer, Yaqkhaer yaq-eu jeq dmtsanq taq-euq mae. Khoermirnae, yaqkhaer yaq-eu jeq ircuf nyif-ir-eu lof-aer aqyawf-euq mawrdo-anr nyif-ir-awr, Tsir nyif-ir-eu lof-aer aqyawf-euq shaqyoeq-anr nyif-ir luf-ur.

¹⁹ Aqyawf maeqtsoeq dmghoeq-eu lof-aer yaqkhaer yaq-eu jeq bidm-awr; Aqyawf, aqmyanluf jofpaf paf-eu lof-aer bi lanrtaeqtaq luf-ur.

²⁰ Ngaq-anr yawdoer jeq ngaeq-eu deuq hawr-eu ngaq-anr iqbax taq-eu deuq-anr, Ya’we Miqyaer, mrpoeq lafsawq janrkhofnaeq luf-ur.

²¹ Aerkhawf, Sanqpaq Miqyaer pyeuf-eu Ya’we Miqyaer-or! Nawq-euq tsawrmyanr-anr tsaqni, ngaq-anr janrnaeq laf-awq. Nawq-euq ghawqshaq gaq-eu jeq muiq-eu mirnae, ngaq-anr bibuq-ir naeqlaf-awq.

²² Aqjeq mirnae aernar-aq, Ngar-aq, lafkhoer paw nuima bi lavnar taq-euq, irshaq shaq-eu shaqzaq zanqzaq ma.

²³ Ngar-aq, arnan jirle-eu naeq-aer, narshmr lof-aer byov-ir luf-awr; Ngar-aq, nyaevbanr lof-aer bi juifdzae ghaeluf mir-a.

²⁴ Hawqmaef dzanq-eu mirnae, Ngaq-euq aqkuir pawqtsuif ghaq baqlar-awr; Ngaq-euq shiqshaq shaqtsur maqanr-eu mirnae, ghaq byaevluf mir-a.

²⁵ Ngar-aq, aqcawq-euq ngaeqdoerduq khawf pyeuflar-awr; Aqyawfmaf, ngaq-anr hawmawr ngae, aqyawf maf-euq uqduq zeuv-eu mae.

²⁶ Ngaq-euq Miqyaer pyeuf-eu Ya’we Miqyaer-or! Ngaq-anr cawba naeqlaf-awq. Nawq-euq ghawqshaq gaq-eu jeq-euq baqda’nae, ngaq-anr bibuq-ir naeqlaf-awq.

²⁷ Heu-aq, nawq-euq aqlaf nae mr-euq ngar-a laer, aqyawf maf-anr bi siqnya-awr; Ya’we Miqyaer, nawq nae heujeq mr-euq ngar-a laer bi siqler-awq.

²⁸ Aqyawfmaf, yaqkhaer yaq-eu khawf, nawr guiqlanq bifnaeq laf-awr; Aqyawfmaf turlar ngae, aqyawfmaf bi shafdawr-ir-awr; Nawq-euq kuirlaf zaqkhav-anr-aq, laqkhaq bicaer-awq.

²⁹ Ngaq-anr iqbax taq-eu deuq-anr daqga-eu jeq bidm-awr; Aqyawfmaf paerkhanq paerma dm-eu lof-aer, Yawqha-euq shafdawr-eu jeq nae tsanrkaq luf-ur.

³⁰ Ngar, ngaq-euq khaqmae nae, Ya’we Miqyaer-anr yawkhav-aer jaceuq ma. Ngar, tsawrhaq baqmaf-euq ghanrcae, aqyawf-anr jaceuq ma.

³¹ Aqjeq mirnae aernar-aq, aqyawf, shaqzaq zanqzaq-euq armar paw yawf-awr; Aqyawf, laeq nga laer yarkhaq dartsaev-eu deuq-anr nae, Aqyawf-anr bibuq-ir-eu mae.