Gʼaˬkʼehˇ 23 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khavma Armur-euq Yawkaq Pyaer-euq

¹ Khoerngae, Pawrluv khavma armur-anr hawtsov taq-awr aer-eu, “Aqyuif aqnyir deuq-or! Iqnan keuvni, ngar, Miqyaer-euq maeqshi kharmr-euq jeq, zaqsiq nuisiq shawrjaevni anr-awr daefluf-eu ma.”

² Khoerngae, Aqnaqnir pirma yawhuiq ghaq, aqyawf-euq maeqboeq-anr taevghae-awq laer, Pawrluv-euq dawqpae yawfluf-eu tsawrhaq-anr khaer-euq mae.

³ Khoernar-aq, Pawrluv, aqyawf-anr aernaeq-eu, “Pyurdeuqni laeftaq-euq karpyawr-or! Miqyaer, nawq-anr taev taef-a. Zanrdawq jav-eu lof-aer ngaq-anr yarkhaq dar-eu laer nawr teugar nuirluf-eu khawf, zanrdawq-anr banqlerni nawr, aqcawq-anr khaer-awr ngaq-anr bitaev-eu le lor?”

⁴ Khoerngae, dawqpae yawfluf-eu deuq, Pawrluv-anr aernaeq-eu, “Nawr, Miqyaer-euq pirma yawhuiq ghaq-anr yaeqbawq-aer aer-eu le laq?”

⁵ Khoerngae, Pawrluv aer-eu, “Aqyuif aqnyir deuq-or! Aqyawf, pirma yawhuiq ghaq nga laer ngar maq siqnya-aq. Aqjeq mirnae aernar-aq, ‘Nawq-euq tsawrhaq-anr uvlanr-eu deuq-anr dawqdoer taqngaeq’ (Di 22:28) laer boftaq-euq mae.”

⁶ Khoerngae, uiqlar taq-euq tsawrhaq deuq-euq lafkhoer, Paqliqsaer tiqpavnav deuq keuq-awr, tiqpavnav deuq-aq, Saqduqgaer nga laer Pawrluv yasiq ngae, tersar yawkhav-aer khavma armur-anr aernaeq-eu, “Aqyuif aqnyir deuq-or! Ngar-aq, Paqliqsaer ma. Ngaqda khawf Paqliqsaer mae. Shir-euq tsawrhaq ghofdaef lar-eu hawr-eu noeqtmq-eu jeq-euq garkawv-euq baqda’nae, ngar yarkhaq dar-eu gar ya daqluf-eu ma.”

⁷ Aqyawf khoerlof-aer aerghaq-euq nar-aq, Paqliqsaer deuq hawr-eu Saqduqgaer deuq yawkaq tsawrpyaer pyaer-awr, uiqlar taq-euq tsawrhaq deuq pav-ir-euq mae.

⁸ Aqjeq mirnae aernar-aq, Saqduqgaer deuq-aq, shir-euq tsawrhaq maq ghofdaef lar-a laer aer-eu uqtaf, mqtav ghaqkhaer maqjawr-aer saflar khawf maqbaw-a laer aer-eu mae. Aerkhawf, Paqliqsaer deuq-aq, heudeuq dawqtawvluf jav mae, jawr mae laer aer-eu mae.

⁹ Khoermirnae, aqyawfmaf lawflawf-aer yawkhav-aer pyaer-eu mae. Paqliqsaer-euq armur-euq lafkhoer zanr maeq-eu tiqpavnav deuq tsawqtur-awr tsawrpyaer pyaerpyaer-aer aer-eu, “Nga’maf-anr tsawrhaq heughaq tiqjeq-iq laeq nga laer maq mawrlar-a. Saflar maqngeur nar-aq, mqtav ghaqkhaer, aqyawf-anr dawq ngaeqcawq le-euq ngeur nar-aq, aqdui, Miqyaer-anr guir maq deuvni yanr kar-eur.”

¹⁰ Khoerngae, tsawrpyaer pyaer duidui-eu mae. Tsawrhaq khoerdeuq, Pawrluv-anr gheupav gheushav baw-mr laer tanrdzoeq guirhuq khanqlanr-eu mae. Khoermirnae, guirzaq-anr khaer-awr, aqyawf maf-euq ghanrcae nae Pawrluv-anr ludov laq-ir-awr, guirzaq-euq jawrnymr-anr sheuqur laf-awq laer dawq bif-euq mae.

