HeˬByehˇ 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pirma Yawshuif-euq Guiqlanq-euq Gar

¹ Nga’maf aermawf-eu nuinoeq uqdzan-aq heulof-aer ma: aqdui, mq-euq khoertav jawr-awr, dawqtawv luf-anr uvlanr luf-eu, Sanqpaq Miqyaer-euq nuirmanq-euq armar paw nuirluf-eu Pirma yawhuiq ghaq jawr-eu ma.

² Aqyawf-aq, tsawrhaq nae ghawv-euq maqngeur-eu, Sanqpaq Miqyaer nae ghawv-euq aqdir saqpar saeqghawv-euq lafkhoer, shawr-eu jawrduq-anr uqduq tanq-eu gar mrluf-eu mae.

³ Pirma yawhuiq yawqghaq navluf damqnaeq-eu jeq yadamq-awr, lawr-eu jeq ya lawrni khaerdar taq-euq mae. Khoermirnae, heughaq khawf lawrnaeq-awr damqnaeq-eu jeq tiqjeqnav yajav-eu mae.

⁴ Aqyawf, mirtsaq-euq khoertav jawr lawnmr-aq, Pirma maqya geuf-a. Aqjeq mirnae aernar-aq, zanrdawq aertaq-euq lof-aer lafsawq damqnaeq-eu pirma deuq jawr-eu mae.

⁵ Aqyawfmaf mrluf-eu khoer-aq, mq-euq khoertav mr-eu jeq-euq narshmr hawr-eu arbar lovni taef mae. Morseq saqpar saeqghawv ghawv-eu laer ghae ngae, Miqyaer, Morseq-anr heulof-aer aernaeq-euq mae, “Yawqjeq navluf gawqjawq-euq khoertav nawq-anr bimawr-euq arbar lof-aer durni, yawmuiq-aer ghawv-awq.” (Di 25:40)

⁶ Aerkhawf, nymq-mr aqyawf-aq, poeqdzaeq muiqdzaeq-eu guiqlanq-euq gar zataq-euq mae. Khoerlof-aer durni, aqyawf-aq, muiqdzaeq-eu sarjax-euq khoertav jav-eu muiqdzaeq-eu dawqma sarjax-euq tsawrkaq pyeuf-eu mae.

Dawqma Sarjax Yawshuif

⁷ Aqjeq mirnae aernar-aq, yawbae bif-euq dawqma sarjax aerkhar maqza lawnmr-aq, dawqma sarjax nyiq hmq tiqhmq-anr sharpov-eu laer maqya ghae-ar.

⁸ Aerkhawf, Sanqpaq Miqyaer, aqyawf maf-anr yawlaeq povpov-aer heulof-aer aer-eu mae, “Hawde-eq. Sanqpaq Miqyaer aer-eu, Ngar, Irsaqleqlav nymrkhanq hawr-eu Yurdav nymrkhanq naeq-aer dawqma sarjax yawshuif dzaq-eu arnan keuvle taef-a.

⁹ Dawqma sarjax yawshuif heu-aq, Ngar, aqyawf maf-euq aqpoeq deuq-euq aqlaf-anr nyaeftaeq-awr, Irjirtuv-anr nae sheuqdovlaf ngae, aqyawf maf-anr aernaeq-euq dawqma sarjax khoer-anr maqdur-a. Aqjeq mirnae aernar-aq, aqyawfmaf, ngaq-euq dawqma sarjax-euq lafkhoer maqdaef-aq. Khoermirnae, ngar khawf aqyawf maf-anr ngaeq maq ghaenaeq.

¹⁰ Khoeryamq dzeur-euq nar-aq, Ngar, Irsaqleqlav-euq nymrkhanq-anr dawqma sarjax heulof-aer dzaq ma laer Sanqpaq Miqyaer aer-eu mae: Ngar, ngaq-euq zanrdawq aqyawf maf-euq nuinoeq-euq lafkhoer dawvanr naeq-awr, aqyawf maf-euq nuima-anr bofmyanqnaeq ma. Khoernar-aq, ngar, aqyawf maf-euq Miqyaer pyeuf-awr, Aqyawfmaf khawf ngaq-euq tsawrhaq pyeuflar taef-a.

¹¹ Khoerngae, aqyawfmaf tiqghaq-iq yawqha-euq dawqpae jawr-eu tsawrhaq hawr-eu yawqha-euq aqyuif aqnyir-anr, ‘Sanqpaq Miqyaer-anr siqnya lar-awq’ laer maqya maeq-ar. Aqjeq mirnae aernar-aq, aqyawfmaf, nyirdzaeq-eu tiq ghaq-anr nae huiqdzaeq-eu tiq ghaq-anr keuvni, yawqghaq navluf, ngaq-anr siqnyajir taef-a.

¹² Ngar, aqyawf maf-euq maqtsaq maqdawr-eu jeq-anr ghawqshaq gaqnaeq-awr, Ngar, aqyawf maf-euq iqbax hawr-eu zanrdawq-anr leur-eu jeq mr-euq gar maqpar noeqtaq ma.” (Ylm 31:31-34)

¹³ “Dawqma sarjax yawshuif” laer aer ngae, dawqma sarjax yawbae hmq zmq-eu aryamq bijir-euq mae. Zmq-eu aryamq jir-awr, oer-ir-euq jeq-aq, byov-ir-eu dawqpae paelar-eu mae.