Gʼaˬkʼehˇ 27 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Lormav-anr Le-eu Laer Dov-ir-euq

¹ Nga’maf-anr lawq-anr bidziq-awr, Irdaqliq mirkhanq-anr bi’ir ma laer noeqtsaev ghaq-euq nar-aq, Pawrluv hawr-eu kuv-anr ur-eu nuideuq-anr, Awrgurtuv guirzaq tiq mur-anr taf-eu, Yurluv laer kur-eu yardzoeq guirhuq-euq aqlaf-anr a’naeq-euq mae.

² Khoernar-aq, Aqsir mircoer-euq iqmalavshav lawrdzer cawcaw-aer jav-eu meuqdeuq-anr ir-eu laer nga’maf, Aqdaqmurdir meuq-anr jawr-eu tsawrhaq-euq lawq-anr davler-euq ma. Maqgeqdawrniv mirkhanq-anr jav-eu Tersaqlorni-anr jawr-eu Aqliqdaqgur khawf, nga’maf naeq-aer tiqkawv lof-aer ir-euq ma.

³ Nishawq ngae nan, nga’maf, Sirdoq meuq-anr naq-ir-euq ma. Yardzoeq guirhuq Yurluv-aq, Pawrluv-anr ghawqshaq gaq-eu mirnae, aqyawf-euq cawq jawr-eu gar le-awr, khoerdeuq nae bi ngaeqghaeni pyaeqnaeq-euq mae.

⁴ Nga’maf khoergar nae lawq-anr dziq-awr dov-ir ngae, jaqlaer baw-eu arpyawq maqtsaq-eu mirnae, Gurbaqlur irjawlanr-anr ghoe-awr, jaqlaer maqzaw-eu paw nae irghae-euq ma.

⁵ Khoernar-aq, Girlirciv mirkhanq hawr-eu Paqburlir mirkhanq-euq lafov paw jav-eu iqmalavshav-anr irpav ghae-awr, Lurgir mirkhanq-anr jav-eu Muqlar meuq-anr irkeuv-euq ma.

⁶ Khoergar, yardzoeq guirhuq khoerghaq, Aqleqsaqdur meuq-euq lawq, Irdaqliq mirkhanq-anr ir-eu laer ghae-eu lawq tiq lawq-anr povmawr-awr, nga’maf-anr bi urler naeqlaf-euq mae.

⁷ Nga’maf ghawqmya nan byanni, arlawv lawv-aer irghae-awr, maqghaq maqnav-aer Gaqnir meuq-euq dawqpae irkeuv-euq ma. Jaqlaer baw-eu arpyawq maqtsaq-eu mirnae, nga’maf maeqhu paw maqir nya-aer, Gaqlaqdeq irjawlanr-anr ghoe-awr, jaqlaer maqzaw-eu Saqmoqneq meuq paw nae irghae-euq ma.

⁸ Nga’maf lawrbanr cawcaw-aer ir-awr, maqghaq maqnav-aer Laqsaer meuq-euq dawqpae jav-eu Zawr muiq-eu Naqduq laer kur-eu tsanr-anr lekeuv-euq ma.

Pawrluv Aer-eu Gar Maq Narhaq-eu

⁹ Irdov-euq ghawqmyanrni keuvlar-awr, Dzardzaq sheuq-eu Arnan khawf dzeur-euq mirnae, lawq dov-ir-eu-aq, guvkhar za-eu mae. Khoermirnae, Pawrluv, aqyawf maf-anr maeqbawq bif-eu laer,

¹⁰ aer-eu, “Cawqdeuq-or! Yanr-awq. Ngar haw ngae heupov dov-ir-eu-aq, tawqluf-eu myawq hawr-eu lawq yawkhav-aer cawv-ir-eu taef-aer maqngeur-aer, aqdui-euq daefzir khawf yasmq-ir taef-a laer ngaq-anr mawrlar nya.”

¹¹ Aerkhawf, yardzoeq guirhuq-aq, Pawrluv-euq dawq-anr navmaqtser, lawq ngawq-eu ghaq hawr-eu lawq-euq yawsanr ghaq-euq dawq-anr narhaq dzaeq-eu mae.

¹² Khoeruqtaf, tsanqgav yamq-anr naqduq heutsanr naq-eu maqmuiq-eu mirnae, heugar nae dov-ir-awr, ghaenya nar-aq, Pirnir meuq-anr irkeuv-awr, tsanqgav yamq khoergar jawrnaq mr-ir-eu gar, tsawrhaq myaqni tiqpav nuima tsaq-eu mae. Pirnir meuq-aq, Gaqlaqdeq irjawlanr-anr jav-eu lawq naqduq mae. Naqduq khoer-aq, nanrma gakhaeq laftav paw hawr-eu nanrma gakhaeq lafov paw pyawr-eu mae.

