Gʼaˬkʼehˇ 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khaeq-awr Khav-eu Gar Yadaq-euq

¹ Saqteqpaq-anr saef-eu gar Sawrluv khawf nuima tsaq-eu mae. Khoerngae nan-anr nae, Yeqlursaqlaeq-anr jawr-eu Kali-anr jan-eu armur-aq, khaeqdui khav duidui-eu gar yadaq-euq mae. Ghaqkhaer deuq maqngeur nar-aq, Kali-anr jan-eu tsawrhaq dawqtawvluf Yurdav mirkhanq hawr-eu Saqmaqliv mirkhanq doeni caevbyav ghae-euq mae.

² Miqyaer-anr yawzeu baw-eu deuq, Saqteqpaq-anr bafpanq-ir-awr, aqyawf-euq gharduq tsawrngoer yawkhav-aer ngoer-euq mae.

³ Aerkhawf, Sawrluv-aq, Kali-euq armur-anr lavcawv luf-eu mae. Aqyawf tiqnymr sair tiqnymr irir-aer, zaqmiq aqbur hawr-eu zaqyo aqli deuq-anr nyaef-awr kuv-anr dawvnaeq-eu mae.

Guiqlanqdawq Saqmaqliv-anr Irkeuv-euq

⁴ Caevbyav ghae-euq khoerdeuq, khar irkeuv-euq gar Yaerdawq maeqnaeq-euq mae.

⁵ Pirlirpuv khawf Saqmaqliv meuq-anr ir-awr, aqyawf maf-anr Kali-euq garkawv dawqmaeq maeqnaeq-euq mae.

⁶ Tsawrhaq khoerdeuq, Pirlirpuv dawqmaeq maeq-eu gar yagaq-awr, khavjeq-aer ghae-eu jeq janr-eu gar ya’mawr-euq mirnae, nuima tiqsiq taef-aer taq-awr, aqyawf maeq-eu dawq-anr yawmuiq-aer narhaq-euq mae.

⁷ Aqjeq mirnae aernar-aq, tsawrhaq ghawqmya ghaq-euq lafkhoer ur-eu naef yawjawf deuq, tersar yawkhav-aer gurgur-aer dovle-euq mae. Kuirshir lafshir shir-eu hawr-eu kuircawv ghawqmya ghaq khawf taqler-euq mae.

⁸ Khoermirnae, meuq khoermeuq-euq lafkhoer laqkhaq caer-eu jeq byan-eu mae.

Shavma Tiq Ghaq Janlar-euq

⁹ Aerkhawf, meuq khoermeuq-anr Sirmoq laer kur-eu tiq ghaq jawr-eu mae. Dzeurlaf ngae, aqyawf mawloq loq-awr, Saqmaqliv tsawrhaq deuq-anr yawkhav-aer bi zanqler-euq mae. Aqyawf, yawqhar yawqha, yawhuiq yawmanr tiq ghaq ma laer aer-eu mae.

¹⁰ Meuq khoermeuq-anr jawr-eu huiqzaq nyirzaq dawqtawvluf heulof-aer aeraer-aer aqyawf-euq dawq narhaqgeuf luf-eu mae, “Tsawrhaq heughaq-aq, Miqyaer-euq huiq duidui-eu baoq mae.”

¹¹ Aqyawf mawloq loq-awr, aqyawf maf-anr bi zanqler-eu myanrlar-euq mirnae, aqyawfmaf, aqyawf-euq dawq narhaq geuf-eu mae.

¹² Aerkhawf, Pirlirpuv, Miqyaer uvlanr-eu garkawv hawr-eu Yeqsur Kali-euq tsawrmyanr garkawv dawqmaeq maeq-eu gar aqyawfmaf janlar-awr, zaqmiq aqbur hawr-eu zaqyo aqli deuq khawf bartirsaq hageuf-euq mae.

¹³ Khoerngae, Sirmoq khoerghaq khawf janlar-awr, bartirsaq hageuf-awr, aqmyanluf Pirlirpuv naeq-aer jawr-eu mae. Pirlirpuv nae mr-euq khavjeq-aer ghae-eu jeq hawr-eu bisiq bimawr-eu jeq-anr aqyawf ya’mawr ngae, zanq duidui ler-euq mae.

¹⁴ Saqmaqliv tsawrhaq, Miqyaer-euq dawq-anr hageuf-euq garkawv, Yeqlursaqlaeq-anr jawr-eu ghaqkhaer deuq yagaq ngae, Beqtuvluv hawr-eu Yorhaq-anr aqyawfmaf jawr-eu gar khaerghae-euq mae.

