Gʼaˬkʼehˇ 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tivmorseq, Pawrluv Naeq-aer Ir-euq

¹ Khoerngae, Pawrluv, Deqbeq hawr-eu Lurdaqlar-anr oekeuv-euq mae. Khoergar Tivmorseq laer kur-eu zaqlanr tiq ghaq jawr-eu mae. Aqyawf-aq, janlar-euq Yurdavma tiq ghaq-euq zaqyo mae. Aerkhawf, aqyawf-euq aqda-aq, Heqlaqsar tsawrhaq mae.

² Lurdaqlar meuq-anr hawr-eu Irgawrnir-anr jawr-eu aqyuif aqnyir deuq, aqyawf-anr jaceuq-eu mae.

³ Pawrluv, Tivmorseq-anr sheuqcawghae mawf-eu mirnae aqyawf-anr bawkhov maeqdzaq bi yaeqler-euq mae. Aqjeq mirnae aernar-aq, Tivmorseq-euq aqda-aq, Heqlaqsar tsawrhaq mae laer khoergar jawr-eu Yurdav tsawrhaq dawqtawvluf siqnya-eu mae.

⁴ Aqyawfmaf tiqmeuq sair tiqmeuq-anr irluf ngae, Yeqlursaqlaeq-anr jawr-eu ghaqkhaer deuq hawr-eu aqyuif aqtsu deuq nae bawqdzaqtsaev taq-euq zanrtaq khoftaq khoer, zaqlanr deuq bi mrcaw-eu gharduq maeqnaeq-euq mae.

⁵ Khoermirnae, Kalizaq armur deuq, jan-eu paw ghaq khavlar-awr, nan-anr nae tsawrhaq myaqlar luf-eu mae.

Maqgeqdawrniv Tsawrhaq Kur-eu

⁶ Khoerngae, Aqsir mircoer-anr Yaerdawq maqbi maeqni Yawshawr Saflar lavtsoeq-eu mirnae, aqyawfmaf, Puqgir hawr-eu Gaqlaqtiv mirkhanq irpav ghae-euq mae.

⁷ Aqyawfmaf, Mursir mirkhanq-euq mirkaq-anr irkeuv ngae, Beqturnir mirkhanq-anr urler-eu laer laejae-euq khawf, muiq-eu Saflar lavtsoeq-eu mae.

⁸ Khoermirnae, aqyawfmaf, Mursir mirkhanq irpav ghae-awr nae Daqlor-anr irkeuv-euq mae.

⁹ Uqcif pawdzer, Pawrluv-anr mawrle-euq lafkhoer, Maqgeqdawrniv tsawrhaq tiq ghaq yawfle-awr Pawrluv-anr shar-eu, “Maqgeqdawrniv mirkhanq-anr lar-awr, nga’maf-anr cawba lar-awq.”

¹⁰ Pawrluv mawrle-eu lafkhoer khoerlof-aer ya’mawr-euq nar-aq, Sanqpaq Miqyaer, aqyawf maf-anr guiqlanqdawq maeqnaeqler laer nga’maf-anr, kur-eu ngar-a laer noeqjir-awr, nga’maf, Maqgeqdawrniv mirkhanq-anr yawkawr-aer lenya’ni laeqhmq-euq ma.

Luqdir, Yeqsur-anr Janlar-euq

¹¹ Nga’maf, lawq-anr dziq-awr, Daqlor-anr nae Saqmoqdaqlaer irjawlanr-anr dawrcoeni ir-awr, nishawq ngae nan, Naqbawrlir meuq-anr irkeuv-euq ma.

¹² Khoergar nae nar-aq, Pirlirpiv-anr lekeuv-euq ma. Meuq khoermeuq-aq, Maqgeqdawrniv mirkhanq-euq lafkhoer, Lormav tsawrhaq uvlanr luf-eu meuq uqdzan mae. Nga’maf khoergar heumyav nan jawr-euq ma.

¹³ Landaw jawrnan ngae nan, nga’maf meuq-euq lafnyir paw irdov-awr, guiqlanq shar-eu tsawrhaq aqmyanluf guiqlanq shar-ir-eu lawrbaq lawrdzer-anr irkeuv-euq ma. Nga’maf nuir-awr khoergar uiqlar taq-euq zaqmiq aqbur deuq-anr dzoer-awr dawq ngaeqcawq-euq ma.

¹⁴ Khoerngae, Miqyaer-anr uqduq tanq-eu, Tiqyaqdiqlar meuq-anr jawr-euq Luqdir laer kur-eu, nerpuir puir-eu saqpar anq-eu zaqmiq aqbur tiq ghaq, nga’maf ngaeq-eu gar gaq-euq mae. Pawrluv nae ngaeq-euq garkawv deuq-anr yawmuiq-aer narhaqni, Sanqpaq Miqyaer, aqyawf-euq nuima pan-euq mae.

