HeˬByehˇ 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pyurshuir-anr Maerjuir Taqjuir

¹ Aqyuif aqnyir maernmr yawkaq gaq-eu lof-aer aqmyanluf gaq-awq.

² Daqyan-anr yawmuiq-aer hageuf-eu taqngaer. Aqjeq mirnae aernar-aq, tiqpavnav deuq daqyan-anr hageuf ngae, yawqha maq siqnya-aer, mqtav ghaqkhaer-anr hageufzaq haw-euq mae.

³ Nawr, shiqshaq piluf-eu mirnae, kuv-anr bi nyaefur taq-euq tsawrhaq deuq naeq-aer bi paftaq-euq lof-aer sawxtaq-awr, khaeq-awr khav-eu gar ya daqluf-eu tsawrhaq deuq naeq-aer daqluf-eu lof-aer khawf sawx-awr, aqyawf maf-anr noeqkeuv-awq.

⁴ Tsawrhaq yawqghaq navluf oermr bar-eu jeq-anr taqhuiq-awq. Yufzar khawf yawshawr shawr-aer bijav-awq. Aqjeq mirnae aernar-aq, aqcawq-anr khaqmiq sheu-eu hawr-eu banq-awr joe-eu tsawrhaq deuq-anr Miqyaer yarkhaq darnaeq taef-a.

⁵ Nawmaf, yawdaef daef-eu lafkhoer, pyurshuir-anr maerjuir taqjuir. Yawqha kharjav-eu jeq-anr nuikhanr shir-awq. Aqjeq mirnae aernar-aq, Miqyaer aer-eu, “Ngar, nawq-anr tiqjawr-iq maqghawq maqghaer-ir. Tiqjawr-iq maq byaerdzae.” (Dm 31:6,8)

⁶ Khoermirnae, aqdui nuima khaqduqni heulof-aer aernya-eu ma, “Sanqpaq Miqyaer-aq, ngaq-anr cawba-eu ghaq pyeuf-eu mae. Ngar tiqjeq-anr-iq maqguv. Tsawrhaqzaq, ngaq-anr aqjeq janrlar nya-eu?” (Jc 118:6)

Yeqsur Kali Aqmyanluf Tiqkawv Mae

⁷ Nawmaf-anr uvlanr-awr Miqyaer-euq dawq ngaeqnaeq-euq gar taqngaer. Aqyawfmaf nae mr-awr shar-euq baqda’nae dovlar-euq deuq-anr sharnoeq-awr, aqyawf maf-euq jan-eu jeq-anr cantae-awq.

⁸ Yeqsur Kali-aq, mirnan, iqnan hawr-eu mqmaq maqbyav yarzir tiqkawv mae.

⁹ Nawmaf, beugar-eu dawqmaeq dawqtsov kharngeur-eu jeq-anr taq cantae-ir. Aqjeq mirnae aernar-aq, dzaqdzaq dawrdawr-euq baqda’nae maqngeur-eu, guiqlanq yawdzanr-euq lafkhoer nuima bi zifdzaeq lar-eu-aq, muiqdzaeq-eu mae. Dzaqdzaq dawrdawr-aq, dzaqdzaq dawrdawr nae bi uvlanr taq-eu tsawrhaq khoerghaq-anr tiqjeq-iq gardanr maqtsoeq-a.

¹⁰ Aqdui lawrduq tiq hmq jav-eu ma. Saqpar saeqghawv-euq lafkhoer gar mr-eu tsawrhaq, khoergar lawrnaeq taq-euq jeq-anr maq dzaqkhmq-a.

¹¹ Aqjeq mirnae aernar-aq, jeqzaq-euq shiq-aq, iqbax-euq gharduq pirma yawhuiq ghaq, shawr duidui-eu lawv-anr yuranr lef-awr, jeqzaq-euq mawrdo-aq, saeqghawv-euq lafnyir paw dzanpuiv-eu mae.

¹² Khoerlof-aer durni, Yeqsur khawf, aqyawf-euq shiq nae tsawrhaqzaq-anr lavshawr-eu laer meuq-euq lanrkhaeq-euq lafnyir paw shaqzanq yadaq-euq mae.

¹³ Khoermirnae, aqdui khawf, saeqghawv-euq lafnyir paw aqyawf jawr-eu gar ir-awr, aqcawq yaeqbawq-aer ghaelar-eu gar Yeqsur daq-euq lof-aer, aqdui khawf daq-ir kar-eur.

