Gʼaˬkʼehˇ 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Saqteqpaq Dawqmaeq Maeq-euq

¹ Khoernar-aq, pirma yawhuiq ghaq, Saqteqpaq-anr narhaq-eu, “Heulof-aer ngeur-eu mae lor?”

² Khoerngae, Saqteqpaq heulof-aer aerkhof naeq-euq mae: “Aqyuif aqnyir hawr-eu aqda deuq-or! Narhaq sher-eq. Aqdui-euq aqpoeq Aqbyaqhaq, Harlaq meuq-anr maqjawr-ir-euq minav-aer, Meqsoqpoqtaqmir mirkhanq-anr jawr ngae, yawshaef khanqsaer huiq-eu Miqyaer, aqyawf jawr-eu gar dovle-awr,

³ aqyawf-anr aernaeq-euq, ‘Nawq-euq mirkhanq hawr-eu nawq-euq aqyuif aqnyir jawr-eu gar nae dov-ir-awr, ngar, nawq-anr toeqmaeq naeq-eu mirkhanq-anr oe-awq.’ (Adb 7:5)

⁴ Khoermirnae, aqyawf, Kaqlaqdaer mirkhanq-anr nae dovle-awr, Harlaq meuq-anr jawr-ir-euq mae. Aqyawf-euq aqda shirdzeur-euq nar-aq, Miqyaer, aqyawf-anr khoergar nae bidov-ir-awr, nymq-mr nawmaf jawrluf-eu mirkhanq heukhanq-anr bi jawrle-euq mae.

⁵ Heugar, Miqyaer, aqyawf-anr jeqbir maq bifnaeq-aq. Kuirzaq tiq daq huini taef-aer khawf maq bifnaeq-aq. Aerkhawf, mirkhanq heukhanq, aqyawf hawr-eu aqyawf-anr nae jeuqle ovle-euq zaqdeuq uvdeuq-euq jeqbir bi pyeuflar ma laer Miqyaer sarjax dzaqtaq-euq mae. Khoerngae, Aqbyaqhaq, zaq maq jawrle-aq siq. (Adb 17:8; 48:4)

⁶ Khoerngae, Miqyaer heulof-aer aer-eu mae, ‘Aqyawf-euq zaqdeuq uvdeuq-aq, aqcawq tsawrjeuq tsawrca-euq mirkhanq-anr jawrnaq mr-awr, khoergar jawr-eu tsawrhaq deuq, aqyawf maf-anr 400 khof byanni zaqkhav bigeuf-awr khaeqnaeq khavnaeq taef-a.

⁷ Miqyaer aer-eu, ‘Aqyawf maf-anr zaqkhav bigeuf-euq mirkhanq khoerkhanq-anr ngar yarkhaq darnaeq ma. Khoernar-aq, aqyawfmaf khoergar nae dovlar-awr, heugar ngaq-anr uqduq tanqlar taef-a.’ (Adb 15:13-14; Di 3:12)

⁸ Khoernar-aq, Miqyaer, Aqbyaqhaq-anr bawkhov maeqdzaq yaeq-eu zanr-anr taf-eu dawqma sarjax bif-euq mae. Khoermirnae, Aqbyaqhaq-euq zaqyo Irtsav daefle-awr yaef nan byanlar-euq nar-aq, aqyawf-anr bawkhov maeqdzaq yaeqnaeq-euq mae. Irtsav-euq zaqyo Yaqkov mae. Yaqkov-euq zaqyo-aq, aqdui-euq aqpoeq 12 poeq mae.

⁹ “Aqpoeq heudeuq, Yorsaev-anr myavnav nav-eu mirnae, Irjirtuv-anr anqdzae-euq mae. Aerkhawf, Miqyaer, aqyawf naeq-aer jawr-awr,

¹⁰ shaqzanq yawqjeq navluf-anr nae aqyawf-anr bibuq-ir-euq uqtaf, Yorsaev, Irjirtuv sanqpaq Paqlawr-euq maeqshi jawr ngae, Miqyaer, aqyawf-anr ghoer mr-awr zaqsiq tsawrganr khawf bifnaeq-euq mae. Khoermirnae, Paqlawr, Yorsaev-anr mirkhanq hawr-eu aqyawf-euq nymrkhanq dawqtawv luf-anr sanrmr-eu ghaq bigeuf-euq mae.

