Jaceuq 107 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

JACEUQ-EU SANQBOF NGAQ PAV TIQPAV: Jaceuq-eu 107-150 Bibuq-ir-eu Miqyaer-anr Jaceuq-eu

¹ Ya’we Miqyaer-euq guiqlanq-anr jaceuq-awq. Aqjeq mirnae aernar-aq, aqyawf-aq yawmuiq mae. Aqyawf-euq ghawqshaq gaq-eu jeq mqmaq maqbyav yarzir zif-eu mae.

² Muir-eu ghaq-euq aqlaf-anr nae, Miqyaer nae bi kakhof-euq tsawrhaq, Ya’we Miqyaer-euq kakhof-eu jeq za-euq tsawrhaq ngaeqdov lef-awq.

³ Aqyawf nae kuruiq-euq tsawrhaq-aq, mirtsaq doeni jawr-awr; Nanrma dovkhaeq paw, gakhaeq paw hawr-eu guikhaeq paw, nyakhaeq paw khawf jawr-eu mae.

⁴ Aqyawfmaf, tiqjeq-iq maqjav-eu bawrtsanq bawrdanr-euq garma-anr doedoe ghagha-aer can-euq khawf; Aqyawfmaf, jawrnya-eu meuq maq povmawr nya-aq.

⁵ Aqyawf maf-euq nuima saflar ghaqbaq baq-ir-awr, hawq maef-awr ircuf maef-euq mae.

⁶ Aqyawfmaf gardzaq garkawv jav-awr, Ya’we Miqyaer-anr gurgaq ngae; Aqyawf, aqyawf maf-anr shaqzanq naf-eu gar nae bibuq-ir-euq mae.

⁷ Aqyawfmaf meuq tiq meuq-anr jawrduq za’ni ir-eu gharduq; Aqyawf, aqyawf maf-anr tsaq-eu garma-anr nae sheuqghae naeq-euq mae.

⁸ Ya’we Miqyaer-aq, muiq-awr tsawrhaqzaq-euq gharduq, Zanqler paq-aer ghae-eu gardeuq mr-euq mirnae; Tsawrhaqzaq, aqyawf-euq guiqlanq-anr jaceuq-eu tsaq mae.

⁹ Aqjeq mirnae aernar-aq, aqyawf geufmawf-eu nuima saflar nuikhanr bishir-awr; Maef-eu nuima saflar-anr yawmuiq jeq bi dzaqdaev-eu mae.

¹⁰ Shir-eu jeq-euq narshmr-euq uqmov hawr-eu yawzanr-euq lafkhoer nuirluf-eu deuq, Shaqzanq hawr-eu shmrcav nae bi paftawf taq-euq mae.

¹¹ Aqyawfmaf, gor duidui-eu ghaq-euq maeqbawq-anr hawdoer-awr, Miqyaer-euq dawq-anr puiq-euq mirnae, khoerlof-aer yadaq-euq mae.

¹² Khoermirnae, aqyawf, aqyawf maf-euq nuima bi ga’aw le-eu laer, Aqyawf maf-anr myawqkhav bimr-awr; Aqyawfmaf coq-ir ngae, gheutur naeq-eu tiqghaq-iq maqjawr-a.

¹³ Aqyawfmaf gardzaq garkawv jav-awr, Ya’we Miqyaer-anr gurgaq ngae; Aqyawf, aqyawf maf-anr shaqzanq naf-eu gar nae bibuq-ir-euq mae.

¹⁴ Aqyawf, aqyawf maf-anr shir-eu jeq-euq narshmr-euq uqmov hawr-eu yawzanr-anr nae sheuqdov lef-awr; Aqyawf maf-euq shmrcav gheutsaev gheulaevjir naeq-euq mae.

¹⁵ Ya’we Miqyaer-aq, muiq-awr tsawrhaqzaq-euq gharduq, Zanqler paq-aer ghae-eu gardeuq mr-euq mirnae; Tsawrhaqzaq, aqyawf-euq guiqlanq-anr jaceuq-eu tsaq mae.

¹⁶ Aqjeq mirnae aernar-aq, aqyawf, guiqshuir larghov-anr ngawqpav-awr; Shmr ghovkhaeq-anr nyiq tsaev-aer deuvtsaev-euq mae.

¹⁷ Aqdzawq argan-aq, yawqha-euq yawbanq yawlaeq hawr-eu, Yawqha-euq yawlaeq yawca-euq baqda’nae shaqzanq yadaq-eu mae.

¹⁸ Aqyawf maf-euq nuima saflar, dzaqdzaq dawrdawr kharngeur-eu jeq-anr maq hawcawq nanr-aer; Aqyawfmaf shir-eu jeq-euq larghov dawqpae larkeuv taq-euq mae.

¹⁹ Aqyawfmaf gardzaq garkawv jav-awr, Ya’we Miqyaer-anr gurgaq ngae; Aqyawf, aqyawf maf-anr shaqzanq naf-eu gar nae bibuq-ir-euq mae.

²⁰ Miqyaer, aqyawf-euq dawq khaerghae-awr nae, aqyawf maf-anr lavsavtaq naeq-awr; Aqyawfmaf yacawv-ir-eu gar nae bibuq-ir-eu mae.

²¹ Ya’we Miqyaer-aq, muiq-awr, Tsawrhaqzaq-euq gharduq zanqler paq-aer ghae-eu gardeuq mr-euq mirnae; Tsawrhaqzaq, aqyawf-euq guiqlanq-anr jaceuq-eu tsaq mae.

