Jaceuq 104 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Bae-euq Yawsanr-anr Jaceuq-eu

¹ Ngaq-euq nuima saflar-or! Ya’we Miqyaer-anr jaceuq-awq! Ngaq-euq Miqyaer pyeuf-eu, Ya’we Miqyaer-or! Nawr-aq, zawr huiq zawr manr-eu mae. Nawr, yawshaef khanqsaer hawr-eu jaqlaq yawbya dmtaq-euq mae.

² Miqyaer maeqtsoeq dm-eu lof-aer yawshaef nae tsanrlanr taq-euq mae. Aqyawf nae saqpar gheutaw-eu lof-aer mq-anr gheutaw taq-euq mae.

³ Aqyawf, aqyawf-euq nymr-euq pyaqdmq, Ircuf-euq khoertav cawqdav taq-euq mae. Aqyawf, mqdmr-anr manq lavlawq bigeuf-awr, Aqyawf, jaqlaer-euq aqdanr-euq khoertav can-eu mae.

⁴ Aqyawf, jaqlaer-anr ghaqkhaer bipyeuf-awr; Aqyawf, miqdzaq miqlmr-anr gar mrzaq bipyeuf-euq mae.

⁵ Nawq nae mirtsaq tanqkhawr-euq dawqpaeq duqpur ciqtsaq taq-euq mirnae; Mqmaq maqbyav yarzir maqpov maq parlar nya-a.

⁶ Nawq nae mirtsaq-anr maeqtsoeq bidm-eu lof-aer, Yawnaf deuq nae sheukaq-awr; Gawqjawq deuq-anr ircuf nae bi danqpymq taq-euq mae.

⁷ Nawr, daeq ngae aqyawfmaf caevbyov ghae-awr; Nawq-euq mqjeq mqtaev-euq tersar yagaq ngae, Aqyawfmaf yawkawr-aer caev-eu mae.

⁸ Aqyawfmaf, gawqjawq-euq uqdu davler-awr, Aqyawfmaf, ghaqlawq-anr irka ghae-awr, Nawq nae aqyawf maf-euq gharduq laeqhmq taq-euq jawrduq-anr irghae-eu mae.

⁹ Aqyawfmaf, mirtsaq-anr maqpar bi danqpymq lar-aer, Maqbi khandzeur laf-eu laer, nawq nae mirkaq lavbawnaeq taq-euq mae.

¹⁰ Aqyawf nae ghaqlawq-anr ircuf irbyoe bijav-awr; Gawqjawq deuq-euq yawkaq-anr ircuf biyoer-euq mae.

¹¹ Aqyawfmaf, daega-anr gav-eu jeqzaq dawqtawv luf-anr ircuf bidawr-awr; Ircuf maef-eu yarsaq-euq manqtanqlav deuq khawf, ya dawrdaev-eu mae.

¹² Mqtav-euq arjir, ircuf jav-eu dawqpae banqbanq-awr; Aqyawfmaf, arbawr lafmyav yawkaq-anr jawr-awr car-eu mae.

¹³ Miqyaer, yawgor-anr jav-eu aqyawf-euq nymr-anr nae, Gawqdur deuq-anr ircuf shaeq-eu mae. Mirtsaq tanqkhawr-aq, nawq nae gar mr-euq arsiq-euq baqda’nae nuikhanr shir-eu mae.

¹⁴ Aqyawf, jeqzaq-euq gharduq yarmof bi daeflar-awr; Mirtsaq-anr nae tsawrhaqzaq dzaq-eu jeq bi dovlar-eu gharduq; Tsawrhaqzaq mrdzaq-eu dzaqla ghovcaer bi daeflar-eu mae.

¹⁵ Tsawrhaqzaq-euq nuima-anr laqkhaq bi caerlar-eu aqgaf dzaruir; Tsawrhaqzaq-euq myavpyawq yawshaef bibya-eu saqloq-euq tsir hawr-eu; Tsawrhaqzaq-euq nuima ghaq anrlarni dzaq-eu kaqmur, Heudeuq-anr Miqyaer nae bi javlar-euq mae.

¹⁶ Miqyaer nae kataq-euq Leqbaqnoq-euq siqdaq miqshuq, Ya’we Miqyaer-euq arbawr deuq ardziq tiqbyanni danq-eu mae.

¹⁷ Arjir, arbawr khoerdeuq-anr banqbanq-awr; Miqshuq arbawr-anr uirdzoeq banqbanq-eu mae.

