Jaceuq 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-anr Yawduq Baw-eu

¹ Ya’we Miqyaer-or! Aqjeq mirnae, nawr garmanr kaq-eu gar jawr-eu le? Nga’maf gardzaq garkawv jav ngae, nawr aqjeq ghae-eu caevzaf naeqlaf-eu le?

² Tsawrcawv nuima huiq-awr, irshaqzaq-anr khaeq-awr khavluf-eu mae. Aqyawfmaf, yawqha nae yawdoer tov-euq bawqtov-anr yawqha bi pafler-awq.

³ Tsawrcawv-aq, yawqha-euq nuima nuikhanr jav-eu jeq-anr khanqsaer jaev-awr; Yawlof maqbaw-eu tsawrhaq-anr jaceuq-eu uqtaf, Ya’we Miqyaer-anr yaeqbawq-aer aer-eu mae.

⁴ Tsawrcawv-aq, nuima huiq-eu lafkhoer Miqyaer-anr maqpov-a. Aqyawf maf-euq nuinoeq dawqtawv luf-euq lafkhoer, Miqyaer-anr maq noeqkeuv-a.

⁵ Aqyawf-euq garma-aq, aqmyanluf muiqlar sanrlar-awr, Nawq-euq yarkhaq dar-eu jeq-aq, ardzaeq-aer gor-eu mirnae, aqyawf maq mawrnya-a. Aqyawf-anr muir-eu deuq-anr, aqyawf aqjaf jafnaeq-eu mae.

⁶ Aqyawf, aqyawf-euq nuima-euq lafkhoer aer-eu, “Ngar tiqjawr-iq maq nyilarni zif-awr, yawdoer tiqjeq-iq ngaq-anr maq keuvle nya-ar.”

⁷ Aqyawf-euq khaqmae, yaqkhaer yaq-awr, jaqmyawf maershuir hawr-eu lmqguv-eu jeq taef-aer byan-awr, Aqyawf-euq maeqlar-anr nae gardzaq garkawv hawr-eu yawlaeq yawca jeq dovle-eu mae.

⁸ Aqyawf, pu-euq dawqpae dzurzaf taq-awr, Yawzaf zaf-aer ghae-eu gar, yawlaeq maqanr-eu tsawrhaq-anr saef-eu mae. Aqyawf-euq myavnuiv-aq, yawqhar yawqha maq cawba nya-eu tsawrhaq-anr khoeqsho luf-eu mae.

⁹ Arlaqjaqshir, yawqha-euq byoe-anr dzurzaf taq-awr lofluf-eu lof-aer, Aqyawf, irshaqzaq-anr nyaef-eu laer lofluf-awr, aqyawf-euq za nae irshaqzaq-anr khmrpaf-awr nyaef-eu mae.

¹⁰ Khoermirnae, yawqhar yawqha maq cawba nya-eu tsawrhaq bi nawqtaeq-awr galan ghae-eu uqtaf, Aqyawf-euq ghaq-euq baqda’nae coqdzae ghae-eu mae.

¹¹ Tsawrcawv, aqyawf-euq nuima-euq lafkhoer aer-eu, “Miqyaer-aq, ngaerjir-awr, aqyawf-euq myavpyawq ciqzaf taq-awr, tiqjeq-anr-iq maqmawr nya-ar.”

¹² Ya’we Miqyaer-or, tur-awq! Miqyaer-or, nawq-euq aqlaf bafdir-awq! Yawshaqzaq-anr taqngaer naeqlaf.

¹³ Aqjeq mirnae tsawrcawv, Miqyaer-anr yaeqbawq-aer aer-awr, Aqyawf-euq nuima-euq lafkhoer, “Miqyaer-aq, garkawv maqyur-ar” laer noeq-eu la?

¹⁴ Aerkhawf, nawr, gardzaq garkawv jav-awr ghawqshaq-aer ghaeluf-eu gar hawmawr-awr, Sharnoeq sharsawx-eu lafkhoer, nawq-euq aqlaf nae janrkhof naeq-eu mae. Yawhar yawqha maq cawba nya-eu tsawrhaq, nawq-anr ghoe-eu mae. Nawr-aq, aqda maqbaw-eu tsawrhaq-anr cawba-eu ghaq mae.

¹⁵ Tsawrdoer hawr-eu tsawrcawv-euq lafdu ngawqkhaef naeq-awq, Aqyawf-euq yawdoer tiqjeq-iq maqbi dzerlarni povdovjir naeq-awq.

¹⁶ Ya’we Miqyaer-aq, mqmaq maqbyav yarzir Sanqpaq pyeuf-eu mae. Tsawrjeuq tsawrca deuq, aqyawf-euq mirtsaq-anr nae yabyov-ir taef-a.

¹⁷ Ya’we Miqyaer-or! Nawr, yawshaqzaq geufmawf-eu jeq-anr yagaq-euq mae. Nawr, aqyawf maf-euq nuima laeqhmq-awr, nawq-euq naqbawr ciqkhmr-awr narhaq naeq-eu mae.

¹⁸ Khoer-aq, mirtsaq-euq khoertav jawr-eu tsawrhaqzaq lavguv-eu jeq maqpar bimr-aer, Bikhaeq bikhav-euq deuq hawr-eu aqda maqbaw-eu tsawrhaq-anr, dawr-awr tsaq-eu jeq janrnaeq-eu gharduq mae.