Gʼaˬkʼehˇ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Beqtuvluv Hawr-eu Yorhaq Binyaef-euq

¹ Aqyawfnyaf, tsawrhaq khoerdeuq-anr ngaeqnaeqluf ngae, pirma deuq, uqduq tanqnymr nymrma-anr lofpir-eu aqyuif ghaq hawr-eu Saqduqgaer deuq, aqyawfmaf jawr-eu gar oekeuv-euq mae.

² Aqyawfnyaf, tsawrhaq khoerdeuq-anr maeqnaeq tsovnaeq luf-awr, Yeqsur-euq garkawv-anr ghoe-awr, shir-euq tsawrhaq ghofdaef lar-eu garkawv maeqnaeq luf-eu mirnae, nuima paer duidui-eu mae.

³ Khoermirnae, aqyawf nyaf-anr nyaef-awr, khoerngae nan uqcif cifle-euq mirnae, nishawq ngae nan keuvni kuv-anr nyaefur taq-awr bijawr-euq mae.

⁴ Aerkhawf, dawq khoer-anr yagaq-euq tsawrhaq ghawqmya’ni janlar-euq mae. Zaqyo aqli deuq taef-aer 5,000 ghaq aerghaqni byan-eu mae.

Khavma Armur-euq Maeqshi

⁵ Khoernar-aq, heulof-aer pyeuflar-euq mae. Nishawq ngae nan, uvlanr-eu deuq, aqyuif aqtsu deuq hawr-eu, zanr maeq-eu deuq uiqlar-awr,

⁶ Aqna pirma yawhuiq ghaq hawr-eu Gaqyaqpar, Yorhaq, Aqleqsaqdur hawr-eu pirma yawhuiq ghaq-euq aqyuif aqnyir dawqtawvluf khawf, Yeqlursaqlaeq-anr tiqkawv lof-aer uiqlar taq-euq mae.

⁷ Ghaqkhaer khoer nyiq ghaq-anr ghanrcae bijawr-awr, aqyawfmaf narhaq-eu, “Nawnyaf aqgeu jeq-euq baoq zmq-awr, aqsur ghaq-euq tsawrmyanr-anr ghoe-awr teulof-aer mrluf-eu le?”

⁸ Khoerngae, Beqtuvluv, Yawshawr Saflar byan-eu lafkhoer, aqyawf maf-anr heulof-aer aernaeq-euq mae: “Mirkhanqzaq-anr uvlanr-eu deuq hawr-eu Irsaqleqlav-euq aqyuif aqtsu deuq-or,

⁹ ghaq maqanr-eu heughaq-anr yawmuiq jeq mrnaeq-awr, aqyawf aqjeq-euq baqda’nae taqler-euq garkawv, iqnan nga’nyaf-anr dar-eu ngeur nar-aq,

¹⁰ nawmaf dawqtawvluf hawr-eu Irsaqleqlav tsawrhaq dawqtawvluf heu-anr siqnya-awq. Nawmaf-euq maeqshi yawfluf-eu heughaq taqler-euq-aq, nawmaf nae tafsaef-awr, Miqyaer nae aqyawf-anr shir-euq gar nae bi ghofdaef lar-euq Naqzaqlaer tsawrhaq Yeqsur Kali-euq tsawrmyanr baqda’nae mae.

¹¹ Yeqsur heughaq-aq, ‘Nawmaf, nymr tsov-eu deuq nae bafdzae taq-euq khaqlo khoersiq, Lafcoer-euq lozif pyeuflar-euq mae.’ (Jc 118:22)

¹² Aqyawf-euq lafkhoer maqngeur nar-aq, nuighaq tiqghaq-iq kakhof-eu jeq maqanr-a. Aqjeq mirnae aernar-aq, mq-euq uqmov, aqdui-anr bibuq-ir nya-eu tsawrmyanr yawqmyanryawq maqbif taq-aq.”

Yeqsur-euq Tsawrmyanr Taqmaeq

¹³ Aqyawfmaf, Beqtuvluv hawr-eu Yorhaq nuima khaqduqni ghae-eu gar ya’mawr-awr, sanqbof maq dzawhaw-aer, mrdzaw maqdzaw-euq tsawrhaq mae laer parya siq ngae zanqler-eu mae. Khoerngae, aqyawf nyaf-aq, Yeqsur naeq-aer jawr-euq mirnae ngar-a laer, aqyawf maf-anr noeqdov ler-euq mae.

