HeˬByehˇ 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pirma Maqlaqkirsaqdaev

¹ Maqlaqkirsaqdaev heughaq-aq, Saqlaeq-euq sanqpaq pyeuf-awr, gor duidui-eu Miqyaer-euq Pirma khawf pyeuf-eu mae. Aqbyaqhaq, sanqpaq deuq-anr deuvsaef ghaq-awr ghoflarluf ngae, Maqlaqkirsaqdaev, aqyawf-anr ha-ir-awr, dawq ngaeqghae naeq-euq mae.

² Aqbyaqhaq khawf, aqyawf nae khar deuvza-euq lafkhoer nae aqyawf-anr tserbymr tiqbymr bifnaeq-euq mae. Maqlaqkirsaqdaev laer aer-eu tsawrmyanr-euq dawqtsuif-aq, “Tsaq-awr dawr-eu sanqpaq” laer aermawf-awr, Saqlaeq-euq sanqpaq laer aer-eu-aq, “Nuisar bi’of-eu sanqpaq” laer aermawf-eu mae. (Adb 14:17-20)

³ Aqyawf-aq, aqma aqda hawr-eu tsuif maqbaw-a. Aqyawf daefle-euq arnan maqjav-aer, shir-euq arnan khawf maqjav-a. Aqyawf-aq, Miqyaer-euq Zaqyo lof-aer arsaq saq-eu maqbawni Pirma pyeuf-eu mae.

⁴ Aqyawf arnavni huiq-eu nga laer hawsher-eq. Aqdui-euq aqda yawdzanr Aqbyaqhaq nae khar deuvza-euq lafkhoer nae aqyawf-anr tserbymr tiqbymr bifnaeq-euq mae.

⁵ Leqbir-euq arjeuq arca-euq lafkhoer, pirma geufluf-eu deuq, yawqha-euq aqyuif aqnyir pyeuf-eu Irsaqleqlav tsawrhaq-anr nae tserbymr tiqbymr taf-awq laer, zanrdawq-euq lafkhoer dawq biftaq-euq jav-eu mae. Irsaqleqlav tsawrhaq, Aqbyaqhaq-euq zaqdeuq uvdeuq pyeuf-eu khawf tserbymr tiqbymr tafnaeq-eu mae.

⁶ Maqlaqkirsaqdaev-aq, aqyawf maf-euq tsuif-anr maqtaf-eu khawf, Aqbyaqhaq nae bifnaeq-euq tserbymr tiqbymr hageuf-awr, sarjax zataq-euq Aqbyaqhaq-anr dawq ngaeqghae naeq-euq mae.

⁷ Yawhuiq ghaq nae yawnyir ghaq-anr dawq ngaeqghae naeq-eu mae. Garkawv heu-anr pyaerkhar maqza-a.

⁸ Nymq-mr-aq, shirnya-eu tsawrhaq tserbymr tiqbymr hageuf-eu mae. Khoerngae-aq, tserbymr tiqbymr hageuf-euq ghaq-aq, “Daefluf-eu mae” laer sarkir bi kamqkeuv taq-euq ghaq mae.

⁹ Aqcawq-anr nae tserbymr tiqbymr hageuf-eu Leqbir khawf, Aqbyaqhaq-anr ghoe-awr nae tserbymr tiqbymr bif-euq mae laer aernya-eu mae.

¹⁰ Aqjeq mirnae aernar-aq, Maqlaqkirsaqdaev, Aqbyaqhaq-anr ha-ir ngae, Leqbir, aqyawf-euq aqpoeq Aqbyaqhaq-euq lafkhoer jawrluf-a siq.

¹¹ Arhu, Leqbir tsawrhaq Pirma geufluf ngae, Irsaqleqlav tsawrhaq, zanrdawq za-euq mae. Leqbir tsawrhaq Pirma geuf-eu baqda’nae mrbyannya lawnmr-aq, aqjeq mirnae Aqloq, Pirma geuf-eu dzoeqdzaq lof-aer maqngeur-eu, Maqlaqkirsaqdaev Pirma geuf-eu dzoeqdzaq za-eu yawqghaqyawq parya dovlar-eu la?

¹² Pirma geuf-eu dzoeqdzaq lavpar-euq ngeur nar-aq, zanrdawq khawf ya lavpar-eu mae.

¹³ Aqjeq mirnae aernar-aq, heugar aerkeuv luf-eu heughaq-aq, Leqbir-euq arjeuq arca maqngeur-a. Aqyawf-euq arjeuq arca-euq tsawrhaq-aq, tiqghaq-iq lawrduq-anr gar maq mrhaw-aq.

¹⁴ Khoerlof-aer durni, aqdui-euq Sanqpaq Yeqsur-aq, Yurdav-euq arjeuq arca-anr taf-eu mae laer byacaevni javluf-eu mae. Pirma geuf-eu garkawv, Morseq heujeuq heuca-anr tafler-awr nae tiqjeq-iq maq aertaq-aq.

