Gaˬlaˬtiˆ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqkhaer Nuideuq

¹ Khoernar-aq, 14 khof dzeur-ir-awr, Baqnaqbar, nga’nyaf, Yeqlursaqlaeq-anr parle-euq ma. Tirtuv khawf sheuq-awr le-euq ma.

² Miqyaer, ngaq-anr panmaeq naeqlaf-euq mirnae le-euq ma. Ngaq nae aqcawq tsawrjeuq tsawrca-anr guiqlanqdawq maeqnaeq-euq garkawv, aqyuif aqnyir deuq-anr dzawrnaeq-euq ma. Aerkhawf, ter dov-eu deuq-anr taef-aer ciqcurni dzawrnaeq-euq ma. Nymq-mr ngar mrluf-eu jeq hawr-eu mrdzeur yaf-euq jeq yawqngaef-aer maqya pyeufni dzawrnaeq-euq ma.

³ Ngaq naeq-aer le-euq Tirtuv-aq, Heqlaqsar tsawrhaq pyeuf-eu khawf, aqyawf-anr bawkhov maeqdzaq yaeq-awq laer maq katir-aq.

⁴ Aqjeq mirnae aernar-aq, tsawrhaq tiqpavnav deuq aqyuif aqnyir janrgeuf-awr, nga’maf-euq lafkhoer urkhoeq lar-euq mae. Aqdui-anr zaqkhav bigeuf-ir-eu laer Yeqsur Kali-euq lafkhoer za-euq buq-ir-eu jeq-anr khoeqsho luf-eu mae.

⁵ Guiqlanq dawq-euq yawtsaq yawdawr jeq nawmaf-euq lafkhoer zifnya’ni, nga’maf, aqyawf maf-euq dawq-anr tiqpawf-iq maq narhaq-aq.

⁶ Ter dov-eu deuq-aq, aqyawfmaf aqjox-aer ghae-eu tsawrhaq law-awr khawf, ngaq naeq-aer tiqjeq-iq maq beugar-a. Miqyaer-aq, myavpyawq huiqnyir maqtser-a. Ter dov-eu khoerdeuq, ngaq-anr tiqjeq-iq maeqlanq maqka naeqlaf-aq.

⁷ Aqyawfmaf tiqjeq-iq maq maeqnaeq laf-euq uqtaf, bawkhov maeqdzaq yaeq-euq deuq-anr guiqlanqdawq maeqnaeq-awq laer Beqtuvluv-anr khaertaq-euq lof-aer, bawkhov maeqdzaq maqyaeq-euq deuq-anr guiqlanqdawq maeqnaeq-awq laer ngaq-anr khaertaq-euq nga laer aqyawfmaf yasiq-euq mae.

⁸ Beqtuvluv-anr bawkhov maeqdzaq yaeq-euq tsawrhaq-euq gharduq ghaqkhaer bigeuf-euq khoerghaq, ngaq-anr khawf aqcawq tsawrjeuq tsawrca-euq gharduq ghaqkhaer bi geufnaeq laf-euq mae.

⁹ Ngaq-anr bifnaeq laf-euq guiqlanq-anr ya’mawr ngae, Kalizaq armur-euq lafkhoer khawrzeur zeurzif pyeufluf-eu Yaqkov, Beqtuvluv hawr-eu Yorhaq aqha’maf, Baqnaqbar, nga’nyaf-anr armar laf nae laftsaf tsafnaeq laf-awr, gar mrcawq laer sawxnaeq laf-euq mae. Nga’nyaf-aq, aqcawq tsawrjeuq tsawrca jawr-eu gar ir-awr, aqyawf maf-aq, bawkhov maeqdzaq yaeq-euq tsawrhaq jawr-eu gar irni nuima tsaq-eu mae.

¹⁰ Aqyawfmaf, nga’maf-anr irshaqzaq-anr noeqkeuv de-eq laer shar-eu mae. Khoerlof-aer janr-eu-aq, ngar khawf nuima keuv-eu tiqjeq pyeuf-eu ma.

Pawrluv, Beqtuvluv-anr Daeq-euq

¹¹ Khoernar-aq, Beqtuvluv, Aqdirawq meuq-anr oekeuv-euq mae. Aqyawf-anr daeq paq-aer ghae-eu mirnae, ngar, aqyawf-anr hawtsov taq-awr daeq-euq ma.

