Gʼaˬkʼehˇ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yawshawr Saflar Zafka Le-euq

¹ Beqdeqgordeq yawbui bui-eu arnan keuvlar ngae, aqyawfmaf dawqtawvluf nuima tiqgar gm-awr, tiqgar taef-aer uiqler taq-awr jawrluf-eu mae.

² Khoerngae, japyuqni jaqlaer laerma baw-eu tersar lof-aer, mq-anr nae yawkhav-aer manrdov lef-awr, aqyawfmaf nuirluf-eu nymr nymrlan-aer tersar khoer byanluf-eu mae.

³ Khoernar-aq, aqyawfmaf jawr-eu gar, miqdzaq dofluf-eu maeqlar larcaeq lof-aer dur-eu miqdzaq miqlmr dovle-awr, aqyawf ghaq aqyawf-euq khoertav birkhawq ghae-awr naqler taq-awr jav-eu gar ya’mawr-euq mae.

⁴ Khoerngae, aqyawfmaf yawqghaq navluf-anr Yawshawr Saflar byanle-awr, Yawshawr Saflar nae bingaeq-euq lof-aer, danqbae-awr nuijeq-euq dawq-anr nae dawqbav bav-eu mae.

⁵ Khoerngae, Miqyaer-anr yawzeu baw-eu Yurdav tsawrhaq deuq, mq-euq uqmov jav-eu mirkhanq yawqkhanq navluf-anr nae Yeqlursaqlaeq-anr lartaq-euq mae.

⁶ Tersar khoer manrdovlef ngae, tsawrhaq armaf mafma uiqlar-awr, aqyawfmaf ngaeqluf-eu dawq khoer, yawqha-euq jawrkhanq-anr ngaeq-eu dawqkawq lof-aer yawqha-anr gaqlar-eu mirnae, aqyawfmaf noeq maqdov-a.

⁷ Aqyawfmaf noeq maqdov-aer zanq duidui ler-eu lafkhoer tiqghaq tirghaq heulof-aer aer-eu mae: “Hawsher-eq, dawq ngaeqluf-eu teudeuq dawqtawvluf Gaqliqlaer-euq tsawrhaq maqngeur-a lor?

⁸ Tox-aer ngeur nar-aq, yawqha-euq jawrkhanq-anr ngaeq-eu dawqkawq aqdui-anr aqjox-aer gaqlar-eu nya?

⁹ Aqdui maf-aq, Baqtir mirkhanq, Miqdir mirkhanq, Erlamq mirkhanq hawr-eu Meqsoqpoqtaqmir mirkhanq-anr jawr-eu tsawrhaq, Yurdav mirkhanq, Gaqbaqdawrciv mirkhanq, Boqtuv mirkhanq, Aqsir mircoer,

¹⁰ Puqgir mirkhanq, Paqburlir mirkhanq, Irjirtuv hawr-eu Kurleqniq mirkhanq-euq dawqpae jav-eu Lirbyaq mirkhanq-anr jawr-eu tsawrhaq deuq ma. Lormav meuq-anr nae lartaq-euq Yurdav tsawrhaq, Yurdav-euq zanr tawqlar-euq aqcawq tsawrjeuq tsawrca,

¹¹ Gaqlaqdeq tsawrhaq hawr-eu Aqlar tsawrhaq khawf keuq-eu mae. Miqyaer nae muiq duidui-eu gardeuq mr-euq garkawv, aqyawfmaf ngaeq-eu gar aqdui yawqha-euq dawq-anr nae yagaq-euq ma.”

¹² Aqyawfmaf dawqtawvluf zanqler jir-awr, noeq maqdovni pyeuf-ir jir-awr, tiqghaq tirghaq aer-eu, “Heu, aqjeq laer aermawf-eu nga?”

¹³ Tiqpavnav deuq aqjaf jafjaf-aer aer-eu, “Aqyawfmaf aqgaf dzaruir yawshuif dawryaef-euq jeq nga.”

