Gaˬlaˬtiˆ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaq Hawr-eu Zaqkhav

¹ Ngar heulof-aer aermawf mir-a. Jeqbir of-eu ghaq, jeqbir dawqtawvluf, aqyawf-euq pyeuf-eu khawf, aqyawf, zaq yawnyir pyeuf ngae, zaqkhav-anr nae maq beugar-a.

² Aqyawf-euq aqda nae aertsaev taq-euq aryamq maq keuvlar-euq khoerkeuvni, aqyawf-anr hawpir-eu ghaq hawr-eu irkanr mrmyawq-anr hawpir-eu ghaq-euq lafov yajawr-eu mae.

³ Khoerlof-aer durni, aqdui, zaq yawnyir pyeuf ngae, mirtsaq-anr taf-eu zanr deuq-euq lafov zaqkhav yageuf-euq ma.

⁴ Aerkhawf, aryamq byanlar ngae, Miqyaer, aqyawf-euq Zaqyo-anr bi’oe-awr, zaqmiq aqbur-anr nae bi daefle-euq uqtaf, zanrdawq-euq lafov daefle-euq mae.

⁵ Aqdui, Miqyaer-euq zaq pyeuflarni, zanrdawq-euq lafov kalanr taq-euq tsawrhaq-anr kakhof dov-eu laer aqyawf khoerlof-aer daefle-euq mae.

⁶ Nawmaf-aq, Miqyaer-euq zaq mirnae, Miqyaer, aqyawf-euq Zaqyo-euq Saflar, nawmaf-euq lafkhoer bi jawrle-awr, “Aqba, Aqda-or!” laer kur-eu mae.

⁷ Khoermirnae, nawr, zaqkhav maqpar ngeur-aer, zaqyo pyeuflar-euq mae. Zaqyo pyeuflar-euq mirnae, Kali-euq baqda’nae Miqyaer-euq jeqbir of-eu mae.

Pawrluv Khanqlanr-eu

⁸ Nawmaf, Miqyaer-anr maq siqnya ngae, aqdirma-aer miqyaer maqngeur-eu deuq-euq zaqkhav geuf-euq mae.

⁹ Nymq-mr nawmaf, Miqyaer-anr siqnya lar-euq mae. Aqdir aernar-aq, Miqyaer, nawmaf-anr siqnya luf-eu mae. Ghaq baq-awr gardanr maqtsoeq-eu deuq jawr-eu paw aqjeq mirnae par ghof-ir-awr, khoerdeuq-euq zaqkhav par geufmawf-eu nya?

¹⁰ Nawmaf nanlan khawf lan, lalov latsaev khawf lan-awr, arkhof arla khawf lanluf-eu nga siq.

¹¹ Ngaq nae nawmaf-euq gharduq laejae-euq-aq, yawqngaef jeq nga laer noeqguv mir-a.

¹² Aqyuif aqnyir deuq-or! Ngar, nawmaf lof-aer pyeufle-euq mirnae, nawmaf khawf ngar lof-aer pyeuflar-awq laer sharmawf mir-a. Nawmaf, ngaq-anr mrlaeq taq-euq tiqjeq-iq maqjav-a.

¹³ Yawbae ngae pov, ngaq-euq mawrdo narlar-euq mirnae, nawmaf-anr guiqlanqdawq ya maeqnaeq-euq mae laer nawmaf siqnya-eu mae.

¹⁴ Ngar nar-eu mirnae, nawmaf-euq gharduq shaqzanq pyeuf-eu khawf, nawmaf, ngaq-anr maq hawnanr-eu lof-aer maq janrnaeq laf-euq uqtaf, maq byaerdzae naeqlaf-aq. Miqyaer-euq mqtav ghaqkhaer-anr hageuf-eu lof-aer hageuf naeqlaf-awr, Yeqsur Kali-anr hageuf-eu lof-aer hageuf naeqlaf-euq mae.

¹⁵ Arhu, nawmaf laqkhaq caer-eu khoer aqgeugar bibyov-ir jir-euq le? Khoerngae, nawmaf-euq myavnuiv kheufdov-awr, ngaq-anr dawvtsof naeqlafnya lawnmr-aq, dawvtsof naeqlaf mawf-eu mae laer nawmaf-euq garkawv ngar sarkir kamqnya-eu ma.

¹⁶ Nymq-mr ngar, nawmaf-anr yawtsaq yawdawr jeq aernaeq-eu mirnae, nawmaf-anr muir-eu tsawrhaq pyeufshaw-aq lor?

¹⁷ Tsawrhaq khoerdeuq, nawmaf-euq gharduq nuima keuv-eu gar dur-eu khawf, nuinoeq maqshawr-a de-eq. Nawmaf-anr bi dovle-awr, nawmaf, aqyawf maf-anr nuima bikeuv mawf-eu mirnae taef mae.

