Gʼaˬkʼehˇ 17 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tersaqlorni-anr Maeqjan-euq

¹ Khoerngae, Pawrluv hawr-eu Siqlav, Aqpirbawrlir meuq hawr-eu Aqpawrlawrnir meuq-anr canpav ghae-awr, Tersaqlorni-anr oekeuv-euq mae. Khoergar, Yurdav tsawrhaq-euq zanrdawq khawqnymr jav-eu mae.

² Khoernar-aq, aqmyanmyan lof-aer, Pawrluv, zanrdawq khawqnymr-anr urler-euq mae. Landaw jawrnan ngae nan smq jaw byanni Yaerbof-anr ghoeghoe-aer aqyawfmaf naeq-aer jasawx-euq mae.

³ Kali-aq, shaqzanq yadaq-awr, shir-euq gar nae ya ghofdaeflar mae laer aershaw-awr ja’mawr naeq-eu lafkhoer aer-eu, “Ngar, nawmaf-anr dawqmaeq maeqluf-eu Yeqsur heughaq-aq Kali mae.”

⁴ Aqyawf maf-euq lafkhoer tiqpavnav deuq-anr maeqjan-awr, Pawrluv hawr-eu Siqlav-anr gawflar-euq mae. Miqyaer-anr guv-eu Heqlaqsar tsawrhaq armaf mafma hawr-eu, myavpyawq narmaer jav-eu zaqmiq aqbur deuq khawf yawmyaq mae.

⁵ Aerkhawf, maqjan-eu Yurdav tsawrhaq deuq myavnav nav-eu mirnae, povka laevkawv kharngeur-eu gar jawr-eu tsawrdoer deuq-anr dae’uiq-awr, meuq khoermeuq bi luiqgha lar-euq mae. Aqyawfmaf, Yaqsoq-euq nymr-anr tanqur lef-awr, Pawrluv hawr-eu Siqlav-anr tsawrhaq khoermyav ni-euq maeqshi gheudov-eu laer pov-euq mae.

⁶ Aerkhawf, aqyawf nyaf-anr maq povmawr nya-eu mirnae, Yaqsoq hawr-eu aqyuif aqnyir tiqpavnav deuq-anr gheu-awr meuq-anr uvlanr-eu deuq jawr-eu gar lekeuv ngae, heulof-aer gurgur-aer aer-eu mae, “Mirtsaq povlav par-eu tsawrhaq deuq, heugar khawf oekeuv taq-euq ngar-a.

⁷ Yaqsoq, aqyawf maf-anr hageuf-euq mae. Aqyawfmaf, Yeqsur laer kur-eu sanqpaq nuighaq jawr-eu mae laer aer-awr, aqyawfmaf dawqtawvluf sanqpaq Gaersaq-euq zanrtaq khoftaq-anr mrbanq-euq mae.”

⁸ Dawq khoerdawq-anr yagaq ngae, tsawrhaq armaf deuq hawr-eu meuq-anr uvlanr-eu deuq, nuima maqsarni pyeuflar-euq mae.

⁹ Khoerngae, aqyawfmaf, kamq-eu gharduq pyur yurghaq-euq nar-aq, Yaqsoq hawr-eu cawqdeuq-anr pyaeqnaeq-euq mae.

Beqlir Meuq-anr Maeq-euq

¹⁰ Khoernar-aq, uqcif cifle ngae, aqyuif aqnyir deuq tiqpov taef-aer, Pawrluv hawr-eu Siqlav-anr Beqlir meuq-anr khaerghae-euq mae. Aqyawfnyaf khoergar irkeuv ngae, Yurdav tsawrhaq-euq zanrdawq khawqnymr-anr urler-euq mae.

¹¹ Khoergar jawr-eu tsawrhaq deuq-aq, Tersaqlorni meuq-anr jawr-eu tsawrhaq deuq navmaqtser sharnoeq nya-awr, aqyawfmaf laeqhmqdan taq-euq lafkhoer, Miqyaer-euq dawq-anr hageuf-eu mae. Garkawv khoerdeuq tsaq nga laq maqtsaq nga laq laer yasiqni, yawqnan navluf Yaerbof-anr povtserhaw luf-eu mae.

¹² Khoermirnae, aqyawf maf-euq lafkhoer ghawqmya ghaq Kali-anr janlar-euq mae. Myavpyawq narmaer jav-eu Heqlaqsar-euq zaqmiq aqbur deuq khawf, zaqyo aqli deuq khawf ghawqmya’ni janlar-euq mae.

