Gʼaˬkʼehˇ 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqlursaqlaeq-anr Bawqdzaq-euq

¹ Khoerngae, Yurdav mirkhanq-anr jawr-eu tsawrhaq tiqpavnav deuq oeka-awr, aqyuif aqnyir deuq-anr maeqnaeq tsovnaeq-eu lafkhoer aer-eu, “Nawmaf, Morseq-euq zanrtaq khoftaq jav-eu lof-aer, bawkhov maeqdzaq maqyaeq nar-aq, maqbuq-ir nya-a.”

² Khoermirnae, Pawrluv hawr-eu Baqnaqbar, aqyawfmaf naeq-aer caecae-aer pyaer duidui-euq mae. Khoernar-aq, garkawv khoer bi narhaq ler-eu laer, Pawrluv, Baqnaqbar hawr-eu aqyawf maf-euq lafkhoer keuq-eu heumyav ghaq-anr tserdov-awr, Yeqlursaqlaeq-anr jawr-eu ghaqkhaer deuq hawr-eu aqyuif aqtsu deuq jawr-eu gar bile-euq mae.

³ Khoerngae, Kalizaq armur aqyawf maf-anr khaerdov-awr bile-euq mae. Aqyawfmaf, Pirnir mirkhanq hawr-eu Saqmaqliv mirkhanq-anr cantsaev-awr, aqcawq tsawrjeuq tsawrca, Miqyaer jawr-eu paw ghoflar-euq garkawv dzawrmaeqnaeq ngae, aqyuif aqnyir dawqtawvluf laqkhaqcaer duidui-eu mae.

⁴ Aqyawfmaf, Yeqlursaqlaeq-anr lekeuv ngae, Kalizaq armur, ghaqkhaer deuq hawr-eu aqyuif aqtsu deuq, aqyawf maf-anr hageuf-euq mae. Khoerngae, Miqyaer, aqyawf nyaf-anr ghoe-awr kharmr kharshar-euq garkawv dawqtawvluf, aqyawf maf-anr dzawrnaeq-euq mae.

⁵ Aerkhawf, Paqliqsaer armur-anr gawf-awr Kali-anr janlar-euq tiqpavnav deuq turlar-awr heulof-aer aer-eu mae, “Aqcawq tsawrjeuq tsawrca deuq bawkhov maeqdzaq yayaeq-awr, Morseq-euq zanrdawq-anr mrcaw-awq laer dawq yabif taef-a.”

Yeqlursaqlaer-anr Maeqbawq Mr-eu

⁶ Khoermirnae, ghaqkhaer deuq hawr-eu aqyuif aqtsu deuq uiqler-awr, garkawv khoer maeqbawq mr-euq mae.

⁷ Garkawv khoer-anr ghawqmyanrni pyaerkeuvlaf ngae, Beqtuvluv turlar-awr aqyawf maf-anr heulof-aer aernaeq-euq mae: “Aqyuif aqnyir deuq-or! Aqcawq tsawrjeuq tsawrca khawf, guiqlanqdawq yagaq-awr janlar nya’ni, yawbae ngae nae aqdui maf-euq ghanrcae, Miqyaer, ngaq-euq khaqmae-anr zmq-eu laer tserdov-euq mae laer nawmaf siqnya-eu mae.

⁸ Tsawrhaq-euq nuima-anr siqnya-eu Miqyaer-aq, aqdui-anr Yawshawr Saflar bifnaeq laf-euq lof-aer, aqcawq tsawrjeuq tsawrca-anr khawf bifnaeq-euq mirnae, Miqyaer, aqyawf maf-anr khawf hageuf-eu nga laer mawrlar-eu mae.

⁹ Miqyaer-aq, aqdui hawr-eu aqyawfmaf laer maq tserpav-a. Jan-eu jeq-anr ghoe-awr nae, Miqyaer, aqyawf maf-euq nuima-anr bimuiq bi shawrlar-euq mae.

¹⁰ Tox-aer mar-iq, nymq-mr nawmaf aqjeq mirnae Miqyaer-anr tsermr haw-eu le? Aqjeq mirnae aqdui-euq aqpoeq deuq hawr-eu aqduimaf khawf maq daqcoer-eu khavbaev, zaqlanr deuq-euq kawqlanr-anr ciqpi naeq-eu le?

¹¹ Sanqpaq Yeqsur Kali-euq guiqlanq yawdzanr-euq baqda’nae, aqdui yabuq-ir taef-a laer aqdui jan-eu ma. Aqyawfmaf khawf khoerlof-aer yabuq-ir taef-a.”

¹² Khoerngae, uiqlar-euq tsawrhaq dawqtawvluf ciqcurni jawr-awr, Baqnaqbar hawr-eu Pawrluv dzawrnaeq-eu gar narhaq luf-eu mae. Miqyaer, aqyawf nyaf-anr ghoe-awr, aqcawq tsawrjeuq tsawrca-euq ghanrcae bisiq bimawr-eu jeq hawr-eu zanqler paq-aer ghae-eu jeq ghawqmya’ni mr-euq garkawv dzawrnaeq-euq mae.

