Gʼaˬkʼehˇ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Cawmr-eu Tsawrhaq Tserdov-euq

¹ Khoerngae yamq-anr, zaqlanr deuq myaqlar luf-eu mae. Yawqnan navluf dzaqdzaq dawrdawr birnaeq ngae, aqyawf maf-euq miqcoeq miqma deuq-anr yawmuiq-aer maq birof naeq-euq mirnae, Heqlaqsar dawq ngaeq-eu deuq, Heqbyaer dawq ngaeq-eu deuq-anr dawqghof dov-eu mae.

² Khoermirnae, ghaqkhaer 12 ghaq, zaqlanr baqmaf mafma-anr kuruiq-awr heulof-aer aernaeq-euq mae: “Nga’maf, Miqyaer-euq dawq maeq-eu byaer-awr, dzaqdzaq dawrdawr birnaeq-eu-aq maqtsaq nga.

³ Khoermirnae, aqyuif aqnyir deuq-or! Nawmaf-euq lafkhoer tsawrmyanr muiq-awr, Yawshawr Saflar hawr-eu zaqsiq tsawrganr byan-eu tsawrhaq shif ghaq-anr tserdov-awq. Nga’maf, aqyawf maf-anr khaerdar naeq-awr gar heu bimr ma.

⁴ Aerkhawf, nga’maf-aq, guiqlanq shar-awr, Yaerdawq-anr taf-eu guiqlanq-euq gar-anr taef-aer noeqtsov taq-awr mr ma.”

⁵ Aqyawfmaf aer-eu gar, tsawrhaq armaf maflanni nuikhanr shir-awr, heudeuq-anr tserdov-euq mae: jan-eu jeq byan-awr Yawshawr Saflar byan-eu Saqteqpaq hawr-eu Pirlirpuv, Bawrkawq, Nirgaqnawq, Tirmoq, Baqmeqnar hawr-eu Yurdav-euq zanr tawqlar-euq Aqdirawq-anr jawr-eu Nirgawrla heudeuq mae.

⁶ Aqyawf maf-anr ghaqkhaer deuq-euq maeqshi biyawf-awr, ghaqkhaer deuq guiqlanq shar-awr, aqyawf maf-euq khoertav aqlaf bafdav naeq-euq mae.

⁷ Khoernar-aq, Miqyaer-euq dawq gaqdoe-ir-awr, Yeqlursaqlaeq-euq lafkhoer zaqlanr zawr myaqlar-awr, pirma ghawqmya’ni khawf Kali-anr janlar-euq mae.

Saqteqpaq-anr Nyaef-euq

⁸ Saqteqpaq-aq, jan-eu jeq hawr-eu baoq tiqbyanni anr-awr, mirkhanqzaq-euq ghanrcae huiq duidui-eu zanqler paq-aer ghae-eu jeq hawr-eu bisiq bimawr-eu jeq mr-euq mae.

⁹ Khoerngae, Buq-ir-euq tsawrhaq-euq zanrdawq khawqnymr laer kur-eu armur-anr taf-eu Kurleqniq meuq, Aqleqsaqdur meuq, Girlirciv hawr-eu Aqsir mircoer-anr nae lar-euq tsawrhaq tiqpavnav deuq turlar-awr, Saqteqpaq naeq-aer tsawrpyaer pyaercae cae-euq mae.

¹⁰ Aerkhawf, Saqteqpaq-aq, zaqsiq tsawrganr hawr-eu muiq-eu Saflar-anr ghoeghoe-aer ngaeq-eu mirnae, aqyawfmaf maq pyaerghaq nya-a.

¹¹ Khoermirnae, aqyawfmaf tsawrhaq tiqpavnav deuq-anr yawzaf zaf-aer cawqtawv-awr heulof-aer bi’aer-euq mae, “Tsawrhaq heughaq-aq, Morseq hawr-eu Miqyaer-anr yaeqbawq saerlu-aer aer-eu gar nga’maf yagaq-euq ma.”

¹² Khoernar-aq, aqyawfmaf nae mirkhanqzaq, aqyuif aqtsu deuq hawr-eu, zanr maeq-eu deuq-anr lavteuv-euq mae. Khoermirnae, aqyawfmaf, Saqteqpaq jawr-eu gar oe-awr, aqyawf-anr nyaef-awr nae, aqyawf-anr khavma armur jawr-eu gar sheuqghae-euq mae.

¹³ Khoeruqtaf, aqyawfmaf, tsawrkaq jaqmyawf kurlaf-awr heulof-aer bi’aer-euq mae: “Tsawrhaq heughaq-aq, yawshawr lawv hawr-eu zanrdawq-anr maq tsaevlerni yaeqbawq saerlu-aer aerluf-eu mae.

¹⁴ Naqzaqlaer tsawrhaq Yeqsur, uqduq tanqnymr nymrma heu-anr pyavdzae-awr, ‘Morseq nae aqdui-anr bi tawqka lef-euq zanr deuq-anr khawf lavpar taef-a’ laer aqyawf aer-eu gar nga’maf yagaq-euq ma.”

¹⁵ Khoerngae, khavma armur-euq lafkhoer nuirluf-eu tsawrhaq dawqtawvluf, Saqteqpaq-anr hawtsov taq-awr, aqyawf-euq myavpyawq, mqtav ghaqkhaer-euq myavpyawq lof-aer dur-eu gar ya’mawr-euq mae.