Gʼaˬkʼehˇ 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv, Yeqlursaqlaeq-anr Le-euq

¹ Khoernar-aq, heulof-aer pyeuflar-euq mae. Aqyawf maf-anr ghawq-awr, nga’maf lawq-anr dziq-awr nae, dawrcoeni ir-awr Korsav irjawlanr-anr irkeuv-euq ma. Nishawq ngae nan, Lordav irjawlanr-anr irkeuv-awr, khoergar nae Baqdaqlar meuq-anr irkeuv-euq ma.

² Khoergar, Pirnir mirkhanq-anr ir-eu lawq tiq lawq povmawr-awr, dziqler-awr irghae-euq ma.

³ Gurbaqlur irjawlanr-anr ya’mawr ngae, nanrma gakhaeq paw nae Surliv-anr ir-euq ma. Khoernar-aq, lawq khoerlawq Durlu-anr myawq ya bafka-eu mirnae, khoergar naq-euq mae.

⁴ Nga’maf khoergar jawr-eu zaqlanr deuq-anr povmawr-awr, khoergar shif nan byanni jawrnaq mr-euq ma. Zaqlanr khoerdeuq Yawshawr Saflar-anr ghoeghoe-aer Pawrluv-anr Yeqlursaqlaeq-anr taqle laer aernaeq-euq mae.

⁵ Khoergar jawr-eu arsaq saqlar ngae nan, nga’maf ghawq-awr maeqhu paw irghae-euq ma. Aqyawfmaf hawr-eu aqyawf maf-euq zaqmiqzaq deuq hawr-eu zaqdeuq dawqtawvluf khawf, meuq-euq meuqdzer keuvni nga’maf-anr sheuqha le-euq mae. Nga’maf iqmalavshav-euq lawrdzer-anr pawqtsuif pawqdmq dmq-awr guiqlanq shar-euq ma.

⁶ Khoernar-aq, tiqghaq tirghaq ghawqdawq ngaeq-awr, nga’maf lawq-anr dziqler-euq nar-aq, aqyawfmaf irkanr ghofler-euq mae.

⁷ Nga’maf, Durlu meuq-anr nae ircuf-euq garma canli-awr, Baqdawrleq meuq-anr irkeuv-euq ma. Khoergar jawr-eu aqyuif aqnyir deuq-anr dawqcawq puq-awr, aqyawfmaf naeq-aer tiq nan jawrnaq mr-euq ma.

⁸ Nishawq ngae nan, Pawrluv naeq-aer canluf-eu nga’maf dov-ir-awr, Gaersaqlir-anr irkeuv-euq ma. Pirlirpuv laer kur-eu guiqlanqdawq maeq-eu ghaq-euq nymr-anr urler-awr, aqyawf naeq-aer yaf-euq ma. Aqyawf-aq, cawba-eu shif ghaq-euq lafkhoer keuq-eu tiq ghaq mae.

⁹ Aqyawf-aq, Miqyaer gharduq ngaeqdan-eu zaqmiq oeq ghaq jawr-awr, yawqghaq navluf miqdaf dafshawr mae.

¹⁰ Nga’maf khoergar ghawqmya nan jawrkeuvlaf ngae, Aqgaqbar laer kur-eu Miqyaer gharduq ngaeqdan-eu tiq ghaq, Yurdav mirkhanq-anr nae oeka-euq mae.

¹¹ Aqyawf, nga’maf jawr-eu gar oe-awr, Pawrluv-euq jofpaf yur-euq mae. Khoernar-aq, aqyawf-euq aqkuir aqlaf-anr pafcuf-awr aer-eu, “Yawshawr Saflar heulof-aer aer-eu mae, ‘Yeqlursaqlaeq-anr jawr-eu Yurdav tsawrhaq deuq, jofpaf heucav-euq yawsanr ghaq-anr heulof-aer paf-awr, aqcawq tsawrjeuq tsawrca-euq aqlaf-anr bianr-ir taef-a.’ ”

¹² Dawq khoerdawq-anr yagaq ngae, nga’maf hawr-eu khoergar jawr-eu deuq, Pawrluv-anr Yeqlursaqlaeq-anr taqpar le laer shar duidui-euq ma.

¹³ Khoerngae, Pawrluv aer-eu, “Aqjeq mirnae nawmaf teunav nav-aer ngoerngoer-aer ngaq-euq nuima tsawqpav-ir paq-aer janrnaeq laf-eu le? Ngar, Sanqpaq Yeqsur-euq tsawrmyanr-euq gharduq aqcawq nae bipaf-eu taef-aer maqngeur-eu, Yeqlursaqlaeq-anr yashir-eu law-awr khawf laeqhmqdan taq-euq ma.”

¹⁴ Nga’maf, aqyawf-anr maq japyawr nya-eu mirnae, “Sanqpaq Miqyaer nuima tsaq-eu lof-aer pyeuf luf-ur!” laer aer-awr, ciqcurni jawr-euq ma.

¹⁵ Khoergar, ghawqmya nan jawrkeuv laf-euq nar-aq, nga’maf myawq lavluiv-awr, Yeqlursaqlaeq-anr le-euq ma.

