Gʼaˬkʼehˇ 20 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Heqlaqsar Mirkhanq-anr Ir-euq

¹ Luiqgha-eu khoer cof-ir-euq nar-aq, Pawrluv, zaqlanr deuq-anr kuruiq-awr, aqyawf maf-anr byarcuf-awr, Maqgeqdawrniv mirkhanq-anr irghae-euq mae.

² Mirkhanq khoerkhanq doeni irghae ngae, zaqlanr deuq-anr dawq ghawqmya’ni ngaeqnaeq-awr ghaq bifyaf-awr, Heqlaqsar mirkhanq-anr irkeuv-euq mae.

³ Khoergar bala smr siq byanni jawr-awr, lawq-anr dziq-awr Surliv-anr ghof-ir-eu laer ghae ngae, Yurdav tsawrhaq, Pawrluv-anr saef-eu laer tovluf-eu mirnae, aqyawf, Maqgeqdawrniv mirkhanq paw nae ghof-ir ma laer noeqtsaev-euq mae.

⁴ Pawrluv naeq-aer ir-euq deuq-aq, Beqlir-anr jawr-eu Sorbaqdaqlur, Tersaqlorni-anr jawr-eu Aqliqdaqgur hawr-eu Seqguqdur, Deqbeq-anr jawr-eu Gaqyur hawr-eu Tivmorseq, Aqsir mircoer-anr jawr-eu Durjir hawr-eu Daqlorbeq heudeuq mae.

⁵ Aqyawfmaf jeqhu irghae-awr, nga’maf-anr Daqlor-anr dawqluf-eu mae.

⁶ Daeqtseq maqdawv-euq kaqmur dzaq-eu yawbui dzeur-awr, nga’maf, Pirlirpiv-anr nae lawq-anr dziq-awr dov-ir-euq ma. Ngaq nan byanlar ngae, Daqlor-anr irkeuv-awr, aqyawfmaf naeq-aer tanqdzoer-awr, khoergar shif nan byanni jawrnaq mr-euq ma.

Pawrluv, Daqlor-anr Maeq-euq

⁷ Tiqjaw-euq lafkhoer yawbae ngae nan, nga’maf kaqmur ngawqpyaeq-eu laer uiqler-euq ma. Pawrluv nishawq ngae nan dov-ir-eu laer ghae-eu mirnae, saerghanr caelar ngae keuvni dawqmaeq maeq-euq mae.

⁸ Nga’maf uiqluf-eu nymr laftav tiv-anr tsirkhmq ghawqmya’ni doftaq-euq mae.

⁹ Khoerngae, Urtiqkur laer kur-eu aqli zaqguq tiq ghaq larghovzaq-anr nuirluf-eu mae. Pawrluv dawqmaeq ghawqmyanrni maeq-eu mirnae, khoerghaq yufkhav-awr, maq noeqni yufkhavbyov lef-euq mae. Khoernar-aq, aqyawf, nymr smq tiv gor-eu gar nae gaka ghae-awr, aqcawq, aqyawf-anr baftur-ir ngae shirdzeur-euq mae.

¹⁰ Khoerngae, Pawrluv zafka-ir-awr, khoerghaq-euq khoertav awkhof-awr, aqyawf-anr byarcuf-awr, aqyawf maf-anr aernaeq-eu, “Nawmaf taq tsawqguv-ir, aqyawf daefluf nya siq.”

¹¹ Khoernar-aq, par davler-awr, kaqmur ngawqpyaeq-awr dzaq-euq mae. Aqyawfmaf naeq-aer ghawqmyanrni jasawx-awr, uqbya byalar-awr nae taef-aer dov-ir-euq mae.

¹² Aqyawfmaf, aqli zaqguq khoerghaq-anr yawdaef-aer ya sheuqkhof ghae-euq mirnae, nuima uicuiv taef-aer sar-eu maqngeur-a.

Daqlor-anr Nae Meqleqdur-anr Ir-euq

¹³ Pawrluv nae khaertaq-euq lof-aer, nga’maf-aq, lawq-anr dziq-awr Aqtsov-anr jeqhu irtawq-awr, aqyawf-euq mawrdo-aq, khoergar keuvni kuirzoq ir-awr, Aqtsov-anr nga’maf naeq-aer lawq-anr bi dziqlar-eu laer noeqtsaev taq-euq ma.

