HeˬByehˇ 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jeqzaq-euq Shiq-aq, Maqbyan-a

¹ Zanrdawq-aq, aqkar keuvle-eu yawmuiq jeq-euq narshmr taef-aer pyeuf-awr, aqdir aqmarhmq maqngeur-eu mirnae, aqyawfmaf tiqkhof sair tiqkhof maq tsaevlerni aqyawf tiqjeq taef-aer lawrnaeq-eu khoer-aq, dawqpae le-eu tsawrhaq deuq-anr tiqjawr-iq maqbi byanlar nya-a.

² Byanlar-euq lawnmr-aq, aqyawfmaf lawrnaeq-eu jeq naqjir taef-a. Aqjeq mirnae aernar-aq, uqduq tanq-eu tsawrhaq deuq tiq pov bishawr-euq nar-aq, aqyawf maf-euq zaqsiq nuisiq iqbax anr nya laer maqpar noeq-ar.

³ Aerkhawf, aqyawf khof aqyawf lawr-eu khoer-aq, yawqha-euq iqbax-anr bi noeqmawr-eu jeq pyeuf-eu mae.

⁴ Aqjeq mirnae aernar-aq, mawrner mawrgaw-euq shiq hawr-eu cifmyaef-euq shiq-aq, tiqjeq ghaenae-iq iqbax-anr maq yurdzae nya-a.

Kali Shirdan-awr Lawrluiv-euq Mae

⁵ Khoermirnae, Kali, mirtsaq-euq khoertav zafkale ngae heulof-aer aer-eu mae, “Nawr lawrnaeq-eu jeq hawr-eu damqnaeq-eu jeq-anr geufmawf-eu maqngeur-a. Aerkhawf, nawr, ngaq-euq gharduq mawrdo laeqhmq taq-euq mae.

⁶ Dzanpuiv-awr lawr-eu jeq hawr-eu iqbax-euq gharduq lawr-eu deuq-anr nawr nuikhanr maqshir-a.

⁷ Khoernar-aq, ngar aer-eu, ‘Sanqbof paryov-euq lafkhoer ngaq-euq garkawv bofanr taq-euq lof-aer, Miqyaer-or! Hawsher-eq! Ngar-aq, nawr nuima tsaq-eu jeq mr-eu laer oe-euq ma.’ ” (Jc 40:6-8)

⁸ Yawbae ngae nae aqyawf aer-eu, “Lawrnaeq-eu jeq hawr-eu damqnaeq-eu jeq, dzanpuiv-awr lawrnaeq-eu jeq hawr-eu iqbax-euq gharduq lawrnaeq-eu jeq-anr khawf, nawr maq geufmawf-eu uqtaf, heudeuq-anr nuikhanr maqshir-a.” (Heudeuq dawqtawvluf zanrdawq aertaq-euq lof-aer damq-eu jeq pyeuf-eu mae).

⁹ Khoernar-aq, aqyawf paraer-eu, “Miqyaer-or. Hawsher-eq, ngar-aq, nawr nuima tsaq-eu jeq mr-eu laer oe-euq ma.” Khoermirnae, aqyawf, dawqma sarjax yawshuif bi dovlar-eu laer dawqma sarjax yawoer-anr yurdzae-euq mae.

¹⁰ Miqyaer nuima tsaq-eu baqda’nae, Yeqsur Kali-euq mawrdo tiq pov lawrnaeq-euq taef khawf, lawrluiv jir-euq jeq pyeuf-eu gar ghoe-awr, aqdui bi lavshawr-euq ma.

Kali Shirdan-awr Lawrbyan-euq Mae

¹¹ Pirma yawqghaq navluf, yawqnan navluf yawf-awr, uqduq tanq-eu gardeuq ya’mr-eu mae. Aqyawfmaf, lawrnaeq-eu aqyawf tiqjeq taef-aer ghawqmya pov yalawr-eu khawf, lawrnaeq-eu khoer-aq, iqbax-anr maq yurdzae nya-a.

¹² Aerkhawf, Kali, iqbax-euq gharduq tiq pov lawr-euq taef khawf, mqmaq maqbyav yarzir luiv-eu jeq lawrnaeq ghaq-euq nar-aq, Miqyaer-euq armar paw nuirler-euq mae.