¹⁶ Gaersaqlir-anr jawr-eu zaqlanr tiqpavnav deuq, Gurbaqlur irjawlanr-anr jawr-eu Maqnaqsoq khawf sheuq-awr nga’maf naeq-aer lar-euq mae. Maqnaqsoq-aq, zaqlanr geuf-eu myanrlar-euq mae. Nga’maf, aqyawf-euq nymr-anr yafler-euq ma.

Yaqkov-anr Gha’mawr Ler-euq

¹⁷ Khoernar-aq, nga’maf, Yeqlursaqlaeq-anr lekeuv ngae, aqyuif aqnyir deuq, nga’maf-anr laqkhaq caertavni hageuf naeqlaf-euq mae.

¹⁸ Nishawq ngae nan, Pawrluv, nga’maf tiqkawv lof-aer Yaqkov-anr dzoerler-euq ma. Aqyuif aqtsu yawqghaq navluf khawf khoergar jawrluf-eu mae.

¹⁹ Pawrluv, aqyawf maf-anr dawqcawq puq-awr, Miqyaer, aqyawf-euq guiqlanq-euq gar-anr ghoe-awr, aqcawq tsawrjeuq tsawrca-euq gharduq aqjox-aer mr-euq garkawv tiqjeq sair tiqjeq dzawrnaeq-euq mae.

²⁰ Aqyawfmaf yagaq ngae, Miqyaer-anr ciqhuiq ciqmanr-eu mae. Khoernar-aq, aqyawfmaf, Pawrluv-anr heulof-aer aernaeq-euq mae: “Maernmr-or! Yurdav tsawrhaq-euq lafkhoer Kali-anr janlar-euq armyav tanr ghaq jawr-eu la laer nawr mawrluf-eu mae. Aqyawfmaf dawqtawvluf zanrdawq-anr nuima keuv duidui-eu mae.

²¹ Aerkhawf, aqcawq tsawrjeuq tsawrca-euq ghanrcae jawr-eu Yurdav tsawrhaq dawqtawv luf-anr, Morseq-anr byaerdzae-awr, yawqha-euq zaqdeuq-anr bawkhov maeqdzaq maqya yaeqnaeq-eu uqtaf, zanrsanrkhof jav-eu lof-aer maqya cantae-ar laer nawr maeqluf-eu mae laer aqyawfmaf yagaq-euq mae.

²² Tox-aer mar-iq, aqjox-aer janr-eu paq nga? Aqjeq mirnae aernar-aq, nawr lar-euq garkawv aqyawfmaf yasiq-awr, aqyawfmaf yadzoer-eu yawduq baw-eu mae.

²³ Khoermirnae, nga’maf nae nawq-anr aernaeq-euq lof-aer janr-awq. Nga’maf jawr-eu gar kamqtaq-euq oeq ghaq jawr-eu mae.

²⁴ Aqyawfmaf sheuq-awr, aqyawfmaf naeq-aer mawrdo shawr-eu zanr janrler-awq. Khoeruqtaf, aqyawf maf-euq gharduq pyur bif-awr uqjaev bi jaevdzae-awq. Khoerlof-aer janr nar-aq, nawq-euq garkawv yagaq-euq lof-aer maqngeur-eu uqtaf, nawr khawf zanrdawq-anr yawmuiq-aer daefcaw-awr cantae luf-eu law hawrngaq laer yawqghaq navluf-anr siqler taef-a.

²⁵ Kali-anr janlar-euq aqcawq tsawrjeuq tsawrca deuq-euq gharduq-aq, aqdui bawqdzaq tsaev-euq lof-aer, sanqbof heulof-aer bofanr ghae-euq ma. Tanqpanq aqma mawrkawr-anr lawrnaeq-euq jeq, shiq hawr-eu pafsaef-euq jeqzaq taqdzaq. Banq-awr khaqmiq sheu-eu taqbi jav. Nawmaf heudeuq lan-eu tsaq mae.”

²⁶ Khoermirnae, nishawq ngae nan, Pawrluv, tsawrhaq khoer oeq ghaq sheuq-awr, aqyawfmaf naeq-aer mawrdo shawr-eu zanr janrler-euq mae. Khoerngae, uqduq tanqnymr nymrma-euq lafkhoer urler-awr, aqyawfmaf mawrdo shawr-eu zanr janrjir-eu arnan hawr-eu yawqha aqgeu ngae yamq-anr lawrnaeq-eu le laer aernaeq ler-euq mae.

Pawrluv Binyaef-euq

²⁷ Khoer shif nan jirlerluf ngae, Aqsir mircoer-anr nae lartaq-euq Yurdav tsawrhaq deuq, Pawrluv-anr uqduq tanqnymr nymrma-euq lafkhoer jawrluf-eu gar ya’mawr ngae, aqyawfmaf, tsawrhaq armaf dawqtawv luf-anr lavluiq-awr, Pawrluv-anr nyaef-awr,

²⁸ gur-eu, “Irsaqleqlav tsawrhaq deuq-or! Cawba le-awq! Tsawrhaq heughaq-aq, aqdui-euq tsawrjeuq tsawrca-anr khawf, zanrdawq-anr khawf, jawrduq heutsanr-anr khawf, muirni kharngeur-eu gar yawqghaq navluf-anr maeqmaeq-aer canluf-eu mae. Khoeruqtaf, aqyawf, Heqlaqsar tsawrhaq-anr uqduq tanqnymr nymrma-euq lafkhoer sheuqur laf-awr, shawr-eu jawrduq heutsanr-anr maqshawrni bipyeuf-ir-euq mae.”