Jaqlaer Laerma Bawlar-euq

¹³ Khoerngae, lafov paw nae bawlaf-eu jaqlaer shuqshuq-aer bawluf-eu mirnae, aqyawfmaf nae noeqtmq taq-euq lof-aer pyeuflar-euq nga laer aqyawfmaf noeq-eu mae. Khoernar-aq, lawq-euq kuvseuq gheudav-awr, iqmalavshav-anr dov-ir ngae, Gaqlaqdeq irjawlanr-euq dawqpae nae ir-euq ma.

¹⁴ Aerkhawf, ghawqmyanr maqghae-aer, nanrma dovkhaeq laftav paw-euq jaqlaer laer kur-eu jaqlaer laerma, danrtav paw nae yawkhav-aer bawlef-euq mae.

¹⁵ Jaqlaer laerma khoer lawq-anr bawtsanqlef ngae, lawq maq daqcoer-eu mirnae, nga’maf jaqlaer khar bawpyawr-eu paw irghae-euq ma.

¹⁶ Khoernar-aq, Gaqlawrdeq laer kur-eu irjawlanr lanrzaq-anr ghoe-awr, nga’maf jaqlaer maq bawzaw-eu paw irluf ngae, lawq lawqzaq maqbi cawv-ir ni maqghaq maqnav-aer lawq lawqma-euq khoertav gheudav taq-euq ma.

¹⁷ Lawq lawqma maqya pav-ir ni, aqyawfmaf arcav yur-awr tiqjawq yawmuiq-aer ganrdzanq-euq mae. Khoerngae, lawq, iqmalavshav-euq lafkhoer jav-eu kharshuif puqlu-anr tanqtsov-ir-eu law maqsiq laer aqyawfmaf khanqlanr-eu mirnae, lawq gheupyawr-eu saqpar khoer pyaeqaw-awr, lawq-anr jaqlaer nae bi bawghae-euq mae.

¹⁸ Jaqlaer laerma khoer maq naqlerni baw duidui-eu mirnae, nishawq ngae nan, aqyawfmaf tawqluf-eu myawqdeuq bafdzae-euq mae.

¹⁹ Smq nan keuvlar ngae, lawq-euq mrmyawq keuka deuq khawf, nga’maf-euq aqlaf nae biqdzae-euq ma.

²⁰ Ghawqmya nan byanni nanrma hawr-eu aqguir-anr maqya mawr-euq uqtaf, jaqlaer laerma khawf baw duidui luf-eu mirnae, nga’maf yabuq-ir taef-a laer tiqpawf-iq maq noeqtmq-aq.

²¹ Aerkhawf, aqyawfmaf tiqjeq-iq maqdzaq-aer jawr-eu ghawqmya nan keuvlar ngae, Pawrluv, aqyawf maf-euq ghanrcae yawf-awr heulof-aer aernaeq-euq mae: “Cawqdeuq-or! Nawmaf, ngaq-euq dawq narhaq-awr, Gaqlaqdeq irjawlanr-anr nae maq dovle-euq lawnmr-aq, smq-ir cawv-ir-eu heu-anr maqya daq-ar.

²² Nymq-mr nawmaf nuisar za-awq laer ngar, nawmaf-anr ghaq bif-eu ma. Lawq heulawq cawv-ir-eu maqngeur nar-aq, nawmaf tiqghaq-iq zir maqya smq-ar.

²³ Aqjeq mirnae aernar-aq, ngaq-anr uvlanr-awr, ngar uqduq tanqluf-eu Miqyaer-euq mqtav ghaqkhaer, mircif ngaq-euq dawqpae yawfle-awr,

²⁴ aer-eu, ‘Pawrluv-or! Taqguv. Nawr, Gaersaq-euq maeqshi yayawf taef-a. Nawq naeq-aer lawq-anr dziqluf-eu tsawrhaq yawqghaq navluf khawf, Miqyaer, nawq-anr taqnaeq jir-euq mae.’

²⁵ Khoermirnae, cawqdeuq-or! Nawmaf nuima noeqsar-awq. Ngaq-anr aernaeq laf-euq lof-aer pyeuflar taef-a laer ngar, Miqyaer-anr jan ma.

²⁶ Aerkhawf, aqdui maf-euq lawq heulawq-aq, irjawlanr tiq tsanr-anr ya tanqtsov taef-a.”

²⁷ Khoernar-aq, 14 nan ngae mir, nga’maf-euq lawq Aqdivtif iqmalavshav-anr buluf-eu ma. Saerghanr caelarmawf ngae, mirtsaq tiq tsanr nav-anr paele-euq jeq mir-a laer lawq-euq lafkhoer gar mr-eu deuq noeq-eu mae.

²⁸ Khoernar-aq, ircuf-anr dzahaw ngae, 20 lmr naf-eu mae. Tiqkhaeq leghae-awr par dzahaw ngae, 15 lmr naf-eu mae.

