Gʼaˬkʼehˇ 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Baqnaqbar Hawr-eu Sawrluv-anr Khaerdov Ghae-euq

¹ Aqdirawq Kalizaq armur-euq lafkhoer, Miqyaer gharduq ngaeqdan-eu deuq hawr-eu maeqnaeq tsovnaeq-eu deuq jawr-eu mae. Tsawrhaq khoerdeuq-aq, Baqnaqbar, Nirgaq laer kur-euq Surmoq, Kurleqniq mirkhanq-anr jawr-eu Lurgir, mirkhanq-anr uvlanr-eu Heqlor naeq-aer tiqkawv lof-aer huiqlar-euq Maqneq hawr-eu Sawrluv, heudeuq mae.

² Aqyawfmaf, Sanqpaq Miqyaer-anr uqduq tanqtanq-aer dzardzaq sheuqluf ngae, Yawshawr Saflar, aqyawf maf-anr aernaeq-eu, “Ngaq nae aqyawf nyaf-anr kurtaq-awr bi mr-eu laer ghaer-eu gar deuq-anr mrni, ngaq-euq gharduq Baqnaqbar hawr-eu Sawrluv-anr tserpavdov taq-awq.”

³ Khoernar-aq, aqyawfmaf dzardzaq sheuq-awr guiqlanq shar-eu lafkhoer, aqyawf nyaf-euq khoertav aqlaf bafdav naeq-awr khaerdov ghae-euq mae.

Gurbaqlur Irjawlanr-anr Maeq-euq

⁴ Khoermirnae, Yawshawr Saflar, aqyawf nyaf-anr khaer-eu lof-aer, Seqlurgir meuq-anr irka-awr, khoergar nae lawq-anr dziq-awr, Gurbaqlur irjawlanr-anr irghae-euq mae.

⁵ Aqyawfnyaf, Saqlaqmir meuq-anr irkeuv ngae, Yurdav tsawrhaq-euq zanrdawq khawqnymr-euq lafkhoer, Miqyaer-euq dawq maeqnaeq-euq mae. Aqyawfnyaf, Yorhaq-anr-aq, cawba-eu ghaq bigeuf-euq mae.

⁶ Aqyawfmaf irjawlanr-anr cantsaevdov ghae-awr, Baqpur meuq-anr irkeuv ngae, Yurdav tsawrhaq pyeuf-euq Baqyeqsur laer kur-eu mawloq loqnya-awr, Miqyaer gharduq ngaeqdan-eu jaqmyawf tiq ghaq tanqpuq-euq mae.

⁷ Heughaq-aq, zaqsiq tsawrganr zawr anr-eu Seqlaqgir Pawrluv laer kur-eu, irjawlanr-euq meuq-anr sanrmr-eu ghaq naeq-aer jawr-eu mae. Meuq-anr sanrmr-eu khoerghaq, Miqyaer-euq dawq gaqmawf-eu mirnae, Baqnaqbar hawr-eu Sawrluv-anr kur-euq mae.

⁸ Aerkhawf, meuq-anr sanrmr-eu heughaq maqbi janlarni, mawloq loqnya-eu Erlurma laer kur-eu khoerghaq, aqyawf nyaf-anr lavtsoeq luf-eu mae (Erlurma laer aer-eu-aq, mawloq loqnya-eu laer aermawf-eu mae).

⁹ Khoerngae, Sawrluv laer khawf kur-eu Pawrluv-anr Yawshawr Saflar byanle-awr, mawloq loqnya-eu khoerghaq-anr hawtsov taq-awr,

¹⁰ heulof-aer aernaeq-euq mae: “Naef sanqpaq-euq zaqyo-or! Nawr-aq, jaqmyawf hawr-eu maershuir tiqbyanni anr-eu nga. Tsaq-awr dawr-eu dawqtawv luf-anr muir-eu ghaq khawf ngeur nga. Sanqpaq Miqyaer-euq garma yawdawr-anr lavghof-eu nawr maq naqler-eu le siq laq?

¹¹ Nymq-mr Sanqpaq Miqyaer-euq aqlaf nawq-euq khoertav keuvle-awr, nawr myavbaef baef-ir-awr, nanrma-euq yawshaef-anr maq mawrnya’ni tiqkhaeq tiqyamq yajawr taef-a.” Khoerngae, tiqpov taef-aer juqkhoeq lof-aer dur-eu zanrtsuini ghae-eu jeq, aqyawf-euq khoertav keuvle-awr, aqyawf-euq aqlaf-anr nyaeftaeq-awr bi sheuqghae-eu laer, aqyawf jawqlaw jawrlawr-aer tsawrhaq-anr povluf-eu mae.

