Gʼaˬkʼehˇ 24 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv-euq Yawlaeq Daq-eu

¹ Ngaq nan dzeur-euq nar-aq, Aqnaqnir pirma yawhuiq ghaq, aqyuif aqtsu heumyav ghaq hawr-eu Deqlaqdurluv laer kur-eu dawq zawr ngaeqnya-eu tiq ghaq laer oeka-awr, aqyawfmaf, Pawrluv-euq yawlaeq meuqsanr Peqlir-anr daqler-euq mae.

² Pawrluv-anr sheuqkeuvlaf ngae, Deqlaqdurluv danqbae-awr Pawrluv-euq yawlaeq heulof-aer daq-eu mae, “Sanqpaq-or! Nawq-euq baqda’nae nga’maf sarlaevni yajawr-awr, sanqpaq nuinoeq dov-awr, tsawrganr byan-eu mirnae, mirkhanq heukhanq nawq-euq maeqshi bawle zale luf-eu mae.

³ Teumirnae, nga’maf yawqgar navluf, yawqjawr navluf, poeq duidui-eu meuqsanr Peqlir, nawq-euq guiqlanq-anr hageuf-awr noeqmuiq luf-eu ma.

⁴ Aerkhawf, nawr narhaqbyae paq-aer ngar dawq ardzaeq-aer maq ngaeqdzeurni, ghawqshaq gaq-awr nga’maf heumyav dawq ja-eu gar narhaq naeqlaf-awq laer ngar, nawq-anr shar-eu ma.

⁵ Aqjeq mirnae aernar-aq, tsawrhaq heughaq-aq, zawr khav-eu nyawq-ir nya-eu nargawr-anr dur-eu tiq ghaq ngar-a laer nga’maf ya’mawr-euq ma. Mirtsaq-euq khoertav kharngeur-eu gar jawr-eu Yurdav tsawrhaq dawqtawvluf, puiqlarni janr-eu ghaq pyeuf-awr, maqtsaq-eu Naqzaqlaer baqmur-euq aqyuif khawf pyeufluf-eu mae.

⁶ Khoeruqtaf, uqduq tanqnymr nymrma-anr khawf lavjawf-eu laer ghae-eu gar, nga’maf, aqyawf-anr nyaef-euq ma. Nga’maf, aqyawf-anr nga’maf-euq zanrdawq jav-eu lof-aer yarkhaq darmawf-eu law mir-a.

⁷ Aerkhawf, tanrdzoeq guirhuq Lursiv oe-awr, nga’maf-euq aqlaf-euq lafkhoer nae aqyawf-anr yawkhav-aer lu-awr ludov-euq mae.

⁸ Pawrluv-anr yawlaeq daq-eu tsawrhaq deuq, nawq-euq maeqshi le-awq laer aqyawf dawq bifnaeq laf-euq mae. Nawr, aqyawf-anr yawmuiq-aer narhaqtser nar-aq, nga’maf, aqyawf-euq yawlaeq daq-eu heu yawqjeq navluf ya siqduq taef-a.”

⁹ Khoerngae, Yurdav tsawrhaq deuq khawf, Pawrluv-euq yawlaeq teulof-aer mae laer nuima tiqgar tsaq-eu mae.

Pawrluv Garkawv Jashaw-eu

¹⁰ Khoernar-aq, dawq ngaeqnya taef-a laer sanqpaq Peqlir, Pawrluv-anr lafdzawr dzawrnaeq ngae, Pawrluv heulof-aer aer-eu mae: “Nawr, mirkhanq heukhanq-anr yarkhaq dar-eu ghaq geufluf-eu ghawqmya khof byanlar-euq mae laer, ngar siqnya-eu mirnae, nawq-euq maeqshi ngar laqkhaq caertavni ngaq-euq garkawv jashawnaeq ma.

¹¹ Ngar, Yeqlursaqlaeq-anr uqduq tanqler-euq 12 nan maq byanlar-aq siq laer nawr cawtserhaw nar-aq yasiq taef-a.

¹² Uqduq tanqnymr nymrma-euq lafkhoer, zanrdawq khawqnymr-euq lafkhoer hawr-eu meuq-euq lafkhoer khawf, aqyawf maf-aq, ngar, aqcawq naeq-aer tsawrpyaer pyaer-eu hawr-eu tsawrhaq armaf mafma-anr bi luiqgha lar-eu gar khawf maqmawr-ar.

¹³ Nymq-mr aqyawfmaf, ngaq-euq yawlaeq daq-eu garkawv teudeuq khawf, tsawrkaq kur-awr nawq-anr maqbi dzawrnaeq nya-a.

