Gʼaˬkʼehˇ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqkuir Yawcawv Tiq Ghaq

¹ Tiqnan, uqciftaw naqliq smr laf-anr guiqlanq shar-eu aryamq keuvlar ngae, Beqtuvluv hawr-eu Yorhaq, uqduq tanqnymr nymrma-anr davler luf-eu mae.

² Khoerngae, Hawmuiq-eu larghov laer kur-eu ghovkhaeq-anr, uqduq tanqnymr nymrma-euq lafkhoer urler-eu deuq-anr pyur bishar-eu laer, daefle ngae nae aqkuir yawcawv tiq ghaq-anr aqcawq yawqnan navluf baftaq lar-eu lof-aer, bi baftaq lar-awr jawr-eu mae.

³ Aqyawf, Beqtuvluv hawr-eu Yorhaq, uqduq tanqnymr nymrma-anr urler-eu laer ghae ngae, ya’mawr-awr aqyawf nyaf-anr pyur shar-eu mae.

⁴ Aqyawf, Yorhaq-anr hawtsovtaq ngae Beqtuvluv aer-eu, “Nawr, nga’nyaf-anr hawsher-eq.”

⁵ Aqyawf, aqyawfnyaf tiqjeqnav bifnaeq laf-eu paq laer noeqtmq-eu mirnae, aqyawf, aqyawf nyaf-anr hawtsov taq-euq mae.

⁶ Khoerngae, Beqtuvluv aer-eu, “Ngar, pyur hawr-eu shuir maqanr. Aerkhawf, ngar anr-eu jeq nawq-anr bif ma. Naqzaqlaer tsawrhaq Yeqsur Kali-euq tsawrmyanr-euq uqmov turlar-awr can-awq.”

⁷ Khoernar-aq, Beqtuvluv, khoerghaq-euq armar laf-anr nyaeftaeq-awr, aqyawf-anr gheutur naeq-euq mae. Khoerngae, aqyawf-euq aqkuir hawr-eu kuirmyavpur tiqpov taef-aer ghaq anrlar-euq mae.

⁸ Khoermirnae, aqyawf tsawqdir laf-awr gawqyawf yawf-eu uqtaf, garma khawf can-eu mae. Khoernar-aq, aqyawf canlaw can, tsawqlaw tsawqtsawq-aer Miqyaer-anr jaceuq-eu lafkhoer, aqyawfnyaf naeq-aer uqduq tanqnymr nymrma-euq lafkhoer urler-euq mae.

⁹ Aqyawf, Miqyaer-anr jaceuq jaqceuq-aer canluf-eu gar, tsawrhaq dawqtawvluf ya’mawr-euq mae.

¹⁰ Aqyawfmaf, aqyawf-aq, Hawmuiq-eu larghov ghovkhaeq-anr nuir-awr pyur shar-eu khoerghaq nga laer hawsiq-awr, aqyawf-euq khoertav pyeuflar-euq jeq-euq baqda’nae, aqyawfmaf noeq maqdovni zanq duidui ler-euq mae.

Beqtuvluv Dawqmaeq Maeq-euq

¹¹ Aqkuir yawcawv taqler-euq khoerghaq, Beqtuvluv hawr-eu Yorhaq-anr nyaeftaeq-awr jawrluf-eu gar tsawrhaq dawqtawvluf zanq duidui ler-awr, aqyawfmaf jawr-eu Sorlaqmoq-euq guirgaceuq laer kur-eu tsanr-anr caevghae lef-euq mae.

¹² Beqtuvluv khoer-anr ya’mawr ngae, tsawrhaq khoerdeuq-anr heulof-aer aernaeq-euq mae: “Irsaqleqlav tsawrhaq deuq-or! Nawmaf aqjeq mirnae garkawv heu-anr zanqler-eu nya? Nga’maf-anr aqjeq mirnae hawtsov taq-euq le? Nga’nyaf-euq baoq hawr-eu nga’nyaf, Miqyaer-anr yawzeu baw-eu baqda’nae heughaq-anr garma bi cannya lar-euq nga laer nawmaf noeq-eu le lor?

¹³ Nawmaf, Yeqsur, Pirlav-anr a’naeq-awr, Pirlav, aqyawf-anr pyaeqnaeq ma laer noeqtsaev-euq khawf, Pirlav-euq maeqshi nawmaf, aqyawf-anr byaerdzae-euq mae. Aerkhawf, ‘ Aqbyaqhaq , Irtsav hawr-eu Yaqkov-euq Miqyaer pyeuf-eu aqdui-euq aqpoeq deuq-euq Miqyaer-aq,’ (Di 3:6,15) aqyawf-euq ghaqzaq ghaqkhaer Yeqsur-anr yawshaef khanqsaer bifnaeq-euq mae.

