Gaˬlaˬtiˆ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Buq-ir-euq Tsawrhaq

¹ Aqdui buq-ir-euq tsawrhaq pyeufni, Kali, aqdui-anr bibuq-ir naeqlaf-euq mae. Khoermirnae, zifdanni jawr-awr zaqkhav-euq khavbaf taqpar baf.

² Ngar Pawrluv, nawmaf-anr heulof-aer aernaeqmawf mir-a. Nawmaf bawkhov maeqdzaq yaeq-eu zanr tawq nar-aq, Kali, nawmaf-euq gharduq gardanr maqtsoeq-a.

³ Bawkhov maeqdzaq yaeq-eu zanr khartawq-eu tsawrhaq-anr ngar tiq pov par aerduqnaeq nyar. Zanr khoer tawq-eu tsawrhaq-aq, zanrdawq dawqtawv luf-anr ya mrbyan-eu dzirdzov dav-eu mae.

⁴ Nawmaf, zanrdawq-euq baqda’nae tsaq-awr dawr-eu tsawrhaq pyeuflar taef-a laer kharnoeq-eu deuq-aq, Kali-anr maqpar taf-aer, guiqlanq yawdzanr-anr nae dov-ir-euq mae.

⁵ Jan-eu baqda’nae aqdui, muiq-eu Saflar-anr ghoeghoe-aer, noeqtmq luf-eu tsaq-awr dawr-eu jeq-anr nuima keuv-eu lafkhoer dawqluf-eu ma.

⁶ Aqjeq mirnae aernar-aq, Yeqsur Kali-euq lafkhoer jawr-eu tsawrhaq deuq, bawkhov maeqdzaq yaeq-eu hawr-eu maqyaeq-eu-aq, tiqjeq-iq gardanr maqtsoeq-a. Aerkhawf, gaq-eu lafkhoer mrdov shardov laf-eu jan-eu jeq taef-aer gardanr tsoeq-eu mae.

⁷ Dzeurlaf ngae, nawmaf yawmuiq-aer caev-euq mae. Yawtsaq yawdawr jeq-anr maqbi narhaq geufni, nawmaf-anr aqsur ghaq lavtsoeq lar-euq la?

⁸ Khoerlof-aer mur-eu-aq, nawmaf-anr kur-euq ghaq-anr nae oe-euq maqngeur-a.

⁹ Daeqtseq uicuiv taef khawf, caermeu tiq siq siqlanni bi poqlar nya-eu mae.

¹⁰ Nawmaf-euq nuinoeq yawqjeq yawq-aer maqpyeuf-ir-ar laer Sanqpaq Miqyaer-euq lafkhoer ngar, nawmaf-anr yawduqbaw ma. Aerkhawf, nawmaf-anr banqgha lar-eu aqsur ghaq maqkaq, yarkhaq dar-eu gar yadaq taef-a.

¹¹ Aqyuif aqnyir deuq-or! Ngar nymq-mr keuvni bawkhov maeqdzaq yaeq-eu zanr tawq-eu garkawv maeqluf-eu lawnmr-aq, aqjeq mirnae khaeq-awr khav-eu gar ya daqluf-eu la? Khoerlof-aer ngeur-eu lawnmr-aq, lafyaq-euq baqda’nae sanqtif tif-eu jeq maqpar jav-eu mae.

¹² Nawmaf-anr bi banqgha lar-eu khoerdeuq, yawqhar yawqha shawf nmr-aq ghaq-ar laer noeq mir-a.

¹³ Aqyuif aqnyir deuq-or! Nawmaf buq-ir-euq tsawrhaq bipyeuf-eu laer Miqyaer, nawmaf-anr kur-euq mae. Aerkhawf, buq-ir-euq khoer-anr shiqshaq-euq nuilov gharduq taqzmq. Gaq-eu lafkhoer, tiqghaq tirghaq-euq kuirlaf zaqkhav geufnaeq-awq.

¹⁴ Aqjeq mirnae aernar-aq, zanrdawq dawqtawvluf dawq heudawq-euq lafkhoer byanlar jir-euq mae, “Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.” (Lb 19:18)

¹⁵ Aerkhawf, nawmaf tiqghaq tirghaq kawfkawf-aer kawfsaef dzaqluf nar-aq, tiqghaq tirghaq lavcawv byovjir lar-eu gar yanr-awq!

Saflar-euq Arsiq Hawr-eu Shiqshaq-euq Gar

¹⁶ Khoermirnae, ngar, heulof-aer aermawf mir-a. Nawmaf shiqshaq-euq nuikhanr-anr maqya mrcawni, muiq-eu Saflar-euq lafkhoer can-awq.

¹⁷ Aqjeq mirnae aernar-aq, shiqshaq-euq nuikhanr-aq, muiq-eu Saflar-anr lavtsoeq-awr, muiq-eu Saflar khawf, shiqshaq-euq nuikhanr-anr lavtsoeq-eu mae. Nawmaf mrmawf-eu jeq maq mrnya’ni, heu nyiq jeqluf tiqjeq tirjeq muir-eu mae.

¹⁸ Aerkhawf, muiq-eu Saflar nae nawmaf-anr bi sheuqghae nar-aq, nawmaf, zanrdawq-euq lafov maqpar jawr-eu mae.

¹⁹ Shiqshaq-euq nuikhanr-aq, byacaevni heudeuq mrdov laf-eu mae: banq-awr joe-eu, banq-awr muv-eu, maqshawr-eu jeq mr-eu, jawflafni daef-eu lafkhoer khar daefmawf-eu lof-aer daef-eu,

²⁰ tanqpanq aqma mawrkawr-anr uqduq tanq-eu, ja’maw maw-eu, tiqghaq tirghaq muir-eu, caedzaq-eu, myavnav nav-eu, nuima dav-eu, huiqmawf manrmawf-eu, armaf birpav-eu, maqtsaq maqdawr-eu jeq maeq-eu,

²¹ maerjuir juir-eu, tsawrhaq lavsaef-eu, dzaqyaef dawryaef-eu, byaeqlaeq shaevdae-aer yawbui bui-eu hawr-eu heulof-aer ghae-eu deuq mrdov laf-eu mae. Heulof-aer ghae-eu deuq mr-eu tsawrhaq-aq, Miqyaer uvlanr-eu lafkhoer maqya urler-a laer arhu ngar, nawmaf-anr aernaeq-awr, nymq-mr khawf par aernaeq-eu ma.

²² Aerkhawf, muiq-eu Saflar-euq arsiq-aq: gaq-eu, laqkhaq caer-eu, nuisar of-eu, nuinoeq ghawqmanrni noeq-eu, ghawqshaq gaq-eu, yawmuiq jeq mr-eu, sarjax zif-eu,

²³ nuima nanqyuni ghae-eu, yawqha-euq nuima-anr ghaqler-eu, heudeuq mae. Heudeuq taqmr laer boftaq-euq zanrdawq maqjav-a.

²⁴ Yeqsur Kali-anr khartaf-eu tsawrhaq deuq-aq, shiqshaq naeq-aer shiqshaq-euq nuinoeq nuilov hawr-eu nuikhanr dawqtawvluf lafyaq-euq khoertav taftaeq-euq mae.

²⁵ Aqdui, muiq-eu Saflar-euq lafkhoer daefluf-eu ngeur nar-aq, aqdui, muiq-eu Saflar-anr ghoeghoe-aer daefghae kar-eur.

²⁶ Aqdui nuima maqhuiq-aer, tiqghaq tirghaq nuima maq lavpaer-eu uqtaf, tiqghaq tirghaq myav maq navni daef kar-eur.