¹³ Khoerngae nae nar-aq, aqyawf, aqyawf-anr muir-eu deuq, aqyawf-euq aqkuir cawqtaqduq pyeuflar-eu gar dawqluf-eu mae.

¹⁴ Aqjeq mirnae aernar-aq, aqyawf tiq pov lawr-euq khoer, bi lavshawr luf-eu tsawrhaq deuq mqmaq maqbyav yarzir byanlarni mr-euq mae.

¹⁵ Yawshawr Saflar khawf, aqdui-anr sarkir kamqnaeq laf-eu lafkhoer, yawbae heulof-aer aer-eu mae,

¹⁶ “Sanqpaq Miqyaer aer-eu, khoerngae yamq dzeur-euq nar-aq, Ngar, aqyawf maf-anr dawqma sarjax heulof-aer bifnaeq ma. Ngar, ngaq-euq zanrdawq aqyawf maf-euq nuima-anr dawvanr naeq-awr, Aqyawf maf-euq nuinoeq-euq lafkhoer bofanrnaeq ma.

¹⁷ Aqyawf paraer-eu, Ngar, aqyawf maf-euq iqbax hawr-eu aqyawfmaf nae zanrdawq-anr leur-eu jeq mr-euq gar maqpar noeqtaq ma.” (Ylm 31:33-34)

¹⁸ Khoermirnae, heudeuq-euq gharduq iqbax pyaeqnaeq-eu jeq aqgeugar jav nar-aq, khoergar-aq, iqbax-euq gharduq maqpar yalawr-eu mae.

Miqyaer-euq Dawqpae Jivurler Kar-eur

¹⁹ Khoermirnae, aqyuif aqnyir deuq-or! Yeqsur-euq shiq baqda’nae, aqdui nuima khaqduqni shawr duidui-eu lawv-anr urler nya-eu ma.

²⁰ Aqjeq mirnae aernar-aq, aqdui-euq gharduq lawvkaq-euq saqpar lepav nya-eu, daef-eu garma yawshuif tiq kanr shardanr naeqlaf-euq mae. Aqyawf-euq mawrdo-aq, lawvkaq-euq saqpar khoer mae.

²¹ Khoeruqtaf, aqdui, Miqyaer-euq nymrkhanq-anr uvlanr-eu Pirma yawhuiq ghaq jawr-eu ma.

²² Aqdui-euq mawrdo-anr ircuf irshawr nae tsiqshawr naeqlaf-awr, zaqsiq nuisiq yawdoer-anr nae aqdui-euq nuima-anr shiq juifshaeq naeqlaf-euq mirnae, dawrcoeni ghae-eu nuima anr-awr, janduq-eu jeq byan-eu lafkhoer, Miqyaer-euq maeqshi urler kar-eur.

²³ Aqdui nae aerdov dzeur-euq noeqtmq-eu jeq-anr povpov lavlav-aer maqghaeni, zifdanni nyaeftaeqtaq kar-eur. Aqjeq mirnae aernar-aq, aqdui-anr sarjax bif-euq ghaq-aq, sarjax zif-eu mae.

²⁴ Khoeruqtaf, gaq-eu jeq myaqlar-awr yawmuiq jeq mrni, aqdui tiqghaq tirghaq-euq gharduq sharnoeq-awr lavnoeq lavzor kar-eur.

²⁵ Aqdui tiqkawv lof-aer uiqler bymrler-eu jeq-anr, tsawrhaq tiqpavnav byaer-eu lof-aer maqbyaerni mrdavlef kar-eur. Arnan khoernan keuvle-eu dawqpae paelar-eu ngar-a laer, nawmaf siqnya-eu mirnae, tiqghaq tirghaq, ghaq yawkhav-aer biftaer taeq-awq.

Jan-eu Baqda’nae Yadaef-eu Mae

²⁶ Aqdui yawtsaq yawdawr-anr siqnya-eu tsawrganr za-euq khawf, dirdaq-aer iqbax parmr nar-aq, iqbax-euq gharduq lawr-eu jeq maqpar jav mae.