¹¹ Khoerngae, Irjirtuv hawr-eu Kaqnaq mirkhanq khanqlanni, maef-awr shuf-eu jeq hawr-eu shaqdui zanq duidui-eu jeq keuvle taq-euq mae. Aqdui-euq aqpoeq deuq khawf, dzaq-eu jeq maq povmawr nya-aer shaqlar taq-euq mae.

¹² Aerkhawf, Yaqkov, Irjirtuv-anr caer jav-eu garkawv yagaq ngae, aqdui-euq aqpoeq deuq-anr khaerghae-awr, yawbae dov bi’ir-euq mae.

¹³ Nyiq dov tiqdov ir ngae, Yorsaev, aqyawf aqsur ghaq le laer aqyawf-euq maernmr deuq-anr bi siqnya-euq mae. Paqlawr khawf Yorsaev-euq zawfjir-anr ya siqnya-euq mae.

¹⁴ Khoernar-aq, Yorsaev, aqyawf-euq aqda Yaqkov hawr-eu aqyuif aqnyir bi sheuqlaq ler-eu laer khaerlef-euq mae. Aqyawfmaf dawqtawvluf 75 ghaq byan-eu mae.

¹⁵ Khoernar-aq, Yaqkov, Irjirtuv-anr jawr-ir-awr, aqyawf khawf, aqdui-euq aqpoeq deuq khawf khoergar shirjir-euq mae.

¹⁶ Aqyawf maf-anr Seqjeq meuq-anr bafkhof lef-awr, Seqjeq meuq-euq aqda Haqmawq-euq oeqpaq oeqma deuq-anr, Aqbyaqhaq nae pyur bif-awr zeurtaq-euq lmqbymr-anr bafpanq-euq mae.”

Miqyaer, Morseq-anr Ghoe-awr Nae Irsaqleqlav Tsawrhaq-anr Bibuq-ir-euq

¹⁷ “Miqyaer nae Aqbyaqhaq-anr sarjax dzaqtaq-euq dawq byanlar-eu aryamq paelar ngae, Irjirtuv-euq lafkhoer aqdui-euq tsawrjeuq tsawrca myaqlar-awr baerlar-euq mae.

¹⁸ Yorsaev-anr maq siqnya-eu sanqpaq yawshuif tiq ghaq dzoeqlar ngae keuvni myaqlar baerlar-euq mae. (Di 1:8)

¹⁹ Sanqpaq heughaq aqdui-euq tsawrjeuq tsawrca-anr maershuir shuir-awr, aqdui-euq aqpoeq aqbawr deuq-anr khaeqnaeq khavnaeq-awr, zaqdeuq maqya daef-ir ni bi ciqdzae-euq mae.

²⁰ Khoerngae, Morseq daefle-awr, Miqyaer nuikhanrshir duidui-eu mae. Bala smr siq byanni aqyawf-euq aqda-euq nymr-euq lafkhoer cutaq-euq mae.

²¹ Arnan, aqyawf-anr ciqdzae-ir ngae, Paqlawr-euq zaqmiq nae aqyawf-anr ciqghae-awr, aqyawf-euq zaq lof-aer cuhuiq-euq mae.

²² Morseq-aq, Irjirtuv tsawrhaq-euq zaqsiq tsawrganr dawqtawvluf yadzaw-awr, ngaeq-awr tmr-eu paw khawf, mr-awr shar-eu paw khawf ghaq anr duidui-eu mae.

²³ “Aqyawf 40 khof khawvlar ngae, aqyawf-euq aqyuif aqnyir Irsaqleqlav tsawrhaq-anr haw-ir-eu laer aqyawf-euq nuima-anr noeqdov ler-euq mae.

²⁴ Aqyawf, aqyawf maf-euq lafkhoer-euq tiq ghaq bikhaeq-awr shaqzanq daqluf-eu gar ya’mawr ngae, aqyawf-euq tsawrhaq-anr cawba naeq-awr, khaeq-euq Irjirtuv tsawrhaq khoerghaq-anr janrkhof naeq-awr saef-euq mae.

²⁵ Miqyaer, aqyawf-euq aqlaf-anr ghoe-awr, aqyawf maf-anr bi kakhof le-euq ngar-a laer, aqyuif aqnyir deuq ghovshawnya taef-a laer Morseq noeq-euq khawf, aqyawfmaf maq ghovshaw nya-a.

