HeˬByehˇ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Huiq Duidui-eu Kakhof-eu Jeq

¹ Khoermirnae, aqdui yawqpawyawq maqya jivdovghae paq-aer, aqdui nae yagaq taq-euq dawq-anr yawmuiq-aer narhaq-eu tsaq mae.

² Mqtav ghaqkhaer-anr ghoe-awr ngaeq-euq dawq khoer aqdir ngeur nar-aq, mrbanq mrlaeq-awr maq narhaq geuf-euq tsawrhaq dawqtawvluf, yawqha-anr geux-eu mrpoeq lafsawq za-eu mae.

³ Aqdui heunav nav-aer huiq-eu kakhof-eu jeq heu-anr maq noeqpoeq nar-aq, aqjox-aer caevdzeurnya nmr-mq? Kakhof-eu jeq heu-anr, ardanqbae ngae-aq, Sanqpaq Yeqsur nae maeqnaeq laf-awr, yagaq-euq tsawrhaq deuq, aqdui-anr aerduq naeqlaf-euq mae.

⁴ Miqyaer, aqyawf nuima tsaq-eu lof-aer bisiq bimawr-eu jeq, zanqler paq-aer ghae-eu jeq hawr-eu khavjeq-aer ghae-eu jeq ghawqmya jeq mr-awr, Yawshawr Saflar-euq lafsawq bizmq-eu lafkhoer sarkir kamqnaeq laf-euq mae.

Kakhof-awr Sheuqghae-eu Ghaq

⁵ Miqyaer-aq, aqdui aerkeuv luf-eu aqkar javle-eu mirtsaq tanqkhawr khoer-anr mqtav ghaqkhaer nae bi uvlanr-eu laer maqngeur-a.

⁶ Aerkhawf, Yaerbof tiq tsanr, tiq ghaq sarkir heulof-aer kamqtaq-euq mae, “Nawr noeqkeuvnaeq paq-aer, tsawrhaqzaq aqjeq pyeuf-eu la? Nawr oemawr paq-aer tsawrhaq-euq zaqyo aqsur ghaq la?

⁷ Nawr, aqyawf-anr mqtav ghaqkhaer taf-aer uicuiv teqni janrnaeq-awr, Aqyawf-anr yawshaef khanqsaer hawr-eu taqhuiq taqmanr-eu uqdzanq bidzanq taq-euq mae. Nawr, nawq-euq aqlaf-euq lafzar deuq-anr, aqyawf nae bi uvlanr-awr,

⁸ nawr, yawqjeq navluf aqyawf-euq aqkuir-euq uqmov bijawr bijav-euq mae.” (Jc 8:4-6) Yawqjeq navluf aqyawf-euq uqmov bijawr bijav-eu laer aer-eu-aq, aqyawf-euq uqmov maqbi jawr maqbi javni tiqjeq-iq maqbi dzerlar-aq. Aerkhawf, nymq-mr keuvni-aq, kharjawr kharjav-eu jeq aqyawf-euq uqmov jawrluf-eu gar aqdui maqya mawr-aq siq.

⁹ Aerkhawf, mqtav ghaqkhaer taf-aer uicuiv teqni janrnaeq-euq Yeqsur-anr aqdui ya’mawr-euq ma. Aqyawf shir-eu gar yadaq-euq mirnae, taqhuiq taqmanr-eu jeq hawr-eu yawshaef khanqsaer, shuir uqkhov lof-aer aqyawf-anr ciqkhov naeq-euq mae. Miqyaer-euq guiqlanq yawdzanr baqda’nae, aqyawf, tsawrhaq yawqghaq navluf-euq gharduq shirdan-euq mae.

Maernmr Laer Kur-eu Maq Shafdawr-a

¹⁰ Miqyaer, aqyawf-euq zaq ghawqmya ni-anr, aqyawf-euq yawshaef khanqsaer jav-eu gar sheuqlaf-eu gharduq, aqyawf maf-euq kakhof-eu jeq bi byanlarni sheuqghae-eu ghaq, shaq-awr zanq-eu jeq yadaq-eu gar Miqyaer nuima tsaq-eu mae. Aqjeq mirnae aernar-aq, kharjawr kharjav-eu yawqjeq navluf Miqyaer nae bae-awr, yawqjeq navluf aqyawf-euq pyeuf-eu mae.

¹¹ Tsawrhaqzaq-anr lavshawr-eu ghaq hawr-eu bi lavshawr-euq deuq dawqtawvluf, aqyawf tiqDazaq taef mae. Khoermirnae, aqyawf, aqyawf maf-anr maernmr laer kur-eu maq shafdawr-a.

¹² Aqyawf aer-eu, “Ngar, ngaq-euq maernmr deuq-anr, nawq-euq tsawrmyanr dzawrgaq ma. Armur uiqler-awr jawr-eu ghanrcae, ngar, nawq-anr car-awr jaceuq ma.” (Jc 22:22)

¹³ Aqyawf tiq pov paraer-eu, “Ngar, aqyawf-anr ghoe ma.” (Isy 8:17) Aqyawf tiq pov paraer-eu, “Hawsher-eq. Ngar hawr-eu Miqyaer nae ngaq-anr bifnaeq laf-euq zaqdeuq heugar jawrluf-eu ma.” (Isy 8:18)

¹⁴ Zaq khoerdeuq shiq hawr-eu shaqjir piluf-eu lof-aer, aqyawf khawf aqyawfmaf lof-aer durni daefle-euq mae. Aqyawf shir-awr, shir-eu jeq-anr uvlanr-eu naef sanqpaq-euq baoq-anr lavcawv le-euq mae.

¹⁵ Khoeruqtaf, shir-eu jeq-anr guv-eu mirnae, tiqzir zirlanni bi paftawf taq-euq tsawrhaq deuq-anr pyaeqnaeq-eu gharduq, aqyawf khoerlof-aer mr-euq mae.

¹⁶ Aqdir aernar-aq, aqyawf, mqtav ghaqkhaer deuq-anr maq cawba naeq-aq. Aerkhawf, Aqbyaqhaq-euq zaqdeuq uvdeuq-anr cawba naeq-euq mae.

¹⁷ Khoermirnae, aqyawf, tsawrhaqzaq-euq iqbax-euq gharduq lawrbyan nya’ni hawr-eu, Miqyaer-euq gar mr-eu lafkhoer, ghawqshaq gaqnya-awr sarjax zif-eu Pirma yawhuiq ghaq geuf-eu gharduq, yawqjeq navluf-euq lafkhoer, aqyawf, aqyawf-euq maernmr lof-aer yapyeuf-euq mae.

¹⁸ Aqyawf murjur jur-eu gar yadaq-euq mirnae, murjur jur-eu gar ya daqluf-eu tsawrhaq deuq-anr cawba nya-eu mae.