¹² Khoerlof-aer pyeuflar-euq gar meuq-anr sanrmr-eu khoerghaq ya’mawr ngae, aqyawf, Kali-anr janlar-euq mae. Aqjeq mirnae aernar-aq, Sanqpaq Miqyaer-euq garkawv maeqnaeq-eu gar aqyawf zanq duidui ler-euq mae.

Birsirdir-euq Aqdirawq-anr Maeq-euq

¹³ Pawrluv hawr-eu aqyawf naeq-aer jawr-eu deuq lawq-anr dziq-awr, Baqpur meuq-anr nae Paqburlir mirkhanq Beqlaqgeq meuq-anr irkeuv-euq mae. Khoergar, Yorhaq, aqyawf nyaf-anr nae ghawq-awr Yeqlursaqlaeq-anr ghofler-euq mae.

¹⁴ Khoerngae, aqyawfnyaf, Beqlaqgeq meuq-anr nae dov-ir-awr, Birsirdir mirkhanq-anr jav-eu Aqdirawq-anr lekeuv-euq mae. Landaw jawrnan ngae nan, aqyawfnyaf zanrdawq khawqnymr-anr urler-awr nuir-euq mae.

¹⁵ Zanrdawq hawr-eu Miqyaer gharduq ngaeqdan-eu tsawrhaq deuq-euq sanqbof-anr guighaq ngae, zanrdawq khawqnymr-anr uvlanr-eu deuq aqyawfnyaf jawr-eu gar tsawrhaq khaerghae-awr heulof-aer bi tsafgaq-ir-euq mae, “Aqyuif aqnyir deuq-or! Tsawrhaq heudeuq-anr ghaq bifmawf-eu jeq jav nar-aq bif-awq.”

¹⁶ Khoerngae, Pawrluv turlar-awr, aqlaf bafdir-awr heulof-aer aer-eu mae: “Irsaqleqlav tsawrhaq hawr-eu Miqyaer-anr guv-eu tsawrhaq deuq-or! Narhaq sher-eq.

¹⁷ Irsaqleqlav tsawrhaq heudeuq-euq Miqyaer-aq, aqdui-euq aqpoeq-anr tserdov-awr, Irjirtuv-anr daqyan pyeuf-awr jawr ngae, aqyawf maf-anr ciqhuiq ciqmanr naeq-awr, aqyawf-euq baoq huiq-eu lafdu nae aqyawf maf-anr sheuqdov laf-euq mae.

¹⁸ Khoerngae, 40 khof aerghaqni aqyawfmaf nae bawrtsanq bawrdanr-anr mr-awr shar-euq jeq-anr Miqyaer or-euq mae.

¹⁹ Aqyawf, Kaqnaq mirkhanq-anr jawr-eu tsawrjeuq shif jeuq-anr lavcawv-awr, mirkhanq heukhanq aqyawf maf-anr biof-euq mae.

²⁰ “Khoernar-aq, Miqyaer gharduq ngaeqdan-eu Saqmeuqlav maq dovlar-euq khoer, 450 khof aerghaqni, Miqyaer, aqyawf maf-anr yarkhaq dar-eu tsawrhaq deuq bifnaeq-euq mae.

²¹ Khoernar-aq, aqyawfmaf sanqpaq tiq ghaq shar-eu mirnae, Miqyaer, Beqyaqmiq-euq arjeuq arca Girsav-euq zaqyo Sawrluv-anr aqyawf maf-euq sanqpaq 40 khof bigeuf-euq mae.

²² Khoernar-aq, Miqyaer, Sawrluv-anr yurdzae-awr, Daqbir-anr aqyawf maf-euq sanqpaq bi geuflar-euq mae. Miqyaer, Daqbir-euq garkawv sarkir kamq-eu, ‘Ngar nuima tsaq-eu jeq dawqtawvluf mrbyan-awr, Ngaq-euq nuima-anr cantae-eu tiq ghaq povmawr-euq ma. Aqyawf-aq, Yeqshaer-euq zaqyo Daqbir mae.’ (Jc 89:20; 1Sml 13:14)

²³ Miqyaer nae sarjax dzaqtaq-euq lof-aer, Daqbir-euq aryoeq-euq lafkhoer nae, Irsaqleqlav tsawrhaq-euq gharduq Kakhof-eu ghaq bi dovle-euq khoer-aq, Yeqsur mae.

²⁴ Yorhaq, Yeqsur maqoe-euq minav-aer, noeqpov noeqpar-eu jeq-anr taf-eu bartirsaq-euq garkawv, Irsaqleqlav tsawrhaq dawqtawv luf-anr dawqmaeq maeqnaeq-euq mae.

²⁵ Yorhaq, aqyawf-euq gar mrjirlaf ngae aer-eu, ‘Nawmaf, ngar, aqsur ghaq nga laer noeq-eu le? Ngar-aq, khoerghaq maqngeur. Ngaq-euq maeqnan tiq ghaq oeluf-eu mae. Ngar, aqyawf-euq saeqnawv arcav-anr puir-eu taef khawf maqgeux-a.’