²⁶ Nishawq ngae nan, Irsaqleqlav tsawrhaq nyiq ghaq caedzaq luf-eu gar dovle-awr, aqyawfnyaf tsaqler dzoerlerni laejae-eu lafkhoer aer-eu, ‘Cawq-or! Nawnyaf, aqyuif aqnyir yawkaq, aqjeq mirnae tiqghaq tirghaq mrbanq luf-eu le?’

²⁷ Aerkhawf, aqyawf-euq aqyuif aqnyir-anr mrbanq-euq khoerghaq, Morseq-anr daeqdzae ghae-awr heulof-aer aer-eu mae, ‘Nawr, nga’maf-anr uvlanr-awr, yarkhaq dar-eu ghaq geufni aqsur ghaq nae nawq-anr khaertaq-euq la?

²⁸ Mirnan, nawr, Irjirtuv tsawrhaq khoerghaq-anr saef-euq lof-aer, ngaq-anr khawf saefmawf-eu nya lor?’ (Di 2:14)

²⁹ Morseq dawq khoerdawq-anr yagaq ngae, Mirdiqyaq mirkhanq-anr caevjawr-ir-awr, mirkhanq khoerkhanq-anr jawrnaq mr-eu tsawrhaq pyeuflar-euq mae. Khoergar zaqyo nyiq ghaq jawrle-euq mae.

Morseq-anr Kur-euq

³⁰ “Oeqtser khof dzeur-ir-awr, Sirnav gawqjawq-euq dawqpae jav-eu bawrtsanq bawdanr-anr daef-eu bawduv-anr miqdzaq dofluf-awr, miqdzaq miqlmr-euq lafkhoer, Sanqpaq Miqyaer-euq mqtav ghaqkhaer tiq ghaq, Morseq jawr-eu gar dovle-euq mae. (Di 3:2)

³¹ Morseq khoer-anr ya’mawr ngae, zanqler-awr hawduq ler-eu laer dawqpae lepae ngae, Sanqpaq Miqyaer-euq tersar ngaeqdov laf-awr

³² aer-eu, ‘Ngar-aq, nawq-euq aqpoeq deuq-euq Miqyaer, Aqbyaqhaq-euq Miqyaer, Irtsav-euq Miqyaer hawr-eu Yaqkov-euq Miqyaer ma.’ (Di 3:6) Khoerngae, Morseq yawdzuq gan’gan-aer maq hawpeuq-a.

³³ Khoerngae, Sanqpaq Miqyaer, aqyawf-anr heulof-aer aernaeq-euq mae: ‘Nawr nawqluf-eu saeqnawv laev-awq. Aqjeq mirnae aernar-aq, nawr yawfluf-eu jawrduq heutsanr-aq yawshawr mae. (Di 3:5)

³⁴ Ngaq-euq tsawrhaq, Irjirtuv-anr jawr-awr, khaeq-awr khav-eu jeq-anr daqluf-eu gar ngar ya’mawr-awr, aqyawfmaf manrluf-eu tersar-anr khawf ngar yagaq-awr, aqyawf maf-anr bibuq-ir-eu laer oeka-euq ma. Haeq, kawr-aer lar-awq. Ngar, nawq-anr Irjirtuv-anr khaerghae ma.’ (Di 3:7-10)

³⁵ “Morseq heughaq-aq, aqyawfmaf nae heulof-aer aer-awr byaerdzae-euq mae, ‘Nawr, nga’maf-anr uvlanr-awr yarkhaq dar-eu ghaq geufni aqsur ghaq nae nawq-anr khaertaq-euq la?’ (Di 2:14) Aerkhawf, Miqyaer-aq, bawduv-euq lafkhoer dovle-euq mqtav ghaqkhaer khoerghaq-euq aqlaf-anr ghoe-awr, aqyawf-anr uvlanr-eu ghaq hawr-eu bibuq-ir-eu ghaq bigeuf-eu laer khaerlef-euq mae.

³⁶ Morseq-aq, Irjirtuv-euq lafkhoer khawf, Irner iqmalavshav hawr-eu bawrtsanq bawrdanr-anr 40 khof byanni jawrluf ngae khawf, zanqler paq-aer ghae-eu jeq hawr-eu bisiq bimawr-eu jeq janr-awr, aqyawf maf-anr sheuqdov laf-euq mae.

