Gaˬlaˬtiˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, ghaqkhaer Pawrluv ma. Ngar ghaqkhaer geufluf-eu-aq, tsawrhaq nae bi geufnaeq laf-euq maqngeur-aer, tsawrhaqzaq nae aryaq bifnaeq laf-euq khawf maqngeur-a. Yeqsur Kali hawr-eu aqyawf-anr shir-euq gar-anr nae bi ghofdaef lar-euq Aqda Miqyaer nae bi geufnaeq laf-euq mae.

² Ngaq naeq-aer jawr-eu aqyuif aqnyir dawqtawvluf naeq-aer Gaqlaqtiv-anr jawr-eu Kalizaq armur deuq-anr sanqbof bofanr laf-eu ma.

³ Aqda Miqyaer hawr-eu aqdui-euq Sanqpaq Yeqsur Kali-euq guiqlanq yawdzanr hawr-eu nuisar of-eu jeq, nawmaf-euq khoertav jav luf-ur!

⁴ Zawr doer-eu heuzir-anr aqdui yabuq-ir ni, Kali-aq, aqdui-euq Aqda Miqyaer nuima tsaq-eu lof-aer, aqdui-euq iqbax-euq gharduq aqyawf-euq mawrdo lawrnaeq-euq mae.

⁵ Mqmaq maqbyav yarzir Miqyaer-euq yawshaef khanqsaer huiq luf-ur! Aqmeq.

Guiqlanqdawq Yawqdawqyawq Maqjav-a

⁶ Kali-euq guiqlanq yawdzanr-euq lafkhoer nawmaf-anr kur-euq Miqyaer-anr, nawmaf yaw’awr laf-aer byaerdzae-awr, guiqlanqdawq yawqdawq yawq-anr hageuf-euq mirnae, ngar zanq duidui ler nya.

⁷ Aqdir aernar-aq, guiqlanqdawq yawqdawqyawq maqjav-a. Aerkhawf, tsawrhaq tiqghaqnav, nawmaf-anr yawbanq yawlanr-aer bipyeuf-ir-awr, Kali-euq guiqlanq dawq-anr yurpyawv mawf-eu mae.

⁸ Nga’maf maqaer, mq-anr nae oe-euq ghaqkhaer deuq maqkaq, nga’maf nae nawmaf-anr maeqnaeq dzeur-euq guiqlanq dawq-anr nae beugar-eu jeq maeq nar-aq, aqyawf-euq khoertav yaqkhaer yaq-eu jeq keuvle luf-ur!

⁹ Nga’maf nae aerdzeur-euq lof-aer, nymq-mr ngar tiq pov paraer ma. Tsawrhaq tiqghaqnav, nawmaf nae hageuf dzeur-euq guiqlanq dawq-anr nae beugar-eu guiqlanqdawq yawqdawqyawq maeqlar nar-aq, aqyawf-euq khoertav yaqkhaer yaq-eu jeq keuvle luf-ur!

¹⁰ Nymq-mr, tsawrhaq, ngaq-anr nuima tsaqni ngar mrluf-eu nga lor? Maqngeur nar-aq, Miqyaer nuima tsaqni mrluf-eu nga laq? Tsawrhaq, ngaq-anr nuikhanr bishir-eu laer ngar povluf-eu nga lor? Tsawrhaq, ngaq-anr nuikhanr bishir-eu laer ngar povluf-eu ngeur nar-aq, ngar-aq, Kali-euq zaqkhav maqngeur-a.

Pawrluv Guiqlanqdawq Maeq-eu Garkawv

¹¹ Aqyuif aqnyir deuq-or! Ngar maeqluf-eu guiqlanqdawq heu-aq, tsawrhaq-anr nae dovlar-euq maqngeur-a laer ngar, nawmaf-anr bi siqnya’mawf mir-a.

¹² Aqjeq mirnae aernar-aq, tsawrhaq-anr nae za-euq maqngeur, tsawrhaqzaq nae maeqnaeq laf-euq khawf maqngeur-a. Yeqsur Kali nae ngaq-anr panmaeq naeqlaf-euq mae.

¹³ Ngar, Yurdav tsawrhaq-euq zanr tawqluf ngae, aqjox-aer daefyaf-awr, Miqyaer-euq Kalizaq armur deuq-anr yawkhav-aer khaeqnaeq-awr, aqjox-aer lavcawv-eu paq nga laer laejae-euq garkawv, nawmaf gaqhaw-euq mae.

¹⁴ Ngar-aq, ngaq-euq tsawrjeuq tsawrca-euq lafkhoer, tiqcawq tiqshaev deuq navmaqtser Yurdav tsawrhaq-euq zanr-anr cantae-awr, ngaq-euq aqpoeq deuq nae tawqka lef-euq zanr-anr nuima keuv duidui-euq ma.

¹⁵ Aerkhawf, ngar, aqma-euq uqpanq-euq lafkhoer urngae nae ngaq-anr tserdov-awr, aqyawf-euq guiqlanq yawdzanr nae ngaq-anr kurnaeq laf-euq Miqyaer-aq,

¹⁶ aqyawf-euq Zaqyo-euq garkawv aqcawq tsawrjeuq tsawrca-anr dawqmaeq bimaeq-ir-eu, aqyawf nuima tsaq-eu lof-aer aqyawf-euq Zaqyo-euq garkawv, ngaq-euq nuima-euq lafkhoer panmaeq naeqlaf-euq mae. Khoerngae, shiqshaq piluf-eu tiqghaq naeq-aer-iq ngar maq bawqdzaq-aq.

¹⁷ Ngar, Yeqlursaqlaeq-anr le-awr, ngaq-euq jeqhu nae ghaqkhaer geufluf-eu deuq-anr khawf maq lemawr-aq. Tiqpov taef-aer Aqlarbyaq mirkhanq-anr ir-euq ma. Khoernar-aq, Daqmaqsaer-anr ghofler-euq ma.

¹⁸ Khoernar-aq, smr khof dzeur-ir-awr nae taef-aer, ngar, Yeqlursaqlaeq-anr le-awr, Beqtuvluv-anr dzoerler-awr, aqyawf naeq-aer 15 nan jawr-euq ma.

¹⁹ Sanqpaq Yeqsur-euq aqnyir Yaqkov-anr maqngeur nar-aq, ngar, ghaqkhaer nuideuq tiqghaq-anr-iq maqmawr-aq.

²⁰ Ngar, nawmaf-anr bofnaeq luf-eu heu-aq, jaqmyawf myawf-eu maqngeur laer Miqyaer-euq maeqshi ngar aer-eu ma.

²¹ Khoernar-aq, ngar, Surliv mirkhanq hawr-eu Girlirciv mirkhanq-anr ir-euq ma.

²² Khoerngae, Yurdav mirkhanq-anr jawr-eu Kali-anr jan-eu Kalizaq armur deuq, ngaq-anr maq mawrhaw-aq siq.

²³ Dzeurlaf ngae, “Aqdui-anr khaeqnaeq laf-euq khoerghaq, nymq-mr-aq, arhu aqyawf nae lavcawv haw-euq jan-eu guiqlanqdawq khoerdawq maeqluf mae jer” laer taef-aer aqyawfmaf yagaq-euq mae.

²⁴ Ngaq-euq baqda’nae aqyawfmaf, Miqyaer-anr jaceuq-eu mae.