HeˬByehˇ 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-anr Hawtsov Taq-awq

¹ Jan-eu jeq-euq garkawv sarkir kamq-eu tsawrhaq, juqkhoeq tmq-eu lof-aer aqdui-euq tiqjawq jawrluf-eu mirnae, aqdui-anr kanluf-eu yawqjeq navluf pyaeqka yaf-awr, aqdui-anr gheupaf lar-eu iqbax dawqtawvluf khawf puirdzae yaf-eu uqtaf, nuinoeq ghawqmanrni noeq-awr, aqdui-euq gharduq lavsav taq-euq garma-anr caevghae kar-eur.

² Caevghaeluf ngae, Yeqsur-anr hawtsov taq-awq. Aqyawf-aq, aqdui jan-eu jeq-euq ardanq bae-euq ghaq hawr-eu arsaq saq-eu ghaq pyeuf-eu mae. Aqyawf-euq maeqshi javluf-eu laqkhaq caer-eu jeq-euq baqda’nae, daqga-eu jeq-anr maq sharnoeqni lafyaq-anr daq-euq mae. Nymq-mr aqyawf, Miqyaer-euq nuirmanq armar paw nuirluf-eu mae.

³ Nawmaf-euq nuima ghaq maqya baq-ir-aer, nuima maqya cawv-ir ni, Kali, aqyawfghaq khawf iqbaxzaq muir-awr janrnaeq-eu gar daqdzeur nya-euq garkawv-anr sharnoeqhaw sher-eq.

⁴ Nawmaf, iqbax naeq-aer deuvcae caecae-aer shaqluf-eu khawf, shiq dov-eu tiv-anr maq keuvler-aq siq.

Maeqpar Naeq-eu Jeq-anr Taqguv

⁵ Aqyawf, nawmaf-anr aqyawf-euq zaqdeuq-anr maeqbawq bif-eu lof-aer aer-euq dawq-anr nawmaf ngaer-euq nya lor? “Ngaq-euq Zaqyo-or! Sanqpaq Miqyaer maeqpar naeqlaf-eu jeq-anr taq hawdoer. Aqyawf, nawq-anr daeqdaeq-aer maeqnaeq laf-eu gar khawf ghaq taqbaq-ir.

⁶ Aqjeq mirnae aernar-aq, Sanqpaq Miqyaer-aq, aqyawf gaq-eu tsawrhaq-anr maeqpar naeq-awr, Aqyawf-euq zaq laer hageuf-euq yawqghaq navluf-anr diqdiq-aer maeqnaeq-eu mae.” (Dd 3:11-12)

⁷ Nawmaf maeqpar naeq-eu jeq-anr daqluf-eu ngeur nar-aq, Miqyaer, nawmaf-anr aqyawf-euq zaqdeuq lof-aer janrnaeqlaf luf-eu mae. Aqda maq maeqpar naeq-eu zaq jawr mae lor?

⁸ Zaq yawqghaq navluf maeqpar naeq-eu gar yadaq-eu mae. Nawmaf-anr maeqpar naeq-eu jeq maqjav nar-aq, nawmaf-aq, aqyawf-euq zaqmar maqngeur-aer, ghovbaq-euq lafnyir-euq zaq pyeuf-eu mae.

⁹ Khoeruqtaf, aqdui-anr maeqpar naeqlaf-euq, aqdui-euq zaqbaw aqda-anr yawzeu baw-eu ma. Khoernav maqtser, aqdui, saflar paw-euq Aqda-euq dawq-anr arnavni par narhaq geuf-awr, daef paq-aer ghae-eu nga?

¹⁰ Aqdui-euq zaqbaw aqda deuq-aq, aqyawfmaf nae tsaq mae laer noeq-euq lof-aer, aqdui-anr tiqkhaeq yawkaq maeqpar naeqlaf-eu taef mae. Aerkhawf, saflar paw-euq Aqda-aq, aqdui-euq gharduq muiqni aqyawf shawr-eu lof-aer, aqdui khawf shawrlarni maeqpar naeqlaf-eu mae.

¹¹ Maeqpar naeqlaf-eu aqgeu jeq maqkaq, ya daqluf ngae narlar-eu mirnae, laqkhaq maq caernya-a. Aerkhawf, arsaq saqlar ngae, khoerlof-aer ya mrdzaw-euq tsawrhaq-euq gharduq, tsaq-awr dawr-eu nuisar of-eu arsiq siqle-eu mae.

Miqyaer-euq Guiqlanq-anr Taqbyaer

¹² Khoermirnae, gagheu taq-euq nawmaf-euq aqlaf hawr-eu ghaq maqanr-eu aqkuir pawqtsuif ghaq bi anrlar-awq.

¹³ Nawmaf-euq kuircawv, kuirtsuif maqya jivpar-ir-eu uqtaf taqler nya’ni, nawmaf-euq aqkuir-euq gharduq garma dawrcoeni shardanr-awq.

¹⁴ Tsawrhaq yawqghaq navluf naeq-aer tsaqler dzoerlerni laejae-awr, shawrlarni khawf laejae-awq. Aqjeq mirnae aernar-aq, maqshawr nar-aq, tsawrhaq tiqghaq-iq Sanqpaq Miqyaer-anr maq mawrnya-a.

