Jaceuq 106 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Muiq-eu Miqyaer-anr Jaceuq-eu

¹ Haleluya! Aqyawf yawmuiq mirnae, Ya’we Miqyaer-euq guiqlanq-anr jaceuq-awq. Aqyawf-euq ghawqshaq gaq-eu jeq, mqmaq maqbyav yarzir zif-eu mae.

² Ya’we Miqyaer nae baoq lafkhoer mr-euq deuq-anr, aqsur ghaq jajir coer-eu la? Aqsur ghaq, aqyawf-anr jaceuq-eu jeq dawqtawvluf dawqdzawr mrjir nya-eu la?

³ Dawr-awr tsaq-eu jeq-euq maeqnan cantae-eu deuq hawr-eu, Aqmyanluf tsaq-awr dawr-eu jeq mr-eu tsawrhaq-aq, guiqlanqhuiq taef-a.

⁴ Ya’we Miqyaer-or! Nawr, nawq-euq tsawrhaq-anr ghoer mr-eu lafkhoer, ngaq-anr noeqkeuv naeqlaf. Nawr, kakhof-eu jeq yur-awr ngar jawr-eu gar oemawr-awq.

⁵ Ngar, nawq nae tserdov-euq deuq bawle zale-eu gar ya’mawr-awr; Ngar, nawq-euq tsawrjeuq lurgha caergha-eu naeq-aer laqkhaq yacaerni hawr-eu; Ngar, nawq-euq jeqbir-euq baqda’nae yawshaef khanqsaer za’ni.

⁶ Nga’maf, nga’maf-euq aqpoeq aqbawr deuq lof-aer iqbax mr-awr, Nga’maf yawlaeq yawca jeq mr-euq uqtaf, nga’maf yawcawv jeq mr-euq mir-a.

⁷ Irjirtuv-anr jawr ngae, nga’maf-euq aqpoeq aqbawr deuq, Nawq nae mr-euq zanqler paq-aer ghae-eu jeq-anr maq ghovshaw nya-aq. Aqyawfmaf, myaq duidui-eu nawq-euq ghawqshaq gaq-eu jeq-anr maq noeqmawrni, Iqmalavshav-euq lawrdzer, Irner iqmalavshav-anr nawq-anr puiq-euq mae.

⁸ Aerkhawf, aqyawf-euq tsawrmyanr-euq gharduq, aqyawf maf-anr kakhof naeq-awr; Aqyawf baoq huiq-eu bisiq-eu gharduq mr-euq mae.

⁹ Aqyawf, Irner iqmalavshav-anr daeq ngae, guicorni bipyeuf-ir-awr; Aqyawf, bawrtsanq bawrdanr-anr nae sheuqdov-eu lof-aer, Yawnaf-anr nae, aqyawf maf-anr sheuqdov ghae-euq mae.

¹⁰ Miqyaer, aqyawf maf-anr byae-eu deuq-euq aqlaf-anr nae bibuq-ir-awr; Aqyawf maf-anr muir-eu deuq-euq aqlaf-anr nae kakhof naeq-euq mae.

¹¹ Aqyawf maf-anr muir-eu deuq ircuf nae bi danqpymq-awr, Aqyawfmaf tiqghaq-iq maq dzerlar-aq.

¹² Khoerngae, aqyawfmaf, aqyawf-euq dawq-anr jan-awr, Aqyawfmaf, car-awr aqyawf-anr jaceuq-euq mae.

¹³ Ghawqmyanr maqghae-aer, aqyawfmaf, aqyawf nae mr-euq jeq ngaer-awr; Aqyawfmaf, aqyawf maeqbawq bif-eu gar maqpar dawq-eu mae.

¹⁴ Aqyawfmaf, bawrtsanq bawrdanr-anr jawr ngae, Zawr khav-eu shiqshaq-euq nuikhanr nuilov-anr maq ghaqler-aer; Kharshuif dae-anr aqyawfmaf, Miqyaer-anr tsermr haw-euq mae.

¹⁵ Khoerngae, aqyawf, aqyawfmaf shar-eu jeq bif-euq mae. Aerkhawf, aqyawf maf-euq nuima saflar jae-ir-eu jeq bi keuvle-euq mae.