²⁶ “Aqbyaqhaq-euq zaq pyeuf-eu aqyuif aqnyir hawr-eu nawmaf-euq lafkhoer Miqyaer-anr guv-eu tsawrhaq deuq-or! Kakhof-eu garkawv-anr taf-eu dawq heu-aq, nawmaf-anr shaha keuvlef taq-euq mae.

²⁷ Yeqlursaqlaeq-anr jawr-eu tsawrhaq hawr-eu aqyawf maf-euq sanqpaq deuq-aq, aqyawf-anr maq siqnya-eu uqtaf, landaw jawrnan yawqjaw navluf guiluf-eu, Miqyaer gharduq ngaeqdan-eu deuq nae boftaq-euq sanqbof-anr khawf, maq ghovshaw nya-eu mirnae, dawq khoerdeuq byanlarni aqyawf-anr yarkhaq dar-euq mae.

²⁸ Aqyawf-euq lafkhoer yashir paq-aer mrlaeq taq-euq jeq maq povmawr nya-euq khawf, aqyawf-anr saefni Pirlav-anr shar-euq mae.

²⁹ Yeqsur-euq garkawv khar boftaq-euq lof-aer, aqyawfmaf mrbyan ghaq ngae, aqyawf-anr darkawq lafyaq-anr nae bafka-awr, lmqbymr-euq lafkhoer bafanr-ir-euq mae.

³⁰ Aerkhawf, Miqyaer, aqyawf-anr shir-euq gar nae bi ghofdaef lar-euq mae.

³¹ Gaqliqlaer mirkhanq-anr nae Yeqlursaqlaeq-anr keuvni, aqyawf naeq-aer le-euq deuq-anr, aqyawf-euq mawrdo ghawqmya nan bimawr-euq mae. Tsawrhaq khoerdeuq-aq, nymq-mr aqcawq-euq maeqshi aqyawf-euq sarkir kamq-eu tsawrhaq pyeuf-eu mae.

³² Miqyaer nae aqdui-euq aqpoeq deuq-anr sarjax dzaqtaq-euq lof-aer, nga’nyaf, nawmaf-anr laqkhaq caer-eu guiqlanqdawq heu maeqnaeq-eu ma.

³³ Yeqsur-anr bi ghofdaef lar-euq khoer-aq, Miqyaer nae aqyawf maf-euq zaqdeuq pyeuf-eu aqdui-euq gharduq bi byanlar-euq mae. Jaceuq-eu sanqbof deuvma nyif lafkhoer khawf heulof-aer boftaq-euq mae, ‘Nawr-aq, ngaq-euq Zaqyo mae. Iqnan, ngar, nawq-euq Aqda pyeuflar-euq ma.’ (Jc 2:7)

³⁴ Miqyaer, aqyawf-anr shir-euq gar nae bi ghofdaef lar-awr, aqyawf-euq mawrdo tiqjawr-iq maqpar yabuf-ir-eu garkawv, Miqyaer aer-eu, ‘Daqbir-anr bif ma laer ngaq nae aertaq-euq yawduq baw-eu ghawqshaq gaq-eu jeq, ngar, nawmaf-anr bif ma.’ (Isy 55:3)

³⁵ Khoermirnae, Jaceuq-eu sanqbof yawqtsanr yawq-anr paraer-eu, ‘Nawq-euq Yawshawr ghaq-anr buf-ir shov-ir gar maqbi keuv-ar.’ (Jc 16:10)

³⁶ “Aerkhawf, Daqbir-aq, aqyawf-euq zir-anr daef-euq tsawrhaq deuq-euq gharduq, Miqyaer nuima tsaq-eu lof-aer mr-awr yufkhav-euq mae. Aqyawf-anr aqyawf-euq aqpoeq deuq naeq-aer bi bafpanq-awr, aqyawf-euq mawrdo buf-ir-euq mae.

³⁷ Aerkhawf, Miqyaer nae bi ghofdaef lar-euq heughaq-aq, buf-ir gar maqya keuv-aq.

³⁸ Khoermirnae, aqyuif aqnyir deuq-or! Nawmaf heu-anr siqnya-awq. Tsawrhaq heughaq-euq baqda’nae iqbax pyaeq-eu garkawv, nawmaf-anr dawqmaeq maeqnaeq-euq ma.

³⁹ Tsawrhaq heughaq-anr kharjan-eu tsawrhaq yawqghaq navluf, Morseq-euq zanrdawq nae maq mrshawr nya-eu iqbax yawqjeq navluf-anr khawf, mrshawr nya-eu mae.

