Gʼaˬkʼehˇ 28 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maqleqdaq-anr Jawr Ngae Pyeuflar-euq

¹ Nga’maf buq-ir ghaq-euq mirtsa, irjawlanr khoer Maqleqdaq laer kur-eu law hawrngaq laer yasiq-euq ma.

² Irjawlanr-anr jawr-eu tsawrhaq, nga’maf-anr ghawqshaq zawr gaqnaeq laf-euq mae. Khoerngae, uqyaer yaer-awr, yawgav gav-eu mirnae, aqyawfmaf miqdzaq bawdof-awr, nga’maf, yawqghaq navluf-anr yawmuiq-aer hageuf naeqlaf-euq mae.

³ Aerkhawf, Pawrluv miqdzaq kawqpyar tiq dzanq ya laf-awr bafdof ngae, yawlanr lanr-eu mirnae, dof zawr khav-eu arlawr tiq mawr dovle-awr, Pawrluv-euq aqlaf-anr lanrtaeq taq-euq mae.

⁴ Khoergar jawr-eu tsawrhaq deuq, arlawr khoermawr, Pawrluv-euq aqlaf-anr gagheu luf-eu gar ya’mawr ngae, aqyawf maf-euq yawkaq ja-eu, “Tsawrhaq teughaq-aq, aqdirma-aer aqcawq-anr saef-eu tsawrhaq ngar-a. Aqyawf, iqmalavshav-anr nae yabuq-ir-euq khawf, tsaq-awr dawr-eu jeq aqyawf-anr maqbi daef-ir-eu ghae-eu nga.”

⁵ Khoerngae, Pawrluv, arlawr khoermawr miqdzaq-euq lafkhoer juifpuiv ghae-awr, aqyawf-anr-aq tiqjeq-iq maq ghaelar-aq.

⁶ Aerkhawf, aqyawf-anr puqlar-eu maqngeur nar-aq, tiqpov taef-aer coqdzae-awr shir taef-a laer aqyawfmaf noeqnoeq-aer hawluf-eu mae. Aqyawfmaf ghawqmyanrni hawhaw-aer jawr-eu khawf, Pawrluv-anr tiqjeq-iq maq pyeuflar-euq mirnae, aqyawfmaf noeqpar lar-awr, ‘Tsawrhaq heughaq-aq, miqyaer tiq ghaq nga’ laer aer-eu mae.

⁷ Khoertsanr-euq dawqpae, Buqbaqlir laer kur-eu irjawlanr-euq aqyuif ghaq-euq daeyar ghawqmya’ni jav-eu mae. Aqyawf, nga’maf-anr yawmuiq-aer hageuf naeqlaf-awr, smq nan byan’ni yawmuiq-aer bidzaq bidawr naeqlaf-euq mae.

⁸ Khoerngae, Buqbaqlir-euq aqda pyaqpyaq-aer uqmav uqner yoer-eu mirnae yufluf-eu mae. Pawrluv urler-awr, aqyawf-anr guiqlanq sharnaeq-euq mae. Khoernar-aq, aqyawf-euq khoertav aqlaf bafdav-awr, nargawr lavtaq naeq-euq mae.

⁹ Khoerlof-aer pyeuflar ghaq-euq nar-aq, irjawlanr-anr jawr-eu nar-eu tsawrhaq nuideuq khawf lar-awr, nargawr taqler jir-euq mae.

¹⁰ Aqyawfmaf, nga’maf-anr yawkhav-aer taqhuiq taqmanr naeqlaf-euq mae. Nga’maf lawq-anr dziq-awr dov-ir-eu laer ghae ngae, nga’maf mawf-eu jeq lawq-euq lafkhoer dawvanr naeqlaf-euq mae.

Lormav Meuq-anr Lekeuv-euq

¹¹ Bala smr siq dzeur-ir-awr, nga’maf, Aqleqsaqdur meuq-euq lawq-anr dziq-awr dov-ir-euq ma. Lawq khoerlawq-anr, “Zaqdzm Maernmr” laer kur-eu arbar nae tsaqtsov taq-euq mae. Lawq khoerlawq-aq, tsanqgav yamq-anr irjawlanr khoerlanr-anr naq-euq mae.