¹⁶ Aqyawfmaf, saeqghawv ghawv-awr jawrluf ngae, Ya’we Miqyaer-euq tsawrshawr Aqloq hawr-eu Morseq-anr myavnav nav-euq mae.

¹⁷ Khoerngae, mirtsaq tsawqnga lar-awr, Daqtaq-anr myeufanr-awr, Aqbirlamq hawr-eu aqyawf-euq baqmur-anr byavtaeq byov-euq mae.

¹⁸ Aqyawf maf-euq baqmur-euq khoertav miqdzaq gale-awr, Miqdzaq khoer nae tsawrcawv deuq-anr puivdzaq jir-euq mae.

¹⁹ Aqyawfmaf, Horlev gawqjawq-anr mawrner mawrkawr taev-awr; Aqyawfmaf nae khar-euq mawrkawr khoer-anr uqduq tanq-euq mae.

²⁰ Aqyawfmaf, yawqha-euq yawshaef khanqsaer, Yarmof dzaq-eu mawrner-euq mawrkawr naeq-aer daeqpar-euq mae.

²¹ Aqyawfmaf, Irjirtuv-anr huiq-awr manr-eu jeq mr-euq Miqyaer-anr, Aqyawf maf-euq kakhof-eu ghaq-anr ngaer-euq mae.

²² Aqyawf, Haqmav mirtsaq-anr zanqler paq-aer ghae-eu jeq mr-awr; Irner iqmalavshav-anr yawzeu bawlar paq-aer ghae-eu jeq mr-euq mae.

²³ Miqyaer, aqyawf maf-anr lavcawv le-eu laer aer ngae; Aqyawf nae tserdov taq-euq Morseq, aqyawf nuima paer-eu yurpyawr-eu laer; Yawkaq-anr jawr-awr, aqyawf-euq maeqshi yawfler-euq mae. Maqngeur lawnmr-aq, aqyawf, aqyawf maf-anr lavcawv jir-eu mae.

²⁴ Khoernar-aq, aqyawfmaf, nuikhanr shirlar-eu mirkhanq-anr hawdoer-awr, Aqyawfmaf, Miqyaer-euq dawq-anr maqjan-a.

²⁵ Aqyawfmaf, Ya’we Miqyaer-euq tersar-anr maq narhaq-aer; Yawqha-euq saeqghawv-euq lafkhoer jawr-awr dawqghof dov-euq mae.

²⁶ Khoermirnae, aqyawf, aqyawf maf-anr bawrtsanq bawrdanr-euq lafkhoer bicoq-ir ma laer, aqlaf bafdir-awr kamq-euq mae.

²⁷ Aqyawf maf-euq zaqdeuq uvdeuq, Aqcawq tsawrjeuq-euq ghanrcae bi jawrbyav-awr; Aqcawq-euq mirkhanq-anr bicoq-ir jir ma laer aernaeq-euq mae.

²⁸ Aqyawfmaf, Peqor-euq Baqlar miqyaer-anr gawfler-awr; Yawshir jeq-anr lawrnaeq-euq lawrdzar dzaq-euq mae.

²⁹ Aqyawfmaf, Miqyaer nuima paerlar paq-aer ghae-eu jeq mr-euq mirnae; Aqyawf maf-euq ghanrcae nargawr gawrma dovlar-euq mae.

³⁰ Aerkhawf, Pirneqhar turlar-awr yawkaq-anr yawf ngae, Nargawr gawrma khoer byov-ir-euq mae.

³¹ Aqyawf khoerlof-aer mr-euq mirnae, tiqzir sair tiqzir mqmaq maqbyav yarzir, Aqyawf-anr tsaq-awr dawr-eu tsawrhaq tiq ghaq lof-aer sawxnaeq taef-a.

³² Aqyawfmaf, Maqlirbaq-euq ircuf laer kur-eu dawqpae jawr ngae khawf; Miqyaer-euq nuima lavpaer-awr, Aqyawf maf-euq baqda’nae, Morseq maqmuiq-eu jeq yadaq-euq mae.

³³ Aqyawfmaf, Morseq-euq saflar-anr bi puiqlar-euq mirnae; Aqyawf, aqyawf-euq maeqluq nae, dawqkhav ngaeq-euq mae.

