Gawˇlawˇsehˇ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Miqyaer nuima tsaq-eu mirnae, Yeqsur Kali-euq ghaqkhaer geufluf-eu Pawrluv ma. Aqdui-euq maernmr Tivmorseq nga’nyaf,

² Kali-euq lafkhoer sarjax zif-eu aqyuif aqnyir, Gawrlawrsaer-anr jawr-eu tsawrshawr deuq-anr sanqbof bofanr lef-euq ma. Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu, nuisar of-eu jeq, nawmaf-euq khoertav jav luf-ur.

Miqyaer-euq Guiqlanq-anr Jaceuq-eu Dawq

³ Nga’maf, nawmaf-euq gharduq aqmyanluf guiqlanq shar-awr, aqdui-euq Sanqpaq Yeqsur Kali-euq Aqda Miqyaer-anr jaceuqluf ma.

⁴ Aqjeq mirnae aernar-aq, nawmaf, Yeqsur Kali-anr janluf-awr, tsawrshawr dawqtawv luf-anr gaqluf-eu garkawv nga’maf yagaq-euq ma.

⁵ Khoeruqtaf, nawmaf-euq gharduq mq-euq khoertav jeqhmq taq-euq noeqtmq-eu jeq-euq baqda’nae khawf, Miqyaer-anr jaceuq luf-eu ma. Noeqtmq-eu jeq khoer-aq, dzeurlaf ngae, nawmaf nae yagaq-euq dawq yawtsaq yawdawr-euq guiqlanqdawq khoer mae.

⁶ Yawtsaq yawdawr-anr taf-eu Miqyaer-euq guiqlanq yawdzanr garkawv khoer, mirtsaq doeni gaqbyan-ir-awr, arsiq siqle luf-eu lof-aer, nawmaf jawr-eu gar gaqkeuv le-awr, nawmaf yagaq-awr siqnya-euq nan-anr nae nar-aq, nawmaf-euq ghanrcae khawf arsiq siqle luf-eu mae.

⁷ Nga’maf naeq-aer tiqkawv lof-aer kuirlaf zaqkhav geufluf-eu, nga’maf zawr gaq-eu Irbaqpaqlar-anr nae, nawmaf garkawv khoer yadzaw-euq mae. Aqyawf-aq, nawmaf-euq gharduq sarjax zif-eu lafkhoer, Kali-euq kuirlaf zaqkhav pyeuf-eu mae.

⁸ Muiq-eu Saflar baqda’nae nawmaf, nga’maf-anr gaqluf-eu garkawv aqyawf ja’naeq laf-euq mae.

Pawrluv-euq Guiqlanq Shardawq

⁹ Khoermirnae, nga’maf yagaq-euq ngae nan-anr nae, maq naqni nawmaf-euq gharduq guiqlanq sharluf-eu ma. Zaqsiq tsawrganr hawr-eu saflar paw-euq ghovshaw nya-eu jeq dawqtawv luf-euq lafkhoer, nawmaf, Miqyaer nuima tsaq-eu jeq-anr siqnya-eu tsawrganr anrlarni sharluf-eu ma.

¹⁰ Khoernar-aq, nawmaf, Sanqpaq Miqyaer-anr geuxni daefnya lar-awr, yawqjeq navluf-euq lafkhoer aqyawf, nawmaf-anr nuikhanr shir-eu uqtaf, nawmaf yawmuiq yawqjeq navluf mr-awr shar-eu lafkhoer arsiq siqle-awr, Miqyaer-anr siqnya-eu tsawrganr myaqlar taef-a.

¹¹ Aqyawf-euq yawshaef khanqsaer huiq-eu baoq baqda’nae, nawmaf laqkhaq caertavni yawqjeq navluf-euq lafkhoer, ornya-awr nuima ghawqmanrni taqnya’ni, baoq dawqtawvluf nae nawmaf-anr ghaq bi khavlar-awq laer sharluf-eu ma.

¹² Yawshaef-euq lafkhoer jawr-eu tsawrshawr deuq naeq-aer aqdui jeqbir of-eu tsawrhaq pyeuf-eu gar geuxni, janrnaeq laf-euq Aqda Miqyaer-anr jaceuq-awq.

¹³ Aqyawf, aqdui-anr yawzanr-euq baoq-euq lafkhoer nae bibuq-ir naeqlaf-awr, aqyawf zawr gaq-eu Zaqyo uvlanr-eu jeq-euq lafkhoer sheuqur naeqlaf-euq mae.

¹⁴ Aqyawf-euq lafkhoer, aqyawf-euq shiq baqda’nae, aqdui kakhof-eu jeq hawr-eu iqbax pyaeq-eu jeq za-euq ma.

Muiqdui Byan Duidui-eu Kali

¹⁵ Kali-aq, maq mawrlar-eu Miqyaer-euq shaevdzeuf pyeuf-awr, baetaq-euq yawqjeq navluf-euq khoertav huqbaw zaqyo ghaq pyeuf-eu mae.

