Gʼaˬkʼehˇ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqnaqnir Hawr-eu Saqpirla

¹ Khoerngae, Aqnaqnir laer kur-eu tiq ghaq jawr-awr, aqyawf-euq miqzaq-aq Saqpirla laer kur-eu mae. Aqnyaf dzerzaq khawf mirtsaq tiq tsanr anq-euq mae.

² Khoernar-aq, anqza-euq pyur-euq lafkhoer nae uicuiv yurdov yaf-awr, nuideuq-aq, ghaqkhaer deuq-euq aqkuir-anr yurtaq lar-euq mae. Pyur yurdov yaf-euq khoer aqyawf-euq miqzaq khawf siqnya-eu mae.

³ Khoerngae, Beqtuvluv heulof-aer aernaeq-euq mae: “Aqnaqnir-or! Aqjeq mirnae nawq-euq nuima-anr naef Saqdaq bi urbyan lar-awr, Yawshawr Saflar-anr jaqmyawf myawf-awr, mirtsaq anqza-euq pyur uicuiv yurdov yaf-euq le?

⁴ Mirtsaq maqanq-euq siq khoer-aq, nawq-euq mirtsaq maqngeur-a lor? Paranq-euq law-awr khawf, arpoeq khoer nawq-euq navni jav-eu maqngeur-a laq? Nawr aqjeq mirnae teulof-aer janr-eu laer, nawq-euq nuima-euq lafkhoer sharnoeq-euq le? Nawr, tsawrhaq-anr maqngeur-eu, Miqyaer-anr jaqmyawf myawf-euq mae.”

⁵ Aqnaqnir dawq khoerdawq-anr yagaq ngae, coqdzae ghae-awr saf tsaev-euq mae. Garkawv khoer yagaq-euq tsawrhaq dawqtawvluf guv duidui-ir-euq mae.

⁶ Khoerngae, zaqguq tiqdeuq turlar-awr, mawrtawv tawv-awr nae bafdov ghae-awr bafpanq-ir-euq mae.

⁷ Khoernar-aq, naqliq smr laf aerghaq dzeur-ir ngae, aqyawf-euq miqzaq urlar-euq mae. Uqsoe pyeufdzeur yaf-euq garkawv-anr aqyawf maq siqnya-a.

⁸ Beqtuvluv, aqyawf-anr narhaq-eu, “Ngaq-anr aernaeqlaf sher-eq. Nawnyaf nae mirtsaq anqza-euq pyur heumyav taef ma lor?” Khoerngae, aqyawf aerkhof-eu, “Ngeur ma. Teumyav taef ma.”

⁹ Khoerngae, Beqtuvluv, aqyawf-anr aernaeq-eu, “Nawnyaf aqjox-aer tiqgar gm-awr, Sanqpaq Miqyaer-euq Saflar-anr tsermr haw-eu le? Taeq, nawq-euq khaqdzerzaq-anr bafpanq-ir-euq deuq ghovkhaeq-anr ghofkeuv lar-euq ngar-a. Aqyawfmaf, nawq-anr khawf bafdovghae taef-a.”

¹⁰ Zaqmiq aqbur khoerghaq khawf tiqpov taef-aer Beqtuvluv-euq aqkuir-euq dawqpae coqdzae ghae-awr saf tsaev-euq mae. Zaqguq khoerdeuq urlar ngae, aqyawf saf tsaevdzeur-euq gar ya’mawr-awr, aqyawf-anr khawf bafdov ghae-awr, aqyawf-euq khaqdzerzaq-euq gardzer bafpanq-ir-euq mae.

¹¹ Khoermirnae, Kalizaq armur hawr-eu, garkawv khoer kharya gaq-euq tsawrhaq dawqtawvluf guv duidui-ir-euq mae.

Bisiq Bimawr-eu Jeq Hawr-eu Zanqler Paq-aer Ghae-eu Jeq

¹² Sanqpaq Miqyaer, ghaqkhaer deuq-euq aqlaf-anr ghoe-awr, tsawrhaq ghawqmya ni-euq ghanrcae, bisiq bimawr-eu jeq hawr-eu zanqler paq-aer ghae-eu jeq ghawqmya’ni mr-euq mae. Aqyawfmaf dawqtawvluf nuima tiqsiq taef-aer taq-awr, Sorlaqmoq-euq guirgaceuq-anr uiqler-awr jawr-eu mae.

¹³ Aqcawq tiqghaq-iq aqyawfmaf naeq-aer maq gawfler peuq-eu khawf, mirkhanqzaq, aqyawf maf-anr noeqpoeq-awr taqhuiq-eu mae.

¹⁴ Sanqpaq Yeqsur-anr jan-eu tsawrhaq, zaqmiq aqbur khawf, zaqyo aqli khawf, ghawqmya’ni tiqjawr sair tiqjawr myaqlar luf-eu mae.

¹⁵ Khoeruqtaf, Beqtuvluv cantsaev ngae, aqyawf-euq arbar narshmr taef-aer khawf, nar-awr gawr-eu tsawrhaq-anr bi barshmrni, aqyawf maf-anr garma-anr bafdov lef-awr, yufzar-anr maqngeur nar-aq, parsiq-anr bi yuftaq-euq mae.