²⁹ (Daqlorbeq laer kur-eu Erpersu-anr jawr-eu tiq ghaq, aqyawfmaf, Pawrluv naeq-aer meuq-euq lafkhoer canluf-eu gar ya’mawr-euq mirnae, Pawrluv, aqyawf-anr uqduq tanqnymr nymrma-euq lafkhoer sheuqur laf-euq paq laer aqyawfmaf noeq-eu mae.)

³⁰ Khoerngae, meuq meuqlanni luiqgha lar-awr, baqmaf purjeq-aer caevuiq laf-euq mae. Aqyawfmaf, Pawrluv-anr nyaef-awr, uqduq tanqnymr nymrma-anr nae gheudov ghae-awr nae tiqpov taef-aer larghov piqtaeq-euq mae.

³¹ Aqyawfmaf, Pawrluv-anr saef-eu laer povluf ngae, Yeqlursaqlaeq meuq meuqlanni luiqgha luf-eu garkawv, tanrdzoeq guirhuq-anr tsafgaq ler-euq mae.

³² Tanrdzoeq guirhuq khoerghaq tiqpov taef-aer, yardzoeq guirhuq heumyav ghaq hawr-eu guirzaq sheuq-awr, luiqgha luf-eu tsawrhaq armaf mafma jawr-eu gar caevghae-euq mae. Tsawrhaq khoerdeuq tanrdzoeq aqyuif hawr-eu guirzaq deuq-anr ya’mawr ngae, Pawrluv-anr maqdiqni naqler-euq mae.

³³ Khoerngae, tanrdzoeq guirhuq dawqpae oe-awr, Pawrluv-anr nyaef-awr, shmrcav nyiq cav nae paf-awq laer dawq bif-euq mae. Aqyawf aqsur ghaq pyeuf-awr, aqjeq janrluf-eu la laer tanryar dzoeqda narhaq-euq mae.

³⁴ Tsawrhaq armaf mafma-euq lafkhoer tiqpavnav deuq, tiqghaq tiqjeq-aer aeraer-aer yawkhav-aer lawfgha luf-eu mae. Khoerlof-aer lawfgha luf-eu mirnae, pyeufluf-eu garkawv maq siqduq nya-aer, Pawrluv-anr guirzaq-euq jawrnymr-anr sheuqghae-awq laer tanrdzoeq guirhuq dawq bif-euq mae.

³⁵ Pawrluv dawqdzm-anr lekeuv ngae, tsawrhaq armaf mafma, aqyawf-anr diq-eu laer yawkhav-aer laejae-eu mirnae guirzaq deuq, aqyawf-anr baf-awr ledav-euq mae.

³⁶ Khoerngae, tsawrhaq armaf mafma khoerdeuq maeqnan cantae cantae-aer gur-eu, “Aqyawf-anr lavsaef byov-awq.”

Pawrluv Dawqdzawr Mrmawf-eu

³⁷ Khoernar-aq, aqyawfmaf, Pawrluv-anr guirzaq-euq jawrnymr-euq lafkhoer sheuqur lef-eu laer ghae ngae, Pawrluv, tanrdzoeq guirhuq-anr narhaq-eu, “Ngar, nawq-anr dawq ngaeqcawqnya mae lor?” Khoerngae, aqyawf aer-eu, “Nawr, Heqlaqsar-euq dawq ngaeqnya-eu le laq?

³⁸ Nawr dzeurlaf ngae, mirkhanq-anr puiq-awr, aqcawq-anr saef-euq tsawrhaq 4,000 ghaq sheuq-awr nae bawrtsanq bawrdanr-anr caevjawr-ir-euq Irjirtuv tsawrhaq khoerghaq maqngeur lor?”

³⁹ Khoerngae, Pawrluv aer-eu, “Ngar-aq, Girlirciv mirkhanq-anr jav-eu Daqsuv-anr jawr-eu Yurdav tsawrhaq ma. Tsawrmyanr maqjav-eu meuq meuqzaq-anr daefle-euq tsawrhaq maqngeur. Tsawrhaq heudeuq-anr dawq tiq pov bi ngaeqcawq naeqlaf-awq laer ngar, nawq-anr shar ma.”

⁴⁰ Tanrdzoeq guirhuq arnmq bifnaeq ngae, Pawrluv dawqdzm-anr yawf-awr, tsawrhaq khoerdeuq-anr lafdzawr dzawrnaeq-euq mae. Aqyawfmaf ciqcur savni jawr ngae, Pawrluv, Heqbyaer dawq-anr nae aqyawf maf-anr heulof-aer aernaeq-euq mae: