Jaceuq 101 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-anr Sarjax Dzaq-eu

Daqbir-euq cardawq

¹ Ya’we Miqyaer-or! Ngar, nawq-anr car-awr jaceuq ma. Ngar, ghawqshaq gaq-eu jeq hawr-eu dawr-awr tsaq-eu garkawv car ma.

² Ngar, noeqganr-awr nae byan-eu garma-anr can ma. Nawr, ngar jawr-eu gar aqmyan oe-eu laer ghae-eu le? Ngar, ngaq-euq nymr-euq lafkhoer nuima shawrjaevni daef ma.

³ Ngar, ngaq-euq myavnuiv-euq maeqshi yawdoer jeq maqbi jav. Ngar, garbanq banq-ir-euq deuq mr-eu jeq-anr byae-eu ma. Ngaq-anr heulof-aer ghae-eu tiqjeq-iq maqbi myanqlar.

⁴ Nuima nanrpov-aer ghae-eu tsawrhaq-aq, Ngar jawr-eu gar nae yadov-ir taef-a. Ngar, yawdoer jeq-anr maq siqnya’mawf nya.

⁵ Ngar, dawqpae jawr-eu tsawrhaq-anr, Jabu jadoer-awr, dawqsav savkhoeq-eu aqgeu ghaq-anr maqkaq, lavcawv ma. Ngar, janrghae-eu myavhaw haw-awr, Nuima huiq-eu tsawrhaq-anr maqdaq maq ornaeq.

⁶ Ngaq-euq myavnuiv, mirtsaq-euq khoertav sarjax zif-eu tsawrhaq-anr hawluf ma. Aqyawfmaf, ngaq naeq-aer bijawr ma. Byan-eu garma-anr can-eu tsawrhaq-aq, Ngaq-euq kuirlaf yageuf taef-a.

⁷ Maershuir shuir-eu gardeuq mr-eu tsawrhaq-aq, Ngaq-euq nymr-euq lafkhoer maqya jawr-ar. Jaqmyawf myawf-eu tsawrhaq-aq, Ngaq-euq maeqshi maqya yawf-ar.

⁸ Ngar, yawnaf-aer mirtsaq-euq khoertav jawr-eu, Tsawrdoer dawqtawv luf-anr lavcawv ma. Ngar, Ya’we Miqyaer-euq meuq-anr nae, Yawdoer jeq kharmr-eu tsawrhaq-anr deuvtsaevdzae ma.