¹⁵ Khoernar-aq, aqyawf hawr-eu aqyawf-euq nymrkhanq-euq zaq dawqtawvluf bartirsaq hageuf-euq mae. Khoerngae, aqyawf shar-eu, “Ngar, Sanqpaq Miqyaer-anr sarjax zif-eu nga laer nawmaf noeq-eu ngeur nar-aq, ngaq-euq nymr-anr davlar-awr yaflar-awq.” Khoermirnae, aqyawf, nga’maf-anr cawqza nya-euq mae.

Pirlirpiv-anr Jawr Ngae Binyaef-euq

¹⁶ Tiqnan, nga’maf guiqlanq sharduq-anr irluf ngae, ja’maw maw-eu naef ur-eu zaqkhav aqbur tiq ghaq, nga’maf-anr tanqpuq lar-euq mae. Aqbur khoerghaq shaevtsaq tsaqnya-eu mirnae, aqyawf-euq yawsanr deuq-anr pyur ghawqmya’ni lavza naeq-euq mae.

¹⁷ Aqbur khoerghaq, Pawrluv hawr-eu nga’maf-euq maeqnan cantae cantae-aer gur-eu, “Tsawrhaq heudeuq-aq, Gor duidui-eu Miqyaer-euq ghaqzaq ghaqkhaer mae. Aqyawf maf-aq, aqdui-anr bibuq-ir-eu garma dawqdzawr mrlar-euq mae.”

¹⁸ Aqyawf khoerlof-aer ghawqmya nan janrkeuv laf-euq mirnae, Pawrluv daevlar taq-awr, narkhan paw ciqpyawr-awr naef khoermawr-anr aernaeq-eu, “Yeqsur Kali-euq tsawrmyanr-euq uqmov, ngar, nawq-anr dawq bif-eu ma. Aqyawf-anr nae dovle-awq.” Khoerngae, tiqpov taef-aer naef khoermawr dovle-euq mae.

¹⁹ Aerkhawf, aqbur khoerghaq-euq yawsanr deuq, aqyawf maf-euq noeqtmqduq pyeuf-eu pyur zakhaeq maqpar jav-eu ngar-a laer ya’mawr ngae, Pawrluv hawr-eu Siqlav-anr nyaef-awr, povka laevkawv, aryaq jav-eu tsawrhaq deuq jawr-eu gar gheughae-euq mae.

²⁰ Aqyawfmaf, aqyawf nyaf-anr yarkhaq dar-eu tsawrhaq jawr-eu gar sheuqkeuv ghae-awr heulof-aer aer-eu mae, “Yurdav tsawrhaq pyeuf-eu tsawrhaq heu nyiq ghaq, aqdui-euq meuq gardzaq garkawv bi dovlarni janrluf-eu mae.

²¹ Aqyawfnyaf, aqdui, Lormav tsawrhaq maq hageuf khmq-aer maq mrkhmq-eu zanr maeqluf tsovluf-eu mae.”

²² Khoerngae, tsawrhaq armaf mafma deuq tiqkawv lof-aer turlar-awr, aqyawf nyaf-anr muir-eu mae. Yarkhaq dar-eu tsawrhaq, aqyawf nyaf-euq maeqtsoeq nyaeflaev-awr, darkawq nae diq-awq laer dawq bif-euq mae.

²³ Aqyawf nyaf-anr ghawqmya laf diq-awr, kuv-anr nyaefur-euq mae. Aqyawf nyaf-anr yawmuiq-aer lofni kuv-euq aqyuif ghaq-anr dawq bif-euq mae.

²⁴ Kuv-euq aqyuif ghaq dawq khoer za-euq lof-aer, aqyawf nyaf-anr kuv-euq lafkhoer lawv-anr nyaefur-awr, aqyawf nyaf-euq aqkuir-anr darkawq manqtawf nae tawftaeq taq-euq mae.

Kuv-euq Aqyuif Ghaq-euq Nymrkhanq Kakhof-eu Jeq Za-euq

²⁵ Aerkhawf, saerghanr caelar ngae, Pawrluv hawr-eu Siqlav guiqlanq shar-awr, Miqyaer-anr jaceuq-eu cardawq carcar-aer jaceuq luf-eu mae. Kuv-anr ur-eu deuq khawf narhaq luf-eu mae.

²⁶ Khoerngae, mirluvluv duidui lar-awr, kuv-euq dawqpaeq-anr keuvni nyaelar-euq mae. Tiqpov taef-aer kuv-euq larghov dawqtawvluf panlar jir-awr, kuv-anr ur-eu tsawrhaq deuq-anr paftaq-euq shmrcav galaev jir-euq mae.