¹⁸ Gawqjawq gawqdur yawgor-aq, yaq-euq jawrduq pyeuf-awr; Logur-euq lopyaf-aq, pyaqiq deuq caevzafduq pyeuf-eu mae.

¹⁹ Aqyawf nae bala-anr yamqlaw bitof-eu gharduq tsaqtsov taq-awr; Nanrma-anr, ga’anr-eu aryamq bi siqnya taq-euq mae.

²⁰ Nawq nae uqcif-euq yawzanr-anr bae-awr; Uqcif zanrle ngae, bawrtsanq-euq jeqzaq deuq bi dovle-eu mae.

²¹ Arlaqjaqshir zaqguq deuq, Miqyaer-anr nae dzar sharpov-eu, Joeqjoeq-aer sanr-eu shaqtae tae-eu mae.

²² Nanrma dovlar ngae, aqyawfmaf tiqgar uiqler-awr, Aqyawf maf-euq lokhanq-euq lafkhoer gayuf ler-eu mae.

²³ Tsawrhaqzaq-aq, yawqha-euq myawqmr yarngaeq-anr dawfler-awr, Uqcif ciftaw tawle ngae keuvni, aqyawf-euq gar mr-eu mae.

²⁴ Ya’we Miqyaer-or! Nawq nae mrtaq-euq jeq armyavni myaq-eu nga! Zaqsiq tsawrganr-euq lafkhoer, nawr khoerdeuq dawqtawv luf-anr bae-awr; Mirtsaq tanqkhawr-aq, nawq-euq myawqganq deuq byanluf-eu mae.

²⁵ Huiq-awr jer-eu iqmalavshav-euq lafkhoer, Maq guijir coer-eu yawdaef jeq yawhuiq yawnyir, tiqbyanni jawrluf-eu mae.

²⁶ Khoertav-aq, lawqdeuq canluf-awr, Nawq nae bae-euq Leqbiraqta byavyanq, Khoergar jawr-awr, aqmui muiluf-eu mae.

²⁷ Yamqlaw tsaq ngae, nawr dzaqdzaq dawrdawr bifnaeq laf-eu gar, Aqyawfmaf dawqtawvluf, nawq-anr dawqluf-eu mae.

²⁸ Nawq nae aqyawf maf-anr bif-euq jeq, aqyawfmaf yuruiq-eu mae. Nawr, nawq-euq aqlaf pyaeq ngae, Aqyawfmaf yawmuiq jeq tiqdaev daev-eu mae.

²⁹ Nawr, nawq-euq myavpyawq ciqzaf ngae, aqyawfmaf tsawqguv-ir-awr; Nawr, aqyawf maf-euq saf yurkhof ngae, Aqyawfmaf shir-awr mirtsaq par pyeufkhof-ir-eu mae.

³⁰ Nawr, nawq-euq Saflar pyaeqghae-awr, aqyawf maf-anr bae-euq mae. Nawq nae mirtsaq tanqkhawr-euq pyawqnaq lavshuif-euq mae.

³¹ Ya’we Miqyaer-euq yawshaef khanqsaer, Mqmaq maqbyav yarzir gmq-awr, Ya’we Miqyaer, aqyawf nae mrtaq-euq gardeuq-anr laqkhaqcaer luf-ur.

³² Aqyawf, mirtsaq tanqkhawr-anr haw ngae, Mirtsaq tanqkhawr yawdzuq dzuqlar-awr; Aqyawf gawqjawq-anr toeqciv ngae, uqkhoeq tanqdov laf-eu mae.

³³ Ngar khardaef-eu maqshir tiqzir, Ya’we Miqyaer-anr car-awr ciqpoeq ma. Ngar, saf kharghawr-eu khoerkeuvni, Ngaq-euq Miqyaer-anr car-awr jaceuq ma.

³⁴ Ngar dzardziv dziv-eu jeq, aqyawf nuikhanr shir-eu jeq pyeuf luf-ur! Ngar, Ya’we Miqyaer-euq lafkhoer laqkhaqcaer ma.

³⁵ Mirtsaq-euq khoertav nae iqbaxzaq bi puivdzaq jir-awr, Tsawrcawv tiqghaq-iq maq dzerlarni byovtsaevjir luf-ur. Ngaq-euq nuima saflar-or! Ya’we Miqyaer-anr jaceuq-awq! Haleluya!