²⁷ Aerkhawf, yarkhaq dar-eu jeq hawr-eu Miqyaer-anr muir-eu tsawrhaq-anr miqdzaq keuqdzae lar-eu gar guv duidui-eu lafkhoer dawq-eu jeq taef-aer jav-eu mae.

²⁸ Tsawrhaq tiq ghaq, Morseq-euq zanrdawq-anr mrbanq-euq mae laer sarkir kamq-eu tsawrhaq nyiq ghaq smr ghaq jawr nar-aq, aqyawf-aq, ghawqshaq gaq-eu jeq maqza-aer yashir-eu mae.

²⁹ Sharnoeqhaw sher-eq. Miqyaer-euq Zaqyo-anr aqkuir-euq uqmov nawqtaeq taq-awr, yawqha-anr lavshawr-euq dawqma sarjax-euq shiq-anr, arpoeq maqbaw-eu lof-aer sawx-awr, guiqlanq yawdzanr bif-eu muiq-eu Saflar-anr yaeqbawq-aer ghae-eu tsawrhaq tiq ghaq, arnavni doerdzaeq-eu darnaeq-eu jeq-anr yadaq-eu jeq nya?

³⁰ Aqjeq mirnae aernar-aq, “Lafpov povkhof naeq-eu jeq-aq, ngaq-euq gar ma. Ngar janrkhofnaeq ma,” (Dm 32:35-36) laer aer-awr, “Sanqpaq Miqyaer, aqyawf-euq tsawrhaq deuq-anr yarkhaqdar taef-a” laer aer-eu khoerghaq-anr aqdui siqnya ma.

³¹ Daefluf-eu Miqyaer-euq aqlaf-euq lafkhoer ya ga’ur-eu-aq, guvlar paq-aer ghae-eu jeq pyeuf-eu mae.

³² Dzeurlaf-euq arnan aryamq-anr noeqmawr-awq. Nawmaf yawshaef-anr ya’mawr-euq nar-aq, shaqzanq-anr oror-aer yawkhav-aer yadaq-euq mae.

³³ Tiqpov nav-aq, nawmaf, aqcawq-euq maeqshi, shafdawr-ir paq-aer bijanr-awr, bikhaeq bikhav-euq mae. Khoeruqtaf, tiqpov nav-aq, nawmaf khoerlof-aer bijanr-euq tsawrhaq deuq naeq-aer cawq cawqnaeq-euq mae.

³⁴ Aqjeq mirnae aernar-aq, shmrcav nae bi paftaq-euq ngaq-anr khawf, nawmaf ghawqshaq gaq-awr, aqcawq, nawmaf-euq myawqdeuq-anr khaeqgeuf khavgeuf-euq khawf, nawmaf laqkhaq caertavni daq-awr hageuf coer-eu mae. Aqjeq mirnae aernar-aq, heunav maqtser muiqdzaeq zifdzaeq-eu jeqbir nawmaf-euq gharduq jav-eu mae laer nawmaf siqnya-eu mae.

³⁵ Khoermirnae, nawmaf yawduq baw-eu jeq-anr taq byaerdzae. Aqjeq mirnae aernar-aq, nawmaf heu-euq baqda’nae huiq duidui-eu mrpoeq lafsawq za taef-a.

³⁶ Nawmaf, Miqyaer nuima tsaq-eu jeq-anr mrbyan-euq nar-aq, aqyawf nae sarjax dzaqtaq-euq jeq-anr za’ni daqcoer orcoer-eu jeq ya’anr-eu mae.

³⁷ Aqjeq mirnae aernar-aq, aqyawf aer-eu, “Tiqkhaeq ghae nar-aq, oe-eu laer ghae-eu ghaq maq nyinaqni oekeuv taef-a.

³⁸ Tsaq-awr dawr-eu tsawrhaq-aq, jan-eu baqda’nae yadaef-eu mae. Aerkhawf, aqyawf narkhan paw jivkhofghae nar-aq, ngaq-euq nuima, aqyawf-anr nuikhanr maq shirnya.” (Hbk 2:3-4)

³⁹ Aerkhawf, aqdui-aq, narkhan paw jivkhof ghae-awr, yacawv-ir-eu tsawrhaq khoerdeuq maqngeur. Jan-eu mirnae, saflar kakhof-eu jeq-anr za-eu tsawrhaq ma.