Gʼaˬkʼehˇ 18 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gawrliqtu-anr Maeq-euq

¹ Khoernar-aq, Pawrluv, Aqteq-anr nae dov-ir-awr, Gawrliqtu-anr ir-euq mae.

² Khoergar, Boqtuv mirkhanq-anr daefle-euq Aqgurla laer kur-eu Yurdav tsawrhaq tiq ghaq-anr tanqpuq-euq mae. Yurdav tsawrhaq dawqtawvluf Lormav meuq-anr nae yadov-ir jir-eu mae laer, sanqpaq Gaqlawrdir dawq bif-euq mirnae, aqyawf-euq nymrdanq Birgirla naeq-aer Irdaqliq mirkhanq-anr nae dovle-euq maq myanrlar-aq siq. Pawrluv, aqnyaf dzerzaq-anr dzoer-ir-euq mae.

³ Aqnyaf dzerzaq-aq, saqpar saeqghawv janranq-eu tsawrhaq mae. Pawrluv khawf aqnyaf dzerzaq lof-aer gar aqyawf tiqjeq mr-eu mirnae, Pawrluv, aqyawfnyaf naeq-aer jawr-awr gar mr-euq mae.

⁴ Yurdav tsawrhaq hawr-eu Heqlaqsar tsawrhaq, Kali-anr janlarni, landaw jawrnan yawqnan navluf zanrdawq khawqnymr-euq lafkhoer Pawrluv kurcawq-eu mae.

⁵ Siqlav hawr-eu Tivmorseq, Maqgeqdawrniv mirkhanq-anr nae oekeuv ngae, Pawrluv, muiq-eu Saflar katir-eu mirnae, Yeqsur-aq, Kali mae laer Yurdav tsawrhaq deuq-anr sarkir kamqnaeq luf-eu mae.

⁶ Aerkhawf, tsawrhaq khoerdeuq, aqyawf-anr muir-awr yaeqbawq saerlu-aer aer ngae, Pawrluv, aqyawf-euq paerkhanq byuqkhar-awr aer-eu, “Nawmaf-euq shiq, nawmaf-euq uqduq-euq khoertav jav luf-ur. Ngar-aq, yawshawr ma. Iqnan tafnar-aq, ngar, aqcawq tsawrjeuq tsawrca jawr-eu gar ir ma.”

⁷ Khoernar-aq, aqyawf khoergar nae dov-ir-awr, Miqyaer-anr uqduq tanq-eu Yurtuq laer kur-eu ghaq-euq irkanr ir-euq mae. Aqyawf-euq nymr-aq, zanrdawq khawqnymr-euq dawqpae jav-eu mae.

⁸ Zanrdawq khawqnymr-euq aqyuif geuf-eu Gaqlirpuv laer kur-eu ghaq hawr-eu aqyawf-euq miqsawrzaq yawqghaq navluf, Sanqpaq Yeqsur-anr janlar-euq mae. Gawrliqtu-anr jawr-eu ghawqmya ghaq khawf yagaq-awr janlar-awr, bartirsaq hageuf-euq mae.

⁹ Uqcif pawdzer mawrle-eu lafkhoer, Sanqpaq Yeqsur, Pawrluv-anr heulof-aer aer-eu mae, “Taqguv. Nawr ciqcurni maqjawr-aer ngaeq-awq.

¹⁰ Aqjeq mirnae aernar-aq, ngar, nawq naeq-aer jawr-eu ma. Tiqghaq-iq nawq-anr maq lavtanq maq lavnar lar-ar. Meuq heumeuq-euq lafkhoer ngaq-euq tsawrhaq ghawqmya’ni jawr-eu ma.”

¹¹ Pawrluv khoergar tiq khof uqtaf bala kof siq jawr-awr, aqyawf maf-euq ghanrcae Miqyaer-euq dawq maeqnaeq tsovnaeq-euq mae.

¹² Aqgaqyar mirkhanq-anr Gaqliqoq sanrmrluf ngae, Yurdav tsawrhaq nuima tiqgar gm-awr, Pawrluv-anr muirni turlar-awr, aqyawf-anr yarkhaq dar-eu nuirmanq-anr sheughae-awr,

¹³ aer-eu, “Tsawrhaq heughaq-aq, zanrdawq-anr banq-eu jeq-aer Miqyaer-anr uqduq tanqni, aqcawq-anr gheupyawr luf-eu mae.”

¹⁴ Khoernar-aq, Pawrluv khaqmae mrnga-awr dawq ngaeq-eu laer ghae ngae, Gaqliqoq, Yurdav tsawrhaq deuq-anr heulof-aer aernaeq-euq mae, “Yurdav tsawrhaq deuq-or! Garkawv heu yawlaeq jeq maqngeur nar-aq, zawr banq-eu yawcawv jeq mr-euq ngeur-eu lawnmr-aq, ngar oror-aer nawmaf ja-eu gar narhaq ma.