¹³ Aqyawfnyaf dzawrnaeqghaq ngae, Yaqkov heulof-aer aernaeq-euq mae, “Aqyuif aqnyir deuq-or! Ngar aer-eu gar narhaq sher-eq.

¹⁴ Miqyaer, aqcawq tsawrjeuq tsawrca-anr hawle baebae ngae pov, aqyawf maf-euq lafkhoer nae, aqyawf-euq tsawrmyanr-euq uqmov bijawr-eu tsawrhaq deuq-anr tserdov taq-euq mae laer, Sirmoq dzawrnaeqlaf dzeur-euq mae.

¹⁵ Garkawv heu-aq, Miqyaer gharduq ngaeqdan-eu deuq nae aertaq-euq dawq-anr khawf tsaq-eu mae. Yaerbof-euq lafkhoer heulof-aer boftaq-euq mae:

¹⁶ ‘Heudeuq pyeuflar ghaq-euq nar-aq, Ngar ghofle-awr, coq-ir taq-euq Daqbir-euq saqpar saeqghawv tsovparle ma. Pyav-ir shav-ir taq-euq gar ngar lavmuiq-awr, Saqpar saeqghawv khoerghawv-anr khanqtur ma.

¹⁷ Khoerngae, dzerlar-euq tsawrhaqzaq, Sanqpaq Miqyaer-anr sharpovnya taef-a. Ngaq-euq tsawrmyanr-anr ghoe-awr kurtaq-euq aqcawq tsawrjeuq tsawrca dawqtawvluf, Heudeuq dawqtawv luf-anr Sanqpaq Miqyaer nae mr-euq mae laer aer taef-a.’ (Am 9:11-12)

¹⁸ “Miqyaer nae kharmr-euq gar dawqtawvluf, mqmaq maqbyav yarzir-anr nae aqyawf siqnya luf-eu mae.’

¹⁹ Khoermirnae, Miqyaer jawr-eu paw ghoflar luf-eu aqcawq tsawrjeuq tsawrca heudeuq-anr lavshaq naeq-eu maqtsaq-a laer ngar aertsaev ma.

²⁰ Aerkhawf, tanqpanq aqma mawrkawr-anr lawrnaeq-euq maqshawr-eu jeq dzaq-eu, banq-awr khaqmiq sheu-eu, shiq hawr-eu pafsaef-euq jeqzaq dzaq-eu, heudeuq-anr byaer-awq laer aqyawf maf-anr sanqbof bofnaeq-eu tsaq taef-a.

²¹ Aqjeq mirnae aernar-aq, Morseq-euq zanrdawq khofdawq-aq, arhuba nae tiqzir sair tiqzir, meuq yawqmeuq navluf-euq lafkhoer, dawq heudeuq maeqnaeq-eu tsawrhaq jawr-awr, landaw jawrnan yawqnan navluf zanrdawq khawqnymr-euq lafkhoer guimaeq naeqluf-eu mae.”

Yeqlursaqlaeq-anr Bawqtsaev-euq Jeq

²² Khoermirnae, aqyawf maf-euq lafkhoer nae tsawrhaq tserdov-awr, Pawrluv hawr-eu Baqnaqbar naeq-aer Aqdirawq-anr bi’ir ma laer ghaqkhaer deuq, aqyuif aqtsu deuq hawr-eu Kalizaq armur murlan-aer nuikhanr shir-eu mae. Aqyuif aqnyir deuq-euq ghanrcae sheuqghae luf-eu Baqsaqbav laer kur-eu Yurdav hawr-eu Siqlav-anr tserdov-awr bi’ir-euq mae.

²³ Aqyawfmaf nae bof-euq sanqbof-aq, heulof-aer boftaq-euq mae: “Nga’maf, ghaqkhaer deuq, aqyuif aqtsu deuq hawr-eu aqyuif aqnyir deuq, nawmaf, Aqdirawq, Surliv hawr-eu Girlirciv-anr jawr-eu, aqcawq tsawrjeuq tsawrca pyeuf-eu aqyuif aqnyir deuq-anr dawqcawqpuq ma.

²⁴ Nga’maf-euq lafkhoer jawr-eu tsawrhaq tiqpavnav deuq, nawmaf jawr-eu gar oe-awr, ‘Nawmaf zanrdawq-anr ya cantae-awr, bawkhov maeqdzaq yayaeq-eu mae’ laer nawmaf-euq nuima maqsarni bi pyeuflar-awr nuima saflar povpov lavlav-aer bi ghaelar-eu dawq ngaeqle-euq mae laer nga’maf yagaq-euq ma. Tsawrhaq khoerdeuq-anr nga’maf nae khaerlef-euq maqngeur.