¹⁴ Khoeruqtaf, aqkuir taqler-euq khoerghaq, aqyawfnyaf naeq-aer yawfluf-eu gar parya mawr-euq mirnae, aqyawfmaf tiqjeq-iq maq aerler nya-a.

¹⁵ Khoernar-aq, aqyawfmaf, aqyawf nyaf-anr dawq bif-awr, khavma armur-anr nae lafnyir paw bidov-ir-awr, aqyawf maf-euq yawkaq bawqdzaq bawqdzaq-aer heulof-aer aer-eu mae:

¹⁶ “Aqduimaf, tsawrhaq heu nyiq ghaq-anr aqjox-aer janrnaeq paq nga? Aqjeq mirnae aernar-aq, aqyawfnyaf byacaevni mawrlar-eu khavjeq-aer ghae-eu jeq janr-euq mae laer Yeqlursaqlaeq-anr jawr-eu tsawrhaq dawqtawvluf siqnya-eu mae. Aqduimaf khawf maqngeur-a laer maqaer nya-eu beu.

¹⁷ Aerkhawf, garkawv heu, mirkhanqzaq-euq ghanrcae heunav maqtser maqpar bikhawq-ir ni, nymq-mr nae nar-aq, tsawrmyanr teumyanr-anr ghoeghoe-aer tiqghaq-anr-iq taqpar maeq laer aqduimaf, aqyawf nyaf-anr guvtsiq yawkhav-aer ya nyaefnaeq-eu ngar-a.”

¹⁸ Khoernar-aq, aqyawfmaf, aqyawf nyaf-anr kur-awr, Yeqsur-euq tsawrmyanr-anr ghoe-awr maeq khawf taqpar maeq, ja khawf taqpar ja laer dawq bif-euq mae.

¹⁹ Aerkhawf, Beqtuvluv hawr-eu Yorhaq, aqyawf maf-anr heulof-aer aerkhof naeq-euq mae, “Miqyaer-anr narhaq geuf-eu navmaqtser nawmaf-anr narhaq geuf-eu, Miqyaer-euq maeqshi tsaq paq-aer ghae mir-a laq laer nawmaf dar-awq.

²⁰ Nga’nyaf-aq, nga’nyaf nae yagaq-awr ya’mawr-euq garkawv deuq maqja-aer maq jawrnya nya.”

²¹ Khoerngae, aqyawfmaf, tsawrhaq baqmaf-anr guv-eu lafkhoer, aqyawf nyaf-anr aqjox-aer khaeqnaeq-eu paq nga laer noeq maqdov-eu mirnae, aqyawf nyaf-anr guvtsiq yawkhav-aer parnyaef-awr pyaeqnaeq-euq mae. Aqjeq mirnae aernar-aq, khoergar pyeuflar-euq garkawv-euq baqda’nae, tsawrhaq dawqtawvluf Miqyaer-anr ciqhuiq ciqmanr luf-eu mae.

²² Aqjeq mirnae aernar-aq, khavjeq-aer ghae-eu jeq mr-euq lafkhoer taqler-euq tsawrhaq khoerghaq-aq, arkhof 40 khof dzaeq-ir-euq mae.

Nuima Khaqduqni Taqnya’ni Guiqlanq Shar-euq

²³ Aqyawfnyaf bipyaeq-euq nar-aq, cawqdeuq jawr-eu gar ir-awr, pirma aqyuif deuq hawr-eu aqyuif aqtsu deuq nae aqyawf nyaf-anr khar aernaeq-euq dawqtawvluf, aqyawf maf-anr dzawrnaeq-euq mae.

²⁴ Aqyawfmaf yagaq ngae, nuima tiqsiq taef-aer taq-awr, tersar yawkhav-aer Miqyaer-anr heulof-aer aernaeq-euq mae, “Sanqpaq Miqyaer-or! Nawr-aq, mq hawr-eu mir, iqmalavshav hawr-eu heudeuq-euq lafkhoer kharjawr kharjav-eu yawqjeq navluf-anr bae-euq Yawsanr ghaq mae.

²⁵ Nawr, nawq-euq ghaqzaq ghaqkhaer Daqbir-euq khaqmae-anr ghoe-awr heulof-aer bi’aer-euq mae: ‘Aqjeq mirnae aqcawq tsawrjeuq tsawrca deuq hawr-eu mirkhanqzaq nuima paersaef-eu la? Aqjeq ghae-eu tsawrhaqzaq gardanr maqtsoeq-eu jeq tovluf-eu nga?