Beqtuvluv Dawqmaeq Maeq-euq

¹⁴ Khoerngae, Beqtuvluv, ghaqkhaer 11 ghaq naeq-aer yawf-awr, tersar yawkhav khav-aer aqyawf maf-anr heulof-aer aernaeq-euq mae: “Yurdav tsawrhaq hawr-eu Yeqlursaqlaeq-anr kharjawr-eu tsawrhaq deuq-or! Garkawv heudeuq nawmaf siqnya paq-aer ghae-eu mae. Ngaq-euq dawq-anr yawmuiq-aer narhaq sher-eq.

¹⁵ Tsawrhaq heudeuq-aq, nawmaf noeq-eu lof-aer aqgaf dzaruir dawryaef-euq maqngeur-a. Aqjeq mirnae aernar-aq, nymq-mr uqshawq paw naqliq ghoeq laf keuvlar-euq taef-a siq.

¹⁶ Aerkhawf, garkawv heu-aq, Miqyaer gharduq ngaeqdan-eu Yorirlav nae aertaq-euq lof-aer pyeuflar-euq mae:

¹⁷ ‘Miqyaer heulof-aer aer-eu mae, “Arsaq saq-eu arnan aryamq keuvle ngae, Shiqshaq khar piluf-eu tsawrhaq-euq khoertav, Ngaq-euq Saflar shaevdavnaeq ma. Nawmaf-euq zaqmiq zaqyo deuq, Miqyaer gharduq ngaeqdan taef-a. Nawmaf-euq zaqguq deuq, mawrle-eu jeq-anr ya’mawr-awr, Nawmaf-euq tsawrmawq tsawrkhavdeuq, yufmav ghawqmya jeq mavmawr taef-a.

¹⁸ Khoerngae yamq-anr, ngaq-euq ghaqzaq ghaqkhaer pyeuf-eu zaqmiq zaqyo deuq-euq khoertav, Ngaq-euq Saflar shaevdav naeq-awr, Aqyawfmaf khawf ngaq-euq gharduq ngaeqdan taef-a.

¹⁹ Mq-euq khoertav zanqler paq-aer ghae-eu jeq ngar bimawr-awr, Mirtsaq-euq khoertav-aq, bisiq bimawr-eu jeq: Shiq dov-awr miqdzaq dof-eu uqtaf, miqkhoeq uvghoeq taq-euq heudeuq-anr bimawr ma.

²⁰ Zawr huiq-awr zawr muiq-eu Sanqpaq Miqyaer-euq arnan maq keuvle-euq minav-aer, Nanrma zanrtsuini pyeuf-ir-awr, Bala khawf shiq lof-aer pyeuf-ir taef-a.

²¹ Khoerngae, Sanqpaq Miqyaer-euq tsawrmyanr-anr kharkur-eu tsawrhaq yabuq-ir taef-a.” ’ (Yil 2:28-32)

²² “Irsaqleqlav tsawrhaq deuq-or! Ngar aer-eu gar narhaq sher-eq. Miqyaer, Naqzaqlaer tsawrhaq Yeqsur-anr ghoe-awr, nawmaf-euq ghanrcae khavjeq-aer ghae-eu jeq, zanqler paq-aer ghae-eu jeq hawr-eu bisiq bimawr-eu jeq bimr-awr, Miqyaer nae nawmaf-euq gharduq sarkir bipyeuf-euq ghaq mae laer nawmaf yawqghaq navluf siqnya-eu lof-aer mae.

²³ Yawbae ngae nae, Miqyaer siqnya-awr noeqtsaev taq-euq lof-aer, Yeqsur, aqcawq-euq aqlaf-euq lafkhoer ya’anr-ir-euq mae. Nawmaf, zanrdawq-anr leur-eu deuq-euq aqlaf-anr ghoe-awr, aqyawf-anr lafyaq-euq khoertav taftaeq-awr saef-euq mae.

