Gʼaˬkʼehˇ 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sawrluv Kali-anr Janlar-euq

¹ Khoerngae yamq-anr khawf, Sawrluv-aq, Sanqpaq Yeqsur-euq zaqlanr deuq-anr saef ma laer guvtsiq nyaefnyaef-aer lmqluf-eu mae. Aqyawf, pirma yawhuiq ghaq jawr-eu gar le-awr,

² Kali-euq Garma khar tawqluf-eu zaqmiq aqbur, zaqyo aqli-anr ya’mawr nar-aq, aqyawf, aqyawf maf-anr paf-awr Yeqlursaqlaeq-anr sheuqghaeni, Daqmaqsaer-anr jav-eu zanrdawq khawqnymr-anr bif-eu sanqbof sharler-euq mae.

³ Sawrluv irdov ghae-awr, Daqmaqsaer-euq dawqpae oekeuv ngae, mq-anr nae yawshaef japyuqni aqyawf-euq tiqjawq byale-euq mae.

⁴ Khoerngae, aqyawf, mirtsa gacoq ghae-awr, aqyawf-anr heulof-aer aer-eu tersar-anr yagaq-euq mae, “Sawrluv-or! Sawrluv, nawr aqjeq mirnae ngaq-anr khaeq-eu le?”

⁵ Khoerngae, aqyawf aer-eu, “Sanqpaq-or! Nawr aqsur ghaq le?” Sanqpaq Yeqsur aer-eu, “Ngar-aq, nawr khaeqluf-eu Yeqsur ma. Nawr jeqzaq-anr tae-eu darcae-anr baev-eu-aq yawshaq mae.”

⁶ Khoernar-aq, aqyawf zanqler taq-awr yawdzuq gan’gan-aer aer-eu, “Sanqpaq-or! Nawr, ngaq-anr aqjeq bi janrmawf-eu nya?” Khoerngae, Sanqpaq Yeqsur, aqyawf-anr aerkhof naeq-eu, “Tur-awr meuq-anr urler-awq. Nawr aqjeq yajanr-eu la laer aqcawq, nawq-anr aernaeqlaf taef-a.”

⁷ Aqyawf naeq-aer canluf-eu tsawrhaq deuq tersar khoer-anr yagaq-euq khawf, tiqghaq-anr-iq maqmawr-euq mirnae, dawq maq ngaeqdov nya’ni yawfluf-eu mae.

⁸ Sawrluv, mirtsa nae turlar-awr, myavnuiv byae ngae, tiqjeq-iq maq mawrnya-a. Khoermirnae, aqyawfmaf, aqyawf-euq aqlaf-anr nyaeftaeq-awr, Daqmaqsaer-anr sheuqur lef-euq mae.

⁹ Aqyawf smq nan keuvni, myavnuiv maq mawrnya-aer, maqdzaq maqdawrni jawr-euq mae.

Aqnaqnir, Sawrluv-anr Bartirsaq Mrnaeq-euq

¹⁰ Daqmaqsaer-anr Aqnaqnir laer kur-eu zaqlanr tiq ghaq jawr-eu gar, mawrle-euq lafkhoer Sanqpaq Yeqsur aer-eu, “Aqnaqnir-or.” Khoerngae, Aqnaqnir aer-eu, “Sanqpaq-or! Ngar heugar jawr ma.”

¹¹ Khoerngae, Sanqpaq Yeqsur, aqyawf-anr heulof-aer aernaeq-euq mae: “Tur-awr, Gardawr laer kur-eu garma khoerkanr-anr ir-awq. Yurdav-euq irkanr jawr-eu, Daqsuv-anr nae lar-euq Sawrluv laer kur-eu tiq ghaq-anr haw-ir-awq. Nymq-mr aqyawf guiqlanq sharluf-eu mae.

¹² Aqyawf-anr mawrle-euq lafkhoer Aqnaqnir laer kur-eu tiq ghaq urlar-awr, aqyawf-euq myavnuiv par mawrnya larni, aqyawf-euq khoertav aqlaf bafdav naeq-euq gar khawf ya’mawr-euq mae.”

¹³ Khoerngae, Aqnaqnir heulof-aer aerkhof naeq-euq mae: “Sanqpaq-or! Tsawrhaq heughaq-aq, Yeqlursaqlaeq-anr jawr-eu nawq-euq tsawrshawr deuq-anr arnavni lavtanq lavnar naeq-euq garkawv, ngar, ghawqmya ghaq ja-eu gar yagaq-euq ma.

¹⁴ Nymq-mr heugar khawf, nawq-euq tsawrmyanr-anr kharkur-eu tsawrhaq deuq-anr nyaef ma laer pirma aqyuif deuq-anr nae aryaq zataq-euq mae.”

¹⁵ Khoerngae, Sanqpaq Yeqsur, aqyawf-anr heulof-aer aernaeq-euq mae: “Ir-awq. Aqjeq mirnae aernar-aq, aqyawf-aq, aqcawq tsawrjeuq tsawrca, sanqpaq deuq hawr-eu Irsaqleqlav tsawrhaq-euq maeqshi, ngaq-euq tsawrmyanr bipi-awr bi tsafgaq-eu laer ngaq nae tserdov taq-euq ngaq-euq keuka ma.