²⁹ Lawq, khaqlo-anr tanqtov-ir-eu law maqsiq laer aqyawfmaf guv-eu mirnae, lawq-euq dawqdanq paw shmr kuvseuq oeq seuq pyaeqka-awr, uqbya yawkawr-aer byalarni guiqlanq shar-eu mae.

³⁰ Khoerngae, lawq-euq lafkhoer gar mr-eu deuq, lawq-anr byaerdzae-awr caev-eu laer ghae-eu mae. Lawq-euq uqduq paw shmr kuvseuq pyaeqka-eu janrgeuf-awr, lawq lawqzaq ircuf-euq lafkhoer pyaeqka luf-eu mae.

³¹ Khoerngae, Pawrluv, yardzoeq guirhuq hawr-eu guirzaq deuq-anr aernaeq-eu, “Tsawrhaq teudeuq lawq-euq lafkhoer maqjawr nar-aq, nawmaf maqbuq-ir nya-ar.”

³² Khoerngae, guirzaq deuq nae lawq lawqzaq-euq arcav deuvtsaev-awr bi bubyov ghae-euq mae.

³³ Uqbya byalarluf ngae, Pawrluv, aqyawfmaf yawqghaq navluf-anr hawq dzaq-awq laer ghaq bif-eu lafkhoer heulof-aer aernaeq-euq mae: “Nawmaf, tiqjeq-iq maqdzaq maqdawr-aer dawq-awr dzanqluf-eu, iqnan 14 nan byanlar-euq mae.

³⁴ Khoermirnae, nawmaf ghaq anrkhof larni dzaq-awr dawr-awq laer ngar, nawmaf-anr ghaq bif-eu ma. Aqjeq mirnae aernar-aq, nawmaf tiqghaq-iq-euq tsaerkanr tiq kanr taef-aer khawf maqya teq-ir-ar.”

³⁵ Pawrluv khoerlof-aer aerghaq-euq nar-aq, kaqmur yur-awr, dawqtawv luf-euq maeqshi Miqyaer-anr jaceuq-awr, ngawqpyaeq-awr aqyawf dzaq-euq mae.

³⁶ Khoernar-aq, aqyawfmaf yawqghaq navluf nuima ghaq anrlar-awr dzaq-euq mae.

³⁷ Nga’maf naeq-aer lawq heulawq-anr dziqluf-eu tsawrhaq dawqtawvluf 276 ghaq byan-eu ma.

³⁸ Aqyawfmaf dzaqdaev ghaq-awr, lawq pyarlarni, caer iqmalavshav-anr bafpuf ghae-euq mae.

Lawq Cawv-ir-euq

³⁹ Uqbya byalar ngae, mirtsaq khoer aqgeu tsanr nga laer aqyawfmaf maq siqnya-a. Aerkhawf, kharshuif jav-eu lanrghof-anr ya’mawr ngae, ghaenya nar-aq, lawq lanrghof khoertsanr-anr taeghae ma laer aqyawfmaf noeqtsaev-euq mae.

⁴⁰ Khoermirnae, lawq-euq kuvseuq khoerdeuq iqmalavshav-anr puirdzae yaf-euq mae. Lawq-anr lavpyawr-eu darlav deuq-anr paftaq-euq arcav-anr khawf puir-euq mae. Khoernar-aq, lawq-euq uqduq paw saqpar gheutaw-awr, jaqlaer nae lawrdzer paw bi bawghae-euq ma.

⁴¹ Aerkhawf, ircuf yoertsmr-eu gar lawq tanqtsov ghae-euq mae. Lawq-euq uqduq paw pyawq khoergar coeqtsmq taq-awr maq luvnya-a. Lawq-euq dawqdanq paw pyawq-anr-aq, irkhawr nae tanqpyav tanqshav jir-euq mae.

⁴² Khoerngae, paftaq-euq tsawrhaq deuq-aq, ircuf irdiq diqtsaev-awr caevbyov-eu baw-mr laer guirzaq deuq khanqlanr-eu mirnae, aqyawf maf-anr saef-eu laer bawqtov tovtaq-euq mae.

⁴³ Aerkhawf, yardzoeq guirhuq ghaq, Pawrluv-anr bibuq-ir mawf-eu mirnae, khoerlof-aer maqbi janrni lavtsoeq-euq mae. Khoerngae, yardzoeq guirhuq dawq bif-awr, irdiq diqnya-eu deuq-aq, aqcawq-euq jeqhu ircuf-anr tsawqpuf-awr lawrdzer irdiq bi diqdov ghae-awr,

⁴⁴ nuideuq-aq, terbyaf-anr nae maqngeur nar-aq, lawq-euq lafkhoer jav-eu keuka-anr nae lawrdzer irdov ghae-euq mae. Khoermirnae, yawqghaq navluf buq-ir-awr lawrdzer tsaevdov jir-euq ma.