Gʼaˬkʼehˇ 26 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv Hawr-eu Aqgirpav

¹ Khoerngae, Aqgirpav, Pawrluv-anr aernaeq-eu, “Nawq-euq garkawv nawr ngaeqmawf-eu lof-aer ngaeqnya taef-a.” Khoermirnae, Pawrluv aqlaf cawqja-awr, aqyawf-euq garkawv heulof-aer ja’naeq-euq mae:

² “Sanqpaq Aqgirpav-or! Yurdav tsawrhaq, ngaq-euq khoertav yawlaeq daq-eu garkawv dawqtawvluf, iqnan ngar, nawq-euq maeqshi ya’aer khof-eu mirnae, ngar laqkhaqcaer mir-a.

³ Guiqlanq huiqdzaeq-eu tiqjeq-aq, nawr, Yurdav tsawrhaq-euq zanrsanrkhof hawr-eu narhaq-eu dawqdeuq dawqtawv luf-anr yawmuiq-aer siqnya-eu mae. Khoermirnae, or-awr ngaq-euq dawq narhaq naeqlaf laer ngar, nawq-anr shar-eu ma.”

Pawrluv, Paqliqsaer Geufhaw-euq

⁴ “Ngar, yawzaq-anr ngae nae, ngaq-euq tsawrjeuq tsawrca-euq lafkhoer hawr-eu Yeqlursaqlaeq-euq lafkhoer, ngaq-euq daefjeq daefkawv aqjox-aer ghae-eu la laer Yurdav tsawrhaq dawqtawvluf siqnya-eu mae.

⁵ Yawbae ngae nae, aqyawfmaf, ngaq-euq garkawv siqnya-eu mirnae, ngaq-euq garkawv sarkir kamqmawf lawnmr-aq, ngar-aq, nga’maf-euq kan duidui-eu uqduq tanq-eu zanr-euq lafkhoer, Paqliqsaer laer kur-eu armur-euq lafkhoer jawrhaw-euq mae laer kamqnya taef-a.

⁶ Nymq-mr-aq, ngar, Miqyaer nae nga’maf-euq aqpoeq deuq-anr aernaeq taq-euq sarjax-anr noeqtmq-eu mirnae, ngar heugar yawf-awr yarkhaq dar-eu gar ya daqluf-eu ma.

⁷ Nga’maf-euq tsawrjeuq 12 jeuq, uqcif nan’ghanr maqaer, laejae laejae-aer Miqyaer-anr uqduq tanq-eu lafkhoer, sarjax heu-anr za’ni noeqtmq luf-eu mae. Sanqpaq Aqgirpav-or! Ngar khawf khoerlof-aer noeqtmq-eu baqda’nae, Yurdav tsawrhaq, ngar yawlaeq nga laer daqluf-eu mae.

⁸ Miqyaer-aq, shir-euq tsawrhaq-anr bi ghofdaeflar nya-eu mae laer aer-eu gar, jancoer paq-aer maqghae-a laer nawmaf noeq-eu nya laq?”

Pawrluv, Kalizaq-anr Khaeqhaw-euq

⁹ “Aqdir aernar-aq, ngar, Naqzaqlaer tsawrhaq Yeqsur-euq tsawrmyanr-anr coeqler civlerni ghawqmya jeq janr paq-aer ghae taef-a laer noeqhaw-euq ma.

¹⁰ Yeqlursaqlaeq-anr khawf ngar heulof-aer mr-euq ma. Pirma aqyuif deuq nae bif-euq aryaq za-awr, tsawrshawr ghawqmya ghaq-anr nyaef-awr kuv-anr dawv-euq ma. Aqyawf maf-anr diqsaef paq-aer ghae-eu mae lor laer aqcawq narhaq ngae, ngar khawf nuima tsaq-euq ma.

