HeˬByehˇ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqyo-anr Ghoe-awr Ngaeqcawq-eu

¹ Arhuba, Miqyaer, aqyawf-euq gharduq ngaeqdan-eu deuq-anr ghoe-awr, aqdui-euq aqpoeq deuq-anr ghawqmya dzerdzaq-anr nae, ghawqmya pov dawq ngaeqcawq-euq mae.

² Arsaq saq-eu arnan aryamq heu-anr-aq, aqyawf-euq Zaqyo-anr ghoe-awr, aqdui-anr ngaeqcawq-euq mae. Dawqtawvluf, aqyawf-euq jeqbir bipyeuf-eu laer, Miqyaer, aqyawf-anr tsaqtsov-awr, Miqyaer, aqyawf-anr ghoe-awr, mq hawr-eu mir-anr baetaq-euq mae.

³ Aqyawf-aq, Miqyaer-euq yawshaef khanqsaer-euq yawshaef pyeuf-awr, Miqyaer-euq shaevdzeuf byan-eu ghaq pyeuf-eu mae. Aqyawf, aqyawf-euq baoq anr-eu dawq-anr ghoe-awr, dawqtawv luf-anr hawlanr lavsav luf-eu mae. Aqyawf, aqyawf-euq mawrdo nae aqdui-euq iqbax-anr tsiqshawr ghaq-awr, yawgor-anr khanqsaer huiq-eu Ghaq-euq armar paw nuirluf-eu mae.

Zaqyo, Mqtav Ghaqkhaer Navmaqtser Huiqdzaeq-eu

⁴ Aqyawf nae jeqbir lof-aer za-euq tsawrmyanr-aq, mqtav ghaqkhaer deuq-euq tsawrmyanr navmaqtser huiqdzaeq muiqdzaeq-awr, mqtav ghaqkhaer deuq navmaqtser huiqdzaeq manrdzaeq-eu mae.

⁵ Miqyaer, mqtav ghaqkhaer aqgeu ghaq-anr heulof-aer aernaeq haw-euq la? “Nawr-aq, ngaq-euq Zaqyo ma. Iqnan, ngar, nawq-euq Aqda pyeuflar-euq ma.” (Jc 2:7) Maqngeur nar-aq, “Ngar-aq, aqyawf-euq Aqda pyeuf-awr, aqyawf-aq, ngaq-euq zaq pyeuf taef-a.”

⁶ Aerkhawf, aqyawf-euq huqbaw zaqyo ghaq-anr mirtsaq-euq khoertav bi’oe ngae, aqyawf heulof-aer aer-eu mae, “Miqyaer-euq mqtav ghaqkhaer dawqtawvluf, aqyawf-anr uqduq tanq-awq.” (Dm 32:43)

⁷ Mqtav ghaqkhaer deuq-euq garkawv aqyawf aer-eu, “Aqyawf-euq mqtav ghaqkhaer-anr jaqlaer bipyeuf-awr, Aqyawf-euq gar mrzaq-anr miqdzaq miqlmr bipyeuf-euq mae.” (Jc 104:4)

⁸ Aerkhawf, Zaqyo-euq garkawv Miqyaer heulof-aer aer-eu mae, “Miqyaer-or! Nawq-euq nuirmanq-aq, mqmaq maqbyav yarzir li-eu maqbaw-a. Nawq-euq mirkhanq-euq shmr gawqyoeq-aq, tsaq-awr dawr-eu shmr gawqyoeq mae.

⁹ Nawr tsaq-awr dawr-eu jeq-anr gaq-awr, Zanrdawq-anr leur-eu jeq-anr byae-eu mae. Khoermirnae, nawq-euq Miqyaer pyeuf-eu Miqyaer-aq, Nawq-euq cawqdeuq-anr navmaqtser, Nawq-anr laqkhaq caer-eu jeq nae tsaqtsov naeq-euq mae.” (Jc 45:6-7)

¹⁰ Khoeruqtaf, “ Sanqpaq Miqyaer-or! Ardanqbae ngae, nawr, mirtsaq tanqkhawr-euq dawqpaeq duqpur ciqtsaq taq-awr, Mqdeuq khawf nawq-euq lafzar pyeuf-eu mae.

¹¹ Khoerdeuq dawqtawvluf cawv-ir jir khawf, Nawr-aq, zif taef-a. Khoerdeuq dawqtawvluf maeqtsoeq lof-aer caer-ir taef-a.

¹² Paerkhanq paermanr-anr yovtaq-eu lof-aer, Nawr khoerdeuq-anr yovtaq-awr, Khoerdeuq parlar taef-a. Aerkhawf, nawr-aq, tiqjawr-iq maqpov maq parlar-aer, Nawq-euq arkhof arla-aq, li-eu maqbaw-a.” (Jc 102:25-27)

¹³ Aerkhawf, Miqyaer, mqtav ghaqkhaer aqgeu ghaq-anr heulof-aer aernaeq haw-euq la? “Ngar, nawq-anr muir-eu deuq, Nawq-euq aqkuir cawqtaqduq maqbi pyeuflar-euq khoerkeuvni, Ngaq-euq armar paw nuir-awq.” (Jc 110:1)

¹⁴ Kuirlaf zaqkhav pyeuf-eu saflar dawqtawvluf, kakhof-eu jeq jeqbir lof-aer za-eu tsawrhaq deuq-anr bi cawba-eu laer, Miqyaer nae khaerghae lef-euq maqngeur-a lor?