³⁷ “Tsawrhaq heughaq-aq, Irsaqleqlav tsawrhaq-anr heulof-aer aernaeq-euq Morseq mae, ‘Sanqpaq Miqyaer, ngaq-anr bi dovlar-euq lof-aer, nawmaf-euq gharduq, nawmaf-euq aqyuif aqnyir-euq lafkhoer nae, Miqyaer gharduq ngaeqdan-eu tiq ghaq bi dovlar taef-a. Nawmaf, aqyawf-anr ya narhaqgeuf taef-a.’ (Dm 18:15)

³⁸ “Morseq-aq, bawrtsanq bawrdanr-anr uiqler-euq baqmaf-euq lafkhoer keuq-eu mae. Sirnav gawqjawq-euq khoertav aqyawf-anr dawq ngaeqcawq-euq mqtav ghaqkhaer khoerghaq naeq-aer jawr-awr, aqdui-euq aqpoeq deuq naeq-aer khawf jawr-euq mae. Bi daeflar nya-eu dawq aqdui-anr bif-eu laer aqyawf hageuf-euq mae.

³⁹ “Aerkhawf, aqdui-euq aqpoeq deuq aqyawf-euq dawq-anr maq narhaq geufni, aqyawf-anr byaerdzae-awr, aqyawf maf-euq nuima-euq lafkhoer-aq, Irjirtuv-anr ghof-ir mawf-eu mae.

⁴⁰ Aqyawfmaf, Aqloq-anr aernaeq-eu, ‘Nga’maf-anr maeqhuq bihuq-eu miqyaer janrnaeq laf-awq. Aqjeq mirnae aernar-aq, Irjirtuv-euq lafkhoer nae nga’maf-anr sheuqdov laf-euq Morseq heughaq-anr aqjeq pyeuflar-euq laer nga’maf maq siqnya nya.’ (Di 32:1,23)

⁴¹ Khoerngae yamq-anr, aqyawfmaf mawrner mawrgaw-euq mawrkawr tiq kawr taev-euq mae. Khoernar-aq, mawrkawr khoerkawr-anr lawrnaeq shaernaeq-awr, aqyawf maf-euq aqlaf nae taevdov taq-euq mawrkawr-anr laqkhaq caer-euq mae.

⁴² Miqyaer yawqpawyawq ciqpyawr-awr nae aqyawf maf-anr byaer-awr, mq-euq khoertav jav-eu jeq-anr uqduq bitanq-euq mae. Khoer-anr tafler-awr nae, Miqyaer gharduq ngaeqdan-eu deuq-euq sanqbof-euq lafkhoer heulof-aer boftaq-euq mae: ‘Irsaqleqlav-euq nymrkhanq deuq-or! Nawmaf bawrtsanq bawrdanr-anr 40 khof byanni can ngae, Jeqzaq saef-awr lawr-euq khoer, nawmaf, ngaq-anr lawrnaeq-euq ma lor?

⁴³ Uqduq tanq-eu gharduq nawmaf nae janrtaq-euq Morlaev tanqpanq aqma mawrkawr-euq saeqghawv hawr-eu, Nawmaf uqduq tanq-eu laer janr-euq, nawmaf-euq miqyaer Leqpaq-euq aqguir-euq arbar-anr nawmaf bafbaf-aer can-eu mae. Khoermirnae, ngar, nawmaf-anr Baqburloq pawpav sheuqtaq-ir ma.’ (Am 5:25-27)

⁴⁴ “Aqdui-euq aqpoeq deuq bawrtsanq bawrdanr-anr jawr ngae, sarkir-euq saqpar saeqghawv jav-euq mae. Morseq nae ya’mawr-euq arbar lof-aer ghawv-awq laer Miqyaer, aqyawf-anr aernaeq-awr khaerdar-euq mae.

⁴⁵ Saqpar saeqghawv heughawv-anr aqdui-euq aqpoeq deuq hageuf-awr ghawvka lef-euq mae. Yorsuv khawf aqcawq tsawrjeuq tsawrca-euq mirkhanq-anr bafanr ghae-awr, Daqbir-euq zir-anr keuvni jav-euq mae. Aqcawq tsawrjeuq tsawrca khoerdeuq-aq, Miqyaer nae aqdui-euq aqpoeq deuq-euq maeqshi nae taedov-euq mae.

⁴⁶ Daqbir-aq, Miqyaer ghoer mr-eu tsawrhaq pyeuf-awr, Yaqkov-euq Miqyaer-euq jawrduq bi tsovnaeqlaf laer shar-euq mae.

