Gawˇlawˇsehˇ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrganr Taf-aer Dzaeq-eu Kali

¹ Nawmaf-euq gharduq, Lawqdiqciv-anr jawr-eu deuq hawr-eu ngaq-euq myavpyawq maq mawrhaw-euq tsawrhaq deuq-euq gharduq, ngar arnavni deuvcae caeluf-eu nga laer, nawmaf-anr bi siqnya’mawf mir-a.

² Aqyawf maf-euq nuima ghaq khavlar-awr, gaq-eu lafkhoer tiqghaq tirghaq gmlar-eu uqtaf, Aqda Miqyaer hawr-eu Kali-anr nae oe-euq, Miqyaer nae zaftaq-eu jeq-anr siqnya-eu tsawrganr hawr-eu, tiqbyan tiqlof yawduq baw-awr ghovshaw nya-eu jeq kharsanr-eu dawqtawv luf-anr bi za’mawf mir-a.

³ Poeq-awr lawq-eu zaqsiq tsawrganr hawr-eu siqnya-eu tsawrganr dawqtawvluf, Kali-euq lafkhoer zaftaq-euq mae.

⁴ Aqcawq, nawmaf-anr gheupyawr lar-eu dawq ngaeqngaeq-aer maqbi shuirtawvni, ngar heulof-aer aer-eu ma.

⁵ Ngaq-euq mawrdo nawmaf naeq-aer maqjawr-eu khawf, ngaq-euq nuima nawmaf naeq-aer javluf-eu ma. Nawmaf, aqyawf jeqyawf tsaqtsaqni mrluf sharluf-awr, Kali-anr zifdanni janluf-eu mirnae, ngar laqkhaqcaer mir-a.

⁶ Khoermirnae, nawmaf, Sanqpaq Yeqsur Kali-anr hageuf-euq lof-aer, aqyawf-euq lafkhoer daef-awq.

⁷ Nawmaf, aqyawf-euq lafkhoer duqcir ka’naf ghae-awr, tsovgordav lef-awq. Guiqlanq-anr jaceuq-eu jeq byankhar luf-eu lafkhoer, nawmaf nae yadzaw-euq lof-aer, jan-eu jeq-euq lafkhoer zifdanni jawr-awq.

⁸ Tsawrganr siqzaq-euq dawqmaeq hawr-eu gardanr maqtsoeq-eu jaqmyawf maershuir dawqdeuq ngaeqngaeq-aer, nawmaf-anr shuirlar-eu tsawrhaq-anr yanr-awr, tiqghaq nae-iq taqbi shuirtawv. Dawq khoerdeuq-aq, Kali-anr maqtaf-aer, tsawrhaqzaq-euq zanroer-anr taf-eu dawq hawr-eu, mirtsaq-euq zanrsanrkhof-anr taf-eu dawqdeuq mae.

⁹ Aqjeq mirnae aernar-aq, Miqyaer kharpyeuf-eu jeq Kali-euq mawrdo-euq lafkhoer tiqbyanni byanluf-eu mae.

¹⁰ Nawmaf, aqyawf-euq lafkhoer byanlar-euq mae. Aqyawf-aq, mqsanr deuq hawr-eu aryaq deuq dawqtawv luf-euq khoertav uqduq pyeuf-eu ghaq mae.

Zanroer Taf-aer Dzaeq-eu Kali

¹¹ Nawmaf, aqyawf-euq lafkhoer bawkhov maeqdzaq yaeq-euq mae. Khoer-aq, tsawrhaqzaq-euq aqlaf nae yaeq-euq maqngeur-a. Mawrdo-anr taf-eu shiqshaq-euq iqbax laevdzaeyaf nya’ni, Kali-anr taf-eu bawkhov maeqdzaq yaeq-euq mae.

¹² Nawmaf bartirsaq hageuf ngae, Kali naeq-aer bi bafpanq-euq mae. Aqyawf-anr shir-euq gar nae bi ghofdaef lar-euq Miqyaer gar mrluf-eu gar jan-eu mirnae, bartirsaq hageuf-eu lafkhoer, nawmaf, aqyawf naeq-aer tiqkawv lof-aer ghofdaef lar-euq mae.

