Jaceuq 103 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nuima-or, Miqyaer-anr Jaceuq-awq!

Daqbir-euq cardawq

¹ Ngaq-euq nuima saflar-or! Ya’we Miqyaer-anr jaceuq-awq! Ngaq-euq lafkhoer kharanr-eu jeq dawqtawvluf, Aqyawf-euq shawr-eu tsawrmyanr-anr jaceuq-awq.

² Ngaq-euq nuima saflar-or! Ya’we Miqyaer-anr jaceuq-awq! Aqyawf nae khar muiqnaeq laf-euq jeq-anr taqngaer.

³ Aqyawf, nawq-euq yawlaeq yawca iqbax dawqtawvluf pyaeqnaeq-awr; Aqyawf, nawq-euq nargawr dawqtawvluf lavtaq naeq-eu mae.

⁴ Aqyawf, nawq-euq daefzir maqbi lavcawvni kakhof naeq-awr; Aqyawf, nawq-anr ghoer-awr gaq-eu hawr-eu, Nanqyuni ghawqshaq gaq-eu uqdzanq nyaefdzanq naeqlaf-euq mae.

⁵ Aqyawf, nawq-euq khaqmae-anr yawmuiq jeq bi dzaqdaev naeqlaf-euq mae. Khoermirnae, nawr, khaqdzer lof-aer zaqguq tiq pov par pyeufkhof lar-euq mae.

⁶ Ya’we Miqyaer, tsaq-awr dawr-eu jeq dovlarni mr-awr; Bi nyaefsuf taq-euq tsawrhaq dawqtawv luf-euq gharduq, Dawr-awr tsaq-eu jeq dovlarni mrluf-eu mae.

⁷ Aqyawf, aqyawf-euq garma deuq, Morseq-anr bi siqnya-awr; Aqyawf mr-eu jeq Irsaqleqlav tsawrhaq deuq-anr bi siqnya-euq mae.

⁸ Ya’we Miqyaer-aq, ghawqshaq gaqnya-awr guiqlanq yawdzanr byan-eu mae. Nuima paer-eu maqkawr-aer, ghawqshaq gaq-eu jeq tiqbyanni anr-eu mae.

⁹ Aqyawf, aqdui-anr aqmyanluf cae-eu laer maqngeur-aer; Aqyawf, aqdui-anr li-eu maqbawni nuima paer-eu laer maqngeur-a.

¹⁰ Aqyawf, aqdui-anr iqbax mrtaq-euq lof-aer geuxni maq janrnaeq laf-aer; Aqdui-euq yawlaeq yawca kharngeur-eu lof-aer maqkhaeq maq khavnaeq laf-a.

¹¹ Aqjeq mirnae aernar-aq, Mq, mirtsaq taf-aer arnavni gordzaeq nar-aq; Aqyawf, aqyawf-anr guv-eu tsawrhaq deuq-anr ghawqshaq khoernavni gaq-eu mae.

¹² Nanrma gakhaeq, dovkhaeq-anr nae armanni kaq nar-aq; Aqyawf, aqdui-euq yawbanq yawlaeq-anr khoermanni kaq-eu gar yurdzae naeqlaf-euq mae.

¹³ Aqda tiq ghaq, yawqha-euq zaq-anr ghawqshaq gaq-eu lof-aer; Ya’we Miqyaer, aqyawf-anr guv-eu tsawrhaq deuq-anr ghawqshaq gaq-eu mae.

¹⁴ Aqjeq mirnae aernar-aq, aqyawf, aqdui-euq mawrkawr-anr siqnya-awr; Aqyawf, aqdui-aq, mirtsaq shaqjaev mae laer maqngaer-a.

¹⁵ Tsawrhaqzaq-euq arnan aryamq-aq, yarmof lof-aer dur-awr; Daega-anr daef-eu aryaev lof-aer maerlar-eu mae.

¹⁶ Khoernar-aq, jaqlaer bawghae laf-awr, Aryaev-anr bawtov ngae, aryaev byovjir-awr, Aryaev daefduq khoer, aryaev-anr maqpar noeqtaq nya-eu mae.

¹⁷ Aerkhawf, Ya’we Miqyaer-aq, Mqmaq maqbyav yarzir-anr nae mqmaq maqbyav yarzir-anr keuvni, Aqyawf-anr guv-eu deuq-anr ghawqshaq gaq-awr; Aqyawf maf-euq zaqdeuq uvdeuq-anr, aqyawf-euq tsaq-awr dawr-eu jeq bif-eu mae.

¹⁸ Khoeruqtaf, aqyawf-euq dawqma sarjax-anr cantae-awr, Aqyawf-euq zanrdawq khofdawq-anr noeqkeuv-awr, Mrcaw-eu deuq-anr, guiqlanq heudeuq bi keuvle-eu mae.

¹⁹ Ya’we Miqyaer, aqyawf-euq nuirmanq mq-euq khoertav lavzif taq-awr; Aqyawf-euq uvlanr-eu jeq, yawqjeq navluf-anr uvlanr luf-eu mae.

²⁰ Miqyaer-euq dawq-euq tersar-anr narhaq-awr, Aqyawf-euq khaerdawq-anr mrcaw-eu uqtaf, Ghaq zawr khav-eu nawmaf, mqtav ghaqkhaer deuq-or, Ya’we Miqyaer-anr jaceuq-awq!

²¹ Miqyaer nuikhanr shir-eu jeq mr-eu, Aqyawf-euq gar mrzaq nawmaf, Nawmaf, aqyawf-euq guirmaf dawqtawvluf, Ya’we Miqyaer-anr jaceuq-awq!

²² Aqyawf uvlanr-eu uqmov kharngeur-eu gar jawr-eu, Aqyawf nae mr-euq lafzar dawqtawvluf, Ya’we Miqyaer-anr jaceuq-awq! Ngaq-euq nuima saflar-or! Ya’we Miqyaer-anr jaceuq-awq.