Gaˬlaˬtiˆ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zanrdawq Hawr-eu Jan-eu Jeq

¹ Gaqlaqtiv-anr jawr-eu aqdzawq argan deuq-or! Yeqsur Kali, lafyaq-euq khoertav bi tafsaef-euq khoer nawmaf-euq myavkhae byacaevni jav-eu khawf, nawmaf yawtsaq yawdawr-anr maq narhaqgeuf paq-aer, aqsur ghaq nae bi shuirtawv-euq le?

² Ngar, nawmaf-anr tiqjeq narhaq mawf-eu taef mir-a. Nawmaf, Yawshawr Saflar za-euq-aq, zanrdawq-anr mrcaw-euq mirnae-a lor? Maqngeur nar-aq, guiqlanqdawq yagaq-awr jan-euq mirnae-a laq?

³ Nawmaf, Yawshawr Saflar-anr ghoe-awr mrdanq baetaq-euq khawf, nymq-mr shiqshaq-anr ghoe-awr arsaq saq-eu ghae le lor? Nawmaf teunav nav-aer laf-eu nya laq?

⁴ Nawmaf shaqzanq-anr khoermyav myav-aer yadaq-euq khoer, yawqngaef-aer daq-euq le lor? Khoerdeuq yawqngaef mae laer ngar maq noeqnya.

⁵ Khoeruqtaf, Miqyaer, nawmaf-anr Yawshawr Saflar bifnaeq lef-awr, nawmaf-euq lafkhoer khavjeq-aer ghae-eu jeq janrdov laf-eu-aq, nawmaf zanrdawq-euq maeqnan cantae-euq mirnae-a lor? Maqngeur nar-aq, nawmaf guiqlanqdawq yagaq-awr jan-euq mirnae-a laq?

⁶ “Aqbyaqhaq, Miqyaer-anr jan-eu mirnae, aqyawf-anr tsaq-awr dawr-eu tsawrhaq mae laer sawxnaeq-euq mae.” (Adb 15:6)

⁷ Khoermirnae, jan-eu jeq anr-eu tsawrhaq deuq-aq, Aqbyaqhaq-euq zaqdeuq mae laer nawmaf siqnya-awq.

⁸ Aqcawq tsawrjeuq tsawrca jan-eu mirnae, Miqyaer, aqyawf maf-anr tsaq-awr dawr-eu tsawrhaq bi pyeuflar taef-a laer yawbae ngae nae Yaerbof mawrtaq-euq mae. “Nawq-euq baqda’nae, mirkhanq-euq tsawrjeuq dawqtawvluf guiqlanq za taef-a,” (Adb 12:3,18) laer Yaerbof, Aqbyaqhaq-anr guiqlanqdawq maeqnaeq baebae-euq mae.

⁹ Khoermirnae, jan-eu jeq anr-eu tsawrhaq-aq, nuijan anr-eu Aqbyaqhaq naeq-aer tiqkawv lof-aer guiqlanq za taef-a.

¹⁰ Zanrdawq-euq maeqnan khar cantae-eu tsawrhaq-aq, yaqkhaer yaq-eu lafov jawrluf-eu mae. Aqjeq mirnae aernar-aq, “Zanrdawq-euq lafkhoer khar boftaq-euq yawqjeq navluf-anr aqmyanluf maqmr-eu tsawrhaq dawqtawvluf, yaqkhaer yaqgar yadaq mae,” (Dm 27:26) laer Yaerbof-euq lafkhoer boftaq-euq mae.

¹¹ Zanrdawq-anr ghoe-awr tsawrhaq tiqghaq-iq, Miqyaer-euq maeqshi tsaq-awr dawr-eu tsawrhaq maq pyeuflar nya-a laer byacaevni dovlar-euq mae. Aqjeq mirnae aernar-aq, “Tsaq-awr dawr-eu tsawrhaq-aq, jan-eu baqda’nae yadaef-eu mae,” (Hbk 2:4) laer Yaerbof-euq lafkhoer boftaq-euq mae.

¹² Zanrdawq-aq, jan-eu jeq-anr maqtaf-a. “Heudeuq-anr khar mrcaw-eu tsawrhaq-aq, mrcaw-eu mirnae yadaef-eu mae,” (Lb 18:5) laer aertaq-euq mae.

¹³ Kali-aq, aqdui-euq gharduq yaqkhaer yaqgar yadaq-euq mirnae, zanrdawq-euq lafkhoer boftaq-euq yaqkhaer yaq-eu jeq-anr nae aqdui-anr kakhof naeqlaf-euq mae. Aqjeq mirnae aernar-aq, “Arbawr-euq khoertav kharbi gheuceuq taq-euq tsawrhaq yawqghaq navluf yaqkhaer yaqgar daqluf-eu tsawrhaq mae,” (Dm 21:23) laer Yaerbof-euq lafkhoer boftaq-euq mae.

¹⁴ Khoermirnae, Aqbyaqhaq-anr bif-euq guiqlanq, Yeqsur Kali-anr ghoe-awr, aqcawq tsawrjeuq tsawrca-anr keuv-ir ni, aqdui jan-eu mirnae, bif ma laer aertaq-euq Yawshawr Saflar za-euq ma.