¹³ Dzeurlaf ngae, nawmaf-aq, mrbanq lavbanq-eu lafkhoer hawr-eu shiqshaq paw bawkhov maeqdzaq maqyaeq-euq lafkhoer, shir-euq tsawrhaq pyeuf-eu khawf, Miqyaer, nawmaf-anr Kali naeq-aer tiqkawv lof-aer yawdaef bi daeflar-awr, nawmaf nae mrbanq lavbanq-euq dawqtawv luf-anr pyaeqnaeq jir-euq mae.

¹⁴ Aqdui-anr muir-awr coeqlar-eu, aqlaf nae boftaq-euq zanrtaq khoftaq-anr sivbyov dzae-eu laer aqyawf yurdov ghae-awr, lafyaq-euq khoertav taftaeq-euq mae.

¹⁵ Aqyawf heu-euq lafkhoer, mqsanr hawr-eu aryaq deuq-anr ghaqler-awr, aqyawfmaf shafdawr paq-aer aqcawq-euq maeqshi byacaevni janrnaeq-euq mae.

¹⁶ Khoermirnae, dzaqdzaq dawrdawr, yawbui bui-eu, lalov latsaev lan-eu hawr-eu landaw jawrnan lan-eu garkawv heudeuq-euq baqda’nae, nawmaf-anr tiqghaq nae-iq yarkhaq taqbi dar.

¹⁷ Heudeuq-aq, aqkar keuvle-eu laer ghae-eu jeq-euq arbar narshmr taef mae. Aerkhawf, arbar narshmr-euq shaqmar-aq, Kali mae.

¹⁸ Gardanr maqtsoeq-eu gar shiqshaq nuilov-euq lafkhoer nuima huiq-awr, yawqha nae maq mawrhaw-euq jeq-anr banqgha-eu uqtaf, nuinanq nuiyu jaqmyawf anr-awr, mqtav ghaqkhaer-anr uqduq tanq-eu heudeuq-anr nuikhanr shir-eu tsawrhaq tiqghaq nae-iq, nawmaf-euq mrpoeq lafsawq maqbi shuirdovni yanr-awq.

¹⁹ Aqyawf maf-aq, uqduq-anr maq tsoftsaf-a. Uqduq-anr khar tsoftsaf taq-euq mawrdo-aq, yoeqtsuif yoeqlaf hawr-eu shaqguq shaqcav nae aqyawf saer aqyawf gheutsaf taq-awr bidzaq bi dawrluf-eu mirnae, Miqyaer nuima tsaq-eu lof-aer huiqlar manrlar nya-eu mae.

²⁰ Nawmaf, Kali naeq-aer shir-awr, mirtsaq-euq zanrsanrkhof heudeuq-anr nae ghawq-ir dzeur-euq ngeur nar-aq, aqjeq mirnae mirtsaq-anr taf-eu lof-aer par daefluf-eu le? Nawmaf zanrtaq khoftaq heudeuq-euq uqmov jawrluf-eu le siq laq?

²¹ “Maq toeqciv khmq-a, maq myeufhaw khmq-a, maq nyaeftaeq khmq-a.”

²² Tsawrhaq-euq zanrdawq khofdawq hawr-eu dawqmaeq dawqtsov khoerdeuq dawqtawv luf-aq, zmq ngae cawv-ir byov-ir nya-eu jeq-anr taf-eu taef mae.

²³ Tsawrhaq nae noeqdov-euq zanr tawq-eu, nuinanq nuiyu jaqmyawf anr-eu, yawqha-euq mawrdo-anr khaeq-awr khav-eu, khoerlof-aer janr-eu deuq-aq, zaqsiq tsawrganr anrgar dur-eu khawf, shiqshaq-euq nuikhanr-anr ghaqlerni tiqjeq-iq gardanr maqtsoeq-a.