²⁴ Aerkhawf, Miqyaer, aqyawf-anr shir-eu jeq-euq shaqzanq-anr nae puirpyaeq naeq-awr, bi ghofdaef lar-euq mae. Aqjeq mirnae aernar-aq, shir-eu jeq aqyawf-anr maq paftawftaq nya-a.

²⁵ Daqbir, aqyawf-euq garkawv heulof-aer aertaq-euq mae: ‘Ngar, aqmyanluf, Sanqpaq Miqyaer-anr ngaq-euq maeqshi jawrluf-eu gar ngar mawr-euq ma. Ngar maqya nyaelarni, aqyawf, ngaq-euq armar paw jawrluf-eu mae.

²⁶ Khoermirnae, ngaq-euq nuima nuikhanr shir-awr, ngaq-euq maeqlar laqkhaq caer-eu dawq ngaeq-eu ma. Khoeruqtaf, ngaq-euq shiqshaq khawf noeqtmq-eu lafkhoer daefluf-eu ma.

²⁷ Aqjeq mirnae aernar-aq, nawr, ngaq-euq saflar, shir-eu mirkhanq-anr maq byaerdzae yaf-aer, Nawq-euq Yawshawr ghaq-anr buf-ir shov-ir gar maqbi keuv-a.

²⁸ Nawr, ngaq-anr daef-eu garma toeqmaeq naeqlaf-euq mae. Nawq-euq maeqshi ngar laqkhaq caer-eu jeq byanlarni, nawr, ngaq-anr janrnaelaf taef-a.’ (Jc 16:8-10)

²⁹ “Aqyuif aqnyir deuq-or! Aqpoeq Daqbir-euq garkawv, ngar, nawmaf-anr dawrcoeni ya’aer nar-aq, aqyawf shir-awr aqyawf-anr bafpanq-euq mae. Khoeruqtaf, aqyawf-euq lmqbymr iqnan keuvni aqduimaf jawr-eu gar javluf-eu mae.

³⁰ Daqbir-aq, Miqyaer gharduq ngaeqdan-eu tiq ghaq pyeuf-eu mirnae, aqyawf-euq mawrdo hawr-eu shiqshaq-anr taf-eu arsiq-euq garkawv, Miqyaer sarjax dzaq-awr kamqtaq-euq lof-aer, aqyawf-euq nuirmanq-anr bi nuirlarni, Miqyaer, Kali-anr bi dovlar-eu garkawv siqnya-eu mae. (Jc 132:11)

³¹ Aqyawf, maeqhu paw pyeuflar-eu garkawv, hawmawr taq-euq mirnae, Kali ghofdaef lar-eu garkawv aer-eu, ‘Shir-eu mirkhanq-euq lafkhoer aqyawf-euq saflar-anr maq byaerdzae yaf-a. Aqyawf-euq mawrdo khawf maqya buf-ir-a.’ (Jc 16:10)

³² Yeqsur heughaq-anr Miqyaer nae bi ghofdaef lar-euq mae. Nga’maf dawqtawvluf garkawv heu-euq gharduq sarkir kamq-eu tsawrhaq ma.

³³ Miqyaer-euq armar paw aqyawf-anr taqhuiq taqmanr-awr, Yawshawr Saflar bif ma laer Miqyaer nae sarjax dzaqtaq-euq lof-aer, aqyawf za-euq mae. Nymq-mr nawmaf yagaq ya’mawr luf-eu lof-aer, aqyawf shaevdav naeqlef-euq mae.

³⁴ “Daqbir mq-euq khoertav maq davler haw-aq. Aerkhawf, aqyawf, yawqha yawqha heulof-aer aer-eu mae, ‘Sanqpaq Miqyaer, ngaq-euq Sanqpaq-anr aernaeq-eu,

³⁵ “Ngar, nawq-anr muir-eu deuq, nawq-euq aqkuir cawqtaqduq maqbi pyeuflar-euq khoerkeuvni, ngaq-euq armar paw nuir-awq.” ’ (Jc 110:1)

³⁶ “Khoermirnae, Irsaqleqlav-euq nymrkhanq yawqkhanq navluf garkawv heu-anr yawmuiq-aer siqduq-awq. Nawmaf nae tafsaef-euq Yeqsur khoerghaq-anr Miqyaer nae Sanqpaq Miqyaer hawr-eu Kali bi pyeuflar ghaq-euq mae.”