¹³ Aerkhawf, Pawrluv, Beqlir meuq-anr Miqyaer-euq dawq maeqluf-eu mae laer Tersaqlorni-anr jawr-eu Yurdav tsawrhaq deuq yasiq ngae, khoergar khawf oe-awr, tsawrhaq armaf mafma-anr lavteuv-euq mae.

¹⁴ Khoerngae, aqyuif aqnyir deuq, Pawrluv-anr iqmalavshav-euq lawrdzer paw yawkawr-aer bi’ir-euq mae. Aerkhawf, Siqlav hawr-eu Tivmorseq-aq, khoergar jawryaf-euq mae.

¹⁵ Khoernar-aq, Pawrluv-anr sheuqha-ir-euq deuq, Aqteq-anr keuvni sheuqha keuv-ir-euq mae. Siqlav hawr-eu Tivmorseq-anr aqyawf jawr-eu gar yawkawr-aer oe laer, dawq bif-awr nae bi ghofler-euq mae.

Pawrluv, Aqteq-anr Maeq-euq

¹⁶ Pawrluv, Aqteq-anr jawr-awr, aqyawf nyaf-anr dawqluf ngae, meuq meuqlanni tanqpanq aqma mawrkawr byanluf-eu gar ya’mawr-awr, saflar maqsarni pyeuflar taq-euq mae.

¹⁷ Khoermirnae, aqyawf, zanrdawq khawqnymr-euq lafkhoer, Yurdav tsawrhaq hawr-eu Miqyaer-anr uqduq tanq-eu aqcawq tsawrjeuq tsawrca naeq-aer jasawx-eu uqtaf, yawqnan navluf povka laevkawv-anr khar mawrle-euq tsawrhaq naeq-aer jasawx-euq mae.

¹⁸ Khoerngae, Erpirgurlu armaf hawr-eu Saqtovif armaf-euq tsawrganr siqzaq deuq khawf, Pawrluv naeq-aer jasawx-euq mae. Khoerngae, tiqpavnav deuq aer-eu, “Heugar maqloev maqlawv-aer tortor-aer can-eu heughaq aqjeq aermawf-eu nga?” Pawrluv, Yeqsur-euq garkawv hawr-eu ghofdaef lar-euq garkawv maeq-eu mirnae, tiqpavnav deuq aer-eu, “Aqyawf-aq, yawqkhanq yawqmir yawq-euq miqyaer deuq-euq garkawv maeq-eu lof-aer dur nga.”

¹⁹ Khoerngae, aqyawfmaf, Pawrluv-anr Aqleqorpaqgur gawqjawq-anr sheuqdav lef-awr heulof-aer aernaeq-euq mae, “Nawr ngaeqluf-eu dawqmaeq dawqtsov yawshuif teu, nga’maf-anr khawf bisiq naeqlafnya mae lor?

²⁰ Nawr, nga’maf-euq naqbawr maq gaqhaw-euq jeq ngaeq-eu mirnae, nga’maf garkawv heudeuq-euq dawqtsuif siqnya’mawf mir-a.”

²¹ Aqteq tsawrhaq hawr-eu khoergar jawr-eu daqyan deuq dawqtawvluf, nuijeq tiqjeq-iq-euq gharduq aryamq maqzmq-aer, maq gaqhaw-euq garkawv yawshuif jeq ja-awr, narhaq-eu gar taef-aer aryamq zmq-eu mae.

Pawrluv, Aqleqorpaqgur-anr Maeq-euq

²² Khoerngae, Pawrluv, Aqleqorpaqgur gawqjawq-euq ghanrcae yawf-awr heulof-aer aer-eu mae, “Aqteq-euq tsawrhaq-or! Nawmaf yawqdzer dzaq-anr navluf uqduq tanq-eu zanr-anr taqhuiq duidui-eu nga laer ngar ya’mawr-euq ma.

²³ Aqjeq mirnae aernar-aq, ngar doedoe-aer can-awr, nawmaf uqduq tanq-eu jeq-anr haw ngae: NGA’MAF MAQ SIQNYA-EU MIQYAER-EUQ GHARDUQ laer bofmyanq taq-euq lawrduq tiq tsanr-anr ngar mawr-euq ma. Khoermirnae, nawmaf maq siqnya-eu khawf uqduq tanqluf-eu Miqyaer heughaq-euq garkawv, ngar, nawmaf-anr ja’maeqnaeq mawf mir-a:

²⁴ “Mirtsaq hawr-eu mirtsaq-euq khoertav kharjawr kharjav-eu yawqjeq navluf-anr bae-euq Miqyaer-aq, mq hawr-eu mir-euq Yawsanr ghaq pyeuf-eu mirnae, tsawrhaq-euq aqlaf nae tsov-euq uqduq tanqnymr-anr jawr-eu maqngeur-a.

