HeˬByehˇ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqnaq Naqduq-anr Urler-eu Sarjax

¹ Khoermirnae, aqyawf-euq ghaqnaq naqduq-anr urler-eu sarjax javluf ngae, nawmaf-euq lafkhoer tiqghaqnav maqya urler-eu paq laer, aqdui khawf guvkhar za-eu mae.

² Aqjeq mirnae aernar-aq, aqyawf maf-anr guiqlanqdawq maeqnaeq-euq lof-aer, aqdui-anr khawf maeqnaeq laf-euq mae. Aqyawfmaf dawq khoer-anr yagaq-euq khawf maqjan-eu mirnae, yagaq-euq dawq khoer gardanr maqtsoeq-a.

³ Miqyaer aer-eu, “Aqyawfmaf, ‘Ngaq-euq ghaqnaq naqduq-anr maqya urler-ar’ laer, Ngar nuima paer-eu lafkhoer kamqtaq-euq ma.” (Jc 95:11) Aerkhawf, aqdui jan-eu tsawrhaq deuq-aq, ghaqnaq naqduq khoer-anr ya urler mae. Aqdir aernar-aq, mqmir bae ngae nae, Miqyaer, aqyawf-euq gar mrjir taq-euq mae.

⁴ Shif nan tiqnan-euq garkawv Yaerbof tiq tsanr aer-eu, “Miqyaer, aqyawf-euq gar dawqtawvluf mrjir-awr, shif nan tiqnan-anr ghaqnaq naq-euq mae.” (Adb 2:2)

⁵ Yaerbof tiq tsanr paraer-eu, “Aqyawfmaf, ngaq-euq ghaqnaq naqduq-anr maqya urler-ar.” (Jc 95:11)

⁶ Khoermirnae, guiqlanqdawq maeq-eu gar jeqhu yagaq-euq tsawrhaq khoerdeuq maq narhaq geuf-euq mirnae, maqya urler-euq khawf, ya urler-eu tsawrhaq tiqdeuqnav jawr-eu mae.

⁷ Khoermirnae, “Iqnan” laer aernya-eu arnan tiq nan-euq gharduq, Miqyaer nae nanpax paxtaq-euq khoer, aryamq myanrlar ngae, Daqbir-anr ghoe-awr heulof-aer aertaq-euq mae, “Iqnan, nawmaf, aqyawf-euq tersar-anr yagaq-euq ngeur nar-aq, nuima taqghanr.” (Jc 95:7-8)

⁸ Yorsuv, aqyawf maf-anr ghaqnaq naqduq khoertsanr-anr sheuqur ghae-euq lawnmr-aq, Miqyaer yawqnan yawq-euq garkawv maqpar aerkeuv-ar.

⁹ Khoermirnae, Miqyaer-euq tsawrhaq deuq-euq gharduq, ghaqnaq naq-eu arnan tiqnan parjav-eu mae.

¹⁰ Aqjeq mirnae aernar-aq, Miqyaer, aqyawf-euq gar mr-eu naq-euq lof-aer, aqyawf-euq ghaqnaq naqduq-anr urler-eu tsawrhaq deuq khawf, yawqha-euq gar mr-eu gar nae ya’naq taef-a.

Aqdui-anr Tsermr-eu Yaerdawq

¹¹ Khoermirnae, Yaerdawq maq narhaq geuf-euq deuq coq-ir-euq lof-aer, aqdui khawf maqya coq-ir ni, ghaqnaq naqduq khoer-anr ya urlerni laejae kar-eur.

¹² Miqyaer-euq dawq-aq, daefluf-awr baoq tiqbyanni anr-eu mae. Dawq heu-aq, miseuq nyiq paw baw-eu micaer navmaqtser tav-awr, nuima hawr-eu saflar-anr khawf, yoeqtsuif hawr-eu purnmf-anr khawf, tsawvcov dov-awr birpav nya-eu mae. Tsawrhaq-euq nuima-euq nuinoeq hawr-eu nuikhanr-anr khawf tserpav nya-eu mae.

¹³ Khar baetaq-euq yawqjeq navluf, aqyawf-euq maeqshi zaftaq-euq tiqjeq-iq maqjav-a. Yawqjeq navluf aqyawf-euq maeqshi byacaevni pandzae taq-euq mae. Aqkar, aqdui, aqyawf-anr dawqdzawr ya mrnaeq-eu mae.

Yeqsur, Pirma Yawhuiq Ghaq Mae

¹⁴ Aqdui, Pirma yawhuiq ghaq jawr-eu ma. Aqyawf-aq, mqtav mirkhanq-anr cantsaev-euq Miqyaer-euq Zaqyo Yeqsur mae. Aqdui nae aerdov-euq jeq-anr aqdui zifdanni nyaeftaeqtaq kar-eur.

¹⁵ Aqjeq mirnae aernar-aq, aqdui-euq Pirma yawhuiq ghaq-aq, aqdui ghaq baq-eu jeq-anr ghawqshaq maq gaqnya-eu maqngeur-a. Aqyawf khawf, aqdui lof-aer yawqdzer dzaq-anr navluf murjur jur-eu gar yadaq haw-euq mae. Aerkhawf, aqyawf iqbax maqmr-aq.

¹⁶ Khoermirnae, aqdui nuima khaqduqni, guiqlanq yawdzanr-euq nuirmanq-euq maeqshi urler kar-eur. Khoergar, aqdui mawf ngae yamq-anr cawba’naeq nya-eu, ghawqshaq gaq-eu jeq za-awr, guiqlanq yawdzanr-anr ya’mawr taef-a.