¹⁶ Yeqlursaqlaeq-euq jawqlaw jawrlawr jav-eu meuq-anr jawr-eu tsawrhaq armaf deuq, nar-awr gawr-eu tsawrhaq deuq hawr-eu, naef yawjawf nae bikhaeq bikhav-euq tsawrhaq deuq sheuqlaf-euq mae. Aqyawfmaf dawqtawvluf taqler jir-euq mae.

Ghaqkhaer Deuq Khaeq-awr Khav-eu Gar Yadaq-euq

¹⁷ Khoerngae, pirma yawhuiq ghaq hawr-eu aqyawf naeq-aer kharjawr-eu Saqduqgaer armur-anr gawf-eu tsawrhaq deuq myavnavnav duidui-eu mirnae tsawqtur lar-euq mae.

¹⁸ Khoerngae, aqyawfmaf, ghaqkhaer deuq-anr nyaef-awr kuv-anr nyaefur taq-euq mae.

¹⁹ Aerkhawf, uqcif paw Sanqpaq Miqyaer-euq mqtav ghaqkhaer tiq ghaq, kuv-euq larghov deuq panle-awr, aqyawf maf-anr sheuqdov ghae-awr aer-eu,

²⁰ “Nawmaf le-awr, uqduq tanqnymr nymrma-euq lafkhoer yawf-awr, aqyawf maf-anr daef-eu jeq bif-eu dawq dawqtawvluf ja’maeq naeqler-awq.”

²¹ Ghaqkhaer deuq dawq khoerdawq yagaq-euq mirnae uqshawq yawnaf-aer, uqduq tanqnymr nymrma-anr urler-awr maeqnaeq tsovnaeq-euq mae. Khoerngae, pirma yawhuiq ghaq hawr-eu aqyawf naeq-aer jawr-eu tsawrhaq deuq lar-awr, khavma armur hawr-eu Irsaqleqlav tsawrhaq-euq aqyuif aqtsu dawqtawvluf kuruiq jir-awr, kuv-anr nyaefur taq-euq ghaqkhaer deuq-anr bi sheuqdov laq-ir-euq mae.

Ghaqkhaer Deuq Shaqzanq Parya Daq-euq

²² Aerkhawf, lofpir-eu kuirlaf deuq irkeuv ngae, ghaqkhaer deuq kuv-anr ur-eu gar maqmawr-aq. Khoermirnae, aqyawfmaf ghoflar-awr, dawqdzawr dzawr-eu lafkhoer,

²³ aer-eu, “Kuv-euq larghov zifdanni tawftaeq taq-awr, lof-eu tsawrhaq deuq khawf lafnyir paw ghovkhaeq-euq maeqshi yawfluf-eu gar nga’maf ya’mawr-euq ma. Aerkhawf, larghov pan-awr haw ngae-aq, lafkhoer tiqghaq-iq jawr-eu maqmawr-aq.”

²⁴ Khoerngae, pirma yawhuiq ghaq, uqduq tanqnymr nymrma-anr haw-eu aqyuif ghaq hawr-eu, pirma aqyuif deuq, dzawrlar-euq dawq khoer-anr yagaq ngae, garkawv heu aqjox-aer pyeuflar-eu laer ghae-eu nga laer noeq maqdov-a.

²⁵ Khoerngae, tsawrhaq tiq ghaq, aqyawfmaf jawr-eu gar urlar-awr aer-eu, “Haeqsher-eq! Nawmaf nae kuv-anr nyaefur taq-euq tsawrhaq khoerdeuq, uqduq tanqnymr nymrma-euq lafkhoer yawf-awr, khoergar jawr-eu tsawrhaq deuq-anr maeqnaeq luf-eu mae.”

²⁶ Khoermirnae, uqduq tanqnymr nymrma-anr haw-eu aqyuif ghaq, lofpir-eu kuirlaf sheuq-awr, ghaqkhaer deuq-anr maq lavnarni sheuqlaq-ir-euq mae. Aqjeq mirnae aernar-aq, tsawrhaq armaf deuq, aqyawf maf-anr khaqlo biqlar-eu gar guv-eu mae.

²⁷ Ghaqkhaer deuq-anr sheuqkeuv laf-euq nar-aq, khavma armur-euq maeqshi biyawf-awr, pirma yawhuiq ghaq, aqyawf maf-anr narhaq-eu lafkhoer,

²⁸ aer-eu, “Tsawrmyanr heumyanr-anr ghoeghoe-aer aqcawq-anr taqpar maeqnaeq laer nga’maf, nawmaf-anr dawq yawkhav khav-aer bif-euq maqngeur-a lor? Aerkhawf, hawsher-eq, nawmaf-euq dawqmaeq dawqtsov deuq, Yeqlursaqlaeq meuq meuqlanni gaqdoe-ir taq-awr, tsawrhaq heughaq-euq shiq-euq arpoeq, nga’maf-euq khoertav bi keuvle mawf-eu ghae-eu nga.”

