Gawˇlawˇsehˇ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kalizaq Mr Paq-aer Ghae-eu Jeq

¹ Yawsanr deuq-or! Yawqha-euq zaqkhav deuq-anr yawtsaq yawdawr dawr-aer janrnaeq-awq. Aqjeq mirnae aernar-aq, nawmaf khawf, mq-euq khoertav Yawsanr tiq ghaq jawr-eu mae laer siqnya-eu mae.

² Maq tsaevlerni nuima keuv-awr guiqlanq shar-awq. Yawbeur beur-aer Miqyaer-euq guiqlanq-anr jaceuq-eu lafkhoer shar-awq.

³ Nga’maf, Kali-euq garkawv zaftaq-euq jeq ngaeqnaeq nya’ni, Miqyaer, nga’maf-anr dawq khoer-euq gharduq larghov pannaeq lafni guiqlanq shar-awq. Khoermirnae, ngar shmrcav daqluf-eu ma.

⁴ Ngar, zaftaq-euq jeq khoer, ngaeq paq-aer ghae-eu lof-aer byacaevni ngaeqnya’ni khawf, guiqlanq sharnaeq laf-awq.

⁵ Kalizaq maqngeur-eu deuq-euq maeqshi, zaqsiq tsawrganr anr-eu tsawrhaq lof-aer daef-awq. Aryamq yawmuiq-aer zmq-awq.

⁶ Nawmaf ngaeq-eu dawqdeuq, aqmyanluf guiqlanq yawdzanr byan-awr, saqdeuf dawvkuir taq-euq lof-aer, aqsur ghaq-anr aqjox-aer ngaeqkhof naeq-eu tsaq nga laer siqnya-awr ngaeq-awq.

Arsaq Saq-eu Dawq

⁷ Ngar zawr gaq-eu maernmr Durjir-aq, ngaq-euq garkawv dawqtawvluf nawmaf-anr ja’naeqlaf taef-a. Aqyawf-aq, sarjax zif-eu kuirlaf zaqkhav hawr-eu ngaq naeq-aer tiqkawv lof-aer Miqyaer-euq gar mrzaq pyeuf-eu mae.

⁸ Aqyawf, nawmaf aqjox-aer pyeufluf-eu garkawv siqnya-awr, nawmaf-euq nuima-anr bi sarlarni, heu-euq gharduq, ngaq nae aqyawf-anr nawmaf jawr-eu gar bi’oe-euq ma.

⁹ Khoeruqtaf, nawmaf jawr-eu gar nae lar-euq aqdui zawr gaq-awr, sarjax zif-eu maernmr Awqneqsiqmur-anr khawf aqyawf naeq-aer bi’oe-euq ma. Aqyawfnyaf heugar khar pyeufluf-eu yawqjeq navluf nawmaf-anr bisiq naeqlaf taef-a.

¹⁰ Ngaq naeq-aer kuv-anr urluf-eu Aqliqdaqgur, nawmaf-anr dawqcawq puqanr lef-euq mae. Baqnaqbar-euq aqdur Maqkuv khawf, nawmaf-anr dawqcawq puqanr lef-euq mae. (Maqkuv-euq garkawv ngar, nawmaf-anr khaertaq-euq lof-aer, aqyawf, nawmaf jawr-eu gar oekeuv nar-aq, aqyawf-anr hageuf-awq).

¹¹ Yurtuq laer kur-eu Yeqsur khawf, nawmaf-anr dawqcawq puqanr lef-euq mae. Bawkhov maeqdzaq yaeq-euq tsawrhaq deuq-euq lafkhoer, ngaq naeq-aer Miqyaer uvlanr-eu jeq-euq gharduq gar mrluf-eu-aq, heu smr ghaq taef mae. Aqyawfmaf, ngar nuima sarlarni janrnaeq laf-euq mae.

¹² Nawmaf-euq lafkhoer Kali-euq kuirlaf zaqkhav pyeuf-eu Irbaqpaqlar, nawmaf-anr dawqcawq puqanr lef-euq mae. Nawmaf, Miqyaer nuima tsaq-eu yawqjeq navluf-euq lafkhoer, zifdanni yawfnya lar-awr byanlarni, aqyawf aqmyanluf laejae-awr guiqlanq yawkhav-aer sharluf-eu mae.

¹³ Aqyawf-aq, nawmaf-euq gharduq, Lawqdiqciv hawr-eu Heqlaqbawrlir-anr jawr-eu tsawrhaq deuq-euq gharduq, nuima zawr-aer keuv-eu mae laer ngar sarkirkamq ma.

¹⁴ Aqdui zawr gaq-eu nargawr lavsav-eu Lurkaf hawr-eu Deqmav khawf, nawmaf-anr dawqcawq puqanr lef-euq mae.

¹⁵ Lawqdiqciv-anr jawr-eu aqyuif aqnyir deuq-anr khawf, Noqpar hawr-eu aqyawf-euq nymr-anr uiqler luf-eu Kalizaq armur-anr khawf dawqcawq puq-eu ma.

¹⁶ Sanqbof heu nawmaf guighaq-euq nar-aq, Lawqdiqciv Kalizaq armur-anr khawf bigui law. Nawmaf khawf, Lawqdiqciv nae za-euq sanqbof gui-awq.

¹⁷ Aqgirpuv-anr heudawq aernaeq-awq, “Sanqpaq Miqyaer-anr nae za-euq guiqlanq-euq gar, nawr mrluiv jirnya ngae keuvni yawmuiq-aer mr-awq.”

¹⁸ Ngar Pawrluv, ngaq-euq aqlaf nae sanqbof bof-awr dawqcawq puq-eu ma. Ngar shmrcav daqluf-eu gar taqngaer de-eq. Miqyaer-euq guiqlanq yawdzanr nawmaf-euq khoertav jav luf-ur. Aqmeq.