Maqlaqkirsaqdaev-anr Dur-eu Pirma Yawqghaqyawq

¹⁵ Maqlaqkirsaqdaev lof-aer Pirma tiq ghaq par dovlar nar-aq, garkawv heu yawmuiq-aer byacaevni mawrmaqdzaeq lar-eu mae.

¹⁶ Aqyawf, Pirma pyeuflar-euq-aq, shiqshaq-euq zanrtaq khoftaq-anr taf-eu zanrdawq-euq baqda’nae maqngeur-a. Maq lavcawv nya-eu daef-eu jeq-euq baoq baqda’nae pyeuflar-euq mae.

¹⁷ Aqjeq mirnae aernar-aq, aqyawf sarkir heulof-aer kamqtaq-euq mae, “Nawr-aq, Maqlaqkirsaqdaev-euq dzoeqdzaq za-awr, mqmaq maqbyav yarzir pirma yageuf taef-a.” (Jc 110:4)

¹⁸ Tiqdzer dzaq-anr aerlef nar-aq, yawbae biftaq-euq zanrdawq khofdawq-aq, ghaq byaev-awr gardanr maqtsoeq-eu mirnae byaerdzae-euq mae.

¹⁹ Aqjeq mirnae aernar-aq, zanrdawq-aq, tiqjeq-anr-iq maqbi byanlar nya-a. Aerkhawf, tiqdzer dzaq-anr par aernar-aq, khoernav maqtser muiq-eu noeqtmq-eu jeq-anr sheuqmaeq naeqlaf-eu jeq pyeuf-eu mae. Noeqtmq-eu khoerjeq-euq baqda’nae, aqdui, Miqyaer jawr-eu gar jivler nya-eu mae.

²⁰ Aqjeq mirnae muiq-eu nga laer aernar-aq, aqyawf-aq, kamqtaq-euq dawq maqjav-aer Pirma yageuf-euq maqngeur-a.

²¹ (Aqjeq mirnae aernar-aq, aqyawf maf-aq, kamq-euq dawq maqjav-eu khawf, pirma yageuf-euq mae. Aerkhawf, Kali-aq, aqyawf-anr heulof-aer kamq-euq ghaq-euq baqda’nae Pirma yageuf-euq mae, “Sanqpaq Miqyaer nae kamqtaq-euq dawq-anr maq yurkhof-a. ‘Nawr-aq, Maqlaqkirsaqdaev-euq dzoeqdzaq za-awr, Mqmaq maqbyav yarzir pirma yageuf taef-a.’ ”) (Jc 110:4)

²² Khoermirnae, Yeqsur-aq, muiqdzaeq-eu dawqma sarjax khoer zifni, yawduq bi bawlar-eu ghaq pyeuf-eu mae.

²³ Dzeurlaf ngae, Pirma tiqghaq sair tiqghaq yabi geuf-euq khoer-aq, aqyawfmaf gar mrdavlef ngae, shir-eu jeq lavtsoeq-eu mirnae mae.

²⁴ Aerkhawf, Yeqsur-aq, mqmaq maqbyav yarzir daef-eu mirnae, aqyawf li-eu maqbawni Pirma pyeuf-eu mae.

²⁵ Khoermirnae, aqyawf-anr ghoe-awr Miqyaer jawr-eu gar kharlar-eu tsawrhaq-anr aqyawf tiqbyan tiqlof kakhofnaeq nya-eu mae. Aqjeq mirnae aernar-aq, aqyawf aqmyanluf daefluf-awr, aqyawf maf-euq gharduq guiqlanq sharcaw duidui luf-eu mae.

²⁶ Heulof-aer ghae-eu Pirma yawhuiq ghaq-aq, aqdui-anr tsaq duidui-eu mae. Aqyawf-aq, yawjawf hawr-eu yawlaeq maqanr-eu uqtaf, yawshawr mae. Iqbaxzaq-anr nae bi tserpav dov-awr, mq-euq navmaqtser bi ciqgor taq-euq mae.

²⁷ Aqyawf-aq, Pirma yawhuiq nuideuq lof-aer, nan-anr nae yawqha-euq iqbax-euq gharduq jeqhu lawr-awr, aqcawq-euq iqbax-euq gharduq lawrnaeq-eu laer maqya ghae-a. Aqjeq mirnae aernar-aq, aqyawf-euq mawrdo lawrnaeq-euq khoer-aq, dawqtawv luf-euq gharduq tiqpov taef-aer lawrluiv jir-euq jeq pyeuf-eu mae.

²⁸ Zanrdawq-aq, ghaq byaev-eu tsawrhaq-anr khawf, Pirma yawhuiq ghaq bigeufni khaerdar-eu mae. Aerkhawf, zanrdawq-euq maeqnan oe-euq kamqtaq-euq dawq khoerdawq-aq, mqmaq maqbyav yarzir byan-eu ghaq bi pyeuflar-euq Zaqyo-anr Pirma yawhuiq ghaq bigeufni khaerdar-euq mae.