¹⁵ Nawmaf, Miqyaer-euq guiqlanq yawdzanr-anr nae kaq-ir-awr, khaqjawfni ghae-eu nuima baw-eu duqcir dovlar-awr, gardzaq garkawv lavdov-eu uqtaf, ghawqmya ghaq-anr maqshawrni bi pyeuflar-eu gar yanr-awq.

¹⁶ Nawmaf tiqghaq-iq banq-awr joe-eu jeq maqbi dovlarni yanr-awq. Irsawr lof-aer maqshawr-aer maqya ghae-ir ni khawf yanr-awq. Irsawr-aq, dzar tiq dzaq nae huqbaw zaqyo-euq aryaq pardzae-euq mae.

¹⁷ Arnan-aq, Irsawr, aqyawf-euq aqda nae dawq ngaeqghae-eu gar za’mawf-eu mae. Aerkhawf, maq janrnaeq-aq. Aqyawf nae mrdzeur-euq jeq-anr myavbir juni sharpov duidui-euq khawf, noeqpov noeqparduq maqpar jav-euq mae laer nawmaf siqnya-eu mae.

Maq Lavnyae Nya-eu Mirkhanq

¹⁸ Nawmaf-aq, heulof-aer ghae-eu gawqjawq-anr larkeuv-euq maqngeur-a: toeqciv nya-awr miqdzaq dof-eu, navcawfni pyeuf-ir-awr zanrtsuini ghae-eu uqtaf, jaqlaer laerma baw-eu,

¹⁹ darhae tersar hawr-eu dawq ngaeq-eu tersar khawf jav-awr, tersar khoer-anr yagaq-euq tsawrhaq deuq, aqyawf maf-anr dawq taqpar ngaeqcawq naeqlaf laer tanqshar-eu mae.

²⁰ Aqjeq mirnae aernar-aq, aqyawfmaf dawq heulof-aer biftaq-euq gar maq daqcoer-a. “Jeqzaq law-awr khawf, gawqjawq heujawq-anr tanqtuv lar-euq nar-aq, khaqlo nae biqsaef-awq. Maqngeur nar-aq, kav nae khawf beuvsaef-awq.” (Di 19:12-13)

²¹ Ya’mawr-euq khoer-aq, guv duiduilar paq-aer ghae-eu mirnae, Morseq aer-eu, “Ngar, yawdzuq gan’gan-aer guv duidui nya.” (Dm 9:19)

²² Aerkhawf, nawmaf-aq, Ziroq gawqjawq hawr-eu daefluf-eu Miqyaer-euq meuq-anr larkeuv-euq mae. Meuq heumeuq-aq, mqtav-euq Yeqlursaqlaeq pyeuf-awr, heugar maq guijir coerni myaq-eu mqtav ghaqkhaer deuq uiqlarduq pyeuf-eu mae.

²³ Mq-euq khoertav bofanr taq-euq huqbaw zaqyo deuq-euq Kalizaq armur uiqlar duq-anr larkeuv-euq mae. Tsawrhaqzaq yawqghaq navluf-anr yarkhaq dar-eu Miqyaer hawr-eu, bi byanlar-euq tsaq-awr dawr-eu tsawrhaq-euq saflar khawf jawr-eu mae.

²⁴ Khoeruqtaf, dawqma sarjax yawshuif-euq tsawrkaq Yeqsur khawf khoergar jawr-awr, juifshaeq taq-euq shiq khawf khoergar jav-eu mae. Aqbeqlav-euq shiq nae ngaeq-euq dawq navmaqtser, juifshaeq taq-euq shiq khoer nae ngaeq-euq dawq-aq, muiqdzaeq-eu mae.

Mqtav-euq Tersar-anr Narhaq-awq

²⁵ Nawmaf-anr dawq ngaeqcawq lar-eu ghaq-euq dawq-anr maq narhaq-aer maqghaeni yanr-awq. Aqjeq mirnae aernar-aq, mirtsaq-euq khoertav aqyawf maf-anr aernoeq naeq-euq khoerghaq-euq dawq-anr, aqyawfmaf maq narhaq-euq mirnae, maqya dzeur-ir-euq ngeur nar-aq, mq-anr nae aernoeq naeqlaf-euq khoerghaq-euq dawq-anr aqdui maq narhaq nar-aq, ngeurdzaeq aqjox-aer parya dzeur-ir nmr-mq?

²⁶ Khoerngae, aqyawf-euq tersar nae mirtsaq-anr ngawqnyae-euq mae. Aerkhawf, nymq-mr aqyawf sarjax dzaq-awr aer-eu, “Ngar, mirtsaq-anr taef-aer maqngeur-eu, mq-anr khawf tiq pov par ngawqnyae ma.” (Hg 2:6)

²⁷ “Tiq pov par ngawqnyae ma” laer aer-eu dawq heudawq-aq, maq nyaelar nya-eu jeq aqmyanluf bizif-awr, khar nyaelar-eu baetaq-euq yawqjeq navluf yurdzaejir ma laer aermawf-eu mae.

²⁸ Aqdui maq gheunyae nya-eu uvlanr-eu jeq zataq-euq mirnae, Miqyaer-euq guiqlanq yawdzanr-anr hageuf-awr, yawzeu baw-awr guv-eu lafkhoer, Miqyaer nuima tsaq-eu lof-aer aqyawf-euq gar mr kar-eur.

²⁹ Aqjeq mirnae aernar-aq, aqdui-euq Miqyaer-aq, puivdzaqjir nya-eu miqdzaq pyeuf-eu mae.