¹⁴ Khoernar-aq, Aqtsov-anr aqyawf, nga’maf-anr dzoer ngae, nga’maf, aqyawf-anr lawq-anr bi dziqlar-awr, Meqdurleq meuq-anr ir-euq ma.

¹⁵ Khoergar nae lawq-anr dziq-awr, nyiq nan tiqnan Ciror irjawlanr naeq-aer dawrnaq-aer jav-eu jawrduq-anr irkeuv-euq ma. Smq nan tiqnan Saqmor irjawlanr-anr irkeuv-awr, Tawqjiqlir-anr jawrnaq mr-euq ma. Oeq nan tiqnan Meqleqdur-anr irkeuv-euq ma.

¹⁶ Aqsir mircoer-anr ghawqmyanr maqya jawrni, Erpersu-anr maqnaq-aer, maeqhu paw irghae ma laer Pawrluv noeqtsaev taq-euq mae. Ghaenya nar-aq, Beqdeqgordeq yawbui arnan-anr Yeqlursaqlaeq-anr jawrnya’ni, aqyawf yawkawr-aer irmawf-eu mae.

Pawrluv Ghaq Bif-euq

¹⁷ Pawrluv, Meqleqdur-anr jawrluf ngae, Erpersu Kalizaq armur-euq aqyuif aqtsu deuq-anr kuruiq laf-euq mae.

¹⁸ Aqyawfmaf, aqyawf jawr-eu gar larkeuv ngae, Pawrluv, aqyawf maf-anr heulof-aer aernaeq-euq mae: “Ngar, Aqsir mircoer-anr larkeuv danqbae-euq ngae nan-anr nae, nawmaf-euq ghanrcae kharjawr ngae, ngar aqjox-aer janr-euq garkawv nawmaf siqnya-eu mae.

¹⁹ Ngar nuima nanqyuni tiqbyan tiqlof taq-awr, myavbir ghawqmya’ni dovdov-aer Sanqpaq Yeqsur-euq gar mr-euq ma. Yurdav tsawrhaq, ngaq-anr yawdoer janr-eu laer jawqluf-eu mirnae, shaqzanq ghawqmya jeq-anr yadaq-euq gar khawf nawmaf siqnya-eu mae.

²⁰ Ngar, nawmaf-anr gardanr tsoeq-eu jeq maq zaftaqni nawmaf-anr dzawrmaeq naeq-awr, tsawrhaq dawqtawv luf-euq maeqshi khawf, tiqnymr sair tiqnymr khawf, ngar, nawmaf-anr maeqnaeq tsovnaeq-euq ma.

²¹ Yurdav tsawrhaq hawr-eu Heqlaqsar tsawrhaq-anr khawf, Miqyaer-euq maeqshi iqbax noeqpov-awr, aqdui-euq Sanqpaq Yeqsur Kali-anr jan-awq laer sarkir kamq-euq ma.

²² Nymq-mr muiq-eu Saflar, ngaq-anr paf-awr Yeqlursaqlaeq-anr sheuqghae naeqlaf luf-eu mae. Khoergar, ngaq-euq khoertav aqjeq keuvle-eu laer ngar maqsiq.

²³ Aerkhawf, ngar khar irkeuv-euq meuq-euq lafkhoer, shmrcav hawr-eu shaqzanq, ngaq-anr dawqluf-eu mae laer Yawshawr Saflar, ngaq-anr byacaevni aernaeq laf-euq mae.

²⁴ Aerkhawf, heudeuq tiqjeq-iq ngaq-anr maq gheunyaelar nya-aer, ngaq-euq daefzir-anr khawf, ngar maq khanqlanr. Aqjeq mirnae aernar-aq, ngar yacaev-eu garma heukanr laqkhaq tiqcaer caevli-awr, Sanqpaq Yeqsur-anr nae za-euq guiqlanq-euq gar pyeuf-eu, Miqyaer-euq guiqlanq yawdzanr byan-eu guiqlanq dawq-euq garkawv, sarkir yakamq nar-aq ghaq ma.

²⁵ “Hawsher-eq, ngar, nawmaf-euq ghanrcae cancan-aer, Miqyaer uvlanr-eu garkawv maeqnaeq-euq ma. Aqkar nar-aq, nawmaf dawqtawvluf ngaq-euq myavpyawq-anr maqpar ya’mawr-a laer ngar siqnya ma.