¹⁵ Aqyawfnyaf oekeuv-euq nar-aq, Kali-anr jan-eu tsawrhaq deuq, Yawshawr Saflar za’ni aqyawf maf-euq gharduq guiqlanq sharnaeq-euq mae.

¹⁶ Aqjeq mirnae aernar-aq, aqyawfmaf tiqghaq-iq-euq khoertav Yawshawr Saflar maq zafka le-aer, aqyawfmaf, Sanqpaq Yeqsur-euq tsawrmyanr-euq uqmov bartirsaq hageuf-euq taef-a siq.

¹⁷ Beqtuvluv hawr-eu Yorhaq, aqyawf maf-euq khoertav aqlaf bafdavnaeq ngae, aqyawfmaf, Yawshawr Saflar za-euq mae.

¹⁸ Ghaqkhaer deuq aqlaf bafdavnaeq nar-aq, aqcawq, Yawshawr Saflar za-eu gar Sirmoq ya’mawr ngae, ghaqkhaer deuq jawr-eu gar pyur yurlaf-awr,

¹⁹ aer-eu, “Ngar, aqsur ghaq-euq khoertav maqaer, aqlaf bafdavnaeq ngae, khoerghaq, Yawshawr Saflar za’ni baoq teu ngaq-anr khawf bifnaeq laf-awq.”

²⁰ Khoerngae, Beqtuvluv, aqyawf-anr heulof-aer aernaeq-euq mae: “Miqyaer-euq lafsawq-anr pyur nae zeurnya taef-a laer nawr noeq-eu mirnae, nawr hawr-eu nawq-euq pyur tiqkawv lof-aer cawv-ir luf-ur.

²¹ Miqyaer-euq maeqshi nawq-euq nuima maqdawr-eu mirnae, nawr garkawv heu-anr tiqjeq-iq maqtaf-aer, tiqpawf-iq maqgawf-a.

²² Nawr yawcawv jeq teu-anr nae noeqpov noeqpar-awq. Miqyaer-anr guiqlanq shar-awq, nawq-euq nuima-euq lafkhoer noeq-eu teu-anr Miqyaer iqbax pyaeqnaeq laf-eu baw-mr.

²³ Aqjeq mirnae aernar-aq, nawr-aq, khaqjawfni ghae-eu nuicawv nae dzardof bidawv taq-awr, maqtsaq maqdawr-eu aryoeq nae bi paftawf taq-euq nga laer, ngaq-anr mawrlar nga.”

²⁴ Khoerngae, Sirmoq aerkhof naeq-eu, “Nawq nae kharaer-euq jeq ngaq-euq khoertav tiqjeq-iq maqya keuvleni, ngaq-euq gharduq Sanqpaq Miqyaer-anr guiqlanqshar naeqlaf-awq.”

²⁵ Ghaqkhaer deuq sarkir kamq-awr, Sanqpaq Miqyaer-euq dawq maeqnaeq ghaq-euq nar-aq, Yeqlursaqlaeq-anr ghofler-euq mae. Ghoflerluf ngae, Saqmaqliv-euq pu ghawqmya pu-anr guiqlanqdawq maeqnaeq-euq mae.

Pirlirpuv Hawr-eu Eqtiqorpir Tiq Ghaq-euq Garkawv

²⁶ Khoerngae, Sanqpaq Miqyaer-euq mqtav ghaqkhaer tiq ghaq Pirlirpuv-anr aernaeq-eu, “Tur-awq, lafov paw jav-eu Yeqlursaqlaeq-anr nae Gaqsaq meuq-anr ir-eu garma khoerkanr-anr ir-awq.” Garma khoerkanr-aq, bawrtsanq bawrdanr mae.

²⁷ Khoermirnae, aqyawf tur-awr irdov ghae-euq mae. Khoerngae, Eqtiqorpir sanqpaqma Gaqdaer-euq pyurshuir myawqganq dawqtawv luf-anr hawpir-eu, aryaq zawr gor-eu Eqtiqorpir-euq miqtsuif aqyuif ghaq, Yeqlursaqlaeq-anr uqduq tanqler-awr,

²⁸ garma-anr ghof-ir luf-eu mae. Aqyawf, manq lavlawq-anr dziq-awr, Miqyaer gharduq ngaeqdan-eu Irsaqyar nae boftaq-euq sanqbof guiluf-eu mae.