²⁵ Aqyawf tiqjeqpaq mawf-eu lof-aer, tsawrhaqzaq-euq aqlaf nae lawr-euq gar ghoe-eu maqngeur-a. Aqjeq mirnae aernar-aq, aqyawf-aq, tsawrhaq dawqtawv luf-anr daef-eu jeq, saf hawr-eu yawqjeq navluf bif-eu ghaq pyeuf-eu mae.

²⁶ Aqyawf, tsawrhaq tiq ghaq-euq shiq-anr nae taef-aer, mirkhanq-euq tsawrjeuq tsawrca dawqtawv luf-anr bae-euq khoer-aq, mirtsaq tanqkhawr doeni bijawr-eu gharduq mae. Aryamq arlaw hawr-eu yajawr-eu mirkaq khawf, ardanqbae ngae nae noeqtsaev taq-euq mae.

²⁷ Khoer-aq, tsawrhaqzaq noeqtmq-eu lafkhoer, aqyawf-anr ya sawvhaw-awr ya’mawrni, Sanqpaq Miqyaer-anr bi sharpov-eu gharduq mae. Miqyaer-aq, aqdui yawqghaq navluf-anr nae, garmanr maqkaq gar jawrluf-eu mae.

²⁸ Aqjeq mirnae aernar-aq, aqdui, aqyawf-euq lafkhoer daef-awr, luvlav mrluf-eu uqtaf, yawdaef daefluf-eu ma. Nawmaf-euq zaqnyiq zmqdawq siqzaq tiqghaqnav nae aertaq-euq lof-aer, ‘Aqdui khawf Miqyaer-anr nae jeuqle ovle-euq tsawrhaq ma.’

²⁹ Khoermirnae, aqdui, Miqyaer-anr nae jeuqle ovle-euq ngeur nar-aq, Miqyaer-euq pyeufghaer-aq, tsawrhaq nae noeqdov-awr janrtaq-euq pyur, shuir, khaqlo-euq mawrkawr, heudeuq-anr dur taef-a laer noeq-eu maqtsaq-a.

³⁰ Dzeurlaf ngae, tsawrhaq nae maq siqnya-aer mr-euq deuq-anr Miqyaer hawdzeur-euq mae. Aerkhawf, nymq-mr yawqgar navluf jawr-eu tsawrhaq dawqtawvluf noeqpov noeqpar-awq laer dawq bif-euq mae.

³¹ Aqjeq mirnae aernar-aq, aqyawf nae aryaq biftaq-euq ghaq-anr ghoe-awr, mirtsaqzaq-anr tsaq-awr dawr-eu lafkhoer aqyawf yarkhaq dar-eu laer nanpax paxtaq-euq mae. Aqyawf-anr shir-euq gar nae bi ghofdaef lar-euq gar ghoe-awr, Miqyaer nae khoerghaq-anr aryaq biftaq-euq mae laer tsawrhaqzaq dawqtawv luf-anr yawduq baw-eu jeq bifnaeq-euq mae.”

³² Khoerngae, aqyawfmaf shir-euq gar nae ghofdaef lar-euq garkawv yagaq-awr, tsawrhaq tiqpavnav deuq, aqyawf-anr aqjaf jaf-eu mae. Aerkhawf, tiqpavnav deuq aer-eu, “Nawr garkawv teu ja-eu gar nga’maf yawqpovyawq par narhaq taef-a.”

³³ Khoernar-aq, Pawrluv, aqyawf maf-euq ghanrcae-anr nae dov-ir-euq mae.

³⁴ Aerkhawf, heumyav ghaq, Kali-anr janlar-awr, aqyawf-anr gawfler-euq mae. Tsawrhaq khoerdeuq-euq lafkhoer, Aqleqorpaqgur armaf-anr taf-eu Daqyawrnaqsir laer kur-eu tiq ghaq keuq-awr, Daqmaqlir laer kur-eu zaqmiq aqbur tiq ghaq hawr-eu nuideuq khawf keuq-eu mae.