¹⁴ Aqjeq mirnae aernar-aq, heugar aqdui zif-eu meuq maqjav. Aerkhawf, aqdui aqkar javle-eu meuq-anr sharpov luf-eu ma.

¹⁵ Khoermirnae, aqdui, Yeqsur-anr ghoe-awr, aqmyanluf Miqyaer-anr jaceuq-eu lawr-eu jeq lawrnaeq kar-eur. Khoer-aq, aqyawf-euq tsawrmyanr-anr jaceuq-eu laer aqdui-euq maeqluq-anr nae siqle-eu arsiq mae.

¹⁶ Aerkhawf, yawmuiq jeq mr-awr aqcawq-anr birnaeq pav naeq-eu jeq-anr taqngaer. Aqjeq mirnae aernar-aq, khoerlof-aer lawrnaeq-eu jeq-anr-aq, Miqyaer nuima tsaq-eu mae.

¹⁷ Nawmaf-anr uvlanr-eu deuq-anr narhaq geuf-awr, aqyawf maf-euq lafov yawmuiq-aer jawr-awq. Aqjeq mirnae aernar-aq, aqyawfmaf, Miqyaer-anr ya dzawrnaeq ler-eu lof-aer, nawmaf-euq nuima saflar-anr hawpir luf-eu mae. Aqyawfmaf hawpirluf ngae, laqkhaq caertavni bi mrnya-awq. Noeqshaq-eu lafkhoer mr-eu jeq taqbi pyeuf, khoerlof-aer ngeur nar-aq, nawmaf-euq gharduq khawf gardanr maqtsoeq-a.

¹⁸ Nga’maf-euq gharduq guiqlanq sharcaw naeqlaf-awq. Aqjeq mirnae aernar-aq, nga’maf-euq zaqsiq nuisiq shawrjaevni jav ma laer nga’maf yawduqbaw ma. Nga’maf yawqjeq navluf-euq lafkhoer yawmuiq-aer daefmawf mir-a.

¹⁹ Ngar, nawmaf jawr-eu gar yawkawr-aer ghoflar nya’ni, ngaq-euq gharduq khawf guiqlanq sharcaw naeqlaf-awq laer ngar, nawmaf-anr yawkhav-aer shar-eu ma.

Dawq Ngaeqghae Naeq-eu

²⁰ Nuisar bif-eu Miqyaer, aqdui-euq Sanqpaq Yeqsur shir-euq gar nae bi ghofdaef lar-euq mae. Yawr bo-eu Yawhuiq khoerghaq, mqmaq maqbyav yarzir zif-eu dawqma sarjax-anr taf-eu shiq-anr ghoe-awr,

²¹ nawmaf, aqyawf nuima tsaq-eu lof-aer mrnya’ni, aqyawf, nawmaf-euq lafkhoer yawmuiq yawqjeq navluf bi byanlar luf-eu mae. Yeqsur Kali-anr ghoe-awr, aqyawf-euq maeqshi aqyawf nuikhanr shir-eu jeq, aqdui-euq lafkhoer mrnaeqlaf luf-ur. Arsaq saq-eu maqbawni yawshaef khanqsaer dawqtawvluf Kali-anr a’naeq kar-eur. Aqmeq.

Arsaq Saq-eu Dawq

²² Aqyuif aqnyir deuq-or! Ngar, nawmaf-anr sanqbof heumyav dawq bofanr laf-awr, maeqbawq bif-eu dawq-anr or-awr narhaq geuf-awq laer ngar, nawmaf-anr shar-eu ma.

²³ Aqdui-euq maernmr Tivmorseq, kuv-anr nae bi pyaeqdov ghaq-euq mae. Aqyawf yawkawr-aer larkeuv nar-aq, ngar khawf aqyawf naeq-aer nawmaf jawr-eu gar lar mae laer siqnya-awq.

²⁴ Nawmaf-anr uvlanr luf-eu yawqghaq navluf-anr hawr-eu tsawrshawr yawqghaq navluf-anr dawqcawq puqanr laf-euq ma. Irdaqliq-anr nae lar-euq deuq khawf nawmaf-anr dawqcawq puqanr laf-euq mae.

²⁵ Nawmaf yawqghaq navluf-euq khoertav guiqlanq yawdzanr jav luf-ur. Aqmeq.