Jaceuq 108 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Bi Ghaqler Naeqlaf-eu Miqyaer-anr Jaceuq-eu

Daqbir-euq dawqcar cardawq

¹ Miqyaer-or! Ngaq-euq nuima zifdanni jav-eu ma. Ngaq-euq nuima saflar nae car-awr jaceuq ma.

² Deur-mq hawr-eu bawqlaw-or! Noeqlar-awq! Ngar uqbya byataw-anr lavnoeq ma.

³ Ya’we Miqyaer-or! Ngar, tsawrhaqzaq-euq ghanrcae, nawq-anr jaceuq ma. Ngar car-awr tsawrjeuq tsawrca deuq-euq ghanrcae, nawq-anr jaceuq ma.

⁴ Aqjeq mirnae aernar-aq, Nawq-euq ghawqshaq gaq-eu jeq-aq, mq taf-aer huiqdzaeq-awr; Nawq-euq yawtsaq yawdawr-aq, mqdmr-anr tuvler-eu mae.

⁵ Miqyaer-or! Mq taf-aer nawq-anr ciqpoeq ciqgor-awr; Mirtsaq tanqkhawr dawqtawv luf-euq navmaqtser, Nawq-euq yawshaef khanqsaer huiq luf-ur.

⁶ Nawr gaq-eu tsawrhaq yabuq-ir ni, ngaq-anr narhaq naeqlaf-awr; Nawq-euq armar laf nae kakhof naeqlaf-awq.

⁷ Miqyaer, aqyawf-euq shawr-eu jawrduq-anr jawr-awr heulof-aer aer-eu mae. “Ngar, laqkhaq tiqcaer Sheqkmq daeqbir naeq-awr, Surkov ghaqlawq dardza dza-awr birnaeq ma.

⁸ Girlav-aq ngaq-euq ma. Maqnarseq khawf ngaq-euq ma. Erpaqleq-aq, ngaq-euq uqduq-euq gharduq khovkaq-eu shmr uqkhov pyeuf-awr; Yurdav-aq, ngaq-euq zanrdawq bif-eu ghaq pyeuf-eu ma.

⁹ Aerkhawf, Mawrbav-aq, ngar dzuifshawr-eu oeqlanq pyeuf-awr; Eqdoq-aq, ngaq-euq saeqnawv dzaetaq-awr; Ngar, Pirlirtiv-anr ghaqler ma.”

¹⁰ Ngaq-anr aqsur ghaq zifdanni ghae-eu meuq-anr sheuqghae naeqlaf nmr-mq? Ngaq-anr aqsur ghaq Eqdoq-anr sheuqghae naeqlaf nmr-mq?

¹¹ Miqyaer-or! Nga’maf-anr taedzae naeqlaf-euq ghaq, nawr maqngeur lor? Miqyaer-or! Nawr, nga’maf-euq guirmaf naeq-aer maqpar irnaeq laf-euq maqngeur laq?

¹² Nga’maf gardzaq garkawv jav-eu gar cawba naeqlaf-awq. Aqjeq mirnae aernar-aq, tsawrhaq nae cawba-euq-aq, tiqjeq-iq gardanr maqtsoeq-a.

¹³ Miqyaer-euq baqda’nae, aqdui ghaqler ma. Aqjeq mirnae aernar-aq, Aqyawf, aqdui-anr muir-eu deuq-anr nawqlan ghaenaeq taef-a.