Zanrdawq Hawr-eu Dawqma Sarjax

¹⁵ Aqyuif aqnyir deuq-or! Nan-anr nae yawdaefdaef ngae ya tanqpuq-eu yawjeq majeq dawq aermaeqnaeq nyar. Tsawrhaq yawkaq dawqma sarjax aertsaev taq-awr, sanqbof boftsaev ghaq-euq nar-aq, tsawrhaq nae aertaq-euq dawqma sarjax pyeuf-eu taef khawf, tiqghaq-iq maq lavcawv nya-eu uqtaf, maq aerlanq nya-a.

¹⁶ Aqbyaqhaq hawr-eu aqyawf-euq aryoeq-anr dawqma sarjax khoerdeuq aernaeq taq-euq mae. “Aryoeq” laer aer-eu-aq, ghawqmya ghaq-anr aer-eu maqngeur-a. “Nawq-euq aryoeq khoerghaq,” (Adb 12:7) laer aer-eu-aq, tiq ghaq-anr aer-eu taef mae. Khoerghaq-aq, Kali mae.

¹⁷ Ngar heulof-aer aermawf mir-a. Yawbae ngae nae Miqyaer nae Kali-euq lafkhoer dawqma sarjax aertaq-euq mae. 430 khof dzeur-ir-awr nae javlar-euq zanrdawq nae dawqma sarjax khoer-anr yawqngaef maqbi pyeuf-ir nya-a.

¹⁸ Jeqbir khoer bif-eu, zanrdawq-anr taf-eu lawnmr-aq, dawqma sarjax-anr maqtaf-a. Aerkhawf, Miqyaer dawqma sarjax-anr ghoe-awr, Aqbyaqhaq-anr jeqbir bif-euq mae.

¹⁹ Tox-aer ngeur nar-aq, zanrdawq jav-eu aqjeq gardanr tsoeq-eu la? Khoer-aq, aqkar dawqma sarjax za-eu aryoeq khoerghaq maq oekeuv-euq nmrkaq, yawbanq yawlaeq jeq-anr bi siqnya-eu gharduq biftaq-euq mae. Zanrdawq-aq, mqtav ghaqkhaer nae, tsawrkaq geufluf-eu ghaq-euq aqlaf-anr ghoe-awr nae bifnaeq lef-euq mae.

²⁰ Tsawrkaq-aq, tiqpaw-euq danzar taef maqngeur-a. Aerkhawf, Miqyaer-aq tiq ghaq taef mae.

Zanrdawq Aqjox-aer Gardanr Tsoeq-eu

²¹ Tox-aer mar-iq, zanrdawq-aq, Miqyaer nae aertaq-euq dawqma sarjax-anr lavcawv-eu nga lor? Maqngeur-a de-eq! Biftaq-euq zanrdawq khoer, tsawrhaq-anr daef-eu jeq bifnya lawnmr-aq, zanrdawq-euq baqda’nae tsaq-awr dawr-eu jeq aqdir za taef-a.

²² Aerkhawf, Yeqsur Kali-anr jan-eu mirnae, kharjan-eu tsawrhaq dawqma sarjax aertaq-euq lof-aer za’ni, Yaerbof-aq, yawqghaq navluf-anr iqbax-euq kuv-euq lafkhoer kalanr taq-euq mae.

²³ Aerkhawf, jan-eu khoer maq keuvle-euq nmrkaq, aqdui-aq, zanrdawq-euq lafov paf-awr kalanr taq-euq gar daqluf-eu ma. Keuvle luf-eu jan-eu jeq maq panmaeq naeqlaf-euq khoerkeuvni yadaq-eu mae.

²⁴ Jan-eu mirnae, aqdui tsaq-awr dawr-eu tsawrhaq pyeuflarni, zanrdawq-aq, Kali oe ngae keuvni, aqdui-anr hawpir-eu ghaq lof-aer dur-eu mae.

²⁵ Nymq-mr jan-eu jeq keuvle-euq mirnae, aqdui-aq, hawpir-eu khoerghaq-euq lafov maqpar jawr-eu ma.

²⁶ Jan-eu mirnae, nawmaf yawqghaq navluf, Yeqsur Kali-euq lafkhoer Miqyaer-euq zaq pyeuflar-euq mae.

²⁷ Nawmaf, Kali-euq lafkhoer bartirsaq hageuf-euq deuq-aq, maeqtsoeq dm-eu lof-aer Kali-anr dmluf-eu mae.

²⁸ Nawmaf dawqtawvluf, Yeqsur Kali-euq lafkhoer tiq ghaq lof-aer taef-aer pyeuf-eu mirnae, Yurdav tsawrhaq hawr-eu Heqlaqsar tsawrhaq, zaqkhav hawr-eu buq-ir-euq tsawrhaq, zaqyo aqli hawr-eu zaqmiq aqbur laer maqpar baw-eu mae.

²⁹ Nawmaf Kali-anr taf-eu tsawrhaq ngeur nar-aq, Aqbyaqhaq-euq aryoeq pyeuf-awr, dawqma sarjax aertaq-euq lof-aer jeqbir of-eu tsawrhaq mae.