³⁴ Ya’we Miqyaer nae aqyawf maf-anr dawq bif-euq lof-aer; Aqyawfmaf, aqcawq-euq tsawrjeuq-anr maq lavcawv-aq.

³⁵ Aerkhawf, aqyawfmaf, aqcawq tsawrjeuq naeq-aer daeftaf-awr, Aqcawq mr-eu jeq mrdzaw-euq mae.

³⁶ Aqyawfmaf, aqcawq-euq tanqpanq aqma mawrkawr-anr uqduq tanq-euq mae. Khoer-aq, aqyawf maf-euq gharduq lanrju pyeuflar-euq mae.

³⁷ Aqyawfmaf, naef-anr yawqha-euq zaqmiq zaqyo khawf lawrnaeq-euq mae.

³⁸ Aqyawfmaf, Kaqnaq-euq tanqpanq aqma mawrkawr-anr lawrnaeq-eu gharduq, Aqyawfmaf, yawqha-euq zaqmiq zaqyo deuq-euq shiq, tiqjeq-iq maq siqnya-eu deuq-euq shiq saefdov-euq mae. Aqyawfmaf, mirkhanq khoerkhanq-anr shiq nae lavjawf-euq mae.

³⁹ Khoermirnae, aqyawfmaf, yawqha nae mr-euq jeq yawqha-anr lavjawf-awr; Aqyawfmaf mr-eu deuq-euq baqda’nae, mawrdo anq-eu tsawrhaq-anr durlar-euq mae.

⁴⁰ Khoermirnae, Ya’we Miqyaer, aqyawf-euq tsawrhaq-anr nuima paer duidui lar-awr; Aqyawf, aqyawf-euq jeqbir-anr nuidav dav-eu mae.

⁴¹ Khoermirnae, aqyawf, aqyawf maf-anr aqcawq tsawrjeuq-euq aqlaf-euq lafkhoer a’naeq-awr; Aqyawf maf-anr byae-eu deuq nae bi uvlanr-euq mae.

⁴² Aqyawf maf-anr muir-eu deuq, aqyawf maf-anr khaeqnaeq khavnaeq-awr; Aqyawfmaf, aqcawq-euq aqlaf-euq uqmov yajawr-ir-euq mae.

⁴³ Aqyawf, aqyawf maf-anr ghawqmyavpov bibuq-ir-euq khawf; Aqyawfmaf, yawqha-euq maeqbawq-euq lafkhoer aqyawf-anr puiq-eu mae. Aqyawfmaf, yawqha-euq yawlaeq yawca-euq baqda’nae bi gheuka-euq mae.

⁴⁴ Khoerlof-aer law-awr khawf, Aqyawf, aqyawfmaf gur-eu gar yagaq ngae; Aqyawf, aqyawfmaf shaqzanq daqluf-eu garkawv sharnoeq naeq-euq mae.

⁴⁵ Aqyawf, aqyawf maf-euq gharduq, aqyawf-euq dawqma sarjax-anr noeqkeuv-awr; Aqyawf-euq ghawqshaq gaq-eu jeq myaq duidui-eu baqda’nae, nuima ga’nanq le-euq mae.

⁴⁶ Aqyawf, aqyawf maf-anr zaqkhav bigeuf-eu laer khar nyaefghae-euq deuq, Aqyawf maf-anr ghawqshaq bi hawgaqni khawf mr-euq mae.

⁴⁷ Nga’maf-euq Miqyaer pyeuf-eu Ya’we Miqyaer-or! Nga’maf-anr kakhof naeqlaf-awq. Nga’maf, nawq-anr khanqsaer jaevjaev-aer jaceuq-awr; Nawq-euq shawr-eu tsawrmyanr-euq guiqlanq-anr jaceuq nya’ni; Aqcawq tsawrjeuq-euq ghanrcae jawrluf-eu nga’maf-anr sheuquiq naeqlaf.

⁴⁸ Irsaqleqlav-euq Miqyaer pyeuf-eu Ya’we Miqyaer-anr jaceuq-awq! Mqmaq maqbyav yarzir-anr nae mqmaq maqbyav yarzir-anr keuvni jaceuq-awq! Tsawrhaq yawqghaq navluf “Aqmeq” laer aer-awq. Haleluya!