¹¹ Khoeruqtaf, zanrdawq khawqnymr yawqgar navluf-euq lafkhoer, ngar, aqyawf maf-anr ghawqmya pov khaeq-awr, aqyawfmaf yaeqbawq saerlu-aer aerni ngar laejae-euq ma. Ngar, aqyawf maf-anr nuima paer duidui-eu mirnae, aqcawq-euq mirkhanq-anr jav-eu meuqdeuq-anr keuvni, aqyawf maf-anr khaeq-awr khavnaeq-euq ma.”

Pawrluv, Kalizaq Pyeuflar-euq

¹² “Ngar khoerlof-aer khaeqluf khavluf ngae, pirma aqyuif deuq-anr nae aryaq hawr-eu arnmq za-awr, Daqmaqsaer-anr ir-euq ma.

¹³ Sanqpaq-or! Nanlov caelar-eu yamq-anr, ngar garpaer-anr canluf ngae, mq-anr nae nanrma tsaeq-eu navmaqtser khav-eu yawshaef, ngar hawr-eu ngaq naeq-aer canluf-eu deuq-euq tiqjawq byale-euq gar ya’mawr-euq ma.

¹⁴ Nga’maf yawqghaq navluf mirtsa gacoq ghae-awr jawr ngae, Heqbyaer dawq-anr nae heulof-aer ngaeqdov lef-eu gar ngar yagaq-euq ma, ‘Sawrluv-or! Sawrluv, nawr, ngaq-anr aqjeq mirnae khaeq-eu le? Nawr jeqzaq-anr tae-eu darcae-anr baev-eu-aq maqawq-a.’

¹⁵ Khoerngae, ngar narhaq-eu, ‘Sanqpaq-or! Nawr aqsur ghaq le?’ Khoernar-aq, aqyawf heulof-aer aer-eu mae: ‘Ngar-aq, nawr khaeqluf-eu Yeqsur ma.

¹⁶ Tur-awr, nawq-euq aqkuir nae yawf-awq. Aqjeq mirnae aernar-aq, ngar, nawq-anr heu-euq gharduq bimawr-euq ma. Nawq nae ya’mawr-euq garkawv hawr-eu maeqhu paw ngar, nawq-anr panmaeq naeq-eu garkawv deuq, nawr gar mr-awr, sarkir kamqni ngar, nawq-anr tserdov-euq ma.

¹⁷ Ngar, nawq-anr Yurdav tsawrhaq-anr nae bibuq-ir-eu uqtaf, nymq-mr ngar, nawq-anr khaerghae-eu aqcawq tsawrjeuq tsawrca-euq aqlaf-anr nae khawf bibuq-ir ma.

¹⁸ Aqyawf maf-euq myavnuiv pannaeq-awr, yawzanr-euq lafkhoer nae yawshaef jav-eu gar bilar-awr, naef Saqdaq-euq baoq-euq uqmov jawr-eu gar nae Miqyaer jawr-eu paw bi ghoflar-eu uqtaf, ngaq-anr jan-eu baqda’nae, Miqyaer, aqyawf maf-euq iqbax pyaeqnaeq-awr, muiqlar shawrlar-euq tsawrhaq naeq-aer jeqbir za’ni, ngar, nawq-anr aqyawfmaf jawr-eu gar bi’ir-eu ma.’ ”

Miqyaer Nae Bi Mawrle-euq Jeq

¹⁹ “Khoermirnae, sanqpaq Aqgirpav-or! Mq-euq khoertav nae bi mawrle-euq jeq-anr ngar maq narhaq geuf-aer maqghae-aq.

²⁰ Khoernar-aq, ngar, Daqmaqsaer-anr maeqdanq bae-awr, Yeqlursaqlaeq-anr jawr-eu deuq, Yurdav mirkhanq doeni jawr-eu deuq hawr-eu, aqcawq tsawrjeuq tsawrca-anr noeqpov noeqpar-awr, Miqyaer jawr-eu paw pyawrlar-eu uqtaf, nawmaf noeqpov noeqpar-euq gar geux-eu gardeuq mrmr-aer daef-awq laer maeqnaeq-ir-euq ma.