²² Aqyawfmaf, guiqlanq-anr jaceuq-eu lawr-eu jeq bilawr-awr; Laqkhaq caercaer-aer aqyawf-euq gardeuq-euq garkawv dawqdzawr bimr-awq.

²³ Lawq-anr dziq-awr iqmalavshav-anr cancan-aer, Huiq-eu ircuf-euq khoertav jeqgaf gaf-eu deuq;

²⁴ Aqyawfmaf, Ya’we Miqyaer nae mr-euq gardeuq ya’mawr-awr; Yawnaf-euq lafkhoer, zanqler paq-aer ghae-eu jeq ya’mawr-euq mae.

²⁵ Aqjeq mirnae aernar-aq, aqyawf dawq bif-awr, Jaqlaer laerma bi bawlef ngae, iqmalavshav irluv dzaelar-euq mae.

²⁶ Aqyawfmaf, mq-anr bi dzaedir lef-awr, Aqyawfmaf, yawnaf-anr tiq pov par gakalef ngae; Aqyawfmaf, gardzaq garkawv-euq baqda’nae nuima saflar guir-ir-euq mae.

²⁷ Aqyawfmaf jirbaq yaef-eu lof-aer, khoerpaw heupaw-aer yawflawf ghala-aer ghae-awr, Aqyawfmaf tiqjeq-iq noeq ngae maqpar dov-a.

²⁸ Aqyawfmaf gardzaq garkawv jav-awr, Ya’we Miqyaer-anr gurgaq ngae; Aqyawf, aqyawf maf-anr shaqzanq naf-eu gar nae bibuq-ir-euq mae.

²⁹ Aqyawf, jaqlaer laerma-anr bicof-ir-euq mirnae, Irluv dzae-eu naqler-euq mae.

³⁰ Jaqlaer laerma naqler-euq mirnae aqyawfmaf laqkhaq caer-awr; Aqyawf, aqyawf maf-anr irmawf-eu gar sheuqkeuvghae naeq-euq mae.

³¹ Ya’we Miqyaer-aq, muiq-awr, Tsawrhaqzaq-euq gharduq zanqler paq-aer ghae-eu gardeuq mr-euq mirnae; Tsawrhaqzaq, aqyawf-euq guiqlanq-anr jaceuq-eu tsaq mae.

³² Tsawrhaq uiqler-awr jawr ngae, aqyawf-anr ciqhuiq ciqmanr-awr; Aqyuif aqtsu baqmaf deuq-euq ghanrcae khawf, aqyawf-anr jaceuq-eu tsaq mae.

³³ Aqyawf, lawrgawv-anr bawrtsanq bawrdanr bipyeuf-ir nya-awr; Ircuf irbyoe-anr guicorni ghae-eu mirtsaq bipyeuf-ir nya-eu mae.

³⁴ Bawle zale-eu mirtsaq maqbaw maq zaleni bipyeuf-ir nya-eu mae. Tsawrdoer deuq khoergar jawr-eu mirnae, khoerlof-aer bipyeuf-ir-eu mae.

³⁵ Aqyawf, bawrtsanq bawrdanr-anr ircuf-euq lan bi pyeuflar-awr; Guicorni ghae-eu mirtsaq ircuf irbyoe bi pyeuflar nya-eu mae.

³⁶ Aqyawf, maef-awr shuf-eu tsawrhaq-anr khoergar bijawr-awr; Aqyawfmaf jawr-eu gharduq, khoergar meuq bi daqdov laf-eu mae.

³⁷ Aqyawfmaf nae mr-euq jeq bawle zale-awr yawmuiq-aer ya yaeqdzaqni; Aqyawfmaf daeyar-anr saeq-awr aqgaf yarkmr mr-euq mae.

³⁸ Aqyawf, aqyawf maf-anr guiqlanq bif-eu mirnae, Aqyawfmaf myaqlar baerlar-awr; Aqyawf maf-euq jeqzaq deuq maqbi cuiv-ir-aq.

³⁹ Aqyawfmaf, bi nyaefsuf-awr, shaqzanq yadaq-eu lafkhoer ghawqshaq-aer ghae-eu baqda’nae, Aqyawfmaf cuiv-ir-awr bi lavawluf ngae;

⁴⁰ Aqyawf, dzoeqda deuq-euq khoertav daqga-eu jeq shaevdav lef-awr; Aqyawf maf-anr garma maqdanr-eu bawrtsanq bawrdanr-anr, Doedoe ghagha-aer cancan-aer bishaq-euq mae.

⁴¹ Aerkhawf, irshaqzaq-anr shaqzanq naf-eu garmanr kaq-eu gar nae yawgor-anr bijawr-awr; Aqyawf maf-euq nymrkhanq deuq-aq, yawr-euq baqmaf-anr bi durlar-euq mae.

⁴² Dawrcoeni ghae-eu tsawrhaq deuq heu-anr ya’mawr ngae laqkhaq caer-awr; Yawlaeq yawca jeq kharmr-eu deuq-aq, khaqmae ciqcurni jawr taef-a.

⁴³ Zaqsiq tsawrganr kharanr-eu tsawrhaq-aq, heudeuq sharsawxhaw taef-a. Khoernar-aq, aqyawfmaf, Ya’we Miqyaer-euq nanqyuni ghae-eu ghawqshaq gaq-eu jeq-anr ghovshawnya taef-a.