¹⁴ Aerkhawf, ngar, nawq-anr dawrcoeni aerdov ma. Maqtsaq-eu baqmur laer aqyawfmaf kur-eu Yeqsur-euq Garma-anr ngar cantae luf-eu ma. Khoermirnae, ngar, ngaq-euq aqpoeq deuq-euq Miqyaer-anr uqduq tanqluf-awr, zanrdawq hawr-eu Miqyaer gharduq ngaeqdan-eu tsawrhaq deuq-euq sanqbof-euq lafkhoer khar boftaq-euq dawqtawv luf-anr khawf ngar jan-eu ma.

¹⁵ Aqkar, tsawrmuiq tsawrdoer dawqtawvluf ghofdaeflar taef-a laer aqyawfmaf noeqtmq-eu lof-aer, ngar khawf Miqyaer-anr ghoeghoe-aer noeqtmq luf-eu ma.

¹⁶ Khoermirnae, ngar, Miqyaer hawr-eu tsawrhaq-euq maeqshi khawf, yawlaeq tiqjeq-iq maqanr-eu zaqsiq nuisiq za’ni laejae duidui luf-eu ma.

¹⁷ “Heumyav khof dzeur-ir-euq nar-aq, ngar, ngaq-euq tsawrjeuq tsawrca-euq shaqzaq-anr cawba-eu gharduq gamfnaeq-eu jeq hawr-eu lawrnaeq-eu jeq shaha ler-euq ma.

¹⁸ Ngar, tsawrhaq armaf mafma hawr-eu luiqgha lar-euq deuq naeq-aer jawr-eu maqngeur-aer, ngar, uqduq tanqnymr nymrma-euq lafkhoer mawrdo shawr-eu zanr janrluf-eu gar, Aqsir mircoer-anr nae oe-euq Yurdav tsawrhaq heumyav ghaq, ngaq-anr mawr-euq mae.

¹⁹ Aqyawfmaf, nawq-euq maeqshi oe-awr, ngaq-euq yawlaeq aer paq-aer ghae-eu jeq jav nar-aq daqle-eu tsaq nga.

²⁰ Maqngeur nar-aq, khavma armur-euq maeqshi, ngar yawfluf ngae, ngar tiqjeqnav mrlaeq-euq gar mawrtaq-euq jav nar-aq, bi aerdovlaf sher-eq.

²¹ Parjav-eu law-awr khawf, ngar, aqyawf maf-euq maeqshi yawf-awr, tersar yawkhav-aer heulof-aer aer-euq taef ma, ‘Shir-euq tsawrhaq ghofdaeflar taef-a laer ngar jan-eu mirnae, iqnan ngar, nawmaf-euq maeqshi yarkhaq dar-eu gar ya daqluf-eu ma.’ ”

²² Khoerngae, Yeqsur-euq Garma-euq zanr garkawv Peqlir yawmuiq paq-aer siqnya-eu mirnae aer-eu, “Tanrdzoeq guirhuq Lursiv oekeuv ngae, ngar, nawmaf-euq garkawv heuhmq dartsaevnaeq ma.”

²³ Khoernar-aq, Pawrluv-anr lof-awq laer yardzoeq guirhuq-anr dawq bif-euq mae. Aerkhawf, aqyawf-anr yawkhav-aer maq kalanr naeqni, aqyawf-euq cawqdeuq larmawr-awr mawf-eu jeq cawba naeq-eu gar khawf taq lavtsoeq laer aernaeq-euq mae.

Pawrluv, Kuv-anr Bi Uryaf-euq

²⁴ Heumyav nan dzeur-euq nar-aq, Peqlir, aqyawf-euq miqzaq Dursirleq naeq-aer lar-euq mae. Dursirleq-aq, Yurdavma mae. Khoernar-aq, Pawrluv-anr bi kurlaq-ir-awr, Kali-anr jan-eu garkawv Pawrluv ja-eu gar narhaq-euq mae.

²⁵ Khoernar-aq, Pawrluv tsaq-awr dawr-eu garkawv, yawqha-euq nuima-anr ghaqler-eu garkawv hawr-eu, aqkar keuvle-eu yarkhaq dar-eu garkawv ja’maeqnaeq ngae, Peqlir guvlar taq-awr aer-eu, “Nymq-mr pov-aq ghaq-ar. Nawr ghof-ir-awr, aqkar aryamq tsaq ngae, ngar, nawq-anr parkur ma.”

²⁶ Pawrluv, aqyawf-anr pyur bifnaeqlaf nar-aq, Pawrluv-anr pyaeqnaeq taef-a laer Peqlir pyur za-eu gar noeqtmq-eu mirnae, Pawrluv-anr ghawqmya pov kurkur-aer dawqja jacawq-euq mae.

²⁷ Nyiq khof byanlar ngae, Peqlir-euq jawrzar-anr Bawrgir Beqtur dzoeqdzaq mrlar-euq mae. Peqlir, Yurdav tsawrhaq-anr ya yurmawf-eu mirnae, Pawrluv-anr kuv-euq lafkhoer bi uryaf-euq mae.