¹⁶ Ngaq-euq tsawrmyanr baqda’nae, aqyawf shaqzanq ghawqmya jeq yadaq-a laer ngar, aqyawf-anr bimawr ma.”

¹⁷ Khoermirnae, Aqnaqnir ir-awr, nymr khoernymr-anr urler-euq mae. Aqyawf, Sawrluv-euq khoertav aqlaf bafdav-awr aer-eu, “Maernmr Sawrluv-or! Nawr garpaer-anr oeluf ngae dovle-euq Sanqpaq Yeqsur khoerghaq, nawr myavnuiv mawrnya lar-awr, Yawshawr Saflar byanlarni, ngaq-anr khaerghae lef-euq mae.”

¹⁸ Khoerngae, tiqpov taef-aer Sawrluv-euq myavnuiv-anr nae ngaqghaw lof-aer ghae-eu jeq gayawv le-awr, aqyawf-euq myavnuiv mawrnya lar-euq mae. Khoernar-aq, aqyawf turlar-awr bartirsaq hageuf-euq mae.

¹⁹ Sawrluv, dzaqdzaq dawrdawr dzaqghaq dawrghaq ngae, ghaq anrkhof lar-euq mae. Khoernar-aq, Sawrluv, Daqmaqsaer-anr jawr-eu zaqlanr deuq naeq-aer heumyav nan jawr-euq mae.

Sawrluv, Kali-euq Garkawv Maeq-euq

²⁰ Sawrluv tiqpov taef-aer zanrdawq khawqnymr-euq lafkhoer, Kali-aq, Miqyaer-euq Zaqyo mae laer maeqnaeq-euq mae.

²¹ Kharya gaq-euq tsawrhaq dawqtawvluf zanqler-awr aer-eu, “Tsawrhaq heughaq, Yeqlursaqlaeq-euq lafkhoer, tsawrmyanr heumyanr-anr kharkur-eu tsawrhaq-anr lavcawv-euq khoerghaq maqngeur-a lor? Heugar khawf khoerlof-aer janr-eu gharduq, aqyawf, aqyawf maf-anr nyaef-awr pirma aqyuif deuq jawr-eu gar sheuqghae-eu laer, aqyawf oe-euq maqngeur-a laq?”

²² Aerkhawf, Sawrluv tiqjawr sair tiqjawr ghaq khavdzaeq lar-awr, Yeqsur-aq, Kali mae laer yawmuiq-aer aerduq nya-eu mirnae, Daqmaqsaer-anr jawr-eu Yurdav tsawrhaq deuq zanqlerjir taq-euq mae.

²³ Ghawqmya nan dzeur-ir ngae, Yurdav tsawrhaq deuq, Sawrluv-anr saef-eu laer tov-eu mae.

²⁴ Aerkhawf, aqyawfmaf nae tov-euq khoer Sawrluv yasiq-euq mae. Aqyawfmaf, Sawrluv-anr saef-eu laer uqcif nan’ghanr maqaer, meuq-euq lanrkhaeq deuq-anr lofluf-eu mae.

²⁵ Khoermirnae, uqcif pawdzer, zaqlanr deuq nae aqyawf-anr khavpuq puqma-anr biur-awr, meuq-euq lanr-anr nae pyaeqka ghae-euq mae.

Sawrluv, Yeqlursaqlaeq-anr Jawr-euq

²⁶ Khoernar-aq, Sawrluv, Yeqlursaqlaeq-anr larkeuv-awr, zaqlanr deuq naeq-aer gawfler-eu laer laejae-euq khawf, aqyawfmaf dawqtawvluf, Sawrluv zaqlanr pyeuflar-euq mae laer maq jancoer-aer guv-eu mae.

²⁷ Aerkhawf, Baqnaqbar, aqyawf-anr sheuq-awr ghaqkhaer deuq jawr-eu gar dzoer-ir-euq mae. Sawrluv garma garpaer-anr, Sanqpaq Yeqsur-anr aqjox-aer mawr-awr, Sanqpaq Yeqsur, aqyawf-anr dawq aqjox-aer ngaeqcawq le-euq garkawv hawr-eu aqyawf, Daqmaqsaer-anr Yeqsur-euq tsawrmyanr-anr ghoeghoe-aer nuima khaqduqni dawqmaeq aqjox-aer maeq-euq garkawv khawf, aqyawf maf-anr dzawrnaeq-euq mae.

²⁸ Khoermirnae, aqyawf, aqyawfmaf naeq-aer irir larlar-aer Yeqlursaqlaeq-anr jawr-euq mae.

²⁹ Aqyawf, Sanqpaq Yeqsur-euq tsawrmyanr-anr ghoeghoe-aer, nuima khaqduqni dawqmaeq maeq-euq mae. Heqlaqsar tsawrhaq deuq naeq-aer tsawrpyaer pyaer-euq mae. Khoerngae, aqyawfmaf, aqyawf-anr saef-eu laer laejae-eu mae.