Kalizaq Armur Huiqlar-euq

³⁷ Aqyawfmaf, dawq khoerdeuq-anr yagaq ngae, nuima-anr zawler-awr, Beqtuvluv hawr-eu ghaqkhaer nuideuq-anr aernaeq-eu, “Aqyuif aqnyir deuq-or! Nga’maf aqjox-aer yajanr-eu la?”

³⁸ Khoerngae, Beqtuvluv, aqyawf maf-anr heulof-aer aernaeq-euq mae: “Miqyaer, nawmaf-euq iqbax pyaeqnaeqni noeqpov noeqpar-awr, Yeqsur Kali-euq tsawrmyanr-euq uqmov bartirsaq hageuf-awq. Khoerlof-aer janr nar-aq, Yawshawr Saflar-euq lafsawq za taef-a.

³⁹ Aqjeq mirnae aernar-aq, sarjax khoer-aq, aqdui-euq Sanqpaq Miqyaer nae khar kurtaq-euq nawmaf-anr khawf, nawmaf-euq zaqdeuq-anr khawf, garmanr kaq-eu gar jawr-eu tsawrhaq dawqtawv luf-anr khawf dzaqtaq-euq mae.”

⁴⁰ Khoeruqtaf, Beqtuvluv dawq ghawqmya’ni ngaeq-awr, aqyawf sarkir kamq-awr aqyawf maf-anr ghaq bifnaeq-eu, “Nawmaf, nanrpov-aer ghae-eu heuzir-anr yabuq-ir ni laejae-awq.”

⁴¹ Aqyawf nae maeq-euq dawq-anr laqkhaq caertavni hageuf-euq tsawrhaq deuq bartirsaq hageuf-euq mae. Khoerngae nan, zaqlanr 3,000 ghaq aerghaqni lanqlar-euq mae.

⁴² Aqyawfmaf aqmyanluf ghaqkhaer deuq-euq dawqmaeq dawqtsov narhaq-awr, tiqghaq tirghaq cawqcawq taf-eu lafkhoer, kaqmur ngawqpyaeq-awr guiqlanq shartaf-eu mae.

⁴³ Khoernar-aq, guv-eu jeq yawqghaq navluf-euq khoertav keuvle-euq mae. Khoerngae, ghaqkhaer deuq zanqler paq-aer ghae-eu jeq hawr-eu bisiq bimawr-eu jeq ghawqmya jeq mrdov laf-euq mae.

⁴⁴ Jan-eu tsawrhaq dawqtawvluf tiqgar taef-aer jawr-awr, myawq dawqtawvluf tiqkawv lof-aer zmq-euq mae.

⁴⁵ Aqyawfmaf, mirtsaq hawr-eu myawqganq anq-awr, kharmawf-eu ghaq-anr mawf-eu lof-aer daeqbir naeq-euq mae.

⁴⁶ Aqyawfmaf nan-anr nae nuima gm-awr, uqduq tanqnymr nymrma-anr davler-eu uqtaf, kaqmur ngawqpyaeq-awr, laqkhaq tiqcaer nuima jerloni, tiqnymr sair tiqnymr dzaqtaf dawrtaf-eu mae.

⁴⁷ Aqyawfmaf, Miqyaer-anr jaceuq-eu mae. Tsawrhaq dawqtawvluf, aqyawf maf-anr nuikhanr shir-eu mae. Nan-anr nae kakhof-eu jeq za-awr jan-eu tsawrhaq deuq bi lanqlarni, Sanqpaq Miqyaer mrluf-eu mae.