¹² Nga’maf, Surlaqgur-anr irkeuv-awr, khoergar smq nan byanni jawrnaq mr-euq ma.

¹³ Khoergar nae pardov-ir-awr, garghof gardiv-aer le-awr nae, Leqjiqoq-anr lekeuv-euq ma. Tiq nan dzeur-ir-euq nar-aq, lafov paw-euq jaqlaer bawlaf-euq mirnae, nishawq ngae nan, nga’maf, Puqterorli-anr irkeuv-euq ma.

¹⁴ Khoergar, aqyuif aqnyir deuq-anr tanqpuq-awr, aqyawfmaf naeq-aer shif nan jawrnaeq laf-awq laer shar-eu mae. Khoernar-aq, nga’maf, Lormav meuq-anr le-euq ma.

¹⁵ Khoergar jawr-eu aqyuif aqnyir deuq, nga’maf larluf-eu mae laer yagaq-euq mirnae, Aqpir laer kur-eu laev-anr hawr-eu daqyan Yafduq Smqnymr laer kur-eu tsanr-anr keuvni oe-awr, nga’maf-anr hageuf laqle-euq mae. Pawrluv, aqyawf maf-anr ya’mawr ngae, Miqyaer-anr jaceuq-awr, nuima ghaq anrlar-euq mae.

¹⁶ Khoernar-aq, nga’maf, Lormav meuq-anr lekeuv ngae, yardzoeq guirhuq ghaq, aqyawf nae paftaq-euq tsawrhaq deuq, lofpir-eu guirzaq aqyuif ghaq-anr a’naeq-euq mae. Aerkhawf, Pawrluv-anr-aq, aqyawf-anr lof-eu guirzaq tiq ghaq bihaw-awr aqyawxyawf bijawr-euq mae.

Pawrluv, Lormav Meuq-anr Maeq-euq

¹⁷ Khoerngae, heulof-aer pyeuflar-euq mae. Smq nan dzeur-euq nar-aq, Pawrluv khoergar jawr-eu Yurdav tsawrhaq-anr sheuqghae-eu deuq-anr kuruiq-euq mae. Aqyawfmaf uiqlar ngae, Pawrluv, aqyawf maf-anr heulof-aer aernaeq-euq mae: “Aqyuif aqnyir deuq-or! Ngar, aqdui-euq tsawrjeuq tsawrca hawr-eu aqdui-euq aqpoeq deuq-euq zanrsanrkhof-anr tiqjeq-iq maq mrbanq-euq khawf, Yeqlursaqlaeq-euq lafkhoer ngaq-anr nyaef-awr, Lormav tsawrhaq-euq aqlaf-euq lafkhoer bi’anr-ir-euq mir-a.

¹⁸ Lormav tsawrhaq, ngaq-anr yawmuiq-aer narhaqtser ghaq ngae, ngaq-euq lafkhoer shir paq-aer geux-eu yawlaeq maqmawr-euq mirnae, ngaq-anr pyaeqnaeq mawf-eu mae.

¹⁹ Aerkhawf, Yurdav tsawrhaq nuikhanr maqshir-aer jabanq-eu mae. Ngaq-anr katir lar-eu mirnae, Gaersaq jawr-eu gar yarkhaq bidar-ir naeqlaf laer shar-euq ma. Ngar khoerlof-aer shar-eu-aq, ngaq-euq tsawrjeuq tsawrca-euq yawlaeq tiqjeqpaq daq-eu laer maqngeur.

²⁰ Khoermirnae, nawmaf-anr mawr-awr dawqja ya jacawqni, ngar, nawmaf-anr kur-euq ma. Aqjeq mirnae aernar-aq, Irsaqleqlav tsawrjeuq tsawrca noeqtmq luf-eu jeq-euq baqda’nae, shmrcav heu nae bi paftawf taq-euq ma.”