¹⁶ Aqjeq mirnae aernar-aq, mq-euq khoertav hawr-eu mirtsaq-euq khoertav kharjawr kharjav-eu mawrlar-eu jeq hawr-eu maq mawrlar-eu jeq, nuirmanq-anr nuir-eu deuq, sanqpaq deuq, mqsanr deuq, aryaq deuq, yawqjeq navluf aqyawf-anr ghoe-awr nae bae-awr, aqyawf-euq gharduq baetaq-euq mae.

¹⁷ Aqyawf, yawqjeq navluf-euq maeqhu nae daefluf jawrluf-awr, yawqjeq navluf, aqyawf-anr ghoe-awr jawrluf javluf-eu mae.

¹⁸ Kali-aq, aqyawf-euq mawrdo pyeuf-eu Kalizaq armur-euq uqduq pyeuf-eu mae. Aqyawf-aq, ardanq bae-eu ghaq pyeuf-awr, yawqjeq navluf-euq khoertav uqdzan ghaq pyeuflarni, shir-euq deuq-anr nae ghofdaeflar baebae-euq ghaq pyeuf-eu mae.

¹⁹ Aqjeq mirnae aernar-aq, aqyawf-euq lafkhoer byan-eu jeq dawqtawvluf byan-eu gar, Aqda nuikhanr shir-eu mae.

²⁰ Aqyawf-euq baqda’nae, mirtsaq-euq khoertav hawr-eu mq-euq khoertav kharjawr kharjav-eu yawqjeq navluf, aqyawf-anr tsaqlar dzoerlarni, aqyawf-euq lafyaq-euq khoertav yoerle-euq shiq-anr ghoe-awr bitsaq bi dzoerlar-euq mae.

²¹ Dzeurlaf ngae, nawmaf, Miqyaer-anr nae zanrdof kaq-awr, yawcawv jeq mr-awr, nuima-euq lafkhoer aqyawf-anr muir-euq mae. Aerkhawf, nymq-mr nawmaf, aqyawf-anr tsaqler dzoerlerni, aqyawf janrnaeq laf-euq mae.

²² Khoer-aq, nawmaf, Miqyaer-euq maeqshi, aerkhar maqza-aer iqbax taqkhar maqza-eu uqtaf, shawr-eu tsawrhaq lof-aer bi jawrlerni, shiqshaq baw-eu Kali-euq mawrdo shirdan-euq gar ghoe-awr janr-euq mae.

²³ Nawmaf nae yagaq-euq guiqlanq dawq-anr taf-eu noeqtmq-eu jeq-anr nae maq jivdov-ir ni, jan-eu lafkhoer dawqpaeq zif-awr, zifdanni nyaeftaeqtaq nya-euq ngeur nar-aq, khoer-aq, mq-euq uqmov baetaq-euq yawqjeq navluf-anr dawqmaeq maeqnaeq-euq mirnae mae. Ngar, Pawrluv khawf khoer-euq gharduq kuirlaf zaqkhav geuflar-euq ma.

Yawshaef Khanqsaer Za’ni Noeqtmqduq

²⁴ Nymq-mr ngar, nawmaf-euq gharduq shaqzanq ya daqluf-eu khawf, laqkhaqcaer mir-a. Aqjeq mirnae aernar-aq, Kali, aqyawf-euq mawrdo pyeuf-eu Kalizaq armur-euq gharduq maqya daqjir-euq shaqzanq deuq daqbyanni, ngar, ngaq-euq shiqshaq-euq lafkhoer daqluf-eu ma.

²⁵ Miqyaer-euq dawq byanlarni, hawpir-eu ghaq pyeufni Miqyaer, ngaq-anr tserdov-awr, nawmaf-euq gharduq, kuirlaf zaqkhav bi geufnaeq laf-euq mae.

²⁶ Arhu nae tiqzir sair tiqzir daeqkaq-awr zaftaq-euq jeq pyeuf-eu khawf, nymq-mr aqyawf-euq tsawrshawr deuq-anr panmaeq naeq-euq mae.

²⁷ Zaftaq-euq heujeq, yawshaef khanqsaer arnavni sanr-eu garkawv, Miqyaer, aqcawq tsawrjeuq tsawrca-euq ghanrcae jawr-eu aqyawf maf-anr bi siqnya mawf-eu mae. Zaftaq-euq jeq heu-aq, Kali, nawmaf-euq lafkhoer jawr-eu mirnae, nawmaf, yawshaef khanqsaer za’ni noeqtmqduq pyeuf-eu mae.

²⁸ Nga’maf, aqyawf-euq garkawv dawqmaeq maeq-eu-aq, tsawrhaq yawqghaq navluf, Yeqsur Kali-euq lafkhoer tsawrkhav khavlar-euq tsawrhaq lof-aer a’naeq-eu gharduq, yawqghaq navluf yanryanr-aer daefnya’ni, zaqsiq tsawrganr dawqtawvluf zmq-awr, maeqnaeq tsovnaeq luf-eu ma.

²⁹ Kali, ngaq-euq lafkhoer baoq huiq duidui-eu jeq nae gar mrluf-eu gar ghoe-awr, teu-euq gharduq ngar khawf laejae-awr gar mrluf-eu ma.