²⁶ Mirtsaq-euq sanqpaq deuq turlar-awr, uvlanr-eu deuq khawf tiqkawv lof-aer uiqlar taq-awr, Sanqpaq Miqyaer hawr-eu aqyawf-euq Kali-anr muir-eu laer ghae-eu mae.’ (Jc 2:1-2)

²⁷ “Nawq nae tsaqtsov taq-euq, shawr-eu nawq-euq ghaqzaq ghaqkhaer Yeqsur-anr aqdir muir-eu laer, Heqlor hawr-eu Boqtiv Pirlav, aqcawq tsawrjeuq tsawrca hawr-eu Irsaqleqlav tsawrhaq deuq khawf tiqkawv lof-aer uiqlar taq-euq mae.

²⁸ Aqyawf maf-aq, nawr nuima tsaq-eu lof-aer nawq-euq aqlaf nae mr ma laer noeqtaq-euq lof-aer pyeuflarni mr-eu gharduq mae.

²⁹ Sanqpaq Miqyaer-or! Nymq-mr aqyawfmaf, nga’maf-anr guvtsiq nyaeflar-eu gar haw-awr, nawq-euq ghaqzaq ghaqkhaer deuq nuima khaqduqni anranr-aer, nawq-euq dawq ngaeqnya’ni cawba naeqlaf-awq.

³⁰ Nawq-euq aqlaf cawqja lef-awr nargawr lavtaq naeq-eu uqtaf, nawq-euq shawr-eu ghaqzaq ghaqkhaer Yeqsur-euq tsawrmyanr-anr ghoe-awr, bisiq bimawr-eu jeq hawr-eu zanqler paq-aer ghae-eu jeq mr-awq.”

³¹ Aqyawfmaf guiqlanq sharghaq ngae, aqyawfmaf uiqler taq-euq khoertsanr nyaelar-euq mae. Khoernar-aq, aqyawfmaf yawqghaq navluf-anr Yawshawr Saflar byanle-awr, aqyawfmaf nuima khaqduqni Miqyaer-euq dawq ngaeq-eu mae.

Myawqganq Tiqkawv Lof-aer Zmq-euq

³² Kali-anr jan-eu tsawrhaq baqmaf myaq-eu khawf, nuima tiqsiq taef-aer taq-awr, nuinoeq tiqgar taef-aer tsaq-eu mae. Aqgeu ghaq maqkaq, yawqha jav-eu myawqdeuq, yawqha-euq le laer tiqghaq-iq maqaerni, kharjav-eu myawq dawqtawvluf tiqkawv lof-aer zmq-eu mae.

³³ Ghaqkhaer deuq huiq-eu baoq anr-eu lafkhoer, Sanqpaq Yeqsur ghofdaef lar-euq garkawv sarkir kamq-euq mae. Aqyawfmaf yawqghaq navluf-euq khoertav, Miqyaer-euq guiqlanq yawdzanr huiq duidui-eu mae.

³⁴ Aqyawf maf-euq lafkhoer nym-eu tsawrhaq tiqghaq-iq maqjawr-a. Aqjeq mirnae aernar-aq, yawqghaq navluf kharjav-eu jeq anq-awr, mirtsaq hawr-eu nymr khawf anq-awr, anqza-euq pyur khoer yurlaf-awr,

³⁵ ghaqkhaer deuq-euq aqkuir-anr yurtaq lar-eu mae. Khoernar-aq, yawqha mawf-eu gar tsaqni kharmawf-eu ghaq-anr birnaeq-eu mae.

³⁶ Gurbaqlur irjawlanr-anr daefle-euq Leqbir arjeuq arca Yorsaev laer kur-eu tiq ghaq jawr-eu mae. Ghaqkhaer deuq, aqyawf-anr Baqnaqbar laer myanrpar naeq-euq mae (Baqnaqbar laer aer-eu-aq, “Ghaq bif-eu zaqyo” laer aermawf-eu mae).

³⁷ Aqyawf khawf mirtsaq jav-eu mae. Mirtsaq khoer anq-awr za-euq pyur khoer, ghaqkhaer deuq-euq aqkuir-anr yurtaq lar-euq mae.