Jaceuq 102 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Myavpyawq Taq Ciqzaf Naeqlaf

Shaqzanq yadaq-awr, Ya’we Miqyaer-euq maeqshi nuighaq baq-eu lafkhoer dawqghof dov-eu dawq shaevdov lef-awr guilanq shar-euq shardawq

¹ Ya’we Miqyaer-or! Ngaq-euq shardawq-anr narhaq-awr; Ngar gur-eu tersar, nawr jawr-eu gar bi larkeuv naeqlaf-awq.

² Ngaq-anr gardzaq garkawv keuvle taq-euq arnan-anr, Ngaq-anr nae nawq-euq myavpyawq taq ciqzaf naeqlaf. Ngar, nawq-anr kur-eu arnan-anr, Nawq-euq naqbawr, ngaq-anr ciqkhmr naeqlaf-awr, Ngaq-anr yawkawr-aer oq toqnaeq laf-awq.

³ Aqjeq mirnae aernar-aq, ngaq-euq arnan aryamq-aq, uqkhoeq lof-aer byovjir-awr; Ngaq-euq shaqyoeq-aq, tsawqbym-anr puivluf-eu lof-aer dur mir-ar.

⁴ Ngaq-euq nuima bi lavcawv-awr nyoeq-ir taq-euq yarmof-anr dur-awr; Ngar-aq, tiqjeq-iq dzaq-eu laer maq noeqnya.

⁵ Ngar yawkhav-aer manr-eu tersar-euq baqda’nae, Ngaq-euq shaqyoeq, ngaq-euq bawkhov-anr myanqler taq-euq mir-a.

⁶ Ngar-aq, bawrtsanq-anr jawr-eu uirdzoeq hawr-eu, Kharshuif dae-anr jawr-eu hawqbuma-anr dur mir-a.

⁷ Nymrmq-euq khaqboeq-anr cawq maqbaw-aer dzur-eu jartseuv tiq mawr lof-aer; Ngar yawnoeq-aer yufluf-eu ma.

⁸ Ngaq-anr muir-eu deuq, nan’ga-i ngaq-anr ngaeqdoer-awr; Ngaq-anr aqjaf jaf-eu deuq, kamq-eu lafkhoer ngaq-anr yaqkhaer yaq-eu mae.

⁹ Ngar-aq, hawq dzaq-eu lof-aer khaqlaer dzaq-awr, Ngar-aq, myavbir keuq-euq ircuf dawrluf-eu ma.

¹⁰ Nawr, ngaq-anr nuima paer-awr nuima dav-eu mirnae; Nawr, ngaq-anr ciqdir-awr bafdzaeghae naeqlaf-euq mae.

¹¹ Ngaq-euq arnan aryamq-aq, uqciftaw paw-euq narshmr-anr dur-awr; Ngar-aq, yarmof lof-aer ya nyoeqbyov ghae-eu mae.

¹² Aerkhawf, Ya’we Miqyaer-or! Nawr-aq, mqmaq maqbyav yarzir zif-eu mae. Nawq-euq tsawrmyanr-anr yawqzir navluf noeqkeuv taef-a.

¹³ Nawr turlar-awr Ziroq-anr ghawqshaq gaqnaeq taef-a. Aqjeq mirnae aernar-aq, ghawqshaq gaq-eu aryamq tsaqlar-awr, Nanpax paxtaq-euq aryamq keuvlar-euq mae.

¹⁴ Aqjeq mirnae aernar-aq, nawq-euq kuirlaf zaqkhav deuq, Ziroq-euq khaqlo-anr nuikhanr shir-awr, Ziroq-euq khaqlaer-anr ghawqshaq gaq-eu mae.

¹⁵ Heu-euq baqda’nae, tsawrjeuq tsawrca deuq, Ya’we Miqyaer-euq tsawrmyanr-anr guv-awr, Mirkhanq sanqpaq dawqtawvluf, nawq-euq yawshaef khanqsaer-anr guv taef-a.

¹⁶ Aqjeq mirnae aernar-aq, Ya’we Miqyaer, Ziroq par tsovmuiq-awr; Aqyawf-euq yawshaef khanqsaer bimawr-eu laer dovle taef-a.

¹⁷ Aqyawf tiqjeq-iq maq dzerlar-euq, aqyawf-euq tsawrhaq-euq guiqlanq shardawq-anr hageuf naeq-awr; Aqyawf maf-euq guiqlanq shardawq-anr maq hawdoer-a.

¹⁸ Maeqhu paw daefle-eu laer ghae-eu tsawrhaq deuq, Ya’we Miqyaer-anr jaceuq nya’ni, Heudeuq aqkar nanqzir-euq gharduq bofanr taq-awq.

¹⁹ Aqjeq mirnae aernar-aq, aqyawf yawgor-anr jav-eu, Aqyawf-euq shawr-eu jawrduq-anr jawr-awr hawka lef-awr; Ya’we Miqyaer, mq-anr nae mirtsaq tanqkhawr-anr hawluf-eu mae.

²⁰ Aqyawf, kuv-anr bi nyaefur taq-euq deuq manr-eu gar narhaq-awr; Yabi saef mae laer aertsaev taq-euq deuq-anr pyaeqnaeq-eu mae.

²¹ Ziroq-euq lafkhoer, Ya’we Miqyaer-euq tsawrmyanr dawqdzawr mr-awr; Yeqlursaqlaeq-euq lafkhoer aqyawf-anr jaceuq taef-a.

²² Tsawrhaqzaq tiqkawv lof-aer uiqlar ngae, Mirkhanq-anr uvlanr-eu deuq, Ya’we Miqyaer-anr uqduqtanq taef-a.

²³ Ngar garma-anr canluf ngae, aqyawf, ngaq-euq ghaq lavbaq naeqlaf-awr, Ngaq-euq arnan aryamq lavnymr naeqlaf-euq mae.

²⁴ Ngar heulof-aer aer-euq ma, “Miqyaer-or! Ngaq-euq arnan aryamq arkhoev arpaer-anr taef-aer, ngaq-anr taq yurdovdzae naeqlaf. Nawq-euq arkhof arla-aq, yawqzir navluf zif-eu mae.

²⁵ Arhuba nae nawr, mirtsaq tanqkhawr-euq dawqpaeq duqpur ciqtsaq taq-awr; Mqdeuq khawf nawq-euq lafzar pyeuf-eu mae.

²⁶ Mqmir cawv-ir jir khawf, nawr-aq, zif taef-a. Khoerdeuq dawqtawvluf, maeqtsoeq lof-aer caer-ir taef-a. Nawr, paerkhanq paermanr dmpar-eu lof-aer, khoerdeuq-anr lavparnaeq taef-a.

²⁷ Aerkhawf, nawr-aq, tiqjawr-iq maqpov maq parlar-aer, Nawq-euq arkhof arla-aq, li-eu maqbaw-a.

²⁸ Nawq-euq kuirlaf zaqkhav-euq zaqdeuq maeqhu paw daefdav lef-awr; Aqyawf maf-euq zaqdeuq uvdeuq, Nawq-euq maeqshi zifdanni yadaef taef-a.”