¹⁴ Nawmaf, Tsaq-awr dawr-eu Yawshawr ghaq-anr byaerdzae-awr, aqcawq-anr saef-eu tsawrhaq pyaeqnaeqlaf laer shar-euq mae.

¹⁵ Nawmaf, daefzir-euq Sanqpaq pyeuf-eu ghaq-anr saef-euq mae. Aerkhawf, Miqyaer, aqyawf-anr shir-euq gar nae bi ghofdaef lar-euq mae. Nga’nyaf-aq, garkawv heu-euq sarkir pyeuf-eu ma.

¹⁶ Nawmaf mawr-awr siqnya-eu tsawrhaq heughaq, ghaq anrlar-euq-aq, aqyawf, Yeqsur-euq tsawrmyanr-anr jan-eu mirnae, Yeqsur-euq tsawrmyanr baqda’nae, aqyawf-anr ghaq anrlar-euq mae. Aqyawf-anr nae dovle-euq Yeqsur-anr jan-eu jeq-euq baqda’nae, aqyawf, nawmaf dawqtawv luf-euq maeqshi tiqbyan tiqlof muiqlar jir-euq mae.

¹⁷ “Aerkhawf, aqyuif aqnyir deuq-or! Nawmaf-euq uvlanr-eu deuq hawr-eu nawmaf khawf, maq siqnya-eu mirnae, khoerlof-aer mr-euq ngar-a laer ngar siqnya ma.

¹⁸ Aerkhawf, Kali-aq, shaqzanq yadaq mae laer aqyawf-euq gharduq ngaeqdan-eu tsawrhaq dawqtawv luf-euq khaqmae-anr ghoe-awr, Miqyaer nae dzeurlaf ngae nae aertaq-euq lof-aer byanlar-euq mae.

¹⁹ Khoermirnae, noeqpov noeqpar-awr daefpov daefpar-awq. Khoerlof-aer janr nar-aq, Miqyaer, nawmaf-euq iqbax sivdzae naeqlaf-awr, Sanqpaq Miqyaer-euq maeqshi lavshuif-eu aryamq keuvle taef-a.

²⁰ Aqcawq, aqyawf-euq garkawv maeq-eu gar nawmaf ya gaqhaw-euq Yeqsur Kali-anr khawf, aqyawf bi’oe taef-a.

²¹ Miqyaer-aq, mqmir bae ngae nae, shawr-eu aqyawf-euq gharduq ngaeqdan-eu deuq-euq khaqmae-anr ghoe-awr aertaq-euq lof-aer, yawqjeq navluf lavmuiqkhof jir ngae keuvni, mqtav mirkhanq, aqyawf-anr yabi jawrtawq taef-a.

²² Morseq, aqpoeq deuq-anr aqdir heulof-aer aernaeq-euq mae, ‘Nawmaf-euq Miqyaer pyeuf-eu Sanqpaq Miqyaer, ngaq-anr bi dovlar-euq lof-aer, nawmaf-euq gharduq nawmaf-euq aqyuif aqnyir-euq lafkhoer nae, Miqyaer gharduq ngaeqdan-eu tiq ghaq bi dovlar taef-a. Aqyawf nae nawmaf-anr khar aernaeq laf-euq dawq nawmaf ya narhaq taef-a. (Dm 18:15-16)

²³ Miqyaer gharduq ngaeqdan-eu khoerghaq-euq dawq maq narhaq geuf-eu aqsur ghaq maqkaq, (Dm 18:19) Miqyaer-euq tsawrhaq deuq-euq lafkhoer nae yabi lavcawvbyov taef-a.’ (Lb 23:29)

²⁴ “Saqmeuqlav-anr nae aqyawf-euq maeqnan dovlar-euq Miqyaer gharduq ngaeqdan-eu yawqghaq navluf nae khar ngaeqtaq-euq deuq, aryamq heu-euq garkawv aertaq-euq mae.

²⁵ Nawmaf-aq, Miqyaer gharduq ngaeqdan-eu deuq-euq zaqdeuq pyeuf-awr, Miqyaer nae aqdui-euq aqpoeq deuq-anr aernaeq-euq dawqma sarjax-euq zaqdeuq khawf pyeuf-eu mae. Miqyaer, Aqbyaqhaq-anr aernaeq-euq, ‘Mirtsaq-euq khoertav-euq tsawrjeuq tsawrca dawqtawvluf, nawq-euq aryoeq-euq baqda’nae guiqlanq za taef-a.’ (Adb 22:18; 26:4)

²⁶ Nawmaf yawqghaq navluf, yawqha-euq yawlaeq jeq-anr byaerdzae-awr, aqyawf, nawmaf-anr guiqlanq bibif-eu gharduq, Miqyaer, aqyawf-euq ghaqzaq ghaqkhaer, Yeqsur-anr bi ghofdaef lar-awr, nawmaf jawr-eu gar jeqhu bi’oe-euq mae.”