²⁷ Khoerngae, kuv-euq aqyuif ghaq noeqlar-awr, kuv-euq larghov dawqtawvluf pantaq-euq gar ya’mawr ngae, kuv-anr ur-eu tsawrhaq dawqtawvluf caevdov jir-euq jeq nga laer noeq-awr, micaer ghawrdov-awr, yawqhar yawqha saef-eu laer ghae-eu mae.

²⁸ Aerkhawf, Pawrluv tersar yawkhav-aer gur-eu, “Yawqha-euq mawrdo-anr lavtanq lavnar-eu jeq taqjanr. Nga’maf yawqghaq navluf heugar jawrluf ma.”

²⁹ Khoerngae, kuv-euq aqyuif ghaq miqdzaq bi keuqlef-awr, caevur ghae-awr, yawdzuq gan’gan-aer, Pawrluv hawr-eu Siqlav-euq maeqshi gabyav ghae-euq mae.

³⁰ Khoernar-aq, aqyawf, aqyawf nyaf-anr sheuqdov ghae-awr aer-eu, “Saqlaq-or! Ngar yabuq-ir ni aqjeq yajanr-eu la?”

³¹ Khoerngae, aqyawfnyaf aer-eu, “Sanqpaq Yeqsur Kali-anr jan-awq. Nawr hawr-eu nawq-euq nymrkhanq-euq zaq dawqtawvluf yabuq-ir taef-a.”

³² Khoernar-aq, aqyawfnyaf, kuv-euq aqyuif ghaq-anr hawr-eu aqyawf-euq nymr-euq lafkhoer jawr-eu tsawrhaq dawqtawv luf-anr, Sanqpaq Miqyaer-euq dawq ja’naeq-euq mae.

³³ Khoerngae mir, khoerngae yamq-anr, kuv-euq aqyuif ghaq, aqyawf nyaf-anr sheuqghae-awr, aqyawf nyaf-anr bidiq-euq markhaeq-anr tsiqshawr naeq-euq mae. Khoernar-aq, aqyawf hawr-eu aqyawf-euq nymrkhanq-euq zaq dawqtawvluf tiqpov taef-aer bartirsaq hageuf-euq mae.

³⁴ Khoernar-aq, aqyawf nyaf-anr aqyawf-euq irkanr sheuqur-awr, aqyawf nyaf-euq maeqshi dzaqdzaq dawrdawr ciqtaq naeq-euq mae. Miqyaer-anr jan-eu mirnae, aqyawf hawr-eu aqyawf-euq nymrkhanq-euq zaq dawqtawvluf laqkhaqcaer duidui-eu mae.

³⁵ Uqbya byalar ngae, yarkhaq dar-eu tsawrhaq, lofpir-eu kuirlaf deuq-anr khaer-awr heulof-aer bi tsafgaq-ir-euq mae, “Tsawrhaq khoer nyiq ghaq-anr pyaeqnaeq-awq.”

³⁶ Khoerngae, kuv-euq aqyuif ghaq, Pawrluv-anr dawq khoerdeuq heulof-aer aernaeq-euq mae, “Yarkhaq dar-eu tsawrhaq deuq, nawnyaf-anr pyaeqnaeq-awq laer khaerlef-euq nga. Khoermirnae, nymq-mr kuv-anr nae dov-ir-awr, nuisar of-eu lafkhoer ghofler-awq.”

³⁷ Aerkhawf, Pawrluv, aqyawf maf-anr aernaeq-eu, “Nga’nyaf, Lormav tsawrhaq pyeuf-eu khawf, aqyawfmaf, nga’nyaf-anr yarkhaq maqdar-euq minav-aer, aqcawq-euq maeqshi diq-awr kuv-anr biqur naeqlaf-euq mae. Nymq-mr aqyawfmaf, nga’nyaf-anr ciqcurni pyaeq-eu laer ghae-eu la laq? Maqgeuf. Aqyawfmaf, yawqha-euq mawrdo oe-awr, nga’nyaf-anr bi sheuqdov le-awq.”

³⁸ Lofpir-eu kuirlaf khoerdeuq yarkhaq dar-eu tsawrhaq-anr tsafgaq naeqler ngae, aqyawfnyaf, Lormav tsawrhaq mae laer yagaq-awr guv-eu mae.

³⁹ Khoermirnae, aqyawfmaf oe-awr, aqyawf nyaf-anr tanqshar-euq mae. Khoernar-aq, aqyawf nyaf-anr kuv-anr nae sheuqdov-awr, meuq heumeuq-anr nae dov-ir naeqlaf laer shar-eu mae.

⁴⁰ Aqyawfnyaf kuv-anr nae dovle-awr, Luqdir-euq irkanr-anr urler-euq mae. Aqyuif aqnyir deuq-anr ya’mawr ngae, aqyawf maf-anr ghaq bif-awr ghawq-euq mae.