HeˬByehˇ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ardanq Bae-eu Gar Taef-aer Taqjawr

¹ Khoermirnae, Kali-anr taf-eu dzawdanq bae-eu garkawv taef-aer jaja-aer maqpar jawr-aer, aqdui tsawrkhav khavlarni, garkawv heudeuq-anr dawqpaeq baepar baepar-aer maqpar jawrni maeqhu paw le kar-eur: gar yawshir-anr nae noeqpov noeqpar-eu, Miqyaer-anr jan-eu jeq-euq garkawv,

² bartirsaq mrnaeq-eu dawqmaeq dawqtsov, aqlaf bafdav-eu garkawv, shir-euq gar nae ghofdaef lar-eu garkawv hawr-eu arsaq saq-eu maqbawni yarkhaq dar-eu jeq, heudeuq mae.

³ Miqyaer nuima tsaq nar-aq, aqdui heulof-aer mrdavlef taef-a.

⁴ Aqjeq mirnae aernar-aq, yawshaef-anr mawrhaw-awr, mq-euq khoertav-euq lafsawq-anr myeufhaw-euq uqtaf, aqcawq lof-aer Yawshawr Saflar za-awr,

⁵ aqkar keuvle-eu zir-euq baoq hawr-eu Miqyaer-euq dawq arnavni muiq-eu nya laer myeufhaw-euq tsawrhaq deuq,

⁶ coq-ir nar-aq, lavshuif-eu laer maqpar noeqpov noeqpar nya-aer noeqtmqkhar maqpar za-eu mae. Aqjeq mirnae aernar-aq, aqyawfmaf, yawqha-euq gharduq, Miqyaer-euq Zaqyo-anr lafyaq-euq khoertav par taftaeq pov-awr, aqcawq-euq maeqshi daqga paq-aer janrnaeq-eu gar dur-eu mae.

⁷ Mirtsaq tiq tsanr-anr uqyaer tiqkhaeq maqtaqni yaershaeq le-awr, kadzaq kadawr-eu deuq-euq gharduq, gardanr tsoeq-eu sanqlanq ghawqdar daefdov lar-eu khoer-aq, Miqyaer-euq guiqlanq za-euq mae.

⁸ Aerkhawf, mirtsaq khoertsanr-anr aqgan arbawq hawr-eu aqgan bawduv taef-aer daeflar nar-aq, yabi byaerdzae-eu uqtaf, yaqkhaer yaq-eu gar yadaq-eu dawqpae paelar-awr, arsaqsaq ngae-aq, miqdzaq nae yabi keuqdzae taef-a.

⁹ Ngar zawr gaq-eu cawqdeuq-or! Nga’maf heulof-aer aer-eu law-awr khawf, kakhof-eu jeq-anr taf-awr, nawmaf-euq gharduq muiqdzaeq-eu jeq jav taef-a laer nga’maf yawduqbaw ma.

¹⁰ Miqyaer-euq tsawrmyanr-anr gaq-eu lafkhoer mrdov shardov laf-euq nga laer bi mawrlarni, dzeurlaf ngae nawmaf nae tsawrshawr deuq-anr cawba naeq-awr, nymq-mr khawf cawba naeqluf-eu gar, Miqyaer-aq, ngaernya-awr maqtsaq maqdawr-eu maqngeur-a.

¹¹ Nawmaf nae noeqtmqduq taq-euq lof-aer aqdir byanlarni, nawmaf yawqghaq navluf arsaqsaq ngae keuvni yawmuiq-aer laejae-awr mrghae-eu gar nga’maf geufmawf mir-a.

¹² Khoermirnae, nymrgawq yawdoer tsawrhaq maqya pyeufni, jan-awr or-eu lafkhoer, Miqyaer nae sarjax dzaqtaq-euq jeq-anr za-euq tsawrhaq deuq-anr mrcaw-awq.

Miqyaer Nae Aer-euq Jeq Pyeuflar Mae

¹³ Miqyaer, Aqbyaqhaq-anr sarjax dzaq ngae, aqyawf navmaqtser huiqdzaeq-eu tiqghaq-iq maqjawr-eu mirnae, aqyawxyawf ghoe-awr kamq-euq mae.

¹⁴ Aqyawf aer-eu, “Ngar, nawq-anr aqdir guiqlanq bi keuvle-awr, ngar, nawq-anr bimyaq bi baerlar ma.” (Adb 22:16-17)

¹⁵ Aqbyaqhaq oror-aer dawq-euq nar-aq, Miqyaer nae aqyawf-anr sarjax dzaqtaq-euq lof-aer za-euq mae.

¹⁶ Tsawrhaqzaq kamq ngae, yawqha navmaqtser huiqdzaeq-eu ghaq-anr ghoe-awr kamq-eu mae. Khoerlof-aer kamq-eu-aq, yawduq bibaw-awr, aqyawfmaf kharpyaer-eu garkawv arsaq bisaq-eu gharduq mae.

¹⁷ Khoernav maqtser, Miqyaer nae jeqbir of-eu tsawrhaq deuq-anr maq parlar nya-eu sarjax dzaq-euq khoer, byacaevni bi mawrmawf-eu mirnae, aqyawf noeqtsaev-awr kamqtaq-euq mae.

¹⁸ Khoer-aq, maq parlar nya-eu nyiq jeq-euq garkawv mae. Miqyaer-aq, jaqmyawf maq myawfnya-a laer aqdui nuima bi sarni kamq-eu jeq khoer-anr ghoe-awr nae, aqdui-euq maeqhu paw jav-eu noeqtmq-eu jeq-anr zifdanni nyaeftaeq taq-awq laer, caevzafduq-anr caevur taq-euq aqdui-anr ghaq yawkhav-aer bifnaeqlaf luf-eu mae.

¹⁹ Aqdui noeqtmq-eu jeq-aq, lawq maqbi jiv-ir ni shmr kuvseuq seuqma nae seuqtaeq taq-euq lof-aer, aqdui-euq nuima saflar-anr zifdanni seuqtaeq taq-euq mirnae, saqpar lawvkaq-euq narkhan, Miqyaer-euq maeqshi urler nya’ni noeqtmq-eu jeq pyeuf-eu mae.

²⁰ Maqlaqkirsaqdaev pirma-euq dzoeqdzaq za-euq lof-aer, Yeqsur-aq, mqmaq maqbyav yarzir Pirma yawhuiq ghaq pyeuf-awr, khoergar aqdui-euq gharduq maeqhuq huq-euq ghaq geuf-awr urler-euq mae.