¹¹ Nishawq nan ngae mir, Sanqpaq Yeqsur, Pawrluv-euq dawqpae yawfle-awr aer-eu, “Pawrluv-or! Nuima khaqduqni jawr-awq. Nawr, ngaq-euq garkawv Yeqlursaqlaeq-euq lafkhoer sarkir kamq-euq lof-aer, Lormav meuq-anr khawf sarkir yakamq taef-a.”

Pawrluv-anr Saef-eu Laer Bawq-euq

¹² Uqbya byalar ngae, Yurdav tsawrhaq tiqpavnav deuq banrler-awr, Pawrluv-anr maqsaef-euq khoer-aq, maqdzaq maqdawr laer kamq-awr aertsaev taq-euq mae.

¹³ Khoerlof-aer banrler-euq tsawrhaq-aq, 40 ghaq dzaeq-eu mae.

¹⁴ Khoernar-aq, aqyawfmaf, pirma aqyuif deuq hawr-eu aqyuif aqtsu deuq jawr-eu gar le-awr heulof-aer aernaeq ler-euq mae, “Nga’maf, Pawrluv-anr maqsaef-euq khoer-aq, tiqjeq-iq maqdzaq laer nga’maf-euq yawkaq kamq-awr aertsaev taq-euq ma.

¹⁵ Teumirnae, nawmaf, khavma armur naeq-aer tiqkawv lof-aer tanrdzoeq guirhuq jawr-eu gar le-awr, nawmaf, Pawrluv-euq garkawv yawmuiq-aer siqduqni narhaqtser mawf-eu janrgeuf-awr, aqyawf-anr nawmaf hawr-eu khavma armur jawr-eu gar bi sheuqlefni sharler-awq. Aerkhawf, aqyawf maq oekeuv-euq minav-aer, nga’maf, aqyawf-anr saef-eu laer laeqhmqtaq ma.”

¹⁶ Aqyawfmaf khoeqlof luf-eu garkawv, Pawrluv-euq zaqoer yagaq-awr, aqyawf, guirzaq-euq jawrnymr-anr lekeuv-awr urler-euq nar-aq, Pawrluv-anr aernaeq-euq mae.

¹⁷ Khoerngae, Pawrluv, yardzoeq guirhuq tiq ghaq-anr kurlaf-awr aernaeq-eu, “Aqli zaqguq heughaq tanrdzoeq guirhuq-anr dzawrnaeq paq-aer ghae-eu tiqjeqnav jav-eu mae. Khoermirnae, aqyawf-anr tanrdzoeq guirhuq jawr-eu gar sheuqha-ir sher-eq.”

¹⁸ Khoermirnae, yardzoeq guirhuq, aqli khoerghaq-anr sheuq-awr tanrdzoeq guirhuq jawr-eu gar irkeuv ngae aer-eu, “Aqli zaqguq heughaq, nawq-anr dzawrnaeq paq-aer ghae-eu tiqjeqnav jav-eu mirnae, nawr jawr-eu gar sheuqha-ir sher-eq laer kuv-anr nyaefur taq-euq Pawrluv khoerghaq, ngaq-anr kur-awr shar-eu mae.”

¹⁹ Khoerngae, tanrdzoeq guirhuq, aqli zaqguq khoerghaq-euq aqlaf-anr tsanr-awr, gardzer paw ir-awr barzaf-anr narhaq-eu, “Nawr, ngaq-anr aqjeq dzawrnaeq-eu jeq jav-eu le?”

²⁰ Khoerngae, aqli zaqguq khoerghaq heulof-aer aer-eu mae, “Pawrluv-euq garkawv yawmuiq-aer narhaqduq mawf-eu janrgeuf-awr, nishawq nan, khavma armur jawr-eu gar nawr, Pawrluv-anr sheuqka lefni, Yurdav tsawrhaq, nawq-anr shar-eu laer bawqdzaqtsaev taq-euq mae.

²¹ Teumirnae, aqyawf maf-euq shardawq-anr nawr taq narhaq. Aqjeq mirnae aernar-aq, Pawrluv-anr maqsaef-euq khoer-aq, tiqjeq-iq maqdzaq maqdawr laer tsawrhaq 40 ghaq dzaeqni kamq-awr, aertsaev taq-awr lofluf-eu mae. Nymq-mr aqyawfmaf danlar taq-awr, nawq-euq dawq-anr dawqluf-eu mae.”

