Gʼaˬkʼehˇ 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv Dawqdzawr Mr-euq

¹ “Aqyuif aqnyir, aqpoeq aqbawr deuq-or! Ngar, ngaq-euq garkawv nawmaf-anr jashaw-eu gar narhaq naeqlaf sher-eq.”

² Aqyawf, Heqbyaer dawq ngaeq-eu gar aqyawfmaf yagaq ngae, yawbae navmaqtser ciqcurni jawr-eu gar Pawrluv heulof-aer aernaeq-euq mae,

³ “Ngar-aq, Girlirciv mirkhanq, Daqsuv-anr daefle-euq Yurdav tsawrhaq ma. Aerkhawf, meuq heumeuq-anr huiqlar-awr, Gaqmaqleqlar-euq aqkuir-euq dawqpae nuir-awr dzaw ngae, aqdui-euq aqpoeq deuq-euq zanrdawq dufyawrni yawmuiq-aer maeqnaeq laf-euq mae. Iqnan, nawmaf dawqtawvluf Miqyaer-euq gharduq nuima keuv duidui-eu lof-aer ngar khawf keuv-euq ma.

⁴ Ngar, Yeqsur-euq Garma-anr can-eu tsawrhaq-anr shir-eu gar keuvni khaeqnaeq khavnaeq haw-euq ma. Zaqyo aqli deuq-anr khawf, zaqmiq aqbur deuq-anr khawf, nyaef-awr kuv-anr dawv-euq ma.

⁵ Pirma yawhuiq ghaq hawr-eu khavma armur-euq aqyuif aqtsu dawqtawvluf khawf, ngaq-euq garkawv sarkir kamqnya taef-a. Aqyuif aqnyir Yurdav tsawrhaq-euq gharduq, ngar sanqbof za-awr, Daqmaqsaer-anr jawr-eu aqyuif aqnyir deuq-anr shmrcav nae paf-awr, Yeqlursaqlaeq-anr sheuqkeuv laf-awr khaeqnaeq-eu laer ngar, Daqmaqsaer-anr ir-euq ma.”

Pawrluv Kali-anr Janlar-euq Garkawv

⁶ “Ngar, Daqmaqsaer-euq meuqdzer irkeuv ngae, nanlov caelar-euq mae. Khoerngae, mq-anr nae zawr khav-eu yawshaef tiqpov taef-aer ngaq-euq tiqjawq byale-euq mae.

⁷ Ngar, mirtsa gacoqghae ngae, ngaq-anr heulof-aer aer-eu tersar-anr yagaq-euq ma, ‘Sawrluv-or! Sawrluv, nawr aqjeq mirnae ngaq-anr khaeq-awr khav-eu le?’

⁸ Khoerngae, ngar aerkhof naeq-eu, ‘Sanqpaq-or! Nawr aqsur ghaq le?’ Aqyawf, ngaq-anr aerkhof naeqlaf-eu, ‘Ngar-aq, nawr khaeq-awr khavluf-eu Naqzaqlaer tsawrhaq Yeqsur ma.’

⁹ “Ngaq naeq-aer canluf-eu deuq yawshaef khoer-anr ya’mawr-awr guv duidui-ir-euq khawf, ngaq-anr ngaeqcawq-eu ghaq-euq tersar-anr maqya gaq-aq.

¹⁰ Khoernar-aq, ngar heulof-aer narhaq-euq ma, ‘Sanqpaq-or! Ngar aqjeq yajanr-eu la?’ Khoerngae, Sanqpaq Yeqsur, ngaq-anr aernaeq laf-eu, ‘Tur-awr, Daqmaqsaer-anr urler-awq. Nawq-anr bimr-eu laer tsaq khartsov taq-euq yawqjeq navluf khoergar nawq-anr aernaeqlaf taef-a.’

¹¹ Yawbya khoer-euq yawshaef-euq baqda’nae, ngar myavnuiv maq mawrnya-aer pyeuf-ir-euq mir-a. Khoermirnae, ngaq naeq-aer canluf-eu khoerdeuq, ngaq-euq aqlaf-anr nyaeftaeq-awr, Daqmaqsaer-anr urler-euq ma.

¹² “Khoergar, Aqnaqnir laer kur-eu tiq ghaq jawr-eu mae. Aqyawf-aq, khoergar jawr-eu Yurdav tsawrhaq dawqtawv luf-euq lafkhoer tsawrmyanr muiq-eu uqtaf, zanrdawq jav-eu lof-aer Miqyaer-anr guv-eu tsawrhaq tiq ghaq mae.

¹³ Aqyawf, ngar jawr-eu gar lar-awr, ngaq-euq dawqpae yawf-awr aer-eu, ‘Maernmr Sawrluv-or! Nawr mawrnya lar-awq.’ Ngar hawghae ngae, tiqpov taef-aer aqyawf-anr mawr-euq ma.

¹⁴ Khoernar-aq, aqyawf aer-eu, ‘Nawr, Miqyaer nuima tsaq-eu jeq-anr yasiqni hawr-eu, Tsaq-awr dawr-eu ghaq-anr ya’mawrni khawf, aqyawf-euq khaqmae-anr nae ngaeqdov lef-euq tersar-anr yagaqni khawf, aqdui-euq aqpoeq deuq-euq Miqyaer, nawq-anr tserdov taq-euq mae.

¹⁵ Aqjeq mirnae aernar-aq, nawq nae yagaq ya’mawr-euq deuq, tsawrhaq dawqtawv luf-euq maeqshi aqyawf-euq gharduq nawr sarkir yakamq taef-a.