¹⁸ Aqmyanluf yawmuiq jeq-anr nuima keuv-awr mr-eu-aq yawmuiq mae. Aerkhawf, ngar, nawmaf naeq-aer jawr ngae taef-aer khoerlof-aer mr-eu jeq taqbi pyeuf.

¹⁹ Ngaq-euq zaqdeuq-or! Kali-euq shaevdzeuf nawmaf-euq lafkhoer pyeufdovlar ngae keuvni, zaq baw ngae nar-eu lof-aer, ngar, nawmaf-euq gharduq tiq pov parya narluf-eu ma.

²⁰ Ngar, nawmaf-euq garkawv noeq ngae maqdov nya. Nymq-mr ngar, nawmaf naeq-aer jawr lawnmr-aq laer noeqsaef nya. Jawr lawnmr-aq, dawq ngaeq-eu tersar lavpar-awr maeqnaeqmawf mir-a.

Haqgaqlar Hawr-eu Saqlar

²¹ Zanrdawq-euq lafov jawrmawf-eu deuq-or! Ngaq-anr aernaeqlaf sher-eq. Nawmaf zanrdawq aertaq-euq jeq-anr maq narhaq-eu le laq?

²² Zanrdawq-euq lafkhoer heulof-aer boftaq-euq mae. Aqbyaqhaq, zaqyo nyiq ghaq jawr-eu mae. Tiq ghaq-aq, aqbur zaqkhav ghaq-euq ovnae daefle-awr, tiq ghaq-aq, nymrsanr aqma ghaq-euq ovnae daefle-euq mae.

²³ Aqbur zaqkhav ghaq-euq ovnae daefle-euq ghaq-aq, shiqshaq-euq nuinoeq-euq baqda’nae daefle-euq mae. Nymrsanr aqma ghaq-euq ovnae daefle-euq ghaq-aq, sarjax dzaqtaq-euq lof-aer daefle-euq mae.

²⁴ Garkawv heu-aq, dawqtsuif naf-eu dawq-euq arbar mae: Zaqmiq aqbur heu nyiq ghaq-aq, dawqma sarjax nyiq jeq mae. Tiq ghaq-aq, Sirnav gawqjawq-anr taf-eu Haqgaqlar mae. Aqyawf, zaq baw-euq-aq, zaqkhav bigeuf-eu laer baw-euq mae.

²⁵ Haqgaqlar-aq, Aqlarbyaq mirkhanq-anr jav-eu Sirnav gawqjawq mae. Nymq-mr jav-eu Yeqlursaqlaeq-anr aermawf-eu mae. Aqjeq mirnae aernar-aq, Yeqlursaqlaeq hawr-eu aqyawf-euq zaqdeuq khawf zaqkhav geufluf-eu mae.

²⁶ Aerkhawf, mqtav jav-eu Yeqlursaqlaeq-aq, nymrsanr aqma ghaq mae. Aqyawf-aq, aqdui, yawqghaq navluf-euq aqma mae.

²⁷ Aqjeq mirnae aernar-aq, Yaerbof-euq lafkhoer heulof-aer boftaq-euq mae, “Zaq maq tsaevler nya-eu, maqbaw aqma-or! Laqkhaq caer-awq. Zaq baw-eu laer narnar-aer maq shaqhaw-euq deuq-or! Tersar yawkhav-aer gurdov laf-awq. Aqjeq mirnae aernar-aq, khaqdzerzaq maqbaw-eu ghaq-aq, khaqdzerzaq baw-eu ghaq myavmaqtser zaq jawrle taef-a.” (Isy 54:1)

²⁸ Aqyuif aqnyir deuq-or! Irtsav-aq, sarjax dzaqtaq-euq lof-aer daefle-euq gar durni, aqdui khawf khoerlof-aer daefle-euq ma.

²⁹ Khoerngae, shiqshaq-euq nuinoeq baqda’nae daefle-euq khoerghaq, Miqyaer-euq Saflar baqda’nae daefle-euq khoerghaq-anr khaeqnaeq khavnaeq-euq mae. Nymq-mr khawf khoerlof-aer pyeufluf-eu mae.

³⁰ Aerkhawf, Yaerbof-euq lafkhoer aqjox-aer aertaq-euq la? “Aqbur zaqkhav ghaq hawr-eu aqyawf-euq aqli-anr taedzae-awq. Aqjeq mirnae aernar-aq, aqbur zaqkhav ghaq-euq aqli-aq, nymrsanr aqma ghaq-euq aqli naeq-aer tiqkawv lof-aer jeqbir maqza nya-a.” (Adb 21:10)

³¹ Tox-aer ngeur nar-aq, aqyuif aqnyir deuq-or! Aqdui-aq, aqbur zaqkhav ghaq-euq zaq maqngeur-eu, nymrsanr aqma ghaq-euq zaq ma.