⁴⁰ Khoermirnae, Miqyaer gharduq ngaeqdan-eu deuq-euq sanqbof-euq lafkhoer aertaq-euq lof-aer, nawmaf-euq khoertav maqya keuvleni yanr-awq:

⁴¹ ‘Nawmaf, aqjaf jaf-eu deuq hawtaq-awq. Zanqler-awr cawv-ir-awq! Aqjeq mirnae aernar-aq, Nawmaf-euq arnan aryamq-euq lafkhoer, ngar tiq jeq mr-eu ma. Nawmaf gar heu-anr tiqjeq ghaenae-iq maqjan-ar, Aqcawq, nawmaf-anr ja’naeq khawf nawmaf maqjan-ar.’ ” (Hbk 1:5)

Guiqlanq Hawr-eu Shaqzanq

⁴² Khoernar-aq, Yurdav tsawrhaq, zanrdawq khawqnymr-anr nae dov-ir dzeur-euq nar-aq, aqkar keuvlar-eu landaw jawrnan ngae nan khawf, dawq heudeuq par maeqnaeqlaf laer aqcawq tsawrjeuq tsawrca deuq shar-eu mae.

⁴³ Tsawrhaq armaf ghawq-ir ngae, Yurdav tsawrhaq hawr-eu Miqyaer-anr guv-eu Yurdav-euq zanr tawqlar-euq tsawrhaq ghawqmya’ni, aqyawf maf-anr maeqnaeq-euq Pawrluv hawr-eu Baqnaqbar-euq maeqnan cantae ghae-euq mae. Aqyawfnyaf, aqyawf maf-anr Miqyaer-euq guiqlanq yawdzanr-euq lafkhoer daefdav lefni maeqjan yaf-euq mae.

⁴⁴ Yawqjaw yawq-euq landaw jawrnan keuvlar ngae, meuq-euq lafkhoer jawr-eu tsawrhaq dawqtawvluf aerghaqni, Miqyaer-euq dawq narhaq-eu laer uiqlar taq-euq mae.

⁴⁵ Aerkhawf, Yurdav tsawrhaq deuq, tsawrhaq armaf-anr ya’mawr ngae, myavnavnav duidui-eu lafkhoer Pawrluv ngaeq-eu gar lavtsoeq-awr, pyaerpyaer-aer yaeqbawq saerlu-aer aernaeq-eu mae.

⁴⁶ Khoermirnae, Pawrluv hawr-eu Baqnaqbar nuima khaqduqni anrlar-awr heulof-aer aernaeq-euq mae: “Miqyaer-euq dawq nawmaf-anr jeqhu maeqnaeq-eu-aq tsaq mae. Aerkhawf, nawmaf, Miqyaer-euq dawq-anr byaerdzae-awr, li-eu maqbawni daef-eu jeq za-eu-aq, yawqha maqgeux-a laer dar-eu mirnae, nga’nyaf, aqcawq tsawrjeuq tsawrca jawr-eu paw ciqpyawr ma.

⁴⁷ Aqjeq mirnae aernar-aq, Sanqpaq Miqyaer, nga’maf-anr dawq heulof-aer biftaq-euq mae, ‘Nawq-euq baqda’nae, mqdzer mirdzer-anr keuvni kakhof-eu jeq za’ni, Aqcawq tsawrjeuq tsawrca-euq gharduq ngar, nawq-anr yawshaef bipyeuf-euq ma.’ ” (Isy 49:6)

⁴⁸ Aqcawq tsawrjeuq tsawrca deuq, dawq khoerdawq-anr yagaq ngae, laqkhaq caertavni Sanqpaq Miqyaer-euq dawq-anr ciqhuiq ciqmanr-eu mae. Li-eu maqbawni daef-eu jeq za-eu gharduq kharbi tserdov taq-euq deuq, Kali-anr janlar-euq mae.

⁴⁹ Khoermirnae, Sanqpaq Miqyaer-euq dawq, mircoer khoercoer-anr gaqdoe-ir-euq mae.

⁵⁰ Aerkhawf, Yurdav tsawrhaq deuq, Miqyaer-anr guv-eu myavpyawq narmaer jav-eu zaqmiq aqbur deuq hawr-eu meuq-euq lafkhoer aqyuif geufluf-eu deuq-anr lavteuv-awr, Pawrluv hawr-eu Baqnaqbar-anr bikhaeq bikhav-awr, aqyawf nyaf-anr mircoer khoercoer-anr nae taedov-euq mae.

⁵¹ Aqyawfnyaf, tsawrhaq khoerdeuq-euq maeqshi, aqkuir-anr laeflar-euq khaqlaer baevkhar yaf-awr, Irgawrnir-anr le-euq mae.

⁵² Khoerngae, zaqlanr deuq laqkhaq caer-eu jeq hawr-eu Yawshawr Saflar tiqbyanni byanluf-eu mae.