³⁰ Aqyuif aqnyir deuq, garkawv khoer-anr yasiq ngae, aqyawf-anr Gaersaqlir-anr sheuqkeuv ha-ir-awr, Daqsuv-anr bile-euq mae.

³¹ Khoerngae, Yurdav mirkhanq, Gaqliqlaer mirkhanq hawr-eu Saqmaqliv mirkhanq doeni jawr-eu Kali-anr jan-eu armur deuq, nuisar of-eu lafkhoer yajawr-awr huiqlar manrlar-euq mae. Sanqpaq Miqyaer-anr yawzeu baw-awr, Yawshawr Saflar ghaq bif-eu lof-aer daefghae-eu lafkhoer, aqyawfmaf myaqlar-euq mae.

Aerneq-anr Bi Taqler-euq

³² Khoerngae, heulof-aer pyeuflar-euq mae. Beqtuvluv doedoe-aer can-awr, Lurda-anr jawr-eu tsawrshawr jawr-eu gar oeka-euq mae.

³³ Khoergar, kuirshir lafshir shir-eu mirnae, yaef khof byanni yufzar-anr taef-aer galaf-euq Aerneq laer kur-eu tiq ghaq-anr ya’mawr-euq mae.

³⁴ Beqtuvluv, aqyawf-anr aernaeq-eu, “Aerneq-or! Yeqsur Kali, nawq-anr lavtaq luf-eu mae. Tur-awr nawq-euq yufzar lavluiv-awq.” Khoerngae, tiqpov taef-aer aqyawf turlar-euq mae.

³⁵ Lurda hawr-eu Saqlor mirkhanq-anr jawr-eu tsawrhaq dawqtawvluf khoerghaq-anr ya’mawr ngae, Sanqpaq Yeqsur jawr-eu paw pyawrlar jir-euq mae.

Dawkar-anr Bi Ghofdaef Lar-euq

³⁶ Yurbeq meuq-anr Daqbirtav laer kur-eu zaqlanr pyeuf-euq zaqmiq aqbur tiq ghaq jawr-eu mae. Daqbirtav-aq, Dawkar laer aermawf-eu mae. Aqyawf aqmyanluf yawmuiq jeq mr-awr, gamfnaeq-eu tiq ghaq mae.

³⁷ Aerkhawf, khoerngae yamq-anr aqyawf narlar-awr shir-euq mae. Aqcawq, aqyawf-anr ircuf dzuifnaeq-awr, nymr laftav tiv-euq kuvlawv-anr baftaq-euq mae.

³⁸ Lurda-aq, Yurbeq meuq-euq dawqpae jav-eu mirnae, Beqtuvluv khoergar jawr mae laer zaqlanr deuq yagaq ngae, aqyawfmaf, aqyawf jawr-eu gar tsawrhaq nyiq ghaq khaerghae lef-awr, maq nyinaqni aqyawfmaf jawr-eu gar oe-awq laer bi tanqshar ler-euq mae.

³⁹ Khoerngae, Beqtuvluv tur-awr aqyawfnyaf naeq-aer ir-euq mae. Khoergar irkeuv-euq naeq-aer, aqcawq, aqyawf-anr nymr laftav tiv-euq kuvlawv-anr sheuqdav lef-euq mae. Miqcoeq miqma dawqtawvluf Beqtuvluv-euq dawqpae yawf-awr, Dawkar daef ngae guf-euq paerkhanq hawr-eu maeqtsoeq deuq, aqyawf-anr sheuhaw sheuhaw-aer ngoer-eu mae.

⁴⁰ Beqtuvluv, aqyawfmaf yawqghaq navluf-anr bidov-ir-awr, pawqtsuif pawqdmq dmq-awr guiqlanq shar-euq mae. Khoernar-aq, shir-euq mawrdo jav-eu paw ghawrpyawr-awr aer-eu, “Daqbirtav-or! Tur-awq.” Khoerngae, aqyawf myavnuiv byaelar-awr, Beqtuvluv-anr mawr ngae turnuir lar-euq mae.

⁴¹ Khoerngae, Beqtuvluv, aqlaf cawqja-awr, aqyawf-anr gheutur naeq-euq mae. Khoernar-aq, tsawrshawr deuq hawr-eu miqcoeq miqma deuq-anr kurlaf-awr, Dawkar yawdaef-aer aqyawf maf-anr a’naeq-euq mae.

⁴² Garkawv heu Yurbeq meuq meuqlan-aer gaqdoe-ir-awr, tsawrhaq ghawqmya’ni Sanqpaq Yeqsur-anr janlar-euq mae.

⁴³ Khoernar-aq, Beqtuvluv, Yurbeq meuq-anr jawr-eu Sirmoq laer kur-eu shaqkhov janranq-eu ghaq-euq nymr-anr ghawqmya nan jawr-euq mae.