²⁹ Khoerngae, Beqtuvluv hawr-eu ghaqkhaer deuq heulof-aer aerkhof-euq mae: “Nga’maf, tsawrhaq-euq dawq-anr navmaqtser, Miqyaer-euq dawq-anr narhaq geuf-eu tsaq mae.

³⁰ Nawmaf nae darkawq lafyaq-anr gheuceuq-awr saef-euq Yeqsur-anr, aqdui-euq aqpoeq deuq-euq Miqyaer nae bi ghofdaef lar-euq mae.

³¹ Uvlanr-eu ghaq hawr-eu Kakhof-eu ghaq pyeuf-awr, Irsaqleqlav-anr noeqpov noeqpar-eu jeq hawr-eu, iqbax pyaeq-eu jeq bif-eu gharduq, Miqyaer, aqyawf-anr aqyawf-euq armar paw ciqgor naeq-euq mae.

³² Nga’maf-aq, aqyawf-euq gharduq garkawv heudeuq sarkir kamq-eu ma. Miqyaer nae aqyawf-euq dawq narhaq geuf-eu tsawrhaq deuq-anr biftaq-euq Yawshawr Saflar khawf garkawv heudeuq sarkir kamq-eu mae.”

Gaqmaqleqlar-euq Maeqbawq

³³ Aqyawfmaf dawq khoerdawq-anr yagaq ngae, nuima paer duidui lar-awr, ghaqkhaer deuq-anr saef-eu laer tov-eu mae.

³⁴ Aerkhawf, tsawrhaq dawqtawvluf yawzeu baw-eu zanrdawq maeq-eu saqlaq, Gaqmaqleqlar laer kur-eu Paqliqsaer tiq ghaq, khavma armur-euq lafkhoer turlar-awr, ghaqkhaer deuq-anr lafnyir tiqkhaeq bi sheuqdov ghaeni aqyawf maf-anr dawq bif-euq mae.

³⁵ Khoernar-aq, aqyawf, khavma armur deuq-anr heulof-aer aernaeq-euq mae: “Irsaqleqlav tsawrhaq deuq-or! Nawmaf tsawrhaq heudeuq-anr aqjox-aer janrnaeq law-awr khawf, yawmuiq-aer yanr-eu lafkhoer janr-eu tsaq mae.

³⁶ Arhu Turdav laer kur-eu tiq ghaq dovlar-awr, aqyawxyawf yawhuiq yawmanr tiq ghaq ma laer aer-eu mae. Oeqyar ghaq aerghaqni aqyawf-euq maeqnan cantae-euq mae. Aerkhawf, aqyawf-anr lavsaef ghaq ngae, aqyawf-anr nuijan taq-euq tsawrhaq dawqtawvluf caevbyav jir-awr, yawqngaef pyeuf-ir-euq mae.

³⁷ Khoernar-aq, mirkhanqzaq-euq tsawrmyanr dawv ngae, Yurdav laer kur-eu Gaqliqlaer tsawrhaq tiq ghaq khawf dovlar-euq mae. Mirkhanqzaq tiqpavnav deuq-anr gheupyawr-awr, aqyawf-euq maeqnan bi cantae lar-euq mae. Aqyawf khawf bisaef-euq nar-aq, aqyawf-anr nuijan taq-eu tsawrhaq dawqtawvluf bi taebyav jir-euq mae.

³⁸ Khoermirnae, nymq-mr tsawrhaq heudeuq-anr tiqjeq-iq maq janrnaeqni bijawrtawq sher-eq laer ngar, nawmaf-anr sharmawf mir-a. Aqyawf maf-euq bawqtov hawr-eu mr-eu jeq tsawrhaq-anr nae dovlar-euq ngeur nar-aq, yawqngaef pyeuf-ir taef-a.

³⁹ Aerkhawf, Miqyaer-anr nae dovle-euq ngeur nar-aq, nawmaf, aqyawf maf-anr maq lavtsoeq nya-ar. Khoeruqtaf, nawmaf, Miqyaer-anr guirdeuv deuv-eu nga laer mawrlar-eu baw-mr.”

⁴⁰ Aqyawf, aqyawf maf-anr japyawr-awr, aqyawfmaf, ghaqkhaer deuq-anr kurur laf-awr nae aqyawf maf-anr diqghaq-euq nar-aq, Yeqsur-euq tsawrmyanr-anr ghoeghoe-aer taqpar maeq laer dawq bif-awr, aqyawf maf-anr pyaeqnaeq-euq mae.

⁴¹ Miqyaer, aqyawf maf-anr Yeqsur-euq tsawrmyanr baqda’nae shafdawr-eu jeq-anr daq-eu geux-eu tsawrhaq laer sawxnaeq-euq mirnae, ghaqkhaer deuq, khavma armur-euq maeqshi nae laqkhaq caertavni dov-ir-euq mae.

⁴² Aqyawfmaf yawqnan navluf, Yeqsur-aq, Kali mae laer uqduq tanqnymr nymrma-euq lafkhoer hawr-eu nymr yawqnymr navluf-euq lafkhoer, dawqmaeq maeq-awr maeqnaeq tsovnaeq-euq mae.