Gaˬlaˬtiˆ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khavbaev Cawpi-awq

¹ Aqyuif aqnyir deuq-or! Tsawrhaq tiqghaqnav mrbanq mrlaeq luf-eu nar-aq, nawmaf saflar paw ghaq khav-eu deuq, nuima nanqyuni anr-awr aqyawf-anr sheuqpyawrkhof laf-eu tsaq mae. Yawqha khawf, murjur jur-eu maeqnan maqya cantae ghaeni yanr-awq.

² Nawmaf, Kali-euq zanr-anr mrbyanni, tiqghaq tirghaq-euq khavbaev cawpi-awq.

³ Tsawrhaq tiqghaqnav tiqjeq-iq gardanr maqtsoeq-eu gar nae, yawqhar yawqha gardanrtsoeq ma laer noeq nar-aq, yawqhar yawqha jaqmyawf myawf-eu mae.

⁴ Aqcawq nae mr-euq gar-anr maqngeur-eu, yawqha nae mr-euq gar-anr taef-aer haw-awr laqkhaqcaer nya’ni, yawqghaq navluf yawqha mr-awr shar-eu gar tsermr haw-eu tsaq mae.

⁵ Aqjeq mirnae aernar-aq, yawqghaq navluf yawqha-euq khavbaev yawqha yapi-eu mae.

⁶ Guiqlanqdawq dzaw-eu tsawrhaq-aq, yawqha-anr maeqnaeq laf-euq ghaq-anr yawmuiq yawqjeq navluf birnaeq-eu tsaq mae.

⁷ Taq noeqbanq de-eq. Miqyaer-anr jaqmyawf maq myawfnya-a. Yawqha aqjeq ka nar-aq, khoerjeq yayaeq taef-a.

⁸ Yawqha-euq shiqshaq-anr taf-eu jeq saeq nar-aq, shiqshaq-euq baqda’nae buf-ir cawv-ir-eu jeq yayaeq taef-a. Muiq-eu Saflar-anr taf-eu jeq saeq nar-aq, muiq-eu Saflar-euq baqda’nae mqmaq maqbyav yarzir daef-eu jeq yayaeq taef-a.

⁹ Khoermirnae, ghaqbyaev maqbyaevni yawmuiq jeq mr kar-eur. Aqdui nuima maqcawv nar-aq, aryamq tsaqlar ngae yayaeq taef-a.

¹⁰ Khoeruqtaf, aqdui khar yaeflar ngae, tsawrhaq dawqtawv luf-anr yawmuiq jeq mrnaeq kar-eur. Aqcawq-anr navmaqtser, jan-eu nymrkhanq-euq lafkhoer mrnaeq-eu tsaq mae.

Arsaq Saq-eu Dawq

¹¹ Ngaq-euq aqlaf nae nawmaf-anr bofnaeq luf-eu sanqbof armawr heudeuq, arnavni huiq-eu nga laer hawsher-eq.

¹² Shiqshaq-euq lafkhoer yawmuiq janrgeuf mawf-awr tsawrhaq khoerdeuq, nawmaf-anr bawkhov maeqdzaq yaeq laer katir lar-eu khoer-aq, aqyawfmaf, Kali-euq lafyaq-euq baqda’nae khaeq-awr khav-eu gar maqya daqni janr-eu taef mae.

¹³ Aqdir aernar-aq, aqyawfmaf bawkhov maeqdzaq yaeq-euq khawf, zanrdawq-euq maeqnan maq cantae-a. Aerkhawf, nawmaf bawkhov maeqdzaq yaeq-euq mirnae, aqyawfmaf khanqsaer jaevkhar zalarni, nawmaf-anr bawkhov maeqdzaq bi yaeqmawf-eu taef mae.

¹⁴ Aerkhawf, ngar lawnmr-aq, aqdui-euq Sanqpaq Yeqsur Kali-euq lafyaq-anr taef-aer nuima huiq-awr, nuijeq tiqjeq-anr-iq nuima maqhuiq. Aqyawf-euq baqda’nae, mirtsaq heu-aq, ngaq-euq gharduq lafyaq-euq khoertav taftaeq dzeur-awr, ngar khawf, mirtsaq-euq gharduq-aq, lafyaq-euq khoertav bi tafsaef dzeur-euq ma.

¹⁵ Aqjeq mirnae aernar-aq, Yeqsur Kali-euq lafkhoer bawkhov maeqdzaq yaeq-eu hawr-eu maqyaeq-eu heu-aq, tiqjeq-iq gardanr tsoeq-eu maqngeur-a. Tsawrhaq yawshuif pyeuflar-eu taef-aer gardanr tsoeq-eu mae.

¹⁶ Heulof-aer khar mrcaw-eu tsawrhaq yawqghaq navluf hawr-eu, Miqyaer-euq Irsaqleqlav tsawrhaq-euq khoertav, nuisar of-eu jeq hawr-eu ghawqshaq gaq-eu jeq jav luf-ur.

¹⁷ Iqnan tafnar-aq, tsawrhaq tiqghaq-iq ngaq-anr taq banqghalar. Aqjeq mirnae aernar-aq, ngaq-euq mawrdo-anr Sanqpaq Yeqsur nae tsaqtsov taq-euq marbyawf baw-eu ma.

¹⁸ Aqyuif aqnyir deuq-or! Aqdui-euq Sanqpaq Yeqsur Kali-euq guiqlanq yawdzanr, nawmaf-euq nuima saflar-euq lafkhoer anr luf-ur. Aqmeq.