⁴⁷ Aerkhawf, Miqyaer-euq gharduq nymr yatsov-euq ghaq-aq, Sorlaqmoq mae.

⁴⁸ “Aerkhawf, aqdir aernar-aq, Gor duidui-eu ghaq-aq, tsawrhaqzaq-euq aqlaf nae tsov-euq uqduq tanqnymr deuq-anr jawr-eu maqngeur-a. Miqyaer gharduq ngaeqdan-eu tsawrhaq heulof-aer aertaq-euq mae:

⁴⁹ ‘Sanqpaq Miqyaer aer-eu, Mq-aq, ngaq-euq nuirmanq pyeuf-awr, Mir-aq, ngaq-euq aqkuir cawqtaqduq ma. Nawmaf, ngaq-euq gharduq aqjox-aer ghae-eu nymr tsov-eu laer ghae-eu le? Maqngeur nar-aq, ngar jawrnaq mrnya-eu aqjeq jav-eu la?

⁵⁰ Heudeuq dawqtawvluf ngaq-euq aqlaf nae baetaq-euq maqngeur-a lor?’ (Isy 66:1-2)

⁵¹ “Kawqlanr ghanr-awr, nuima hawr-eu naqbawr bawkhov maeqdzaq maqyaeq-euq tsawrhaq deuq-or! Nawmaf aqmyanluf Yawshawr Saflar-anr lavtsoeq-eu mae. Nawmaf-euq aqpoeq deuq aqjox-aer janr-euq nar-aq, nawmaf khawf khoerlof-aer ghaeluf-eu mae.

⁵² Nawmaf-euq aqpoeq deuq nae maqbi khaeq maqbi khav haw-euq Miqyaer gharduq ngaeqdan-eu tsawrhaq aqgeu ghaq jawr-eu la? Tsaq-awr dawr-eu ghaq oe taef-a laer ngaeqdan-euq deuq-anr khawf, aqyawfmaf saef-euq mae. Nymq-mr nawmaf khawf, Tsaq-awr dawr-eu khoerghaq, aqcawq-anr anqdzaq-awr bisaef-euq mae.

⁵³ Nawmaf-aq, mqtav ghaqkhaer deuq-anr nae zanrdawq za-euq khawf maq cantae-aq.”

Saqteqpaq-anr Bi Biqsaef-euq

⁵⁴ Aqyawfmaf dawq khoer-anr yagaq ngae, nuima-anr tsawvler-awr, Saqteqpaq-anr seuq teuf-eu mae.

⁵⁵ Khoerngae, Saqteqpaq-anr Yawshawr Saflar byanle-awr mq-anr hawtsovtaq ngae, Miqyaer-euq yawshaef khanqsaer-anr mawr-awr, Yeqsur, Miqyaer-euq armar paw yawfluf-eu gar khawf ya’mawr-awr,

⁵⁶ aer-eu, “Hawsher-eq! Mq pantaq-awr, Tsawrhaq-euq Zaqyo, Miqyaer-euq armar paw yawfluf-eu gar ngar mawrluf-eu ma!”

⁵⁷ Khoerngae, aqyawfmaf tersar yawkhav-aer gurgur-aer, naqbawr daeqtsoeq-awr, Saqteqpaq jawr-eu gar tiqkawv lof-aer caevghae-euq mae.

⁵⁸ Khoernar-aq, aqyawf-anr meuq-euq lafnyir daeqdov ghae-awr, aqyawf-anr khaqlo nae biq-euq mae. Sarkir pyeuf-eu deuq, aqyawf maf-euq paerkhanq laev-awr, Sawrluv laer kur-eu zaqguq tiq ghaq-euq aqkuir-anr yurtaq yaf-euq mae.

⁵⁹ Aqyawfmaf, Saqteqpaq-anr khaqlo biqluf ngae, Saqteqpaq, Miqyaer-anr kurkur-aer aer-eu, “Sanqpaq Yeqsur-or! Ngaq-euq saflar-anr hageuf naeqlaf-awq.”

⁶⁰ Khoernar-aq, aqyawf pawqtsuif pawqdmq dmq-awr tersar yawkhav-aer aer-eu, “Sanqpaq Miqyaer-or! Iqbax heu aqyawf maf-euq khoertav taqbi jav.” Aqyawf khoerlof-aer aerghaq-awr yufkhav-euq mae.