¹⁵ Aerkhawf, dawqdeuq, tsawrmyanr deuq hawr-eu nawmaf-euq zanrdawq-anr taf-eu garkawv pyeuf-eu mirnae, nawmaf yawqha yawqha hawtser-awq. Heulof-aer ghae-eu garkawv deuq-anr ngar yarkhaq dar-eu ghaq maq geufmawf nya.”

¹⁶ Khoernar-aq, aqyawf, aqyawf maf-anr yarkhaq dar-eu nuirmanq-anr nae taedov ghae-euq mae.

¹⁷ Khoerngae, Heqlaqsar tsawrhaq dawqtawvluf, zanrdawq khawqnymr-euq aqyuif Surdeq-anr tsuvtaeq-awr, yarkhaq dar-eu nuirmanq-euq maeqshi diq-euq mae. Aerkhawf, Gaqliqoq-aq, garkawv khoer aqyawf-anr tiqjeq-iq maqtaf-eu lof-aer jawr-eu mae.

Pawrluv, Aqdirawq-anr Ghof-ir-euq

¹⁸ Pawrluv khoergar ghawqmya nan jawr-euq nar-aq, aqyuif aqnyir deuq-anr ghawqdawq tsaf-awr, lawq-anr dziq-awr Surliv-anr ir-euq mae. Birgirla hawr-eu Aqgurla aqnyaf dzerzaq khawf aqyawf naeq-aer ir-euq mae. Aqyawf nae kamqtaq-euq lof-aer, Geqjeq meuq-anr irkeuv ngae, aqyawf uqjaev jaev-euq mae.

¹⁹ Aqyawfmaf, Erpersu-anr irkeuv-awr, aqnyaf dzerzaq-anr khoergar bi jawryaf-euq mae. Pawrluv-aq, zanrdawq khawqnymr-anr urler-awr, Yurdav tsawrhaq deuq naeq-aer jasawx-euq mae.

²⁰ Khoerngae, aqcawq, aqyawf-anr uicuiv tiqkhaeq jawrnaeq laf-awq laer shar-eu khawf, aqyawf maq jawrnaeq-aq.

²¹ Aerkhawf, aqyawf, aqyawf maf-anr ghawq-ir ngae aer-eu, “Ngar khar ghaenya-eu lof-aer Yeqlursaqlaeq-anr yawbui jav-eu gar ya irkeuv-a. Aerkhawf, Miqyaer nuima tsaq nar-aq, ngar, nawmaf jawr-eu gar par ghoflar ma.” Khoernar-aq, aqyawf, lawq-anr dziq-awr Erpersu-anr nae dov-ir-euq mae.

²² Pawrluv, Gaersaqlir-anr irkeuv-awr, khoergar nae ledav-awr, Kalizaq armur-anr dawqcawq puqnaeq-awr, Aqdirawq-anr le-euq mae.

²³ Pawrluv khoergar tiqkhaeq jawr-euq nar-aq dov-ir-awr, Gaqlaqtiv hawr-eu Puqgir mirkhanq tiqgar sair tiqgar ir-awr, zaqlanr dawqtawv luf-anr ghaq bif-euq mae.

Aqpawrluv, Guiqlanq-euq Gar Mr-euq

²⁴ Khoerngae, Aqleqsaqdur meuq-anr daefle-euq Aqpawrluv laer kur-eu Yurdav tsawrhaq tiq ghaq, Erpersu-anr oekeuv-euq mae. Aqyawf-aq, dawq zawr ngaeqnya-awr, Yaerbof siqnya duidui-eu mae.

²⁵ Tsawrhaq heughaq-aq, Sanqpaq Miqyaer-euq garkawv yadzaw-awr, nuima keuv duidui-eu lafkhoer, Sanqpaq Miqyaer-euq garkawv marjawvni maeqnya-awr aernya-eu mae. Aerkhawf, aqyawf-aq, Yorhaq-euq bartirsaq-anr siqnya-eu taef mae.

²⁶ Aqyawf, zanrdawq khawqnymr-euq lafkhoer, danqbae-awr nuima khaqduqni maeq-eu mae. Birgirla hawr-eu Aqgurla aqnyaf dzerzaq, aqyawf maeq-eu dawq yagaq ngae, aqyawf-anr kurceuv dov-awr, Miqyaer-euq garkawv marjawvni yawmuiq-aer, aqyawf-anr maeqnaeq-euq mae.

²⁷ Aqyawf, Aqgaqyar mirkhanq-anr irtsaev mawf-eu mirnae, khoergar jawr-eu zaqlanr deuq aqyawf-anr bi ha’ni, ghaq bif-eu laer aqyuif aqnyir deuq nae sanqbof bofanr ghae-euq mae. Aqyawf khoergar irkeuv ngae, Miqyaer-euq guiqlanq yawdzanr-euq baqda’nae, janlar-euq tsawrhaq deuq-anr yawkhav-aer cawba naeq-euq mae.

²⁸ Aqjeq mirnae aernar-aq, Yeqsur-aq, Kali mae laer Yaerbof panpan-aer tsawrhaq dawqtawv luf-euq maeqshi, Yurdav tsawrhaq naeq-aer tsawrpyaer pyaer ngae, aqyawf pyaerghaq nya-eu mae.