²⁵ Khoermirnae, nga’maf tiqgar uiqler-awr tserdov-euq, nga’maf zawr gaq-eu Baqnaqbar hawr-eu Pawrluv, nawmaf jawr-eu gar bi’oe-eu yawmuiq taef-a laer noeq-eu ma.

²⁶ Aqyawf nyaf-aq, aqdui-euq Sanqpaq Yeqsur Kali-euq tsawrmyanr gharduq, yawqha-euq daefzir bifpeuq-euq tsawrhaq mae.

²⁷ Khoermirnae, nga’maf, Yurdav hawr-eu Siqlav-anr khaer-awr bi’oe-euq ma. Nga’maf nae khar boftaq-euq garkawv heu, aqyawf nyaf-euq khaqmae nae dzawrnaeqlaf taef-a.

²⁸ Maq mrkhmq-eu heudeuq maqngeur nar-aq, nawmaf-euq khoertav khavbaev nuijeq maq ciqpi naeq-eu gar Yawshawr Saflar khawf nuima tsaq-awr, nga’maf khawf nuima tsaq-eu ma.

²⁹ Nawmaf maq mrkhmq-eu jeq-aq heudeuq mae, tanqpanq aqma mawrkawr-anr lawrnaeq-euq dzaqdzaq dawrdawr dzaq-eu, shiq dzaq-eu, pafsaef-euq jeqzaq dzaq-eu hawr-eu banq-awr khaqmiq sheu-eu, heudeuq-anr nawmaf maqmr nar-aq muiq duidui-eu mae. Nawmaf nuisar of luf-ur.”

³⁰ Khoermirnae, aqyawf maf-anr bi khaerghae-awr, Aqdirawq-anr irkeuv ngae, tsawrhaq armaf deuq-anr kuruiq-awr, aqyawf maf-anr sanqbof khoertaf bifnaeq-euq mae.

³¹ Aqyawfmaf sanqbof khoertaf-anr guihaw ngae, aqyawf maf-anr ghaq bif-eu garkawv boftaq-euq mirnae, aqyawfmaf laqkhaqcaer duidui-eu mae.

³² Yurdav hawr-eu Siqlav, aqnyaf khawf, Miqyaer gharduq ngaeqdan-eu tsawrhaq pyeuf-eu mirnae, aqyuif aqnyir deuq-anr dawq ghawqmya’ni ngaeqnaeq-eu lafkhoer maeqbawq bif-awr ghaq bi khavlar-euq mae.

³³ Aqyawfnyaf khoergar tiqkhaeq jawr-awr, aqyuif aqnyir deuq nae dawqcawq puqanr laf-euq dawq yur-awr, ghaqkhaer deuq jawr-eu gar bighof-ir-euq mae.

³⁴ Aerkhawf, Siqlav ghaq-aq, khoergar jawryaf-eu yawmuiq nga laer noeqtsaev-euq mae.

³⁵ Pawrluv hawr-eu Baqnaqbar-aq, Aqdirawq-anr jawr-awr, aqcawq ghawqmya ghaq naeq-aer gm-awr Sanqpaq Miqyaer-euq dawq maeqnaeq tsovnaeq-awr, dawqmaeq maeq-euq mae.

Pawrluv Hawr-eu Baqnaqbar Ghawq-ir-euq

³⁶ Arnan aryamq uicuiv myanrlar ngae, Pawrluv, Baqnaqbar-anr aernaeq-eu, “Arnyaf nae Sanqpaq Miqyaer-euq dawq maeqyaf-euq meuq yawqmeuq navluf-anr ghofkhof-ir-awr, aqyuif aqnyir deuq aqjox-aer pyeufluf-eu nga laer haw-ir kar-eur.”

³⁷ Khoerngae, Baqnaqbar-aq, Maqkuv laer kur-eu Yorhaq-anr khawf sheuqghae ma laer noeqtsaev-euq mae.

³⁸ Aerkhawf, dzeurlaf ngae, aqyawfmaf, Paqburlir mirkhanq-anr jawr ngae, aqyawfnyaf naeq-aer gar maqmr-ir ni ghawq-ir-euq tsawrhaq-anr sheuqghae-eu maqtsaq-a laer, Pawrluv pyaer-eu mae.

³⁹ Khoermirnae, aqyawfnyaf yawkaq yawkhav-aer jadzaq-awr, tiqghaq tiqpaw-aer ghawq-ir-euq mae. Baqnaqbar-aq, Maqkuv sheuq-awr nae, Gurbaqlur irjawlanr-anr lawq-anr dziq-awr ir-euq mae.

⁴⁰ Aerkhawf, Pawrluv-aq, Siqlav-anr tser-awr, aqyuif aqnyir deuq nae Miqyaer-euq guiqlanq yawdzanr-euq lafkhoer bi a’naeq ghaq-euq nar-aq, sheuq-awr dov-ir-euq mae.

⁴¹ Aqyawf, Surliv hawr-eu Girlirciv doedoe-aer, Kalizaq armur deuq-anr ghaq bifbif-aer can-euq mae.