²¹ Heudeuq-euq baqda’nae, Yurdav tsawrhaq, ngar, uqduq tanqnymr nymrma-euq lafkhoer jawr-eu gar nyaef-awr, ngaq-anr diqsaef-eu laer laejae-eu mae.

²² Aerkhawf, Miqyaer, ngaq-anr cawba naeqlaf luf-eu mirnae, iqnan keuvni, ngar heugar yawf-awr, huiqzaq nyirzaq deuq-euq maeqshi, garkawv heudeuq sarkir kamqluf-eu ma. Ngar aerluf-eu heudeuq-aq, Miqyaer gharduq ngaeqdan-eu tsawrhaq deuq hawr-eu Morseq nae aqkar pyeuflar taef-a laer, aertaq-euq lof-aer taef-aer ngar aer-eu ma.

²³ Kali-aq, yashaq yazanq-awr, shir-euq gar nae ghofdaef baebae lar-euq ghaq pyeuf-awr, Yurdav tsawrhaq hawr-eu aqcawq tsawrjeuq tsawrca-anr yawshaef-euq garkawv dzawrnaeq taef-a.”

Pawrluv, Aqgirpav-anr Maeq-euq

²⁴ Pawrluv khoerlof-aer jashawluf ngae, Beqtur tersar yawkhav-aer aer-eu, “Pawrluv-or! Nawr-aq, uq-ir-euq nga. Nawr sanqbof ardzaeq-aer dzawdzeur-awr dzawuq shaw-euq ngar-a!”

²⁵ Aerkhawf, Pawrluv heulof-aer aerkhof naeq-euq mae: “Huiq-awr manr-eu Beqtur-or! Ngar uq-ir-euq maqngeur. Ngar yawmuiq-aer sharnoeq-awr yawtsaq yawdawr jeq ngaeqluf-eu ma.

²⁶ Garkawv heudeuq-anr sanqpaq Aqgirpav siqnya-eu mirnae, ngar, aqyawf-euq maeqshi nuima khaqduqni aerpeuq-eu ma. Garkawv heudeuq barzaf-anr pyeuflar-euq maqngeur-eu mirnae, aqyawf maqsiq maqmawr-euq tiqjeq-iq maqjav-a laer ngar yawduqbaw ma.

²⁷ Sanqpaq Aqgirpav-or! Miqyaer gharduq ngaeqdan-eu tsawrhaq deuq-euq dawq-anr nawr jan ma lor? Nawr jan-eu mae laer ngar siqnya ma.”

²⁸ Khoerngae, sanqpaq Aqgirpav, Pawrluv-anr aerkhof naeq-eu, “Uicuiv nae maqngeur lawnmr-aq, ngar, Kalizaq pyeuflarni nawq nae bi gheupyawr-euq law mir-a.”

²⁹ Khoerngae, Pawrluv aer-eu, “Ngaq-euq navni jav-eu lawnmr-aq, nawr taef-aer maqngeur-eu, iqnan ngaq-euq dawq narhaq luf-eu tsawrhaq dawqtawvluf khawf, shmrcav daq-eu heu tiq hmq maqngeur nar-aq, ngar lof-aer pyeuflarni, ngar, Miqyaer-anr guiqlanq sharluf-eu ma.”

³⁰ Aqyawf khoerlof-aer aerghaq ngae, sanqpaq Aqgirpav tur-euq mae. Khoerngae, Beqtur hawr-eu Beqlaqnir naeq-aer nuirluf-eu deuq khawf turjir-awr,

³¹ Aqyawfmaf dov-ir dzeur-euq nar-aq, aqyawf maf-euq yawkaq aer-eu, “Tsawrhaq heughaq beu, shir paq-aer hawr-eu shmrcav pafnaeq paq-aer geux-eu tiqjeq-iq maqanr nga-eq.”

³² Khoerngae, Aqgirpav, Beqtur-anr aernaeq-eu, “Tsawrhaq heughaq, Gaersaq jawr-eu gar yarkhaq bidar-ir naeqlaf laer maq shartaq-euq lawnmr-aq, aqyawf-anr pyaeqnaeq nya-eu ngar-a.”