²² Khoernar-aq, tanrdzoeq guirhuq, aqli zaqguq khoerghaq-anr bighof-ir ngae dawq bif-eu, “Nawq nae ngaq-anr dzawrnaeq laf-euq garkawv heu tiqghaq-anr-iq taq aernaeq de-eq.”

Pawrluv Hawr-eu Meuqsanr Peqlir

²³ Khoerngae, tanrdzoeq guirhuq khoerghaq, yardzoeq guirhuq nyiq ghaq-anr kur-awr heulof-aer aernaeq-euq mae, “Nymrcif naqliq ghoeq laf-anr Gaersaqlir-anr ir-eu gharduq, guirdeuv deuv-eu guirzaq 200 ghaq, manq dziq-eu guirzaq 70 ghaq hawr-eu, ganq baf-eu guirzaq 200 ghaq laeqhmq taq-awq.

²⁴ Khoeruqtaf, Pawrluv bidziq-eu jeqzaq khawf laeqhmq-awr, meuqsanr Peqlir jawr-eu gar yawmuiq paq-aer sheuqkeuv ha-ir-awq.”

²⁵ Tanrdzoeq guirhuq khoerghaq, meuqsanr Peqlir-anr sanqbof heulof-aer bofanr ghae-euq mae:

²⁶ “Gaqlawrdir Lursiv nae muiq duidui-eu meuqsanr Peqlir-anr dawqcawq puqanr lef-eu ma.

²⁷ Tsawrhaq heughaq, Yurdav tsawrhaq nae binyaef-awr, aqyawf-anr saef-eu laer ghaeluf ngae, aqyawf, Lormav tsawrhaq nga laer ngar yasiq-euq mirnae, guirzaq deuq sheuq-awr aqyawf-anr kakhof laq-ir-euq ma.

²⁸ Yurdav tsawrhaq, aqyawf-anr aqjeq-euq baqda’nae iqbax taq-eu nga laer ngar siqduq mawf-eu mirnae, aqyawf-anr aqyawf maf-euq khavma armur jawr-eu gar sheuqghae-euq ma.

²⁹ Aqyawfmaf, aqyawf-euq khoertav shir paq-aer geux-eu yawlaeq hawr-eu shmrcav paf paq-aer geux-eu yawlaeq daq-eu maqngeur-aer, aqyawf maf-euq zanrdawq-anr taf-eu garkawv taef-aer yawlaeq daq-eu nga laer ngar povtser duq-euq ma.

³⁰ Arnan, tsawrhaq heughaq-anr saef-eu laer Yurdav tsawrhaq laeqhmq taq-euq mae laer, aqcawq, ngaq-anr aernaeq lar-euq naeq-aer, ngar, aqyawf-anr nawr jawr-eu gar yawkawr-aer bi sheuqha le-euq ma. Aqyawf-anr yarkhaq ja’mawf-eu tsawrhaq khawf, nawq-euq maeqshi ja-ir-awq laer ngar dawq bif-euq ma. Guiqlanqhuiq luf-ur.”

³¹ Khoermirnae, guirzaq deuq, aqyawf maf-anr dawq bif-euq lof-aer, uqcif paw Pawrluv-anr sheuq-awr, Aqdirbaqlir meuq-anr sheuqkeuv ha-ir-euq mae.

³² Nishawq ngae nan, manq dziq-eu guirzaq deuq, aqyawf-anr maeqhu paw sheuqha-ir-awr, guirzaq nuideuq-aq, guirzaq-euq jawrnymr-anr ghofler-euq mae.

³³ Manq dziq-eu guirzaq deuq, Gaersaqlir-anr irkeuv-awr, meuqsanr Peqlir-anr sanqbof khoertaf bifnaeq-awr, Pawrluv khawf aqyawf-anr a’naeq-euq mae.

³⁴ Meuqsanr Peqlir sanqbof khoertaf guighaq-awr Pawrluv-anr aqgeu khanq-anr jawr-eu tsawrhaq le laer narhaq-euq mae. Khoernar-aq, Pawrluv-aq, Girlirciv mirkhanq-anr jawr-eu tsawrhaq nga laer yasiq ngae,

³⁵ aer-eu, “Nawq-anr yawlaeq daq-eu deuq oekeuv ngae, ngar, nawq-euq garkawv par narhaqduq ma.” Khoernar-aq, Pawrluv-anr Heqlor-euq guirmaf-euq dzoeqnymr-anr kalanr taq-awq laer dawq bif-euq mae.