²⁹ Khoerngae, muiq-eu Saflar, Pirlirpuv-anr aernaeq-eu, “Nawr, manq lavlawq-anr taemir-awr, manq lavlawq naeq-aer ir-awq.”

³⁰ Khoermirnae, Pirlirpuv, aqyuif khoerghaq jawr-eu gar caevghae-euq mae. Khoerngae, aqyuif khoerghaq, Miqyaer gharduq ngaeqdan-eu Irsaqyar nae boftaq-euq sanqbof guiluf-eu gar yagaq-awr, aqyawf-anr narhaq-eu, “Nawr guiluf-eu garkawv teu, nawq-anr ghovshawlar mir-a lor?”

³¹ Khoerngae, aqyawf aer-eu, “Ngaq-anr maeqnaeq laf-eu tsawrhaq maqjawr-eu gar, ngar aqjox-aer ghovshawnya nmr-mq?” Khoernar-aq, Pirlirpuv-anr manq lavlawq-euq lafkhoer kurdav-awr, aqyawf naeq-aer binuir-euq mae.

³² Aqyawf guiluf-eu Yaerbof khoertsanr-aq heulof-aer mae: “Aqyawf-aq, saef-eu laer bi tsanrghae-euq yawr-anr dur-eu mae. Cafhm taeq-eu tsawrhaq-euq maeqshi yawrzaq maqmanrni jawr-eu lof-aer, Aqyawf khawf khaqmae maq mrnga lar-aer ciqcurni jawrluf-eu mae.

³³ Aqcawq, aqyawf-anr taqnyirnaeq ngae, aqyawf-anr dawr-awr tsaq-eu lafkhoer maq darnaeq-aq. Aqyawf-euq tsuif aqsur ghaq guinaeq nmr-mq? Aqjeq mirnae aernar-aq, aqyawf-euq daef-eu jeq, mirtsaq-euq khoertav nae bi yurdzae-euq mae.” (Isy 53:7-8)

³⁴ Khoerngae, aqyuif khoerghaq, Pirlirpuv-anr aernaeq-eu, “Ngar narhaqmawf mir-a. Miqyaer gharduq ngaeqdan-eu tsawrhaq heughaq, aqsur ghaq-euq garkawv aermawf-eu nga? Aqyawf-euq garkawv aermawf-eu nga lor? Maqngeur nar-aq, aqcawq-euq garkawv aermawf-eu nga laq?”

³⁵ Khoerngae, Pirlirpuv khaqmae mrnga-awr Yaerbof heudeuv-anr nae danqbae-awr, Yeqsur-euq garkawv aqyawf-anr dawqmaeq maeqnaeq-euq mae.

³⁶ Aqyawfnyaf garma kanrli-aer irghae-awr, ircuf danq-eu tiq tsanr-anr irkeuv ngae, aqyuif khoerghaq aer-eu, “Hawsher-eq. Heugar ircuf danq ngar-a. Ngar bartirsaq hageuf-eu gar lavtsoeq paq-aer tiqjeqnav jav-a laq?”

³⁷ Khoerngae, Pirlirpuv aer-eu, “Nawq-euq nuima dawqtawvluf jan nar-aq, bartirsaq hageufnya taef-a.” Khoerngae, aqyuif khoerghaq aer-eu, “Yeqsur Kali-aq, Miqyaer-euq Zaqyo ngar-a laer ngar jan ma.”

³⁸ Khoerngae, aqyuif khoerghaq dawq bif-awr, manq lavlawq-anr binaq-euq mae. Pirlirpuv hawr-eu aqyuif khoerghaq ircuf-anr ur-ir-awr, Pirlirpuv, aqyawf-anr bartirsaq mrnaeq-euq mae.

³⁹ Aqyawfnyaf, ircuf-anr nae dovlar ngae, Sanqpaq Miqyaer-euq Saflar nae Pirlirpuv-anr ciqghae-awr, aqyuif khoerghaq, Pirlirpuv-anr maqpar ya’mawr-euq mae. Aqyuif khoerghaq-aq, laqkhaq caertavni maeqhu paw ghof-ir ghae-euq mae.

⁴⁰ Khoernar-aq, Pirlirpuv, Aqcov meuq-anr jawr-eu gar bimawr-euq mae. Aqyawf, meuq yawqmeuq navluf-anr cantsaev ngae, guiqlanqdawq maeqmaeq-aer Gaersaqlir-anr lekeuv-euq mae.