²¹ Khoerngae, aqyawfmaf, aqyawf-anr heulof-aer aer-eu mae: “Nga’maf, Yurdav mirkhanq-anr nae nawq-euq garkawv bofanr laf-euq sanqbof maqza-aq. Aqyuif aqnyir deuq khawf, heugar lar-awr nawq-euq garkawv yawdoer jeq tiqghaq-iq maqtsaf maq dzawrnaeq lar-aq.

²² Aerkhawf, yawqgar navluf jawr-eu tsawrhaq, armur heumur-anr jadoer luf-eu mae laer nga’maf siqnya ma. Khoermirnae, nawr aqjox-aer noeq-eu le laer nga’maf gaqmawf mir-a.”

²³ Khoernar-aq, aqyawfmaf, Pawrluv naeq-aer nanpax pax-euq mae. Khoernan keuvlar ngae, tsawrhaq ghawqmya’ni Pawrluv jawr-eu gar uiqlar-euq mae. Pawrluv uqshawq paw nae uqcif pawdzer keuvni, Miqyaer uvlanr-eu garkawv, aqyawf maf-anr sarkir kamqnaeq-awr, aqyawfmaf, Yeqsur-anr taf-eu paw pyawrlarni, Morseq-euq zanrdawq hawr-eu Miqyaer gharduq ngaeqdan-eu tsawrhaq deuq-euq sanqbof-anr ghoeghoe-aer, yawmuiq paq-aer dufyawrni ja’maeq naeq-euq mae.

²⁴ Aqyawf ngaeq-eu gar tiqpavnav deuq pyawrlar-awr, tiqpavnav deuq maqjan-a.

²⁵ Aqyawfmaf tiqghaq tirghaq maqtsaq maq dzoerler-aer, Pawrluv, aqyawf maf-anr dawq heudawq aernaeq ghaq ngae ghawq-ir-euq mae: “Yawshawr Saflar nae Miqyaer gharduq ngaeqdan-eu Irsaqyar-anr ghoe-awr, aqdui-euq aqpoeq deuq-anr aernaeq-euq dawq heudawq-aq, tsaq duidui-eu mae.

²⁶ Aqyawf heulof-aer aer-eu mae: ‘Nawr, tsawrjeuq heujeuq jawr-eu gar ir-awr heulof-aer aernaeq-awq: “Nawmaf narhaq-awr yagaq-euq khawf maq ghovshaw nya-aer, Haw-awr ya’mawr-euq khawf maq siqnya-a.

²⁷ Aqjeq mirnae aernar-aq, tsawrjeuq heujeuq-euq nuima ghanr-ir-awr, Naqbawr naqbar bar-ir-awr, myavnuiv mivtaeq taq-euq mae. Khoerlof-aer maqghae lawnmr-aq, Aqyawfmaf, ngar jawr-eu paw pyawrlar taef-a. Ngar, aqyawf maf-anr bi taqler ma. Khoerngae, aqyawf maf-euq myavnuiv mawrlar-awr, naqbawr coerlar taef-a. Nuima khawf ghovshaw nyalar taef-a.” ’ (Isy 6:9-10)

²⁸ “Khoermirnae, nawmaf heulof-aer siqnya-awq. Miqyaer kakhof-eu garkawv heu, aqcawq tsawrjeuq tsawrca-anr keuv-ir ngae, aqyawfmaf lawnmr-aq narhaq taef-a.”

²⁹ Pawrluv khoerlof-aer aerghaq ngae, Yurdav tsawrhaq deuq dov-ir-awr, aqyawf maf-euq yawkaq pyaer duidui-eu mae.

³⁰ Khoernar-aq, Pawrluv, aqyawf nae ngaqtaq-euq nymr-anr nyiq khof byanni jawr-awr, aqyawf jawr-eu gar kharlar-eu tsawrhaq dawqtawv luf-anr hageuf-euq mae.

³¹ Aqyawf nuima khaqduqni anr-eu lafkhoer, Miqyaer uvlanr-eu garkawv dawqmaeq maeq-awr, Sanqpaq Yeqsur Kali-euq garkawv maeqnaeq tsovnaeq-euq mae. Aqyawf khoerlof-aer maeq-eu gar tiqghaq-iq maq lavtsoeq-a.