²⁶ Khoermirnae, tsawrhaq dawqtawv luf-euq shiq khoer ngaq-anr maqtaf-aer, ngar-aq, shawrjaevni ghae-eu ma laer iqnan ngar, nawmaf-anr sarkir kamq-eu ma.

²⁷ Aqjeq mirnae aernar-aq, Miqyaer nuima tsaq-eu jeq dawqtawvluf ngar maq zaftaqni nawmaf-anr maeqnaeq jir-euq ma.

²⁸ Yawshawr Saflar, nawmaf-anr armaf-euq lafkhoer nae tserdov-awr aqyuif aqtsu bigeuf-euq mirnae, nawmaf yawqhar yawqha yanryanr-aer daef-awr, armaf maflan-euq gharduq khawf yanr-awq. Aqyawf-euq shiq nae zeurkhof taq-euq Sanqpaq Miqyaer-euq Kalizaq armur-anr bosav-awq.

²⁹ Ngar dov-ir dzeur-euq nar-aq, zawr ghae-eu khaqyaer deuq, nawmaf-euq ghanrcae urlar-awr, yawr yawrmaf-anr lavcawv duidui taef-a laer ngar siqnya ma.

³⁰ Khoeruqtaf, nawmaf-euq lafkhoer tsawrhaq tiqpavnav deuq dovlar-awr, zaqlanr deuq, aqyawf maf-euq maeqnan cantae larni, yawtsaq yawdawr-euq dawq-anr yurpyawv taef-a.

³¹ Khoermirnae, nawmaf yawbeur beur-aer jawr-awq. Ngar smr khof byanni uqcif nan’ghanr maqaer, maq naqlerni myavbir dovdov-aer, nawmaf yawqghaq navluf-anr aernoeq naeq-euq gar noeqmawr-awq.

³² “Aqyuif aqnyir deuq-or! Nymq-mr ngar, nawmaf-anr Miqyaer-euq aqlaf-euq lafkhoer hawr-eu aqyawf-euq guiqlanq yawdzanr-euq dawq-euq lafkhoer a’naeq-awr bi jawryaf ma. Guiqlanq yawdzanr-euq dawq khoer-aq, nawmaf-anr bihuiq bi manrlar nya-awr, lavshawr-euq tsawrhaq dawqtawvluf naeq-aer, nawmaf tiqkawv lof-aer jeqbir za’nya-eu mae.

³³ Ngar-aq, tiqghaq-iq-euq pyur, shuir maqngeur nar-aq, dmghaq dmlmr-anr maerjuir maqjuir-aq.

³⁴ Ngar hawr-eu ngaq naeq-aer jawr-eu deuq mawf-eu jeq za’ni, ngaq-euq aqlaf heu aqmyanluf mrluf-eu mae laer nawmaf siqnya-eu mae.

³⁵ Nawmaf khawf khoerlof-aer gar yawkhav-aer mrmr-aer, ghaq baq-eu deuq-anr cawba’ni, ngar yawqjeq navluf-euq lafkhoer nawmaf-anr mrmaeq naeq-euq ma. Sanqpaq Yeqsur nae aertaq-euq dawq heudawq-anr khawf noeqkeuv-awq, ‘Bif-eu-aq, za-eu navmaqtser guiqlanq huiqdzaeq-eu mae.’ ”

³⁶ Khoerngae, Pawrluv khoerlof-aer aerghaq-awr, pawqtsuif pawqdmq dmq-awr nae, aqyawfmaf dawqtawvluf naeq-aer guiqlanq shar-euq mae.

³⁷ Khoernar-aq, aqyawfmaf dawqtawvluf yawkhav-aer ngoerngoer-aer, Pawrluv-euq kawqlanr-anr byarcuf-awr maeqsaw saw-euq mae.

³⁸ Aqkar nar-aq, nawmaf, ngaq-euq myavpyawq-anr maqpar ya’mawr-a laer Pawrluv nae aer-euq dawq khoerdawq-euq baqda’nae, aqyawfmaf noeqshaq duidui-eu mae. Khoernar-aq, aqyawfmaf, Pawrluv-anr lawq-anr sheuqur naeq-ir-euq mae.