¹² Aqjeq mirnae aernar-aq, Yaqkov jawr-eu gar nae oe-eu deuq maq oekeuv-euq khoer-aq, aqyawf, aqcawq tsawrjeuq tsawrca naeq-aer hawq dzaqtaf-eu mae. Aerkhawf, tsawrhaq khoerdeuq oekeuv-euq nar-aq, bawkhov maeqdzaq yaeq-euq tsawrhaq-anr guv-eu mirnae jivghawq-awr, aqcawq tsawrjeuq tsawrca naeq-aer jawrghawq taq-euq mae.

¹³ Yurdav tsawrhaq nuideuq khawf, aqyawf kharmr-eu maeqnan cantae luf-eu mae. Baqnaqbar khawf aqyawfmaf lof-aer janrluf-eu mae.

¹⁴ Ngar, aqyawfmaf, guiqlanq dawq-euq yawtsaq yawdawr-euq maeqnan dawrcoeni maq cantae-eu gar ya’mawr ngae, aqyawfmaf dawqtawv luf-euq maeqshi Beqtuvluv-anr heulof-aer aernaeq-euq ma, “Nawr, Yurdav tsawrhaq pyeuf-eu khawf, Yurdav tsawrhaq lof-aer maqdaef-aer, aqcawq tsawrjeuq tsawrca lof-aer daef-eu gar nae, aqjeq mirnae, aqcawq tsawrjeuq tsawrca, Yurdav tsawrhaq lof-aer yadaef-eu mae laer katir-eu le?”

Kali-euq Guiqlanq Yawdzanr

¹⁵ “Aqdui maf-aq, daefle ngae nae Yurdav tsawrhaq ma. Iqbaxzaq laer kur-eu aqcawq tsawrjeuq tsawrca maqngeur.

¹⁶ Tsawrhaq tiq ghaq zanrdawq-anr mrcaw-euq mirnae, tsaq-awr dawr-eu tsawrhaq pyeuflar-eu maqngeur-a. Yeqsur Kali-anr jan-eu mirnae taef-aer pyeuflar-eu mae laer aqdui siqnya-eu ma. Aqduimaf khawf zanrdawq-anr mrcaw-euq mirnae, tsaq-awr dawr-eu tsawrhaq pyeuflar-euq maqngeur-aer, Kali-anr jan-eu mirnae tsaq-awr dawr-eu tsawrhaq bi pyeuflar naeqlaf-euq mae. Aqjeq mirnae aernar-aq, shiqshaq khar piluf-eu tsawrhaq tiqghaq-iq zanrdawq-euq maeqnan cantae-euq mirnae, tsaq-awr dawr-eu tsawrhaq maq pyeuflar nya-a.

¹⁷ “Kali-euq baqda’nae, tsaq-awr dawr-eu tsawrhaq pyeuflarni aqduimaf povluf ngae, aqdui khawf iqbaxzaq ma laer dovlar nar-aq, Kali-aq, iqbax-euq gharduq gar mr-eu ghaq-a lor? Maqngeur-a de-eq.

¹⁸ Ngaq nae pyavdzae-euq deuq-anr ngar tsovpar nar-aq, ngar-aq, mrbanq luf-eu tsawrhaq nga laer byacaevni bi dovlar-eu mae.

¹⁹ Ngar, Miqyaer-euq paw daefnya’ni, zanrdawq-anr ghoe-awr, zanrdawq-euq paw shir-euq ma.

²⁰ Ngar, Kali naeq-aer lafyaq-euq khoertav bi taftaeq-euq ma. Khoermirnae, nymq-mr ngar daefluf-eu-aq, ngar daef-eu maqngeur. Kali, ngaq-euq lafkhoer daefluf-eu mae. Khoeruqtaf, nymq-mr ngar shiqshaq paw yawdaef daefluf-eu-aq, Miqyaer-euq Zaqyo-anr jan-eu lafkhoer daefluf-eu ma. Aqyawf, ngaq-anr gaq-awr, ngaq-euq gharduq aqyawf-euq mawrdo lawrnaeq-euq mae.

²¹ Ngar, Miqyaer-euq guiqlanq-anr maq byaerdzae. Zanrdawq-euq baqda’nae tsaq-awr dawr-eu tsawrhaq pyeuflarnya lawnmr-aq, Kali shir-euq-aq, yawqngaef mae.”