¹⁶ Nymq-mr nawr aqjeq ghae-eu dawqdawq-aer jawr-eu le? Tur-awr, bartirsaq hageuf-awr, nawq-euq iqbax tsiqshawr-awq. Sanqpaq Miqyaer-euq tsawrmyanr-anr kur-awq.’ ”

Pawrluv-anr Khaerghae-euq

¹⁷ “Khoernar-aq, ngar, Yeqlursaqlaeq-anr ghofkeuv lar-awr, uqduq tanqnymr nymrma-euq lafkhoer guiqlanq sharluf ngae, mawrle-euq lafkhoer,

¹⁸ Sanqpaq Yeqsur mawrle-awr, ngaq-anr aer-eu, ‘Yeqlursaqlaeq-anr nae yawkawr-aer dov-ir-awq. Aqjeq mirnae aernar-aq, heugar jawr-eu tsawrhaq deuq, nawr, ngaq-euq garkawv sarkir kamq-eu gar maq hageuf-a.’

¹⁹ Khoerngae, ngar heulof-aer aer-euq ma: ‘Sanqpaq-or! Ngar, nawq-anr jan-eu tsawrhaq-anr kuv-euq lafkhoer nyaefur-awr, zanrdawq khawqnymr yawqnymr navluf-euq lafkhoer aqyawf maf-anr diq-euq garkawv, aqyawfmaf siqnya-eu mae.

²⁰ Khoeruqtaf, nawq-euq gharduq shir-euq Saqteqpaq-anr aqcawq shiq lavdovnaeq ngae, ngar khawf yawfluf-awr, aqyawf shir-eu gar nuima tsaq-awr, aqyawf-anr biqsaef luf-eu tsawrhaq-euq maeqtsoeq-anr ngar lof-euq ma.’

²¹ Khoerngae, aqyawf, ngaq-anr aernaeq laf-eu, ‘Nawr ir-awq. Ngar, nawq-anr garmanr kaq-eu gar jawr-eu aqcawq tsawrjeuq tsawrca jawr-eu gar khaerghae-eu ma.’ ”

Pawrluv, Lormav Tsawrhaq Pyeuf-eu

²² Tsawrhaq armaf mafma deuq, Pawrluv dawq khoerdawq aer-eu gar narhaq keuvlaf-euq nar-aq, tersar yawkhav khav-aer gur-eu, “Teulof-aer ghae-eu tsawrhaq-aq, mirtsaq-euq khoertav nae lavbyov dzae-awq. Aqyawf daef-eu maqgeux-a.”

²³ Aqyawfmaf gurgur-aer, yawqha-euq maeqtsoeq laevdzae-awr, mq paw khaqlaer byav-eu mae.

²⁴ Khoerngae, tanrdzoeq guirhuq, Pawrluv-anr guirzaq-euq jawrnymr-euq lafkhoer sheuqur lef-awr, aqjeq mirnae aqcawq, aqyawf-anr khoerlof-aer aerluf-eu nga laer yasiqni, aqyawf-anr juif-awr narhaq tser-awq laer dawq bif-euq mae.

²⁵ Aqyawfmaf, aqyawf-anr shaqkhov arcav nae paf-awr juif-eu laer ghae ngae, Pawrluv, aqyawf-euq dawqpae yawfluf-eu yardzoeq guirhuq-anr narhaq-eu, “Nawmaf, Lormav tsawrhaq-anr yarkhaq maqdar-euq minav-aer juif-eu zanr jav-eu le laq?”

²⁶ Yardzoeq guirhuq dawq khoerdawq-anr yagaq ngae, tanrdzoeq guirhuq jawr-eu gar le-awr aer-eu, “Nawr aqjeq janr-eu law-awr khawf yayanr-eu ngar-a. Tsawrhaq heughaq-aq, Lormav tsawrhaq nga de-eq.”

²⁷ Khoernar-aq, tanrdzoeq guirhuq, Pawrluv jawr-eu gar le-awr aer-eu, “Ngaq-anr aernaeqlaf sher-eq, nawr, Lormav tsawrhaq le lor?” Khoerngae, Pawrluv aer-eu, “Ngeur ma.”

²⁸ Tanrdzoeq guirhuq aer-eu, “Ngar pyur ghawqmya’ni bif-awr nae taef-aer Lormav tsawrhaq pyeuflar-euq ma.” Khoerngae, Pawrluv aer-eu, “Aerkhawf, ngar-aq, daefle ngae nae Lormav tsawrhaq ma.”

²⁹ Khoerngae, Pawrluv-anr narhaq tser-eu laer ghae-eu deuq, aqyawf jawr-eu gar nae tiqpov taef-aer ghofdov-ir-euq mae. Pawrluv-aq, Lormav tsawrhaq law hawrngaq laer tanrdzoeq guirhuq ghaq khawf yasiq-awr, aqyawf-anr paftaq-euq mirnae guv duidui-eu mae.

Pawrluv Hawr-eu Khavma Armur

³⁰ Nishawq ngae nan, tanrdzoeq guirhuq, Pawrluv-anr shmrcav puirnaeq-awr, Yurdav tsawrhaq, Pawrluv-anr iqbax aqjox-aer taq-eu nga laer siqnya mawf-eu mirnae, pirma aqyuif deuq hawr-eu khavma armur dawqtawv luf-anr dawq bif-awr bi uiqlar-euq mae. Khoernar-aq, Pawrluv-anr sheuqlef-awr, aqyawf maf-euq maeqshi biyawf-euq mae.